HANDURAWA nga ginhatagan ka sing isa ka espesyal nga regalo. Ano ang batyagon mo?— Magapasalamat ka lang bala kag pagkatapos kalimtan na ang isa nga naghatag sini sa imo? Ukon dumdumon mo bala sia kag ang ginhimo niya para sa imo?—

Ginhatagan kita ni Jehova nga Dios sing isa ka espesyal nga regalo. Ginpadala niya ang iya Anak sa duta agod mapatay para sa aton. Nahibaluan mo bala kon ngaa kinahanglan nga mapatay si Jesus para sa aton?— Isa ini ka importante nga butang nga dapat naton mahangpan.

Subong natun-an naton sa Kapitulo 23, nakasala si Adan sang ginlapas niya ang himpit nga sugo sang Dios. Kag napanubli naton ang sala gikan kay Adan, ang amay naton tanan. Gani, ano sa banta mo ang kinahanglan naton?— Kinahanglan naton, sa malaragwayon nga paghambal, ang isa ka bag-o nga amay, nga nagpabilin nga himpit sa iya bug-os nga pagkabuhi sa duta. Sin-o sa banta mo ang subong sini agod mangin amay aton?— Amo si Jesus.

Ginpadala ni Jehova si Jesus sa duta agod mahimo sia mangin amay naton sa baylo ni Adan. Ang Biblia nagasiling: “ ‘Ang una nga tawo nga si Adan nangin isa ka buhi nga kalag.’ Ang katapusan nga Adan nangin isa ka espiritu nga nagahatag sing kabuhi.” Sin-o ang una nga Adan?— Huo, amo sia ang gintuga sang Dios gikan sa yab-ok sang duta. Sin-o ang ikaduha nga Adan?— Si Jesus. Ginapakita ini sang Biblia sa pagsiling: “Ang una nga tawo [si Adan] gikan sa duta kag human sa yab-ok; ang ikaduha nga tawo [si Jesus] gikan sa langit.”—1 Corinto 15:45, 47; Genesis 2:7.

Sanglit ginkuha sang Dios ang kabuhi ni Jesus gikan sa langit kag ginliton ini sa tiyan sang babayi nga si Maria, si Jesus wala makapanubli sing  sala gikan kay Adan. Amo kon ngaa si Jesus isa ka himpit nga tawo. (Lucas 1:30-35) Amo man sini kon ngaa ang isa ka anghel nagsiling sa mga manugbantay sang mga karnero sang matawo si Jesus: “Natawo sa inyo karon ang isa ka Manluluwas.” (Lucas 2:11) Apang, agod mangin aton Manluluwas, ano ang una nga himuon sang lapsag nga si Jesus?— Dapat sia magdaku kag mangin isa ka hamtong nga tawo, kaangay ni Adan. Nian si Jesus mangin ‘ang ikaduha nga Adan.’

Si Jesus, nga aton Manluluwas, mangin aton man “Dayon nga Amay.” Amo sini ang pagtawag sa iya sa Biblia. (Isaias 9:6, 7) Huo, ang himpit nga si Jesus mahimo nga mangin amay naton sa baylo ni Adan, nga nangin di-himpit sang nakasala sia. Gani sarang naton mapili ‘ang ikaduha nga Adan’ nga mangin amay naton. Sa pagkamatuod, si Jesus mismo Anak ni Jehova nga Dios.

Paagi sa pagtuon kon sin-o si Jesus, mabaton naton sia subong aton Manluluwas. Nadumduman mo bala kon gikan sa ano dapat kita luwason?— Huo, gikan sa sala kag kamatayon nga napanubli naton gikan kay Adan. Ang himpit nga kabuhi subong isa ka hamtong nga tawo nga ginhalad ni Jesus para sa aton ginatawag nga gawad. Ginhatag ni Jehova ang gawad agod mapatawad ang aton mga sala.—Mateo 20:28; Roma 5:8; 6:23.

Sa pagkamatuod indi gid naton luyag kalimtan ang ginhimo sang Dios kag sang iya Anak para sa aton, indi bala?— Ginpakita ni Jesus sa iya mga sumulunod ang isa ka pinasahi nga paagi nga makabulig sa aton agod madumduman ang iya ginhimo. Hambalan naton ini.

 Handurawa nga yara ikaw sa isa ka naibabaw nga hulot sang isa ka balay sa Jerusalem. Gab-i na. Si Jesus kag ang iya mga apostoles yara sa lamesa. Sa ibabaw sang lamesa, may sinugba nga kordero, pila ka bilog nga mga tinapay, kag mapula nga alak. Espesyal ang ila pagkaon. Nahibaluan mo bala kon ngaa?—

Ini nga pagkaon magapahanumdom sa ila sang ginhimo ni Jehova mga ginatos ka tuig sang una sang ang iya katawhan, nga mga Israelinhon, mga ulipon sa Egipto. Sadto nga tion ginsugo ni Jehova ang iya katawhan: ‘Mag-ihaw sing isa ka kordero para sa tagsa ka pamilya, kag ipalhit ang dugo sini sa mga bakalan sang ganhaan sang inyo mga balay.’ Nian nagsiling sia: ‘Magsulod kamo sa inyo balay, kag kauna ang kordero.’

