1-6. Magsugid sang eksperiensia sang mga Saksi sa ila pagbantala sa sarisari nga sitwasyon.

 SI Rebecca, isa ka pamatan-on nga Saksi ni Jehova sa Ghana. Ginhimo niya ang iya eskwelahan bilang teritoryo nga preachingan niya. Ang iya bag pirme may literatura nga base sa Biblia. Ginakalitan niya ang kahigayunan kon break time nila para maistorya ang iban nga mga estudyante. Nag-Bible study na ang pila niya ka classmate.

² Sa isla sang Madagascar nga malapit sa sidlangan nga baybayon sang Africa, duha ka payunir ang pirme nagalakat sing mga 25 kilometros sa nagatagiti nga init pakadto sa malayo nga baryo. Madamo sila didto sing mga Bible study.

³ Para makadtuan ang mga tawo sa mga suba sang Paraguay kag Paraná, naghimo sing lantsa ang mga Saksi sa Paraguay upod sa mga boluntaryo halin sa 15 pa ka pungsod. Ining 45 ka tonelada nga lantsa puede istaran sang 12 ka tawo. Gingamit ini sang mapisan nga mga manugbantala sang Ginharian para masugid ang maayong balita sa mga lugar nga mabudlay kadtuan.

⁴ Sa Alaska, may mga binulan nga madamo ang mga turista. Gani gingamit ini sang mga Saksi didto nga kahigayunan para makabantala. Kon medyo mainit ang tiempo, ang de-pasahero nga mga barko nagadungka nga dala ang madamo nga mga bisita halin sa sarisari nga pungsod, amo nga ang mga Saksi didto nagabutang sing mga estante sa pantalan kag diri nila gina-display ang manami nga mga literatura sa Biblia sa sarisari nga lenguahe. Sa sina man nga lugar, kinahanglan kon kaisa ang eroplano para ma-preachingan ang malayo nga mga lugar, pareho sang mga komunidad sang Aleut, Athabascan, Tsimshian, kag Tlingit.

⁵ Si Larry, nga taga-Texas, U.S.A., may espesyal nga teritoryo, nga amo ang nursing home nga iya ginaistaran. Naaksidente si Larry amo nga naga-wheelchair sia, pero masako sia gihapon. Ginasugid niya sa iban ang mensahe sang Ginharian, pati ang iya paglaum nga natun-an niya sa Biblia nga makalakat sia liwat kon maggahom na ang Ginharian diri sa duta.—Isa. 35:5, 6.

⁶ Para makatambong sa asembleya sa norte sang Myanmar, nagsakay sa de-pasahero nga lantsa ang isa ka grupo sang mga Saksi para magbiyahe sing tatlo ka adlaw halin sa Mandalay. Bangod gusto gid nila nga maka-preaching,  nagdala sila sing mga literatura nga base sa Biblia kag gintanyag ini sa kaupod nila nga mga pasahero. Kon maghapit gani ang lantsa sa isa ka banwa ukon baryo, ang mga kauturan nagapanaug dayon kag madasig nga nagatanyag sing mga literatura sa mga balay. Pagbalik nila sa lantsa, preachingan naman nila ang bag-o lang nagsaka nga mga pasahero.

7. Ano nga mga paagi ang ginahimo sang mga Saksi kon nagabantala sila parte sa Ginharian sang Dios, kag ano ang ila tulumuron?

⁷ Pareho sa mga kauturan sa sining pila ka halimbawa, ang mapisan nga mga sumilimba ni Jehova sa bilog nga kalibutan ‘nagapanaksi sing maid-id tuhoy sa Ginharian sang Dios.’ (Binu. 28:23) Nagabantala sila sa mga balay, sa mga dalan, paagi sa mga sulat, kag paagi sa telepono. Nagasakay man sila sa bus, nagapamasyar sa park, ukon nagapahuway sing makadali sa ila ulubrahan, nalipay gid sila mangita sang tsansa nga masugid ang parte sa Ginharian sang Dios. Mahimo sarisari ang mga pamaagi, pero isa lang ang tulumuron, kag ina amo ang pagbantala sang maayong balita sa tanan.—Mat. 10:11.

8, 9. (a) Ngaa makasiling kita nga ang pagbantala sang Ginharian subong daw isa ka milagro? (b) Ano nga pamangkot ang binagbinagon, kag ano ang dapat naton himuon para masabat ini?

