1-3. Ano nga palanan-awon ang nakita ni Pedro, kag ngaa dapat naton mahangpan ang kahulugan sini?

 TUIG 36 C.E. Tion sang tigragas kag ang mainit nga silak nagatupa kay Pedro samtang nagapangamuyo sia sa matapan nga atop sang balay malapit sa pantalan nga siudad sang Joppe. Pila na sia ka adlaw nga nagadayon sa sini nga balay. Ang iya pagdayon diri nagapakita nga wala sia sing pagpasulabi. Ang tag-iya sang balay nga si Simon isa ka manugpanit, kag ang pila ka Judiyo indi gusto makig-upod sa tawo nga amo sini ang obra. a Sa indi madugay, matun-an pa gid ni Pedro kon paano ginapakita ni Jehova nga wala Sia sing ginapasulabi.

² Samtang nagapangamuyo si Pedro, nakakita sia sing palanan-awon. Magalalain gid ang bisan sin-o nga Judiyo sa iya nakita. Nagbukas ang langit kag nagapaubos sa duta ang daw malapad nga habol nga may indi matinlo nga mga sapat base sa Kasuguan. Sang ginsilingan nga mag-ihaw kag magkaon, si Pedro nagsabat: “Wala pa gid ako makakaon sing bisan ano nga nadagtaan kag indi matinlo.” Tatlo ka beses sia ginsilingan: “Indi na pagtawga nga nadagtaan ang mga butang nga natinluan na sang Dios.” (Binu. 10:14-16) Nagpalibog si Pedro kon ano ang buot silingon sini nga palanan-awon, pero ginbuligan sia ni Jehova nga mahangpan ini.

³ Ano ang buot silingon sang palanan-awon ni Pedro? Importante nga mahangpan man naton ang kahulugan sini, kay ginapakita sang palanan-awon kon ano ang pagtan-aw ni Jehova sa mga tawo. Para makapadayon kita sa pagpanaksi sing maid-id tuhoy sa Ginharian sang Dios, kinahanglan tun-an naton nga tan-awon ang mga tawo base sa pagtan-aw ni Jehova sa ila. Para mahangpan ang kahulugan sang palanan-awon ni Pedro, binagbinagon naton ang mga natabo antes kag pagkatapos sini nga kasaysayan.

4, 5. Sin-o si Cornelio, kag ano ang natabo sang nagapangamuyo sia?

⁴ Wala makahibalo si Pedro nga sang nagligad nga adlaw, didto sa Cesarea,  nga mga 50 kilometros sa aminhan nakakita man sing palanan-awon si Cornelio. Opisyal sia sang mga soldado sang Roma kag “debotado sia nga tawo.” b Maayo man sia nga halimbawa sa pag-atipan sa iya pamilya, kay ‘mahinadlukon sia sa Dios pati ang bug-os niya nga panimalay.’ Si Cornelio indi Judiyo nga proselita. Isa sia ka wala matuli nga Gentil. Pero, mabinuligon sia sa imol nga mga Judiyo kag pirme niya sila ginahatagan sang kuarta ukon sang iban pa nga regalo. Ining sinsero nga tawo ‘pirme nagapangamuyo sing hanuot sa Dios.’—Binu. 10:2.

⁵ Sang mga alas 3:00 sang hapon, nagapangamuyo si Cornelio sang nakita niya ang palanan-awon diin ginsilingan sia sang anghel: “Ginpamatian sang Dios ang imo mga pangamuyo kag nakita niya ang imo pagkamabinuligon sa mga imol.” (Binu. 10:4) Base sa ginsiling sang anghel, ginsugo ni Cornelio ang pila ka lalaki para sugaton si apostol Pedro. Sa indi madugay, maeksperiensiahan ni Cornelio ang isa ka kahimtangan nga wala pa gid maeksperiensiahan sang isa ka Gentil. Makabaton sia sang mensahe sang kaluwasan.

6, 7. (a) Magsugid sang eksperiensia nga nagapakita nga ginasabat sang Dios ang pangamuyo sang mga sinsero nga nagapangita sang kamatuoran parte sa iya. (b) Ano ang matun-an naton sa sini nga mga eksperiensia?

