SA NAGLIGAD nga duha ka kapitulo, pila ka tawo ang nabasa naton nga ginbanhaw?— Lima. Pila ang mga bata?— Tatlo. Kag ang ikap-at gintawag nga pamatan-on. Ano sa banta mo ang ginapakita sini?—

Bueno, ginapakita sini nga ginahigugma sang Dios ang mga bata kag mga pamatan-on. Apang banhawon man niya ang madamo pa. Ang mga nakahimo lamang bala sing maayo ang banhawon sang Dios?— Mahimo nga amo sini sa banta naton. Apang, madamo nga mga tawo ang wala gid makatuon sing kamatuoran tuhoy kay Jehova nga Dios kag sa iya Anak. Gani naghimo sila sing malain bangod sayop ang gintudlo sa ila. Sa banta mo ayhan banhawon ni Jehova ang subong sini nga mga tawo?—

Ang Biblia nagasiling: “May pagkabanhaw sang mga matarong kag mga di-matarong.” (Binuhatan 24:15) Ngaa banhawon ang mga tawo nga indi matarong, ukon ang mga tawo nga wala maghimo sing maayo?— Bangod wala gid sila mahatagan sing tion nga makatuon tuhoy kay Jehova kag kon ano ang ginapahimo niya sa mga tawo.

 San-o sa banta mo banhawon ang mga tawo?— Dumduma nga sang napatay si Lazaro, ginsaaran ni Jesus ang iya utod nga si Marta: “Ang imo utod mabanhaw.” Si Marta nagsabat: “Nakahibalo ako nga mabanhaw sia sa pagkabanhaw sa katapusan nga adlaw.” (Juan 11:23, 24) Ano ang buot silingon ni Marta sang nagsiling sia nga banhawon si Lazaro “sa katapusan nga adlaw”?—

Bueno, nabatian ni Marta ang saad ni Jesus: ‘Ang tanan nga yara sa handumanan nga mga lulubngan magaguwa.’ (Juan 5:28, 29) Gani ang “katapusan nga adlaw” amo ang tion nga banhawon ang tanan nga yara sa handumanan sang Dios. Ining katapusan nga adlaw indi isa ka 24-oras nga adlaw. Magalawig ini sing isa ka libo ka tuig. Sa sini nga adlaw, siling sang Biblia, ‘Hukman sang Dios ang katawhan sa duta.’ Lakip sa iya pagahukman amo ang mga ginbanhaw.—Binuhatan 17:31; 2 Pedro 3:8.

Hunahunaa kon daw mangin ano ini ka makalilipay nga tion! Sa sulod sining isa ka libo ka tuig nga tion, minilyon ka tawo nga napatay ang banhawon. Gintawag ni Jesus nga Paraiso ang duog nga banhawan sa ila. Tan-awon naton kon diin makita ang Paraiso kag kon ano ang kahimtangan sa sini.

Mga tatlo ka oras antes napatay si Jesus sa isa ka usok sang pag-antos, ginsambit niya ang Paraiso sa isa ka tawo nga nalansang man sa usok sa tupad niya. Palatyon ini nga tawo bangod sang mga krimen nga nahimo niya. Apang samtang ginapanilagan sini nga kriminal si Jesus kag ginapamatian ang ginasiling tuhoy sa Iya, nagtuo sia kay Jesus. Gani nagsiling ang kriminal: “Dumduma ako kon magsulod ka sa imo ginharian.” Si Jesus  nagsabat: “Sa pagkamatuod ginasiling ko sa imo karon, Mangin kaupod ko ikaw sa Paraiso.”—Lucas 23:42, 43.

Ano ang buot silingon ni Jesus sang ginsiling niya ini? Diin ang Paraiso?— Hunahunaa ini. Diin gid bala sa ginsuguran ang Paraiso?— Dumduma, ginhatagan sang Dios ang una nga tawo, nga si Adan, kag ang iya asawa sing isa ka paraiso nga puy-an nila diri mismo sa duta. Gintawag ini nga hardin sang Eden. May mga sapat sa sini nga hardin, apang wala sila nagapanghalit. Kag may mga kahoy sa sini nga may madamong manamit nga bunga, kag may isa man ka daku nga suba. Matahom gid ini puy-an!—Genesis 2:8-10.