 Ginhimo ini sang mga Israelinhon. Sadto man nga gab-i, nag-agi ang anghel sang Dios sa duta sang Egipto. Ginpatay sang anghel ang panganay nga anak sa kalabanan nga mga balay. Apang sang makita sang anghel ang dugo sang kordero sa mga bakalan sang ganhaan, ginlaktawan niya ini nga balay. Sa sini nga mga balay, wala sing kabataan nga napatay. Hinadlukan si Paraon, nga hari sang Egipto, sa ginhimo sang anghel ni Jehova. Gani ginsugo ni Paraon ang mga Israelinhon: ‘Hilway na kamo. Magguwa kamo sa Egipto!’ Nian, ginkarga nila ang ila mga pagkabutang sa mga kamelyo kag mga asno kag naghalin.

Indi luyag ni Jehova nga malipatan sang iya katawhan kon paano niya ginhilway sila. Gani nagsugo sia: ‘Makaisa kada tuig dapat kamo magkaon sing pagkaon nga kaangay sang pagkaon nga ginkaon ninyo karon nga gab-i.’ Gintawag nila ining espesyal nga pagkaon nga Paskuwa. Nahibaluan mo bala kon ngaa?— Bangod sadto nga gab-i ‘ginlaktawan’ sang anghel sang Dios ang mga balay nga napalhitan sing dugo.—Exodo 12:1-13, 24-27, 31.

Ginahunahuna ini ni Jesus kag sang iya mga apostoles sang ginkaon nila ang pagkaon sang Paskuwa. Pagkatapos sini, ginhimo ni Jesus ang isa ka tuman ka importante nga butang. Apang, antes niya ginhimo ini, ginpahalin niya anay ang di-matutom nga apostol nga si Judas. Nian ginkuha ni Jesus ang isa sang nabilin nga mga tinapay, ginpangamuyuan ini, gintipiktipik ini, kag ginpasa ini sa iya mga disipulo. “Kuha kamo, kaon kamo,” siling niya. Nian ginsugiran niya sila: ‘Ining tinapay nagasimbulo sa akon lawas nga ihalad ko kon mapatay ako para sa inyo.’

Masunod nagkuha si Jesus sing isa ka kopa sang mapula nga alak. Pagkatapos makapangamuyo liwat sing pagpasalamat, ginpasa niya ini sa ila kag nagsiling: “Inom kamo gikan sa sini, kamo tanan.” Kag ginsugiran niya sila: ‘Ining alak nagasimbulo sa akon dugo. Sa indi madugay ibubo ko ang akon dugo agod mahilway kamo gikan sa inyo mga sala. Padayon nga himua ninyo ini sa pagdumdom sa akon.’—Mateo 26:26-28; 1 Corinto 11:23-26.

 Natalupangdan mo bala nga nagsiling si Jesus nga dapat ini himuon sang mga disipulo sa pagdumdom sa iya?— Indi na nila dapat pagsaulugon ang pagkaon sang Paskuwa. Sa baylo, sing makaisa kada tuig dapat nila saulugon ining pinasahi nga pagkaon agod dumdumon si Jesus kag ang iya kamatayon. Ini nga pagkaon ginatawag nga Panihapon sang Ginuo. Sa karon masami naton ginatawag ini nga Memoryal. Ngaa?— Bangod ginapahanumdom sini sa aton ang ginhimo ni Jesus kag sang iya Amay, si Jehova nga Dios, para sa aton.

Ang tinapay dapat magpahunahuna sa aton sang lawas ni Jesus. Handa sia nga ihalad ini nga lawas agod makatigayon kita sing kabuhi nga walay katapusan. Kag ano naman ang mapula nga alak?— Dapat ini magpahanumdom sa aton sang balor sang dugo ni Jesus. Mas hamili ini sangsa dugo sang kordero sang Paskuwa sa Egipto. Nahibaluan mo bala kon ngaa?— Ginasiling sang Biblia nga paagi sa dugo ni Jesus sarang mapatawad ang aton mga sala. Kag kon madula na ang tanan naton nga mga sala, indi na kita magmasakit, magtigulang, kag mapatay. Dapat naton hunahunaon ini kon nagatambong kita sa Memoryal.

Dapat bala magkaon ang tanan sing tinapay kag mag-inom sing alak sa Memoryal?— Bueno, ginsingganan ni Jesus ang mga nagkaon kag nag-inom: ‘Mangin bahin kamo sang akon ginharian kag magalingkod kamo sa mga trono sa langit kaupod ko.’ (Lucas 22:19, 20, 30) Nagkahulugan ini nga magakadto sila sa langit agod maghari kaupod ni Jesus. Gani sila lamang nga may paglaum nga maggahom kaupod ni Jesus sa langit ang dapat makig-ambit sa tinapay kag alak.

Apang bisan ang mga wala nagakaon sing tinapay ukon nagainom sing alak dapat magtambong sa Memoryal. Nahibaluan mo bala kon ngaa?— Bangod ginhatag ni Jesus ang iya kabuhi para man sa aton. Paagi sa pagtambong sa Memoryal, ginapakita naton nga wala kita malipat. Nadumduman naton ang espesyal nga regalo sang Dios.