⁶ Ginasabat bala subong sang Dios ang pangamuyo sang mga sinsero nga nagapangita sang kamatuoran parte sa iya? Binagbinaga ang halimbawa. Ang isa ka babayi sa Albania nagbaton sing kopya sang Ang Lalantawan nga may artikulo parte sa pagpadaku sa kabataan. c Ginsilingan niya ang Saksi nga nagpanuktok sa iya puertahan: “Mapati ka bala nga nagapangamuyo ako sa Dios nga buligan ako sa pagpadaku sang akon mga bata nga babayi? Ginpadala ka niya! Ang ginhatag mo nga impormasyon sa akon amo gid ang akon kinahanglan!” Nag-Bible study ang babayi kag ang iya mga bata, kag sang ulihi nag-Bible study man ang iya bana.

⁷ Talagsa lang bala ini nga halimbawa? Indi! Ini nga klase sang eksperiensia pirme nagakatabo sa bilog nga kalibutan, amo nga indi masiling nga natabuan lang ini. Gani  ano ang matun-an naton? Una, ginasabat ni Jehova ang pangamuyo sang mga nagapangita gid sa iya. (1 Hari 8:41-43; Sal. 65:2) Ikaduha, ginabuligan kita sang mga anghel sa aton pagbantala.—Bug. 14:6, 7.

8, 9. Ano ang ginsugid sang espiritu sang Dios kay Pedro, kag ano ang iya reaksion?

⁸ Sa atop, “nagapalibog si Pedro” kon ano ang kahulugan sang palanan-awon sang nag-abot sa balay ang mga tawo nga ginpakadto ni Cornelio. (Binu. 10:17) Maupod bala si Pedro sa sini nga mga tawo kag magsulod sa balay sang isa ka Gentil bisan pa tatlo ka beses sia nga nangindi sa pagkaon sang indi matinlo nga mga pagkaon base sa Kasuguan? Gingamit sang Dios ang iya balaan nga espiritu para isugid kay Pedro kon ano ang himuon niya. Ginsugo si Pedro: “May tatlo ka tawo nga nagapangita sa imo. Magpanaug ka kag mag-upod sa ila. Indi ka magduhaduha, bangod ako ang nagpakadto sa ila sa imo.” (Binu. 10:19, 20) Ang palanan-awon nga nakita ni Pedro parte sa isa ka suludlan nga daw malapad nga habol, sigurado nga nakabulig sa iya nga sundon ang direksion sang balaan nga espiritu sang Dios.

⁹ Sang nahibaluan ni Pedro nga si Cornelio ginsugo sang Dios nga ipasugat sia, gin-agda niya ang mensahero nga mga Gentil nga magsulod kag “gin-abiabi sila subong mga bisita niya.” (Binu. 10:23a) Ginbag-o na ni Pedro ang iya panghunahuna sang nabal-an niya kon ano ang gusto sang Dios.

10. Paano ginagiyahan ni Jehova ang iya katawhan, kag ano ang aton ipamangkot sa aton kaugalingon?

¹⁰ Asta subong, amat-amat nga ginagiyahan ni Jehova ang iya katawhan. (Hulu. 4:18) Paagi sa iya balaan nga espiritu, ginagiyahan niya ang “matutom kag mainandamon nga ulipon.” (Mat. 24:45) Kon kaisa, makabaton kita sing dugang nga pagpaathag parte sa Pulong sang Dios ukon sing mga pagbag-o sa mga kahimusan sa organisasyon. Dapat pamangkuton naton ang aton kaugalingon: ‘Ano ang reaksion ko sa sini nga mga pagbag-o? Magapasakop bala ako sa paggiya sang espiritu sang Dios sa sini nga mga butang?’

11, 12. Ano ang ginhimo ni Pedro pag-abot niya sa Cesarea, kag ano ang iya natun-an?

¹¹ Pagkaaga, nagkadto sa Cesarea si Pedro kag ang siam niya ka kaupod—ang tatlo ka mensahero nga ginpadala ni Cornelio kag ang “anom ka [Judiyo nga] kauturan” halin sa Joppe. (Binu. 11:12) Samtang nagapaabot kay Pedro, gintipon ni Cornelio “ang iya mga paryente kag suod nga mga abyan” nga posible mga Gentil tanan. (Binu. 10:24) Pag-abot ni Pedro, ginhimo niya ang butang nga abi niya sadto indi gid niya mahimo: Nagsulod sia sa balay sang wala matuli nga Gentil! Si Pedro nagpaathag: “Nahibaluan gid ninyo nga indi tugot sa kasuguan sang mga Judiyo nga makig-upod ukon magpalapit ang isa ka Judiyo sa isa ka tawo nga tuhay sing rasa, apang ginpakita sa akon sang Dios nga indi ko dapat kabigon nga nadagtaan ukon indi matinlo ang bisan sin-o nga tawo.” (Binu. 10:28) Natun-an na subong ni Pedro nga ang leksion sa palanan-awon indi lamang parte sa klase sang pagkaon nga dapat kaunon. Natun-an man niya nga ‘indi pagkabigon nga indi matinlo ang bisan sin-o nga tawo,’ bisan ang Gentil.