Gani kon mabasa naton nga ini nga kriminal yara sa Paraiso, dapat naton ilaragway sa aton hunahuna ang duta nga ginhimo nga isa ka matahom nga duog puy-an. Magakari bala si Jesus sa duta agod makaupod niya sa Paraiso ang isa ka kriminal anay?— Indi. Nahibaluan mo bala kon ngaa indi mahimo nga mangin diri sia?—

Bangod magahari si Jesus sa langit sa ibabaw sang Paraiso nga duta. Gani magaupod si Jesus sa sini nga tawo sa kahulugan nga banhawon sia ni Jesus gikan sa minatay kag ihatag ang iya mga kinahanglanon. Apang ngaa tugutan ni Jesus ang isa ka kriminal anay nga magpuyo sa Paraiso?— Tan-awon naton kon mahibal-an naton ang sabat.

Antes makighambal ang kriminal kay Jesus, nahibaluan bala niya ang mga katuyuan sang Dios?— Wala. Naghimo sia sing malain bangod wala  niya mahibaluan ang kamatuoran tuhoy sa Dios. Sa Paraiso tudluan sia sang mga katuyuan sang Dios. Nian hatagan sia sing kahigayunan nga pamatud-an nga ginahigugma gid niya ang Dios paagi sa paghimo sang Iya kabubut-on.

Magapuyo bala sa Paraiso nga duta ang tanan nga banhawon?— Indi. Nahibaluan mo bala kon ngaa?— Bangod ang iban nga banhawon magapuyo sa langit upod kay Jesus. Magahari sila kaupod niya sa ibabaw sang Paraiso nga duta. Tan-awon naton kon paano naton nahibaluan ini.

Sang gab-i antes mapatay si Jesus, ginsugiran niya ang iya mga apostoles: ‘Sa balay sang akon Amay sa langit, may madamong puluy-an, kag magalakat ako agod maghanda sing duog para sa inyo.’ Nian ginsaaran sila ni Jesus: “Magakari ako liwat kag batunon ko kamo sa akon kaugalingon, agod nga kon diin ako didto man kamo.”—Juan 14:2, 3.

 Diin nagkadto si Jesus sa tapos sia ginbanhaw?— Huo, nagbalik sia sa langit sa iya Amay. (Juan 17:4, 5) Gani ginsaaran ni Jesus ang iya mga apostoles kag ang iban pa nga mga sumulunod nga banhawon niya sila agod makaupod niya sa langit. Ano ang himuon nila didto upod kay Jesus?— Ang Biblia nagasiling nga ang iya mga disipulo nga may bahin sa “nahauna nga pagkabanhaw” magakabuhi sa langit kag magagahom sa ibabaw sang duta “subong mga hari kaupod niya sa sulod sang isa ka libo ka tuig.”—Bugna 5:10; 20:6; 2 Timoteo 2:12.

Pila ang banhawon sa “nahauna nga pagkabanhaw” kag magagahom upod kay Jesus subong mga hari?— Ginsingganan ni Jesus ang iya mga disipulo: “Indi kamo mahadlok, diutay nga panong, bangod nahamut-an sang inyo Amay nga ihatag sa inyo ang ginharian.” (Lucas 12:32) Eksakto gid ang kadamuon sining “diutay nga panong” nga banhawon agod makaupod ni Jesus sa iya langitnon nga Ginharian. Ginapakita sang Biblia nga “isa ka gatos kag kap-atan kag apat ka libo” ang banhawon gikan sa duta.—Bugna 14:1, 3.

Pila ang magapuyo sa Paraiso nga duta?— Wala ini ginasugid sang Biblia. Apang ginsugo sang Dios sanday Adan kag Eva sang didto pa sila sa hardin sang Eden nga magpanganak sila kag tugbon ang duta. Matuod, wala nila mahimo ini. Apang pat-uron sang Dios nga matuman ang iya katuyuan nga matugob ang duta sing maayo nga mga tawo.—Genesis 1:28; Isaias 45:18; 55:11.

Hunahunaa lamang kon daw ano katahom nga magpuyo sa Paraiso! Ang bug-os nga duta mangin subong sang isa ka parke. Mangin bugana ini sa mga pispis kag mga sapat kag patahumon sang tanan nga sahi sang mga kahoy kag mga bulak. Wala sing magaantos bangod nagamasakit sia. Wala sing mapatay. Mag-abyanay ang tanan nga mga tawo. Kon luyag naton magpuyo sing dayon sa Paraiso, karon na ang tion sa paghanda para sa sini.