⁸ Pinalangga namon nga bumalasa, isa ka bala sa mga manugbantala sang Ginharian nga aktibo subong sa sobra 235 ka kadutaan? Kon amo, malipay ka gid kay nagabulig ka sa pagsugid sang maayong balita sa mas madamo nga tawo. Daw milagro gid ang nahimo sa bilog nga kalibutan. Bisan pa sang grabe nga mga kabudlayan kag mga balagbag, pareho sang pagdumili sang mga gobierno kag mga paghingabot, maid-id gihapon nga ginasugid sang mga Saksi ni Jehova ang parte sa Ginharian sang Dios sa mga tawo sa tanan nga pungsod.

⁹ Ang isa ka pamangkot nga binagbinagon amo, Ngaa indi mapauntat bisan sang pagpamatok ni Satanas ang hilikuton nga pagbantala sang Ginharian? Para masabat ini nga pamangkot, balikan naton ang unang siglo C.E. kay sa sina nga tion nagsugod ang hilikuton sang mga Saksi ni Jehova subong.

10. Ano ang pinakaimportante nga hilikuton para kay Jesus, kag ano ang iya nahibaluan parte sini nga hilikuton?

¹⁰ Si Jesucristo ang nagtukod sang Cristianong kongregasyon. Ang pinakaimportante nga hilikuton nga ginhimo niya diri sa duta amo ang pagbantala sang maayong balita sang Ginharian sang Dios kag nagapadayon ini nga hilikuton asta subong. Isa ka bes, sia nagsiling: “Dapat ko man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.” (Luc. 4:43) Nahibaluan ni Jesus nga sugdan niya ang isa ka hilikuton nga indi niya matapos. Antes sia mapatay, gintagna niya nga ang mensahe sang Ginharian ibantala “sa tanan nga pungsod.” (Mar. 13:10) Pero paano ini himuon, kag sin-o ang magahimo sini?

11. Ano nga importante nga hilikuton ang ginhatag ni Jesus sa iya mga disipulo, kag ano nga bulig ang mabaton nila?

¹¹ Pagkatapos sang iya kamatayon kag pagkabanhaw, nagpakita si Jesus sa iya  mga disipulo kag ginhatag sa ila ining importante nga hilikuton: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo. Kag dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.” (Mat. 28:19, 20) Ang mga tinaga nga “kaupod ninyo ako” nagapakita nga buligan niya ang mga disipulo sa hilikuton nga pagbantala kag pagtudlo sa mga tawo para mangin disipulo. Kinahanglan nila ini nga bulig kay nagtagna si Jesus nga ‘dumtan sila sang tanan nga pungsod.’ (Mat. 24:9) Makabaton man sing bulig ang mga disipulo sa iban pa nga paagi. Antes magkayab sa langit, ginsilingan sila ni Jesus nga hatagan sila sang kusog sang balaan nga espiritu para mangin saksi niya sila “tubtob sa pinakamalayo nga bahin sang duta.”—Binu. 1:8.

12. Ano nga importante nga mga pamangkot ang dapat sabton, kag ngaa importante gid nga mahibaluan naton ang mga sabat?

¹² May pila ka importante nga pamangkot nga dapat sabton: Importante gid bala para sa mga apostoles ni Jesus kag sa mga disipulo sang unang siglo ang ila hilikuton? Nangin maid-id gid bala ining gamay nga grupo sang mga Cristiano sa pagbantala sang Ginharian sang Dios bisan may mapintas nga paghingabot? Ginbuligan gid bala sila ni Jehova kag sang iya balaan nga espiritu sa ila pagtudlo sa mga tawo para mangin disipulo? Ini nga mga pamangkot masabat sa libro sang Mga Binuhatan sa Biblia. Importante gid nga mahibaluan naton ang mga sabat. Ngaa? Nagpromisa si Jesus nga ang hilikuton nga iya ginsugo magapadayon “tubtob sa hingapusan sang sistema sang mga butang.” Gani ini nga sugo para sa tanan nga matuod nga mga Cristiano, lakip kita nga nagakabuhi sa sining tion sang katapusan. Bangod sini, interesado gid kita sa kasaysayan nga nasulat sa libro sang Mga Binuhatan.