 ¹² Ang tanan nga nagtipon interesado sa ihambal ni Pedro. “Yari kami tanan karon sa atubangan sang Dios agod magpamati sa tanan nga butang nga ginsugo sa imo ni Jehova nga ihambal sa amon,” siling ni Cornelio. (Binu. 10:33) Imadyina kon ano ang imo batyagon kon mabatian mo ini sa isa ka interesado nga tawo! Nagsugod si Pedro sa sining makatalandog nga mga tinaga: “Nahangpan ko na gid karon nga ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.” (Binu. 10:34, 35) Natun-an ni Pedro nga wala sing pinasulabi ang Dios sa mga tawo bisan ano man ang ila rasa, nasyonalidad, hitsura ukon kahimtangan sa kabuhi. Ginpanaksihan sila dayon ni Pedro parte sa ministeryo, kamatayon, kag pagkabanhaw ni Jesus.

13, 14. (a) Sang 36 C.E., nangin Cristiano si Cornelio kag ang iban pa nga mga Gentil. Ano ang ginapakita sini? (b) Ngaa indi gid naton paghukman ang mga tawo base sa hitsura ukon kahimtangan sa kabuhi?

¹³ Dayon, may natabo nga wala ginapaabot: “Samtang nagahambal pa si Pedro,” nakabaton sing balaan nga espiritu “ang mga tawo sang mga pungsod.” (Binu. 10:44, 45) Sa sini lang nga okasyon nga ginsambit sang Kasulatan nga ginbubo ang balaan nga espiritu antes sang bawtismo. Nahibaluan ni Pedro nga tanda ini nga ginabaton sila sang Dios, gani “ginsugo niya [ang mga Gentil nga nagatipon didto] nga magpabawtismo.” (Binu. 10:48) Sang nangin Cristiano ang mga Gentil sang 36 C.E., ginapakita sini nga natapos na ang tion nga ginahatagan sang Dios sang espesyal nga pabor ang mga Judiyo. (Dan. 9:24-27) Paagi sa pagpanguna sa sining okasyon, gingamit ni Pedro ang ikatlo kag katapusan sa “mga yabi sang Ginharian sang langit.” (Mat. 16:19) Ini nga yabi nagbukas sang puertahan para ang wala matuli nga mga Gentil may kahigayunan nga mangin hinaplas sang espiritu nga mga Cristiano.

¹⁴ Bilang mga manugbantala sang Ginharian subong, nahibaluan naton nga “wala sing ginapasulabi ang Dios.” (Roma 2:11) Kabubut-on niya nga “ang tanan nga sahi sang tawo maluwas.” (1 Tim. 2:4) Gani indi gid naton paghukman ang mga tawo base sa hitsura ukon kahimtangan sa kabuhi. Ang sugo sa aton amo nga manaksi sing maid-id tuhoy sa Ginharian sang Dios, kag nagalakip ini sa pagbantala sa tanan nga tawo, bisan ano man ang ila rasa, nasyonalidad, hitsura, ukon relihion.

15, 16. Ngaa ginsaway sang pila ka Judiyo nga mga Cristiano si Pedro, kag paano niya ginpaathag ang iya ginhimo?

¹⁵ Nagkadto dayon si Pedro sa Jerusalem kay sigurado nga gusto niya isugid ang natabo. Pero naunahan sia sang balita nga ang wala matuli nga mga Gentil ‘nagbaton sang pulong sang Dios.’ Pag-abot ni Pedro, “ang mga nagasakdag sa pagtuli nagsaway sa iya.” Nagalalain sila bangod nagsulod sia “sa balay sang mga tawo nga wala matuli kag nagkaon upod sa ila.” (Binu. 11:1-3) Wala naakig ang mga Judiyo nga nangin mga sumulunod sang Cristo ang mga Gentil. Pero gusto sang Judiyo nga mga disipulo nga dapat tumanon sang mga Gentil ang Kasuguan, lakip ang pagpatuli, para batunon ni Jehova ang ila pagsimba. Maathag nga  ang pila ka Judiyo nga disipulo nabudlayan magbaton nga natapos na ang Mosaikong Kasuguan.

