1. Sa ano pareho ang mga Cristiano sadto kag ang mga Saksi ni Jehova subong?

 MAPISAN sila nga nagabantala. Ginpahulag sila sang ila tagipusuon nga batunon ang bulig kag paggiya sang balaan nga espiritu. Wala sila mapauntat sang paghingabot. Kag ginpakamaayo gid sila sang Dios. Amo ini ang ginhimo kag naeksperiensiahan sang mga Cristiano sadto kag sang mga Saksi ni Jehova subong.

2, 3. Ngaa espesyal gid ang libro sang Mga Binuhatan?

² Sigurado nga napabakod ka sa makapalig-on sing pagtuo nga mga hitabo nga narekord sa libro sa Biblia nga Mga Binuhatan sang mga Apostoles! Espesyal gid ini nga libro, kay amo lang ini ang kasaysayan sang unang siglo nga mga Cristiano nga gingiyahan sang Dios ang pagsulat, pagkatapos nga nagkayab si Jesus sa langit.

³ Mabasa sa libro sang Mga Binuhatan ang ngalan sang 95 ka tawo halin sa 32 ka kadutaan, 54 ka siudad, kag 9 ka isla. Makakulunyag ini nga istorya parte sa mga tawo—ordinaryo nga mga tawo, matinaastaason nga mga miembro sang butig nga relihion, bugalon nga mga pulitiko, kag mapintas nga mga manughingabot. Pero ang pinakaimportante, parte ini sa imo mga kauturan sang unang siglo nga may kinaandan man nga mga problema sa kabuhi pero mapisan nga nagbantala sing maayong balita.

4. Ngaa pamatyag naton suod kita kay apostol Pablo, kay Tabita, kag sa iban pa nga matutom nga mga saksi sadto?

⁴ Halos 2,000 ka tuig na ang nagligad halin sang panahon sang mapisan nga mga apostoles nga sanday Pedro kag Pablo, sang hinigugma nga manugbulong nga si Lucas, sang maalwan nga si Bernabe, sang maisog nga si Esteban, sang maluluy-on nga si Tabita, sang maabiabihon nga si Lidia, kag sang madamo pa nga matutom nga mga saksi. Bisan sang una pa sila nagkabuhi, pamatyag naton suod kita sa ila. Ngaa? Bangod pareho kita nga ginsugo nga tudluan ang mga tawo para mangin disipulo. (Mat. 28:19, 20) Daku gid nga dungog naton nga nakapakigbahin kita sa sini!

5. Diin nagsugod sa pagbantala ang mga sumulunod sadto ni Jesus?

⁵ Hunahunaa ang sugo ni Jesus sa iya mga sumulunod. “Magabaton kamo sing gahom kon ang balaan nga espiritu mag-abot sa inyo,” siling niya, “kag  mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Una, ginhatagan sang gahom sang balaan nga espiritu ang mga disipulo para mangin saksi “sa Jerusalem.” (Binu. 1:1–8:3) Masunod, sa paggiya sang espiritu, nangin mga saksi sila “sa bug-os nga Judea kag Samaria.” (Binu. 8:4–13:3) Dayon, dal-on nila ang maayong balita “tubtob sa pinakamalayo nga bahin sang duta.”—Binu. 13:4–28:31.

6, 7. Sa aton ministeryo, ano ang bentaha naton sa aton mga kauturan sang unang siglo?

⁶ Ang imo mga kauturan sang unang siglo wala sing kompleto nga Biblia nga magamit nila sa ila pagbantala. Ang Ebanghelyo ni Mateo natigayon lamang sang mga 41 C.E. Natapos na ang pila ka sulat ni Pablo antes nakompleto ang Mga Binuhatan sang mga 61 C.E. Pero ang mga Cristiano sadto wala sing kompleto nga kopya sang Balaan nga Kasulatan kag wala man sila sing mahatag nga mga publikasyon sa mga interesado. Antes mangin mga disipulo ni Jesus, nabatian sang Judiyo nga mga Cristiano ang Hebreong Kasulatan nga ginabasa sa sinagoga. (2 Cor. 3:14-16) Pero bisan pa nabatian nila ini, dapat mapisan sila nga mga estudyante, kay kinahanglan nga saulado nila ang mga teksto.

⁷ Subong, halos tanan kita may kaugalingon nga Biblia kag may madamo nga base sa Biblia nga mga literatura. Ginatudluan naton ang mga tawo para mangin mga disipulo sila paagi sa pagbantala sing maayong balita sa 240 ka kadutaan kag sa madamo nga lenguahe.

8, 9. (a) Ano ang nahimo sang mga disipulo ni Jesus sa bulig sang balaan nga espiritu? (b) Ano ang ginahimo sang matutom nga ulipon sa bulig sang espiritu sang Dios?

