ANO ang mahimo naton agod mapahalipay ang Dios? May mahatag bala kita sa iya?— Si Jehova nagsiling: “Akon ang tagsa ka ilahas nga sapat sa kagulangan.” Nagsiling man sia: “Ang pilak akon, kag ang bulawan akon.” (Salmo 24:1; 50:10; Hageo 2:8) Apang, may mahatag kita sa Dios. Ano ini?—

Ginatugutan kita ni Jehova sa pagpili kon bala magaalagad kita sa iya ukon indi. Wala niya kita ginapilit nga himuon ang luyag niya. Hibaluon naton kon ngaa ginhimo kita sang Dios agod makapili kita kon bala magaalagad kita sa iya ukon indi.

Ayhan nahibaluan mo kon ano ang robot. Isa ini ka makina nga nagasunodsunod lamang sa bisan ano nga ginapahimo sang naghimo sa iya. Gani indi makadesisyon ang robot kon ano ang iya himuon. Mahimo kuntani nga himuon kita tanan ni Jehova nga subong sang mga robot. Mahimo kuntani nga himuon niya kita agod magsunodsunod lamang sa luyag niya. Apang wala ina paghimua sang Dios. Nahibaluan mo bala kon ngaa?— Bueno, ang iban nga mga hampanganan subong sang mga robot. Kon paandaron mo ini, ginahimo sini ang gindesinyo sang manughimo nga himuon sini. Nakakita ka na bala sing hampanganan nga subong sina?— Masami nga madali matak-an ang mga tawo sa hampanganan nga ang mahimo lamang amo ang gindesinyo, ukon ginprograma, nga himuon sini. Indi luyag sang Dios nga tumanon naton sia bangod  mga robot kita nga ginprograma sa pag-alagad sa iya. Luyag ni Jehova nga mag-alagad kita sa iya bangod ginahigugma naton sia kag bangod luyag naton nga tumanon sia.

Ano sa banta mo ang ginabatyag sang aton langitnon nga Amay kon ginatuman naton sia bangod luyag naton nga tumanon sia?— Bueno, sugiri ako, ano ang ginabatyag sang imo mga ginikanan sa imo paggawi?— Ang Biblia nagasiling nga ang isa ka maalamon nga anak “nagapasadya sa [iya] amay” apang ang buangbuang nga anak “kalisod sang iya iloy.” (Hulubaton 10:1) Natalupangdan mo bala nga kon ginasunod mo ang imo iloy kag amay, nagakalipay sila?— Apang ano ang ginabatyag nila kon ginalalis mo sila?—

Hunahunaon naton karon ang aton langitnon nga Amay, si Jehova. Ginasugiran niya kita kon paano naton sia mapahalipay. Kuhaa ang imo Biblia kag buksi ini sa Hulubaton 27:11. Ang Dios nagahambal diri sa aton: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” Nahibaluan mo bala kon ano ang buot silingon sang pagyaguta sa iban?— Bueno, mahimo ka yagutaon sang isa ka tawo paagi sa pagkadlaw sa imo kag pagsiling sa imo nga indi mo mahimo ang ginsiling mo nga masarangan mo. Paano ginayaguta ni Satanas si Jehova?— Tan-awon naton.

Dumduma, natun-an naton sa Kapitulo 8 sini nga libro nga luyag ni Satanas nga mangin Numero Uno kag luyag niya nga tumanon sia sang tanan. Si Satanas nagasiling nga ginasimba lamang sang mga tawo si Jehova  bangod hatagan Niya sila sing kabuhi nga walay katapusan kon magsimba sila sa Iya. Sa tapos mahaylo ni Satanas si Adan kag si Eva nga lalison si Jehova, ginhangkat ni Satanas ang Dios. Ginsingganan niya ang Dios: ‘Ginaalagad ka lamang sang mga tawo bangod may makuha sila sa imo. Hatagi lamang ako sing kahigayunan, kag sarang ko mapatalikod sa imo ang bisan sin-o.’

Matuod, indi mabasa sa Biblia ini gid nga mga pulong. Apang kon basahon naton ang kasaysayan ni Job, maathag nga daw amo sini ang ginhambal ni Satanas sa Dios. Importante gid, para kay Satanas kag kay Jehova, kon bala magmatutom si Job sa Dios ukon indi. Buksan naton ang aton Biblia sa Job kapitulo 1 kag 2 agod mahibaluan naton kon ano ang natabo.

