Apang ngaa nagapangabudlay gid sing lakas si Satanas kag ang iya mga demonyo agod dayaon ang tawo? Bangod luyag nila nga magbuylog kita sa ila pagrebelde. Luyag nila nga magsimba kita sa ila. Luyag nila nga magpati kita sa ila mga kabutigan kag magbuhat sang mga butang nga wala naluyagi ni Jehova. Madamong sining mga buhat nagalakip sang mga kinabatasan may kaangtanan sa patay.

Ang kamatayon sang isa nga hinigugma masakit sa balatyagon nga eksperiensia, kag normal kag nagakaigo ang magpakita sing kasubo. Sang napatay ang iya abyan nga si Lasaro, si Jesus “naghibi.”—Juan 11:35.

Madamong mga kinabatasan ang may kaangtanan sa kamatayon, kag lainlain ini sa bug-os nga kalibutan. Madamo ang wala nagasumpakil sa mga prinsipio sang Biblia. Apang, ang iban nga mga buhat napasad sa panghunahuna nga ang patay buhi kag sarang makakita sa buhi. Ang pagpulaw, wala sing pagpugong nga paglalaw, kag sobra nga mga seremoniya sa lubong nagpanggamot tanan sa kahadlok nga indi pahamut-an ang mga espiritu sang patay. Apang bangod kay ang patay “wala sing hinalung-ong,” ang nagabuhat sinang mga butang nagapauswag sang kabutigan ni Satanas.—Manugwali 9:5.

 Ang iban nga mga kinabatasan ukon mga seremoniya naghalin sa pagpati nga ang patay nagakinahanglan sang bulig sang buhi kag magahalit sa buhi kon indi sila mauluuluhan. Sa iban nga kadutaan ang pagpuasa kag sakripisyo ginahimo sa sulod sang 40 ka adlaw ukon isa ka tuig pagkatapos ang isa napatay. Nagabulig kuno ini sa napatay nga ‘makakadto’ sa espirituhanon nga duog. Ang isa pa sa kinaandan nga buhat amo ang paghalad sing pagkaon kag ilimnon sa patay.

Sayop ini bangod nagapauswag ini sang mga kabutigan ni Satanas nahanungod sa patay. Mahamuot bala si Jehova kon magahimo kita sang mga kinabatasan nga napasad sa mga panudlo sang mga demonyo? Indi gid!—2 Corinto 6:14-18.

Ang mga alagad sang matuod nga Dios wala nagapakigbahin sa mga buhat nga nagasakdag sa mga kabutigan ni Satanas. Sa baylo, mahigugmaon sila nga nagabulig sa mga buhi kag nagalugpay sa ila. Nakahibalo sila nga kon ang isa mapatay, si Jehova lamang ang makabulig sa iya.—Job 14:14, 15.

Ang iban nga tawo nagapakig-angot sa mga demonyo sing direkta ukon paagi sa tawhanon nga palaagyan. Ginatawag ini nga espiritismo. Ang voodoo, pangaswang, salamangka, pagpakot sang kapalaran, kag pagpamangkot sa patay mga dagway tanan sang espiritismo.

Ginapakamalaut ini sang Biblia, nga nagasiling: “Mangin walay makita sa imo nga bisan sin-o . . . nga nagagamit sing pagpamakot, ang manuglagpat ukon manugbabaylan, ukon diwatahan, ukon manugtiwtiw ukon manugpaguwa sa mga espiritu ukon salamangkero ukon manugpamangkot sa mga napatay. Kay ang bisan sin-o nga nagahimo sining mga butang kalangil-aran kay Jehova.”—Deuteronomio 18:10-12.

Ngaa makusog nga nagapaandam sa aton si Jehova batok sini nga mga buhat?

Para sa kaayuhan naton, si Jehova nagapaandam sa aton batok  sa tanan nga dagway sang espiritismo. Ginahigugma kag ginaulikdan niya ang mga tawo, kag nakahibalo sia nga ang mga nagapakig-angot sa mga demonyo magaantos.

Ang isa sa ila amo si Nilda, nga isa anay ka palaagyan sang espiritu sa Brazil. Ginguba sang mga demonyo ang iya kabuhi. Sia nagaasoy: “Ang mga espiritu . . . nagpanag-iya sa akon, nagasugo sa akon. Pirme ako nagakadulaan sing animo, kag ginbulong ako bangod sang problema sa hunahuna. Ginhingabot gid ako sing daku sang mga demonyo sa bagay nga ang akon mga nerbios naapektuhan. Nag-inom ako sang bulong nga pangpakalma kag nagsugod sa pag-inom kag sa pagpanigarilyo sing dalayon. Nagpadayon ini sing mga tinuig.”

Sang ulihi, paagi sa bulig ni Jehova kag sang iya mga Saksi sa duta, si Nilda nahilway sa impluwensia sang demonyo kag nagakabuhi karon sing malipayon kag maayo. Sia nagasiling: “Ginapalig-on ko sa tanan nga indi gid, bisan sa makaisa, magpakig-angot sa [malauton nga] mga espiritu.”