⁸ Sang ginsugo ni Jesus ang iya mga disipulo nga magpanaksi, sia nagsiling: “Magabaton kamo sing gahom kon ang balaan nga espiritu mag-abot sa inyo.” Sa paggiya sang espiritu ukon sang aktibo nga puersa sang Dios, ang mga sumulunod ni Jesus mangin mga saksi niya sa bilog nga duta sa ulihi. Paagi sa balaan nga espiritu, sanday Pedro kag Pablo nagpang-ayo, nagpagua sang mga demonyo, kag nagpangbanhaw pa gani! Pero may mas importante nga katuyuan ang pagbaton sing gahom paagi sa balaan nga espiritu. Sa bulig sini, nasugid sang mga apostoles kag sang iban nga mga disipulo ang sibu nga ihibalo nga nagakahulugan sing kabuhi nga wala sing katapusan.—Juan 17:3.

⁹ Sang Pentecostes 33 C.E., ang mga disipulo ni Jesus naghambal sing “lainlain nga lenguahe, suno sa lenguahe nga ginhatag sa ila sang espiritu.” Gani nagpanaksi sila parte sa “gamhanan nga mga binuhatan sang Dios.” (Binu. 2:1-4, 11) Wala na sing milagro subong para makahambal kita sing iban nga lenguahe. Pero sa bulig sang espiritu sang Dios, ang matutom nga ulipon nagahimo sing literatura sa Biblia sa madamo nga lenguahe. Halimbawa, minilyon ka kopya sang Ang Lalantawan kag Magmata! ang ginaimprinta kada bulan, kag sa aton website nga jw.org, may ara mga publikasyon kag mga video nga base sa Biblia sa sobra 1,000 ka lenguahe. Tanan ini nakabulig sa aton nga mabantala ang “gamhanan nga mga binuhatan sang Dios” sa mga tawo halin sa tanan nga pungsod, tribo, kag lenguahe.—Bug. 7:9.

10. Sugod sang 1989, ano na ang nahimo parte sa pag-translate sang Biblia?

 ¹⁰ Sugod sang 1989, ang matutom nga ulipon nagpokus sa pag-translate sang New World Translation of the Holy Scriptures sa madamo nga lenguahe. Ini nga Biblia na-translate na sa sobra 200 ka lenguahe, kag minilyon ka kopya ang naimprinta na, kag madamo pa ang pagaimprintahon. Nangin madinalag-on ini nga mga panikasog sa bulig lamang sang Dios kag sang iya espiritu.

11. Ano na ang nahimo parte sa pag-translate sang mga publikasyon sang mga Saksi?

¹¹ Ang pag-translate ginahimo subong sang linibo ka Cristiano nga mga boluntaryo sa sobra sa 150 ka pungsod kag kadutaan. Indi kita dapat matingala sa sini, kay wala na sing iban pa nga organisasyon sa duta nga ginagiyahan sang balaan nga espiritu sa “pagpanaksi sing maid-id” sa bilog nga kalibutan. Ang ila mensahe parte kay Jehova nga Dios, sa iya Mesianikong Hari, kag sa natukod na nga Ginharian sa langit!—Binu. 28:23.

12. Paano nagbantala si Pablo kag ang iban nga Cristiano?

¹² Sang nagpanaksi si Pablo sa mga Judiyo kag mga Gentil sa Antioquia sa Pisidia, “nagtuo ang tanan nga may husto nga panimuot sa pagtigayon sing kabuhi nga wala sing katapusan.” (Binu. 13:48) Sa katapusan sang libro sang Mga Binuhatan, ginsulat ni Lucas nga si Pablo ‘nagabantala sang Ginharian sang Dios . . . nga may kahilwayan sa paghambal, kag wala sing upang.’ (Binu. 28:31) Sa diin nagabantala ang apostol? Sa Roma mismo, ang kapital sang isa ka kagamhanan sa kalibutan! Bangod ginbuligan kag gingiyahan sang balaan nga espiritu, ang mga sumulunod sadto ni Jesus nakabantala sa bisan ano nga paagi lakip ang pagpamulongpulong.

13. Ngaa dapat kita mangamuyo kon ginahingabot kita?

¹³ Sang ginhingabot ang mga disipulo ni Jesus sadto, nangabay sila kay Jehova nga hatagan sila sing kaisog. Ano ang resulta? Napuno sila sang balaan nga espiritu kag ginpabakod nga maghambal sang pulong sang Dios nga may kaisog. (Binu. 4:18-31) Makapangayo man kita sing kaalam kag kusog para makapadayon sa pagbantala bisan ginahingabot. (Sant. 1:2-8) Bangod ginapakamaayo kita sang Dios kag ginabuligan sang iya espiritu, padayon kita nga nagabantala sang Ginharian. Wala sing makapauntat sang pagbantala, bisan ang masupog nga pagpamatok ukon mapintas nga paghingabot. Kon ginahingabot kita, dapat mangamuyo kita para sa balaan nga espiritu kag para sa kaalam kag kaisog sa pagbantala sang maayong balita.—Luc. 11:13.

