SI Abraham, isa ka kilala nga tawo nga may pagtuo sa maragtas sang Biblia, nagbiya sang masulhay nga kabuhi sa mahamungayaon nga siudad sang Ur. Pagkatapos sang pagpuyo sing pila ka tion sa Haran, ginhinguyang niya ang nabilin nga bahin sang iya kabuhi subong manlulugayaw, nga nagapuyo sa mga tolda kag wala sing permanente nga puluy-an. (Genesis 12:​1-3; Binuhatan 7:​2-7; Hebreo 11:​8-10) Apang, ginrekord ini: “Si Abraham nagtaliwan kag napatay sa katigulangon, tigulang na kag naayawan.” (Genesis 25:⁠8) Ngaa nangin tuman ka makaalayaw ang iya kabuhi? Indi lamang sia isa ka tigulang nga tawo nga nagbatyag sing kaayawan sa iya higdaan sang kamatayon bangod sang iya mga hinimuan sa bug-os niya nga kabuhi. Si Abraham gintawag sang ulihi nga “abyan ni Jehova” bangod sang iya tumalagsahon nga pagtuo sa Dios. (Santiago 2:​23; Isaias 41:⁠8) Ang makahulugan nga kaangtanan nga ginpalambo ni Abraham sa iya Manunuga ang rason kon ngaa nangin makaalayaw ang iya kabuhi.

² Kaangay ni Abraham sang nagligad nga mga 4,000 ka tuig, mahimo man ikaw magkabuhi sing makahulugan kag makaalayaw sa karon kon makig-abyan ka sa Dios. Mahimo ka mapunaw sa ideya nga mangin abyan sang Manunuga sang uniberso, apang posible ini. Paano? Dapat makilala mo sia kag higugmaon sia. (1 Corinto 8:⁠3; Galacia 4:⁠9) Ini nga kaangtanan sa imo Manunuga magahimo sang imo kabuhi nga makahulugan kag makaalayaw.

³ Para sa mga handa sa pagbaton sang halad-gawad  ni Jesucristo, si Jehova nag-aman sing mga panuytoy sa pagkabuhi sing malipayon. (Isaias 48:17) Dumduma, si Adan nagrebelde batok sa Dios paagi sa pagpamat-od sing kinaugalingon kon ano ang maayo kag kon ano ang malain. Bisan pa ginbakal ni Jehova ang tawhanon nga pamilya paagi sa halad-gawad sang iya Anak, nga naghatag sa ila sing paagi nga mahilway gikan sa pagkaulipon sa sala kag kamatayon, dapat batunon sang tagsa ka indibiduwal ang gawad kag untatan ang pagpahamtang sang iya kaugalingon nga talaksan sa kon ano ang maayo kag malain. Dapat kita magpasakop sa mga kasuguan kag mga prinsipio nga ginaaman sang Dios para sa mga magabaton sang halad-gawad ni Jesus.

⁴ Samtang padayon mo nga ginatun-an ang Biblia kag ginasunod ang mga prinsipio nga ginhatag sini, pat-od gid nga mahangpan mo ang balor sang talaksan sang Dios sa kon ano ang maayo kag malain. (Salmo 19:​7-9) Mapahulag ka sa pagsiling sa Dios, kaangay ni Moises, nga manalagna ni Jehova: “Karon, palihug, kon nakasapo ako sing kahamuot sa imo mga mata, ipahibalo mo sa akon, palihug, ang imo mga dalanon, agod makilala ko ikaw.” (Exodo 33:​13; Salmo 25:⁠4) Ang Biblia nagahatag sing mga prinsipio nga magatuytoy sa imo sa paglubad sang mga problema sining “makahalanguyos nga mga tion nga mabudlay pakigbagayan.” (2 Timoteo 3:⁠1) Ang imo paghangop magadugang, nga nagadul-ong sa imo agod makilala sing maayo pa si Jehova kag agod mapabakod ang imo pagpakig-abyan sa iya.

⁵ Si Abraham napatay nga “tigulang na kag naayawan,” apang tubtob ang isa kinahanglan pa nga mapatay, ang kabuhi tuman kalip-ot gihapon. Ang handum nga mabuhi duna sa aton tanan, bisan kon pila man ang mangin edad naton. Ini bangod “ginbutang [sang Dios] ang walay katubtuban sa tagipusuon sang mga tawo; apang indi nila mahangpan ang ginhimo sang Dios kutob sa ginsuguran tubtob sa katapusan.” (Manugwali 3:​11, New International Version) Bisan nagakabuhi sing walay katubtuban, indi gid naton mahangpan ang tanan nga tinuga ni Jehova. Wala katapusan ang mahimo naton panilagan, tun-an, kag kalipayan sa tunga sang makatilingala nga mga binuhatan ni Jehova!​—⁠Salmo 19:​1-4; 104:​24; 139:⁠14.

