NGAA madamo ang nagahimakas nga wala man lang mahibalui ang matuod gid nga kahulugan sang ila kabuhi? “Ang tawo, nga natawo sa babayi, malip-ot sing kabuhi kag puno sing kagamo. Kaangay sang bulak nagaguwa sia kag ginakutol, kag nagapalagyo sia subong sang landong kag wala nagapadayon sa pagluntad.” (Job 14:​1, 2) May butang nga natabo sa nahaunang tawhanon nga mag-asawa sa Paraiso nga nagguba sang masanag nga paglaum sang katawhan.

² Agod ang tawhanon nga pamilya mangin tunay nga malipayon, dapat sila may maayo nga kaangtanan sa Dios​—⁠isa nga kinabubut-on, wala ginapilit. (Deuteronomio 30:​15-20; Josue 24:15) Luyag ni Jehova ang pagkamatinumanon kag pagsimba nga nagagikan sa tagipusuon, bangod sang gugma. (Deuteronomio 6:⁠5) Gani sa hardin sang Eden, si Jehova may gindumili sa nahaunang lalaki agod hatagan sia sing kahigayunan nga pamatud-an ang iya tinagipusuon nga katutom. “Gikan sa tagsa ka kahoy sa hardin mahimo ka makakaon nga may kaayawan,” siling sang Dios kay Adan, “apang tuhoy sa kahoy sang pagkilala sang maayo kag malain indi ka magkaon gikan sini, kay sa adlaw nga magkaon ka gikan sini mapatay ka nga totoo.” (Genesis 2:​16, 17) Isa lamang ini ka simple nga pagtilaw. Gindumilian ni Jehova si Adan sa pagkaon sang bunga sang isa lamang ka kahoy gikan sa tanan nga kahoy sa hardin. Yadto nga kahoy nagalaragway sa kinamatarong sang maalam-sa-tanan nga Manunuga sa pagpamat-od kon ano ang maayo kag kon ano ang malain. Ginpaalinton sang nahauna nga lalaki ining hatag-Dios nga sugo sa iya asawa, nga gin-aman ni Jehova “subong katuwang [ni Adan].” (Genesis 2:18) Kontento sila sa sining kahimusan​—⁠nga magkabuhi sa idalom sang pagginahom sang Dios⁠​—⁠​nagapasakop sing mapinasalamaton sa iya kabubut-on kag sa amo nagapakita sang ila gugma sa ila Manunuga kag Manughatag-kabuhi.

³ Nian isa ka adlaw ang isa ka man-ug nakigsugilanon kay Eva kag nagpamangkot: “Nagsiling gid bala ang Dios nga indi kamo dapat magkaon gikan sa tanan nga kahoy sa hardin?” Si Eva nagsabat nga gindumilian lamang sila sa pagkaon  sang bunga sang “kahoy nga yara sa tunga sang hardin,” ang kahoy sang pagkilala sang maayo kag malain, ‘agod indi sila mapatay.’​—⁠Genesis 3:​1-3.

⁴ Sin-o ining man-ug? Ginapakilala sang tulun-an sang Bugna sa Biblia ang “orihinal nga man-ug” subong “ang isa nga ginatawag nga Yawa kag Satanas, nga nagapatalang sa bug-os napuy-an nga duta.” (Bugna 12:⁠9) Gintuga bala sang Dios si Satanas nga Yawa? Wala, ang mga binuhatan ni Jehova himpit kag maayo. (Deuteronomio 32:⁠4) Ining espiritu nga tinuga naghimo sang iya kaugalingon nga Yawa, nga nagakahulugan sing “Manugpasipala,” kag Satanas, nga nagakahulugan sing “Manugpamatok.” ‘Ginbuyok kag ginhaylo sia sang iya kaugalingon nga kailigbon,’ ang kailigbon nga mangin sa kahimtangan sang Dios, kag nagsugod sia sa pagrebelde batok sa Manunuga.​—⁠Santiago 1:⁠14.