¹⁶ Paano ginpaathag ni Pedro ang iya ginhimo? Base sa Binuhatan 11:4-16, ginsambit niya ang apat ka pamatuod sang paggiya sang Dios: (1) ang palanan-awon halin sa Dios nga nabaton niya (Bersikulo 4-10); (2) ang sugo sang espiritu sang Dios (Bersikulo 11, 12); (3) ang pagkadto sang anghel kay Cornelio (Bersikulo 13, 14); kag (4) ang pagbubo sang balaan nga espiritu sa mga Gentil. (Bersikulo 15, 16) Gintapos ni Pedro ang iya pamulongpulong paagi sa makapakumbinsi nga pamangkot: “Gani, kon ang Dios naghatag man sa ila [ukon sa tumuluo nga mga Gentil] sang wala sing bayad nga dulot [nga balaan nga espiritu] nga ginhatag niya sa aton [nga mga Judiyo] nga nagapati kay Ginuong Jesucristo, sin-o ako nga magbalabag sa Dios?”—Binu. 11:17.

17, 18. (a) Ano nga desisyon ang kinahanglan himuon sang Judiyo nga mga Cristiano bangod sang ginsiling ni Pedro? (b) Ngaa indi mahapos nga padayon nga mahiusa ang kongregasyon, kag ano ang dapat naton ipamangkot sa aton kaugalingon?

¹⁷ Sang mabatian sang Judiyo nga mga Cristiano ang ginsiling ni Pedro, kinahanglan nila maghimo sang desisyon. Untatan bala nila ang pagpasulabi kag batunon nga ang bag-o nabawtismuhan nga mga Gentil pareho na nila nga mga Cristiano? Ang rekord nagasugid sa aton: “Sang mabatian nila ini [ukon sang mga apostoles kag sang iban nga Judiyo nga mga Cristiano], nag-ugyon sila, kag ginhimaya nila ang Dios. Nagsiling sila: ‘Kon amo, ginhatagan man sang Dios ang mga indi Judiyo sing kahigayunan sa paghinulsol agod makatigayon sila sang kabuhi.’” (Binu. 11:18) Bangod ginbag-o nila ang ila panghunahuna, padayon nga nahiusa ang kongregasyon.

¹⁸ Subong, indi man mahapos sa mga alagad ni Jehova nga padayon nga mahiusa, kay ang matuod nga mga sumilimba naghalin sa “tanan nga pungsod kag tribo kag katawhan kag hambal.” (Bug. 7:9) Gani, ang mga kauturan sa madamo nga kongregasyon sarisari ang rasa, kultura, kag gindak-an. Pamangkuton naton ang aton kaugalingon: ‘Wala na gid bala sang bisan ano nga pagpasulabi sa akon tagipusuon? May mga tawo sa kalibutan nga nagabatyag nga mas mataas sila sangsa iban bangod sang nasyonalismo, tribalismo, bugal sa kultura, kag rasismo. Determinado bala ako nga indi pagtrataron sing amo sina ang akon mga kauturan?’  Dumduma kon ano ang natabo kay Pedro (ukon Cefas) pila ka tuig pagkatapos nga nangin Cristiano ang una nga mga Gentil. Bangod naapektuhan sang pagpasulabi, “wala na sia magpakig-upod” sa Gentil nga mga Cristiano amo kon ngaa ginsaway sia ni Pablo. (Gal. 2:11-14) Dapat kita pirme maghalong nga indi magbatyag nga mas mataas kita sangsa iban bangod lang lain sila sangsa aton.

19. Sin-o ang ginbantalaan sang Judiyo nga mga Cristiano sa Antioquia, kag ano ang resulta?

¹⁹ Nagsugod bala sa pagbantala ang mga sumulunod ni Jesus sa wala matuli nga mga Gentil? Talupangda ang natabo sang ulihi sa Antioquia sa Siria. d Ini nga siudad may daku nga komunidad sang mga Judiyo, pero maayo ang relasyon sang mga Judiyo kag mga Gentil sa sini nga lugar. Gani maayo nga teritoryo ang Antioquia sa pagbantala sa mga Gentil. Diri nagsugod sa pagbantala ang pila ka Judiyo nga disipulo sa “mga tawo nga nagahambal sing Griego.” (Binu. 11:20) Ginbantalaan nila indi lamang ang nagahambal sing Griego nga mga Judiyo kundi pati man ang wala matuli nga mga Gentil. Ginpakamaayo ni Jehova ang hilikuton, kag “madamo ang nangin tumuluo.”—Binu. 11:21.