Talupangda sa Job kapitulo 1 nga si Satanas didto mismo sa langit sang magtipon ang mga anghel agod makigkita kay Jehova. Gani ginpamangkot ni Jehova si Satanas: “Diin ka maghalin?” Nagsabat si Satanas nga nagapanghulunghulong sia sa duta. Gani namangkot si  Jehova: ‘Natalupangdan mo bala si Job, nga nagaalagad sia sa akon kag wala nagahimo sing malain?’—Job 1:6-8.

Gilayon nga nangatarungan si Satanas. ‘Ginasimba ka lamang ni Job bangod wala gid sia sing mga problema. Kon kuhaon mo ang imo pag-amlig kag pagpakamaayo sa iya, pakamalauton ka niya sa imo nawong mismo.’ Gani nagsabat si Jehova: ‘Sige, Satanas, himua sa iya ang luyag mo himuon, apang indi paghaliti si Job mismo.’—Job 1:9-12.

Ano ang ginhimo ni Satanas?— Ginpakawat niya ang mga baka kag mga asno ni Job kag ginpatay niya ang mga nagaatipan sa sini. Nian nagpangilat, sa amo nagkalamatay ang mga karnero kag ang mga nagaatipan sa sini. Sang ulihi, ginkawat sang mga tawo ang mga kamelyo kag ginpamatay ang mga nagaatipan sa sini. Bilang katapusan, paagi sa bagyo ginguba ni Satanas ang balay nga ginapuy-an sang napulo ka anak ni Job, kag napatay sila tanan. Walay sapayan sini tanan, nag-alagad gihapon si Job kay Jehova.—Job 1:13-22.

Sang makita liwat ni Jehova si Satanas, ginpatalupangod niya nga matutom gihapon si Job. Nangatarungan si Satanas, nga nagasiling: ‘Kon tugutan mo lamang ako nga halitan ang iya lawas, pakamalauton ka niya sa imo nawong mismo.’ Gani gintugutan ni Jehova si Satanas nga halitan ang lawas ni Job apang ginpaandaman sia nga indi pagpatyon si Job.

 Ginsalakay ni Satanas si Job amo nga gintubuan sing hubag ang iya bug-os nga lawas. Mabaho gid ini amo nga wala sing luyag magpalapit sa iya. Bisan gani ang asawa ni Job nagsiling sa iya: “Pakamalauta ang Dios kag manginmatay ka!” Ang mga nagpakunokuno nga mga abyan ni Job nagkari kag labi pa nga ginpagrabe nila ang ginabatyag ni Job sa pagsiling nga pat-od gid nga nakahimo sia sing malain nga mga butang amo nga nag-alabot sa iya ining tanan nga mga problema. Apang, walay sapayan sang tanan nga mga problema kag kasakit nga ginpahanabo ni Satanas kay Job, padayon gihapon nga nag-alagad si Job kay Jehova sing matutom.—Job 2:1-13; 7:5; 19:13-20.

Ano sa banta mo ang ginbatyag ni Jehova sa katutom ni Job?— Nalipay sia bangod nagsiling si Jehova kay Satanas: ‘Tan-awa si Job! Nagaalagad sia sa akon bangod luyag niya.’ Mangin kaangay ka bala ni Job, isa ka tawo nga matudlo ni Jehova subong isa ka halimbawa nga nagapamatuod kay Satanas nga isa ka butigon?— Sa pagkamatuod, isa ka pribilehiyo nga hatagan sing sabat ang pangangkon ni Satanas nga sarang niya mapatalikod ang bisan sin-o gikan sa pag-alagad kay Jehova. Ginkabig gid ini ni Jesus nga isa ka pribilehiyo.

Wala gid pagtuguti sang Daku nga Manunudlo si Satanas nga hayluhon Sia sa paghimo sing bisan ano nga malain. Hunahunaa lamang kon paano nalipay ang iya Amay sa iya halimbawa! Sarang matudlo ni Jehova si Jesus kag sabton si Satanas: ‘Tan-awa ang akon Anak! Nagpabilin sia nga matutom sing bug-os sa akon bangod ginahigugma niya ako!’ Hunahunaa man kon ano nga kalipay ang ginbatyag ni Jesus nga napahalipay niya ang tagipusuon sang iya Amay. Bangod sina nga kalipay, ginbatas ni Jesus bisan gani ang kamatayon sa usok sang pag-antos.—Hebreo 12:2.

Luyag mo bala mangin kaangay sang aton Daku nga Manunudlo kag pahalipayon si Jehova?— Kon amo, padayon nga tun-i kon ano ang luyag ipahimo sa imo ni Jehova, kag pahalipaya sia paagi sa paghimo sini!