⁵ Si Satanas nga Yawa nagsiling pa kay Eva: “Indi gid kamo mapatay. Kay nakahibalo ang Dios nga sa adlaw nga magkaon kamo gikan sini magamuklat ang inyo mga mata kag mangin kaangay kamo sang Dios, nga nakakilala sang maayo kag malain.” (Genesis 3:​4, 5) Ginhimo ni Satanas nga makagalanyat ang pagkaon gikan sa kahoy sang pagkilala sang maayo kag malain. Sa aton pa, nangatarungan sia: ‘Ginadingot sang Dios ang maayo nga butang sa imo. Magkaon ka lang sa kahoy, kag ikaw mangin kaangay sa Dios kag makapamat-od ka para sa imo kaugalingon kon ano ang maayo kag kon ano ang malain.’ Sa karon ginagamit gihapon ni Satanas ini nga pangatarungan agod punggan ang madamo sa pag-alagad sa Dios. ‘Himua ang gusto mo,’ siling niya. ‘Indi lang pagsapaka ang katungdanan mo sa Isa nga naghatag sa imo sing kabuhi.’—Bugna 4:11.

⁶ Ang bunga sang kahoy hinali nga nangin butang nga halandumon, butang nga indi mapangindian! Si Eva nagkuha sang bunga, ginkaon ini, kag nian gintan-ayan ang iya bana. Bisan pa nga nakahibalo sing bug-os sang mga resulta, si Adan nagpamati sa tingog sang iya asawa kag nagkaon sang bunga. Ano ang resulta? Sa babayi, ginhatag ni Jehova ang masunod nga pamatbat: “Padamuon ko sing tama ang kasakit sang imo pagmabdos; sa kasakit magapanganak ka, kag ang imo handum mangin sa imo bana, kag magagahom sia sa imo.” Kag sa lalaki? “Pinakamalaut ang duta bangod sa imo. Sa kasakit magakaon ka sing patubas sini sa tanan nga adlaw sang imo kabuhi. Kag magapatubo ini sing mga tunok kag mga ragiwriw para sa imo, kag magakaon ka sing tanom  sang latagon. Sa balhas sang imo nawong magakaon ka sing tinapay tubtob nga magbalik ka sa duta, kay gikan sini ginkuha ka. Kay yab-ok ka kag sa yab-ok magabalik ka.” Ginpabay-an na karon sanday Adan kag Eva sa pagpangita sing kalipay kag kaayawan sa ila kaugalingon nga paagi. Ang mga panikasog bala sang mga tawo nga magkabuhi sing makaalayaw nga nahamulag sa katuyuan sang Dios magamadinalag-on? Ang makalilipay nga hilikuton sang pag-atipan sa kaangay-hardin nga Paraiso kag sang pagpasangkad sini tubtob sa kaukbungan sang duta ginbuslan sang makatalaka nga paghimakas agod lamang mabuhi, nga wala sing ginahimo para sa kahimayaan sang ila Manunuga.—Genesis 3:6-19.

⁷ Sang adlaw nga nagkaon gikan sa kahoy sang pagkilala sang maayo kag malain, ang nahaunang tawhanon nga mag-asawa napatay sa mga mata sang Dios kag nagpadulong sa ila pisikal nga kamatayon. Ano ang natabo sa ila sang napatay sila sang ulihi? Ang Biblia nagahatag sing paghangop sa kahimtangan sang minatay. “Ang mga buhi nakahibalo nga mapatay sila; apang nahanungod sa mga patay, wala sila makahibalo sing bisan ano, ukon may padya pa sila, bangod ang ila handumanan nalimtan.” (Manugwali 9:⁠5; Salmo 146:⁠4) Wala sing ginatawag nga “kalag” nga padayon nga nagakabuhi kon mapatay. Ang silot sa sala amo ang kamatayon, indi ang walay katapusan nga pag-antos sa kalayuhon nga impierno. Dugang pa, ang kamatayon wala nagadul-ong sa dayon nga kalipay sa mga langit. *

⁸ Subong nga ang isa ka hurmahan sang keyk nga may gupi mahimo lamang magpatubas sing keyk nga may marka ukon horma, ang di-himpit karon nga lalaki kag babayi makapatubas lamang sing di-himpit nga mga kaanakan. Ang Biblia nagapaathag sini nga proseso: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Sa amo, kita tanan natawo sa sala, nga napaidalom sa walay kapuslanan. Ang kabuhi sang mga kaliwat ni Adan nangin makatalaka gid. Apang may solusyon bala?