20, 21. Paano nagpakita sing pagkamapainubuson si Bernabe, kag paano man kita mangin mapainubuson sa ministeryo?

²⁰ Para maatipan ining teritoryo nga madamo sing handa mamati, ginpadala sang kongregasyon sa Jerusalem si Bernabe sa Antioquia. Pero indi niya masarangan ang kadamuon sang mga interesado. Sin-o pa abi ang mas bagay nga magbulig sangsa kay Saulo, nga sa ulihi mangin apostol nga ginpadala sa mga pungsod? (Binu. 9:15; Roma 1:5) Tamdon bala ni Bernabe si Saulo nga karibal? Indi, kay nangin mapainubuson si Bernabe. Nagmatumato sia nga magkadto sa Tarso, ginpangita si Saulo, kag gin-upod sia sa Antioquia para magbulig. Nagtener sila didto sing isa ka tuig para palig-unon ang mga disipulo sa kongregasyon didto.—Binu. 11:22-26a.

²¹ Paano kita mangin mapainubuson sa aton ministeryo? Ang isa ka paagi para mapakita ini nga kinaiya amo ang pagbaton sang aton mga limitasyon. Sarisari ang aton kusog kag mga ikasarang. Halimbawa, ang iban mahimo sagad sa indi pormal nga pagpanaksi ukon sa pagpamalaybalay pero nabudlayan mag-return visit ukon magsugod sing mga Bible study. Kon gusto mo mag-uswag sa pila ka bahin sang ministeryo, mangayo sing bulig. Kon himuon mo ini, mangin mas maayo ka magtudlo sang Biblia kag mangin mas malipayon ka sa ministeryo.—1 Cor. 9:26.

22, 23. Paano ginpakita sang mga kauturan sa Antioquia ang ila pagpalangga sa ila mga kauturan, kag paano man ini ginahimo sang katawhan sang Dios subong?

²² Didto sa Antioquia una nga “gintawag nga mga Cristiano ang mga disipulo paagi sa pagtuytoy sang Dios.” (Binu. 11:26b) Ining ngalan nga ginhatag sang Dios sa ila bagay gid sa mga gusto magsunod sa Cristo. Sang nangin Cristiano ang mga  tawo sang mga pungsod, natun-an bala sang mga Judiyo kag sang mga Gentil nga palanggaon ang isa kag isa? Binagbinaga ang natabo sang may daku nga tiggulutom sang mga 46 C.E. e Sang una, apektado gid ang mga imol kon may tiggulutom kay wala sila sing nasupot nga kuarta ukon pagkaon. Sa sining tiggulutom, nagakinahanglan gid sing pagkaon ang Judiyo nga mga Cristiano sa Judea, kay madamo sa ila ang imol. Sang mahibaluan sang mga kauturan sa Antioquia ang ila problema, pati sang mga Gentil nga Cristiano, ‘nagpadala sila sing bulig’ sa mga kauturan nga nagaistar sa Judea. (Binu. 11:29) Ginpakita gid nila nga palangga nila ang ila mga kauturan!

²³ Amo man sini ang nagakatabo sa katawhan sang Dios subong. Kon mabalitaan naton nga nagakinahanglan ang aton mga kauturan sa iban nga lugar ukon diri sa aton, kinabubut-on kita nga nagabulig. Madasig nga nagaasayn ang mga Branch Committee sing mga Disaster Relief Committee para magbulig sa aton mga kauturan nga mahimo naapektuhan sang mga kalamidad pareho sang bagyo, linog, kag tsunami. Ini tanan nga bulig nagapakita nga palangga gid naton ang aton mga kauturan.—Juan 13:34, 35; 1 Juan 3:17.

24. Paano naton mapakita nga naintiendihan gid naton ang kahulugan sang palanan-awon nga nakita ni Pedro?

²⁴ Bilang matuod nga mga Cristiano, naintiendihan gid naton ang kahulugan sang palanan-awon nga nakita ni Pedro sa atop sang balay sa Joppe sang unang siglo. Ginasimba naton ang Dios nga wala sing ginapasulabi. Kabubut-on niya nga manaksi kita sing maid-id tuhoy sa iya Ginharian, nga nagalakip sang pagbantala sa iban bisan ano man ang ila rasa, nasyonalidad, ukon kahimtangan sa kabuhi. Gani gusto gid naton nga bantalaan ang tanan nga mamati para may kahigayunan sila nga makatuon parte kay Jehova.—Roma 10:11-13.