ANO ang kahulugan sa imo sang pagkilala kay Jehova? Lakip sa iban nga mga butang, nagakahulugan ini sang pagpangita sing sabat sa pamangkot nga nagapagumon sa binilyon: ‘Ngaa yari ako diri?’ Mahimo nga ginpamangkot mo na ini sing madamo nga beses. Ang isa ka maalam nga hari nga may manggad nga “labaw sangsa tanan nga iban pa nga hari” sang panahon niya nag-usisa sina nga pamangkot tuhoy sa kahulugan sang kabuhi. (2 Cronica 9:​22; Manugwali 2:​1-13) Magamit sini nga hari, nga si Solomon, ang iya daku nga gahom, bugana nga manggad, kag di-matupungan nga kaalam. Ano ang resulta sang iya pagpangusisa? “Ang katapusan sang butang, sang nabatian na ang tanan, amo: Magkahadlok ka sa matuod nga Dios kag tumana ang iya mga sugo. Kay amo ini ang bug-os nga katungdanan sang tawo.” (Manugwali 12:13) Sanglit ang kasangkaron sang eksperiensia ni Solomon labaw sangsa kalabanan nga mga tawo, ang iya konklusion sa di-magkubos takus nga binagbinagon naton.​—⁠Manugwali 2:⁠12.

² Ang kahadlok sa Dios nga ginapatuhuyan ni Solomon indi ang makangilidlis nga kahadlok sa isa ka wala makilal-i nga espirituhanon nga puwersa. Sa baylo, isa ini ka maayo nga kahadlok nga indi pagpahamut-an ang isa nga palangga mo gid. Kon palangga mo gid ang isa ka tawo, pat-od gid nga luyag mo sia pirme pahamut-an kag likawan nga makahimo sing butang nga makasaklaw sa iya. Kon mahigugma mo na si Jehova, amo man sini ang mabatyagan mo sa iya.

³ Paagi sa pagbasa sing Biblia, mahibaluan mo ang mga luyag kag mga indi luyag sang aton Manunuga subong man ang iya katuyuan sa pagtuga sa duta. Sa paglaragway kay Jehova subong “ang Manughuman sang duta kag ang Magbubuhat sini,” ginatawag man sia sang Biblia subong “ang Isa nga nagpalig-on sini, nga wala magtuga sini nga wala sing pulos, nga naghuman sini agod puy-an.” (Isaias 45:18) Ginhimo ni Jehova ang duta agod puy-an sang mga tawo, nga magaatipan sang duta kag sang tanan nga tinuga nga yari sa sini. (Genesis 1:28) Apang amo lang bala sina ang katuyuan sang pagtuga ni Jehova sa mga tawo​—⁠agod mangin mga manug-atipan?

 ⁴ Indi, may mas mataas pa nga katuyuan. Ang nahaunang tawo, nga si Adan, may makahulugan nga kaangtanan kay Jehova. Si Adan mahimo makakomunikar sing direkta sa Manunuga. Mabatian niya ang ginsugo sang Dios sa iya kag mapabutyag kay Jehova ang ginhunahuna niya. (Genesis 1:​28-30; 3:​8-13, 16-19; Binuhatan 17:​26-28) Gani, si Adan kag ang iya asawa, si Eva, may daku nga kahigayunan nga makilala si Jehova sing maayo pa kag mapalambo ang tudok pa nga kaangtanan sa iya. Ang pagkilala kay Jehova kag pag-ilog sa iya magahimo sang ila kabuhi nga makaalayaw, kay sia “malipayon nga Dios.” (1 Timoteo 1:11) Subong ang Dios “nga nagahatag sa aton sang tanan nga butang sing bugana para sa aton ikalipay,” ginbutang ni Jehova ang nahauna nga tawo sa paraiso nga ginatawag hardin sang Eden, nga may paglaum nga magkabuhi sing dayon.​—⁠1 Timoteo 6:​17; Genesis 2:​8, 9, 16, 17.

⁵ Sing dayon? Mahimo tamdon mo ang panghunahuna tuhoy sa kabuhi nga walay katapusan subong indi gid makatarunganon, apang amo bala? Nagapati ang mga sientipiko nga nahantop na nila karon kon ano ang kabangdanan sang pagtigulang sang mga selula. Ang magagmay nga bahin sang genetiko nga materyal nga ginatawag mga telomere, nga nagakalo sa punta sang mga chromosome, nagalip-ot kada magtunga ang isa ka selula. Pagkatapos sang 50 tubtob 100 ka pagtunga sang selula, ang mga telomere nagakapudpod, kag ang kalabanan nga selula nagadulog sa pagtunga. Apang, ang karon lang nga mga tukib sa siensia nagapakita nga sa bulig sang enzyme nga ginatawag telomerase, ang mga selula sang tawo makapadayon sa pagtunga sing walay latid. Bisan pa ini nga tukib wala nagakahulugan nga ginapaposible ni Jehova ang kabuhi nga walay katapusan paagi sining partikular nga enzyme, nagapakita ini sing isa ka butang: Ang panghunahuna tuhoy sa kabuhi nga walay katapusan makatarunganon!

⁶ Huo, ang rekord sang Biblia nga nagapakita nga ang nahaunang tawhanon nga mag-asawa gintuga agod mabuhi sing dayon mapatihan. Ang mga tawo magalambo sa ila kaangtanan kay Jehova tubtob sa tion nga walay latid. Magatukod sila sing mabakod nga kaangtanan sa ila langitnon nga Amay, nga nakahibalo gid sang iya katuyuan para sa mga tawo sa duta kag magatuman sini. Ang ila kabuhi indi mangin makatalaka. Sanday Adan kag Eva may makalilipay anay nga paglaum nga tugbon ang duta sing malipayon kag himpit nga mga kaanakan. May makaalayaw kag makalilipay kuntani sila nga himuon sing dayon. Isa gid kuntani yadto ka makaalayaw nga kabuhi!—Genesis 1:28.