SEKSION 4
Paano Magbadyet sang Kuarta?
“Ang tagsa ka katuyoan ginapalig-on tungud sa laygay.”
Kinahanglan naton ang kuarta para iaman sa aton pamilya ang ila mga kinahanglanon. (Hulubaton 30:8) “Ang cuarta pangapin.” (Manugwali 7:12) Bilang mag-asawa, mahimo mabudlay istoryahan ninyo ang parte sa kuarta, pero indi pagtuguti nga amo ini ang tunaan sang inyo mga problema. (Efeso 4:32) Dapat ang mag-asawa may pagsalig sa isa kag isa kag magbuligay sa pagbadyet.
1 PLANUHA SING MAAYO
ANG GINASILING SANG BIBLIA: “Sin-o sa inyo nga luyag magtukod sang torre ang wala anay nagalingkod kag nagasuma sang kagastuhanan, agod mahibaluan kon bala may bastante sia nga inugpahuman sa sini?” (Lucas 14:28) Importante nga planuhon ninyo kon paano magbadyet. (Amos 3:3) Hibalua kon ano ang dapat ninyo baklon kag kon bala masarangan ninyo ini. (Hulubaton 31:16) Indi buot silingon kon may kuarta kamo, mabakal kamo dayon. Likawi nga mangutang. Maggasto suno lang sa inyo badyet.
ANO ANG MAHIMO MO?
-
Kon may sobra ang inyo badyet sa tapos sang bulan, istoryahi ninyo kon ano ang inyo himuon sa sini
-
Kon kulang ang inyo badyet, maghimo sing espesipiko nga plano nga buhinan ang inyo gasto. Halimbawa, mahimo kamo magluto sa baylo nga magkaon sa restawran
2 MANGIN BUNAYAG KAG MAY HUSTO NGA PAGTAMOD SA KUARTA
ANG GINASILING SANG BIBLIA: “Bunayag nga nagaaman, indi lamang sa itululok ni Jehova, kundi sa itululok man sang mga tawo.” (2 Corinto 8:21) Mangin bunayag sa imo tiayon kon pila ang imo kita kag gasto.
Istoryahi ninyo sang imo tiayon kon nagahimo sang importante nga desisyon parte sa kuarta. (Hulubaton 13:10) Paagi sini, mahuptan ang paghidait sa inyo pag-asawahay. Indi pagkabiga nga imo lang kuarta ang imo kita, kundi kuarta sang inyo pamilya.
ANO ANG MAHIMO MO?
-
Magsugtanay kon pila ang gastuhon sang isa kag isa nga indi na kinahanglan maglisensia pa
-
Indi na paghulata nga mag-utwas pa ang problema antes kamo mag-istorya parte sa kuarta
Basi Manamian Ka Man
SABAT SA MGA PAMANGKOT SA BIBLIA
Problema sa Kuarta kag Utang—Makabulig Bala ang Biblia?
Indi mabakal sang kuarta ang kalipay, pero may apat ka prinsipio sa Biblia nga makabulig sa imo pag-uyat sang kuarta.
MAGMATA!
Paano Kontrolon ang Paggasto?
Indi na paghulata nga maubusan kamo sang kuarta antes maghunahuna sang inyo batasan sa paggasto. Hibalua kon paano kontrolon ang paggasto antes pa maglala ini.
