ANG pinakadaku nga tulun-an sang Biblia amo ang gintipon nga sagrado nga mga ambahanon. Ang bug-os nga tulun-an ginsulat sa sulod sang mga 1,000 ka tuig. Mabasa sa Salmo ang pila ka madalom kag makapalig-on sing pagtuo nga mga pinamulong. Ginlaragway sa sini ang lainlain nga balatyagon sang tawo, subong sang kalipay, pagdayaw, pagpasalamat, kasubo, kag paghinulsol. Maathag nga may pagsalig kag suod nga kaangtanan sa Dios ang salmista. Binagbinaga ang pila sang mga tema sa sining ambahanon.

Si Jehova amo ang may kinamatarong nga Manuggahom, takus simbahon kag dayawon. “Ikaw lamang, nga ang iya ngalan amo ang GINOO [ukon Jehova], amo ang Labing Mataas sa bug-os nga duta,” amo ini ang mabasa naton sa Salmo 83:18. Ang pila sa mga salmo nagadayaw kay Jehova bangod sa iya mga tinuga, subong sang mga bituon sa kalangitan, dalayawon nga kabuhi sa duta, kag lawas sang tawo. (Salmo 8, 19, 139, 148) Ang iban nagahimaya kay Jehova subong Dios nga nagaluwas kag nagaproteksion sa mga mainunungon sa iya. (Salmo 18, 97, 138) Ang iban naman nagadayaw sa iya subong Dios sang hustisya, nga nagaluwas sa mga ginapigos kag nagasilot sa mga malaut.—Salmo 11, 68, 146.

Ginabuligan kag ginalugpayan ni Jehova ang mga nagahigugma sa iya. Ayhan ang labing bantog nga ambahanon amo ang ika-23 sang Salmo, sa diin ginlaragway ni David si Jehova subong mahigugmaon nga Manugbantay nga nagagiya, nagaproteksion, kag nagatatap sa iya mga karnero. Ang Salmo 65:2 nagapahanumdom sa mga sumilimba sang Dios nga si Jehova “nagapamati sang pangamuyo.” Nalugpayan ang madamo nga nakahimo sang mabug-at nga mga sala sang Salmo 39 kag 51. Diri ginhambal ni David ang iya tinagipusuon nga paghinulsol sa iya mabug-at nga mga sala kag ginpabutyag ang iya pagtuo sa pagpatawad ni Jehova. Ginapalig-on sang Salmo 55:22 nga magsalig kay Jehova kag itungtong sa Iya ang tanan nga kabudlayan.

Bag-uhon ni Jehova ang kalibutan paagi sa Mesianikong Ginharian. Ang pila ka dinalan sa Salmo maathag nga nagapatuhoy sa Mesias, ang gintagna nga Hari. Gintagna sang Salmo 2 nga ini nga Manuggahom magalaglag sang malaut nga mga pungsod nga nagapamatok sa iya. Ginapakita sang Salmo 72 nga ini nga Hari magapauntat sang gutom, inhustisya, kag pagpamigos. Suno sa Salmo 46:9, pauntaton sang Dios ang giyera kag gub-on ang tanan nga armas paagi sa Mesianikong Ginharian. Aton mabasa sa Salmo 37 nga ang malaut dulaon, pero ang matarong nga mga tawo magapuyo sa mahidaiton kag nahiusa nga duta sing dayon.

—Base sa tulun-an sang Salmo.