⁶ Indi ka maganyat sa pagkabuhi sing dayon sa duta kon puno ini sing mga problema subong sang makita naton karon. Apang, indi ina rason agod magkabalaka. Ang Biblia nagasaad: “Nagahulat kita sing bag-ong mga langit kag  bag-ong duta suno sa iya saad, kag sa sini magapuyo ang pagkamatarong.” (2 Pedro 3:13) Ang termino nga “bag-ong mga langit” nagapatuhoy sa bag-ong langitnon nga panguluhan—ang Ginharian sang Dios, nga magagahom sa bug-os nga duta. Ang “bag-ong duta” amo ang bag-ong katilingban sang mga tawo nga ginahuman sang mga matinumanon sa paggahom sina nga Ginharian. Agod matuman ini, si Jehova magapanghikot sa dili madugay batok sa mga “nagalaglag sang duta.”​—⁠Bugna 11:​18; 2 Pedro 3:⁠10.

⁷ Daw ano na kalapit? Subong bahin sang “tanda . . . sang konklusion sang sistema sang mga butang,” ginlakip ni Jesucristo ang mga inaway sa mga pungsod, “kakulang sa kalan-on kag mga linog sa nagakalainlain nga mga duog,” “mga kamatay,” kag “pagdugang sang pagkamalinapason.” (Mateo 24:​3-13; Lucas 21:​10, 11; 2 Timoteo 3:​1-5) Nian nagtagna sia: “Kon makita ninyo nga nagakahanabo ining mga butang, hibalua ninyo nga ang ginharian sang Dios malapit na.” (Lucas 21:31) Sa pagkamatuod, ang tion nga laglagon ni Jehova ang mga malauton madasig nga nagapakari.⁠ *

⁸ Pagkatapos sang “dakung adlaw sang Dios nga Labing Gamhanan,” kon tinluan na ni Jehova ang duta sang kalautan, ang aton globo mangin isa ka paraiso. (Bugna 16:​14, 16; Isaias 51:⁠3) Nian, “ang mga matarong magapanag-iya sang duta, kag magapuyo sila sing dayon sa sini.” (Salmo 37:29) Apang kamusta naman ang mga napatay? “Indi kamo matingala sa sini,” siling ni Jesus, “bangod ang oras magaabot nga ang tanan nga yara sa handumanan nga lulubngan makabati sang iya tingog kag magaguwa, ang mga nakahimo sing maayong mga butang sa pagkabanhaw nga sa kabuhi, yadtong nakahimo sing malaut nga mga butang sa pagkabanhaw nga sa paghukom.” (Juan 5:​28, 29) Luyag ni Jehova, nga interesado sa tagsa ka indibiduwal, banhawon ang mga nagakatulog sa kamatayon. Mahimo tinguhaan sang mga sientipiko nga kopyahon ang mga tawo paagi sa genetic engineering, apang ang Manunuga indi magapangopya. Sarang niya madumduman ang tagsa ka detalye sang kada galawaron nga tawo kag mapasag-uli sila sa kabuhi. Huo, may  paglaum ka nga masug-alaw ang imo napatay nga mga pinalangga sa paraiso nga duta!

⁹ Mangin ano ang kahimtangan sang kabuhi sa Paraiso? Ang duta matugob sang malipayon nga mga lalaki kag mga babayi nga nagadayaw sing nahiusa sa Manunuga. “Wala sing pumuluyo nga magasiling: ‘Nagamasakit ako.’ ” (Isaias 33:​24; 54:13) Wala na sing madayag sa indi makapapagros nga kahuol ukon magmasakit sa emosyon kag hunahuna. Ang tanan may bugana na nga pagkaon kag magakalipay sa makaalayaw nga hilikuton nahisuno sa katuyuan sang Dios. (Salmo 72:​16; Isaias 65:23) Magaagom na sila sing paghidait upod sa mga sapat, paghidait upod sa mga isigkatawo kag, labaw sa tanan, “paghidait upod sa Dios.”​—⁠Roma 5:​1; Salmo 37:​11; 72:​7; Isaias 11:​6-9.

¹⁰ Ano ang dapat mo himuon agod mangin didto ikaw sa sina nga Paraiso kag maagom ang makaalayaw gid nga kabuhi? Si Jesucristo nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:⁠3) Gani magpadayon sa pagkuha sing ihibalo tuhoy kay Jehova kag kay Jesucristo, nagahibalo kon ano ang ginapatuman sang Dios sa imo. Nian mapahamut-an mo si Jehova nga Dios, kag magahimo ini sang imo kabuhi nga labi gid ka makaalayaw.