13, 14. (a) Sin-o ang nagsulat sang Mga Binuhatan, kag paano nakuha sang manunulat ang iya impormasyon? (b) Ano ang kaundan sang Mga Binuhatan?

¹³ Sin-o ang nagsulat sang Mga Binuhatan? Wala ginsambit sa libro ang ngalan sang manunulat, pero ang nagabukas nga mga tinaga maathag nga nagapakita nga ang manunulat sang Mga Binuhatan amo man ang manunulat sang Ebanghelyo ni Lucas. (Luc. 1:1-4; Binu. 1:1, 2) Sugod pa sadto, ang “hinigugma nga manugbulong” kag masaligan nga historian nga si Lucas, amo ang ginapatihan nga manunulat sang Mga Binuhatan. (Col. 4:14) Ginasugid sang libro ang natabo sa sulod sang mga 28 ka tuig, sugod sa pagkayab ni Jesus sang 33 C.E. asta sa pagkapriso ni apostol Pablo sa Roma sang mga 61 C.E. Ang pagbag-o sang pagsaysay ni Lucas halin sa “sila” pakadto sa “kami” nagapakita nga ara sia sa madamo nga mga hitabo nga iya ginasaysay. (Binu. 16:8-10; 20:5; 27:1) Bilang isa ka maid-id nga researcher, wala sing duhaduha nga nakuha ni Lucas ang impormasyon halin mismo kay Pablo, kay Bernabe, kay Felipe, kag sa iban pa nga ginsambit sa libro.

¹⁴ Ano ang kaundan sang Mga Binuhatan? Ginsulat ni Lucas sa iya Ebanghelyo ang ginsiling kag ginhimo ni Jesus. Pero sa libro sang Mga Binuhatan, ginreport ni  Lucas ang ginsiling kag ginhimo sang mga sumulunod ni Jesus. Gani ang Mga Binuhatan parte sa mga tawo nga nakahimo sing tumalagsahon nga hilikuton, bisan pa nga para sa iban ang madamo sa ila ‘ordinaryo lang nga mga tawo kag indi edukado.’ (Binu. 4:13) Bilang sumaryo, ining libro nga ginsulat ni Lucas sa bulig sang balaan nga espiritu sang Dios nagasugid sa aton kon paano gintukod ang Cristianong kongregasyon kag kon paano ini nag-uswag. Ginapakita sang Mga Binuhatan kon paano nagbantala ang mga Cristiano sang unang siglo, pati man ang ila mga pamaagi kag ang ila panimuot. (Binu. 4:31; 5:42) Ginapatalupangod sini ang papel sang balaan nga espiritu sa pagpalapnag sang maayong balita. (Binu. 8:29, 39, 40; 13:1-3; 16:6; 18:24, 25) Ginapadaku sang Mga Binuhatan ang tema sang Biblia, nga nagalakip sang pagpakabalaan sang ngalan sang Dios paagi sa iya Ginharian nga pagagamhan sang Cristo. Ginapakita man sini ang madinalag-on nga paglapnag sang mensahe sang Ginharian bisan may mapintas nga paghingabot.—Binu. 8:12; 19:8; 28:30, 31.

15. Paano kita makabenepisyo sa pagtuon sa Mga Binuhatan?

¹⁵ Makalilipay gid kag makapabakod sing pagtuo ang pagtuon sa libro sang Mga Binuhatan sa Biblia! Kon pamalandungan naton ang halimbawa sang kaisog kag kapisan sang una nga mga sumulunod sang Cristo, matandog gid ang aton tagipusuon. Mapalig-on kita nga ilugon ang pagtuo sang aton mga kauturan sang unang siglo. Makabulig ini sa aton sa pagtuman sang aton hilikuton nga ‘kadtuan ang mga tawo kag tudluan sila agod mangin disipulo.’ Ang libro nga imo ginabasa subong gindesinyo para buligan ka nga matun-an sing maayo ang Mga Binuhatan.

16. Ano ang tatlo ka tulumuron sini nga libro?

¹⁶ Ano ang katuyuan sini nga libro? Ang tatlo ka tulumuron sini nga libro amo ang (1) para magbakod pa gid ang aton pagsalig nga ginabuligan ni Jehova paagi sa iya balaan nga espiritu ang pagbantala sang Ginharian kag pagtudlo sa mga tawo para mangin disipulo, (2) para palig-unon kita nga mangin mapisan pa gid sa ministeryo paagi sa pagtuon sa halimbawa sang mga sumulunod sang Cristo sang unang siglo, kag (3) para respetuhon pa gid naton ang organisasyon ni Jehova kag ang mga nagapanguna sa pagbantala kag nagatatap sa mga kongregasyon.

