Ang Biblia nagasiling nga si Satanas “manugdaya sang bug-os napuy-an nga duta.” (Bugna 12:9) Si Satanas kag ang iya mga demonyo indi luyag nga magpati kita sa Pulong sang Dios, ang Biblia. Ginapapati nila sa mga tawo nga ang patay buhi sa espirituhanon nga duog. Tan-awon naton kon paano nila ina ginahimo.

Madamong relihion ang nagatudlo nga ang tagsa ka tawo may kalag nga nagakadto sa espirituhanon nga duog kon mapatay ang ila pisikal nga lawas. Nagasiling sila nga ang lawas nagakapatay apang ang kalag wala. Dugang pa, nagasiling sila nga ang kalag indi mapatay, nga ini dimamalatyon.

Apang ang Pulong sang Dios wala nagatudlo sina. Ginapakita sang Biblia nga ang kalag amo ang tawo, indi ang butang sa sulod sang tawo. Halimbawa, sa paglaragway sang pagtuga kay Adan, ang Biblia nagasiling: “Kag si Jehova nga Dios naghimo sang tawo gikan sa yab-ok sang duta kag naghuyop sa iya ilong sang ginhawa sang kabuhi, kag ang tawo nangin buhi nga kalag.” (Genesis 2:7) Gani si Adan wala paghatagi sing kalag; sia amo ang kalag.

Ang mga sapat ginatawag man nga mga kalag.—Genesis 1:20, 21, 24, 30.

 Sanglit ang tinaga nga “kalag” sa Biblia nagakahulugan sang tawo mismo, indi kita dapat makibot sa paghibalo nga ang mga kalag sarang mapatay kag nagakapatay. Ang Kasulatan nagasiling:

• “Ang kalag nga nagapakasala—ini mismo mapatay.”—Ezequiel 18:4.

• “Kag si Samson nagsiling: ‘Pakamatya ang akon kalag kaupod sang mga Filistinhon.’”—Mga Hukom 16:30.

• “Tugot bala sa adlaw nga inugpahuway ang paghimo sing maayo ukon paghimo sing malain, ang pagluwas ukon ang pagpatay sa kalag?”—Marcos 3:4.

Ginapakita sang iban nga mga kasulatan nga ang mga kalag sarang malaglag (Genesis 17:14), mapatay sang espada (Josue 10:37), makuga (Job 7:15), kag malumos (Jonas 2:5). Sa amo, ang kalag nagakapatay.

Kon imo basahon ang Biblia sing bug-os, indi mo gid makita ang dinalan nga “dimamalatyon nga kalag.” Ang tawhanon nga kalag indi espiritu. Ang panudlo tuhoy sa dimamalatyon nga kalag indi panudlo sang Biblia. Panudlo ini ni Satanas kag sang iya mga demonyo. Ginadumtan ni Jehova ang tanan nga relihiosong mga kabutigan.—Hulubaton 6:16-19; 1 Timoteo 4:1, 2.

Ang isa ka paagi nga ginadaya ni Satanas ang mga tawo amo ang paagi sa mga palaagyan. Ang palaagyan amo ang isa nga makasarang sa pagbaton sing mga mensahe direkta halin sa kalibutan sang mga espiritu. Madamong mga tawo, lakip ang mga palaagyan mismo, ang nagapati nga ining mga mensahe naghalin sa mga espiritu sang patay. Apang subong sang aton nakita sa Biblia, imposible ini.—Manugwali 9:5, 6, 10.

Nian, diin nagahalin ining mga mensahe? Sa mga demonyo mismo! Ang mga demonyo sarang makapanilag sa tawo sang buhi sia; nakahibalo sila kon paano sia anay nagahambal, kon ano ang iya hitsura, kon ano ang ginhimo niya anay, kag kon ano ang iya nahibal-an. Gani mahapos para sa ila ang mag-ilog sa mga tawo nga napatay.—1 Samuel 28:3-19.

Ang isa pa ka paagi nga ginapauswag ni Satanas ang butig nahanungod sa patay amo ang paagi sa dimatuod nga mga sugilanon. Inang mga sugilanon masunson nagapatalikod sang mga tawo sa kamatuoran sang Biblia.—2 Timoteo 4:4.