14, 15. (a) Ano ang resulta bangod “sa paghingabot nga natabo may kaangtanan kay Esteban”? (b) Sa aton tion, paano nahibaluan sang madamo nga tawo sa Siberia ang kamatuoran?

¹⁴ Si Esteban maisog nga nagpanaksi antes ginpatay sang iya mga kaaway. (Binu. 6:5; 7:54-60) Sang natabo ang ‘daku gid nga paghingabot’ sadto, ang tanan nga disipulo magluwas sa mga apostoles nag-alaplaag sa Judea kag Samaria. Pero wala mag-untat ang pagbantala. Si Felipe nagkadto sa Samaria kag ‘ginbantala niya sa mga tawo ang tuhoy sa Cristo.’ Maayo gid ang resulta sang iya pagbantala. (Binu. 8:1-8, 14, 15, 25) Dugang pa, ginasugiran kita: “Ang mga nag-alaplaag bangod sa paghingabot nga natabo may kaangtanan kay Esteban nakalab-ot tubtob sa Fenicia, Cipre, kag  Antioquia. Nagbantala sila sa mga Judiyo lang. Apang, ang pila sa ila nga halin sa Cipre kag Cirene nga nagkadto sa Antioquia nagbantala sing maayong balita tuhoy kay Ginuong Jesus sa mga tawo nga nagahambal sing Griego.” (Binu. 11:19, 20) Naglapnag pa gani sadto ang pagbantala sang Ginharian bangod sang paghingabot.

¹⁵ Amo man subong ang natabo sa ginatawag anay nga Soviet Union. Linibo ka Saksi ni Jehova ang gintapok sa Siberia ilabi na sang dekada ’50. Bangod naglapta sila didto, padayon man nga nagalapta ang maayong balita sa sinang malapad nga lugar. Indi gid makakita sing inugplete ang madamo nga Saksi para maglakbay sing 10,000 kilometros para magbantala sang maayong balita! Pero ang gobierno mismo ang nagpadala sa ila didto. “Bilang resulta,” siling sang isa ka brother, “ang mga awtoridad mismo ang nagpaposible nga mahibaluan sang sinsero nga mga tawo sa Siberia ang kamatuoran.”

16, 17. Ano nga pamatuod ang ginpakita sang Mga Binuhatan parte sa pagpakamaayo ni Jehova sa hilikuton nga pagbantala?

¹⁶ Maathag nga ginpakamaayo gid ni Jehova ang mga Cristiano sadto. Si Pablo kag ang iban pa ang nagtanom kag nagbunyag, “apang ang Dios amo ang nagapatubo sini.” (1 Cor. 3:5, 6) Ang mga report sa Mga Binuhatan nagapakita sang mga pamatuod sining pag-uswag bangod ginapakamaayo ni Jehova ang hilikuton nga pagbantala. Halimbawa, “padayon nga naglapnag ang pulong sang Dios, kag nagdamo pa gid ang mga disipulo sa Jerusalem.” (Binu. 6:7) Samtang nagalapnag ang pagbantala, “ang kongregasyon sa bug-os nga Judea kag Galilea kag Samaria nangin malinong, kag napalig-on ini. Nagdamo ang mga disipulo bangod gintuman nila si Jehova kag ginpabakod sila sang balaan nga espiritu.”—Binu. 9:31.

¹⁷ Sa Antioquia sa Siria, ang mga Judiyo kag Griego nakabati sang kamatuoran halin sa maisog nga mga saksi. “Dugang pa,” siling sang rekord, “kaupod nila si Jehova, kag madamo ang nangin tumuluo kag nagsunod sa Ginuo.” (Binu. 11:21) Parte sa dugang nga pag-uswag sa sini nga siudad, aton mabasa: “Ang pulong ni Jehova padayon nga naglapnag kag nagdamo pa ang mga tumuluo.” (Binu. 12:24) Kag bangod sa maid-id nga pagpanaksi ni Pablo kag sang iban pa sa mga Gentil, “padayon nga naglapnag kag nagmadinalag-on ang pulong ni Jehova sa gamhanan nga paagi.”—Binu. 19:20.

18, 19. (a) Ngaa nahibaluan naton nga ‘kaupod naton si Jehova’? (b) Maghatag sing halimbawa nga ginabuligan ni Jehova ang iya katawhan.