17, 18. Paano ginpasunod kag ginplastar ini nga libro, kag ano nga mga bahin sini ang makabulig sa imo personal nga pagtuon sing Biblia?

¹⁷ Paano ginpasunod kag ginplastar ini nga libro? Matalupangdan mo nga may walo ini ka seksion nga ang kada isa nagabinagbinag sang isa ka bahin sang Mga Binuhatan. Ang mga kapitulo sa kada seksion indi magbinagbinag sang kada bersikulo sang Mga Binuhatan, kundi magapokus ini sa mga leksion nga makuha sa mga hitabo nga makita sa sini nga libro sa Biblia. Kag magabulig ini sa aton nga maintiendihan kon paano naton himuon ang aton mga natun-an. Sa umpisa sang kada kapitulo, may malip-ot nga paathag sang panguna nga punto sina nga kapitulo kag makita man ang teksto kon diin nga porsyon sang Mga Binuhatan ang pagabinagbinagon.

¹⁸ May iban pa nga bahin sini nga libro nga makabulig gid sa personal nga pagtuon sing Biblia. Ang matahom nga mga piktyur parte sa makawiwili nga mga  hitabo sa Mga Binuhatan makabulig sa imo nga maimadyin ang nagakatabo samtang ginabinagbinag mo ang kasaysayan sa Biblia. Madamo nga kapitulo ang may mga kahon nga nagahatag sing dugang nga impormasyon. Ang pila ka kahon may impormasyon parte sa isa ka karakter sa Biblia nga ang pagtuo dapat gid naton ilugon. Ang iban may dugang nga detalye parte sa mga lugar, hitabo, kustombre, ukon mga tawo nga ginsambit sa Mga Binuhatan.

19. Ano nga pag-usisa sa kaugalingon ang dapat naton himuon kon kaisa?

¹⁹ Ini nga libro makabulig sa imo nga mausisa sing maayo ang imo kaugalingon. Bisan daw ano ka na kadugay nga manugbantala sang Ginharian, maayo nga magpamalandong ka kon kaisa kag analisahon ang imo mga prioridad sa kabuhi kag ang imo pagtan-aw sa Cristianong ministeryo. (2 Cor. 13:5) Pamangkuta ang imo kaugalingon: ‘Para sa akon, hilingagawon bala pirme ang ministeryo? (1 Cor. 7:29-31) Nagapati gid bala ako sa akon ginabantala nga maayong balita kag mapisan bala ako sa paghimo sini? (1 Tes. 1:5, 6) Ginahimo ko bala ang tanan ko nga masarangan sa pagbantala kag pagtudlo sa mga tawo para mangin disipulo?’—Col. 3:23.

20, 21. Ngaa hilingagawon gid ang aton hilikuton, kag ano dapat ang aton mangin determinasyon?

²⁰ Dumdumon naton pirme nga importante gid ang ginsugo sa aton nga hilikuton nga pagbantala kag pagtudlo sa mga tawo para mangin disipulo. Samtang nagaligad ang inadlaw, mas nangin hilingagawon pa gid ini nga hilikuton. Madasig nga nagahilapit ang katapusan sini nga sistema. Ara gid sa katalagman ang madamo nga kabuhi subong. Wala kita makahibalo kon daw ano pa kadamo ang may husto nga panimuot nga magbaton sang kamatuoran. (Binu. 13:48) Salabton naton nga buligan sila antes maulihi ang tanan.—1 Tim. 4:16.

²¹ Gani importante gid nga sundon naton ang halimbawa sang mapisan nga mga manugbantala sang Ginharian sang unang siglo. Kabay pa nga ang imo pagtuon sing maayo sa sini nga libro magapahulag sa imo nga mangin mas mapisan kag mas maisog sa pagbantala. Kag kabay nga mangin determinado ka pa gid nga magpadayon sa “pagpanaksi sing maid-id tuhoy sa Ginharian sang Dios.”—Binu. 28:23.