Sa Aprika may madamong mga sugilanon nahanungod sa mga tawo nga nakita nga buhi sa tapos sila napatay. Sa masami, nakita sila malayo sa kon diin anay sila nagapuyo. Apang pamangkuta ang imo kaugalingon: ‘Makatarunganon bala nga kon ang isa may gahom sa pagbalik gikan sa patay, magabalik sia malayo sa iya pamilya kag mga abyan?’

Subong man, mahimo bala nga ang tawo nga nakita basi kaanggid lamang sang tawo nga napatay? Halimbawa, duha ka Cristianong ministro nga nagabantala sa isa ka uma ang nakamutik nga inoras na sila nga ginasulusundan sang isa ka tigulang nga tawo. Sang ginpamangkot nila sia, ginsugiran sia nila nga abi niya ang isa sa mga ministro utod niya nga napatay sang nagligad nga mga tuig. Sa pagkamatuod, nagsayop sia, apang indi sia magbaton nga nagsayop sia. Handurawa lamang ang sugilanon nga ginsugid sang tigulang sa iya mga abyan kag mga kaingod sang ulihi!

Walay duhaduha nga nahibaluan mo ang nahanungod sa makatilingala nga mga butang nga nakita, nabatian, ukon nadamgo sang mga tawo. Inang labaw sa kinaugali nga mga eksperiensia masunson nga nagpahadlok sa ila. Si Marein, nga nagapuyo sa Katundan nga Aprika, pirme nakabati sang tingog sang iya anhing nga lola nga nagapanawag sa iya kon gab-i. Hinadlukan, si Marein nagasinggit, nagapukaw sang iya bug-os nga panimalay. Sang ulihi, nagbuang sia.

Ti, kon ang patay tunay nga buhi, makatarunganon bala nga pahugon nila ang ila mga hinigugma? Siempre indi. Ang ginhalinan sinang makahalalit nga mga mensahe amo ang mga demonyo.

Apang kamusta ang mga mensahe nga daw mabuligon kag makapalugpay? Halimbawa, si Gbassay, nga taga-Sierra Leone, nagmasakit. Nagdamgo sia kag sa sini ang iya napatay nga amay nagpakita sa iya. Ginsugo sia sa pagkadto sa isa ka kahoy, magkuha sing dahon, timplahan ini sang tubig, kag imnon. Antes sini indi sia anay dapat maghambal kay bisan sin-o. Ginhimo niya ini kag nag-ayo sia.

Isa pa ka babayi ang nagsiling nga ang iya bana nagpakita sa iya isa ka gab-i antes sia napatay. Nagsiling sia nga maayo ang iya hitsura kag nagasuksok sing matahom nga panapton.

 Inang mga mensahe kag mga palanan-awon daw maayo kag mabuligon. Halin bala ini sa Dios? Indi. Si Jehova “Dios sang kamatuoran.” (Salmo 31:5) Indi gid sia magaugyon nga kita tiplangon ukon dayaon. Mga demonyo lamang ang nagahimo sina.

Apang may maayo bala nga mga demonyo? Wala. Bisan pa daw nagabulig sila kon kaisa, sila tanan malain. Sang nakigsugilanon ang Yawa kay Eva, mainabyanon sia. (Genesis 3:1) Apang ano ang resulta kay Eva sang namati sia kag ginbuhat ang ginsiling sang Yawa? Napatay si Eva.

Nakahibalo kamo nga kinaandan para sa malain nga tawo ang magmangin mainabyanon sa mga luyag niya dayaon kag tiplangon. “Puti sing ngipon, itom sing tagipusuon,” siling sang Aprikano nga hulubaton. Kag ang Pulong sang Dios nagasiling: “Si Satanas nagapakamanugtunda sang kapawa.”—2 Corinto 11:14.

Ang Dios wala nagapakigsugilanon sa tawo sa duta paagi sa mga damgo, mga palanan-awon, ukon mga tingog gikan sa kalibutan sang mga espiritu. Nagatuytoy kag nagatudlo sia sa ila paagi sa Biblia, nga nagahimo sa isa nga “masangkapan sing bug-os para sa tagsa ka maayong buhat.”—2 Timoteo 3:17.

Sa amo, sang nagpaandam si Jehova sa aton batok sa mga pagtiplang sang Yawa, ginahimo niya ini bangod ginahigugma niya kita. Nakahibalo sia nga ang mga demonyo makatalagam nga mga kaaway.