¹⁸ Maathag man nga ‘kaupod naton si Jehova’ subong. Amo nga madamo gid ang nagatuo kag nagasimbulo sang ila dedikasyon sa Dios paagi sa pagpabawtismo. Dugang pa, paagi sa bulig kag pagpakamaayo sang Dios nabatas naton ang mabudlay kag kon kaisa grabe pa kapintas nga mga paghingabot. Paagi man sini, nagmadinalag-on kita sa aton ministeryo pareho sang nahimo ni Pablo kag sang mga Cristiano sadto. (Binu. 14:19-21) Pirme kita ginabuligan ni Jehova nga Dios. Ang iya “mga butkon nga magapabilin tubtob san-o” wala nagauntat sa pagbulig sa aton sa tanan naton nga kabudlayan. (Deut. 33:27) Dapat man naton dumdumon nga bangod sang iya halangdon nga ngalan, indi gid pagpabay-an ni Jehova ang iya katawhan.—1 Sam. 12:22; Sal. 94:14.

 ¹⁹ Sa pag-ilustrar: Bangod padayon nga nagpanaksi si Brother Harald Abt, ginpriso sia sang mga Nazi sa Sachsenhausen sang World War II. Sang Mayo 1942, ginkadtuan sang mga Gestapo sa ila balay si Elsa nga iya asawa, ginkuha ang ila bata nga babayi, kag ginpriso si Elsa sa sarisari nga mga prisuhan. “May natun-an ako nga importante nga leksion sa pila ka tuig ko nga pagkapriso sa Germany,” siling ni Elsa. “Ini amo nga mapalig-on gid kita sang espiritu ni Jehova bisan sa pinakamabudlay nga pagtilaw! Antes ako naaresto, nabasa ko ang sulat sang isa ka sister nga nagasiling nga kon ara kita sa mabudlay katama nga pagtilaw, ang espiritu ni Jehova nagahatag sa imo sang kalinong. Abi ko nagapasobra lang sia. Pero sang ako na ang gintilawan, narealisar ko nga matuod gid ang iya ginsiling. Amo gid sini ang natabo sa akon. Mabudlay ini imadyinon kon wala mo ini naeksperiensiahan. Pero, nabatyagan ko gid ini.”

20. Ano ang ginhimo ni Pablo samtang napriso sia sa balay, kag paano ini makapalig-on sa pila naton ka kauturan?

²⁰ Sa katapusan nga bahin sang Mga Binuhatan, ginasugiran kita nga si Pablo mapisan ‘nga nagabantala sang Ginharian sang Dios.’ (Binu. 28:31) Bangod ginpriso sia sa balay, indi sia makapamalaybalay sa Roma para magbantala. Pero padayon sia nga nagabantala sa tanan nga nagabisita sa iya. Subong, ang pila naton ka pinalangga nga mga kauturan indi makahalin sa ila balay, mahimo nga nagahigda na lang, ukon mahimo nga ara sila sa mga nursing home bangod tigulang na, may balatian, ukon baldado. Pero mabaskog gihapon ang ila gugma sa Dios kag handum nga magbantala. Puede naton mapangabay ang aton Amay sa langit nga kuntani may maistorya sila nga gusto magtuon parte sa iya makatilingala nga mga katuyuan.

21. Ngaa ginasakuan naton ang aton hilikuton nga pagbantala?

²¹ Kalabanan sa aton makasarang magpamalaybalay kag makahimo sang iban pa nga paagi sang pagbantala para tudluan ang mga tawo nga mangin disipulo. Gani himuon naton ang tanan naton nga masarangan para mangin maayo nga mga manugbantala sang Ginharian, nga nagapakigbahin sa bilog kalibutan nga pagpanaksi “tubtob sa pinakamalayo nga bahin sang duta.” Dapat naton dumdumon nga ginasakuan ini nga hilikuton, kay “ang tanda” sang presensia sang Cristo nagakatabo na gid. (Mat. 24:3-14) Dapat naton kalitan ang tion. Madamo gid kita subong sing hilimuon sa “hilikuton sang Ginuo.”—1 Cor. 15:58.

22. Ano ang dapat naton himuon samtang nagahulat kita sa adlaw ni Jehova?

²² Samtang nagahulat kita nga “mag-abot ang daku kag makahalawhaw nga adlaw ni Jehova,” kabay nga determinado kita nga mangin maisog kag matutom nga saksi. (Joel 2:31) Madamo pa kita sing masapwan nga mga tawo pareho sang mga taga-Berea nga ‘nalangkag gid sa pagbaton sa pulong sang Dios.’ (Binu. 17:10, 11) Gani, kabay nga manaksi kita asta hambalan kita sang Dios: “Dalayawon gid ang ginhimo mo, maayo kag matutom nga ulipon!” (Mat. 25:23) Kon mapisan kita nga makigbahin sa hilikuton nga pagtudlo sa mga tawo para mangin disipulo subong kag padayon nga mangin matutom kay Jehova, magakalipay gid kita asta san-o kay daku gid nga kadungganan ang “pagpanaksi sing maid-id tuhoy sa Ginharian sang Dios!”