1-4. Ano ang mabudlay nga kahimtangan nga ginaatubang ni Pedro, kag ano ang imo batyagon kon ikaw ang ara sa iya lugar?

 NAGALAGABONG ang pagsira sang daku nga gawang ukon gate nga salsalon sa likod ni Pedro. Gindala sia sa iya selda nga nakadenahan sa tunga sang duha ka Romano nga guardia. Naghulat sia didto sing pila ka adlaw para mahibaluan kon ano ang himuon sa iya. Ang makita lang niya amo ang pader kag mga rehas sang prisuhan, ang iya kadena, kag ang iya mga guardia.

² Mapintas ang nangin sentensia kay Pedro. Determinado si Hari Herodes Agripa I nga ipapatay sia. a Ang matuod, ipresentar si Pedro sa mga tawo pagkatapos sang Paskua, kag ang iya kamatayon isa ka regalo para malipay ang katawhan. Indi ini pamahog lamang. Bag-o lang ginpapatay sini man nga hari si apostol Santiago nga kaupod ni Pedro.

³ Sang gab-i antes sang gintalana nga pagpatay kay Pedro, ano ayhan ang iya ginahunahuna sa iya madulom nga selda? Nadumduman bala niya nga sang nagligad nga tuig, ginhambalan sia ni Jesus nga gapuson sia kag puersa nga dal-on bisan indi niya gusto, asta sa iya kamatayon? (Juan 21:18, 19) Mahimo nga nagapalibog si Pedro kon amo na ini ang tion.

⁴ Kon ikaw si Pedro, ano ang imo batyagon? Madamo ang mahimo masubuan kag magahunahuna nga wala na sila sing paglaum. Pero para sa matuod nga mga sumulunod ni Jesucristo, may mga kahimtangan bala nga wala na sing paglaum? Ano ang matun-an naton sa reaksion ni Pedro kag sang iya kaupod nga mga Cristiano sa paghingabot sa ila? Hibaluon naton.

5, 6. (a) Ngaa kag paano ginhingabot ni Hari Herodes Agripa I ang Cristianong kongregasyon? (b) Ngaa isa ka pagtilaw sa kongregasyon ang kamatayon ni Santiago?

⁵ Natun-an naton sa nagligad nga kapitulo sini nga libro nga nalipay gid ang Cristianong kongregasyon sang nakumbertir ang Gentil nga si Cornelio kag ang iya pamilya. Pero mahimo nga nakibot ang wala nagatuo  nga mga Judiyo sang mahibaluan nila nga nagaupod na sa pagsimba ang Judiyo nga mga Cristiano sa mga indi Judiyo.

⁶ Si Herodes, nga isa ka maalam nga pulitiko, nakakita sing kahigayunan nga mapahamut-an ang mga Judiyo, gani ginhingabot niya ang mga Cristiano. Nahibaluan niya nga suod gid si apostol Santiago kay Jesucristo. Gani “ginpatay [ni Herodes] paagi sa espada si Santiago nga utod ni Juan.” (Binu. 12:2) Daku gid ini nga pagtilaw sa kongregasyon! Isa si Santiago sa tatlo nga nakakita sang pagbaylo-dagway ni Jesus kag sang iban nga mga milagro nga wala ginpakita sa iban nga apostoles. (Mat. 17:1, 2; Mar. 5:37-42) Gintawag ni Jesus ang mag-utod nga sanday Santiago kag Juan nga “Mga Anak sang Daguob” bangod sang ila mapagsik nga panimuot. (Mar. 3:17) Gani nadulaan ang kongregasyon sing isa ka maisog, matutom nga saksi, kag hinigugma nga apostol.

7, 8. Ano ang reaksion sang kongregasyon sa pagkapriso ni Pedro?

⁷ Natabo gid ang ginalauman ni Agripa kay ginkalipay sang mga Judiyo ang pagpatay kay Santiago. Bangod sini, si Pedro naman ang iya isunod. Nabal-an ta kaina sa una nga parapo nga ginpadakop niya si Pedro. Pero mahimo nga nadumduman ni Agripa nga sang nagligad, nakagua ang mga apostoles sa prisuhan paagi sa milagro, pareho sang ginbinagbinag sa Kapitulo 5 sini nga libro. Para masigurado nga indi makapalagyo si Pedro, gin-angot ang iya kadena sa 2 ka guardia, kag 16 ka guardia ang nagbulosbulos bantay adlaw kag gab-i. Kon makapalagyo sia, ang mga guardia ang silutan. Sa sining mabudlay nga mga kahimtangan, ano ang mahimo sang iban nga mga Cristiano para buligan si Pedro?

⁸ Nahibaluan gid sang kongregasyon kon ano ang ila himuon. Ang Binuhatan 12:5 mabasa: “Samtang yara si Pedro sa bilangguan, ang kongregasyon hanuot nga nagpangamuyo sa Dios para sa iya.” Huo, ang ila mga pangamuyo para sa  ila hinigugma nga utod hanuot kag tinagipusuon nga pagpakitluoy. Wala sila maluyahan sing buot bangod sang kamatayon ni Santiago kag nagapati sila gihapon nga ginapamatian ang ila mga pangamuyo. Importante gid para kay Jehova ang pangamuyo. Ginasabat niya ini basta indi ini supak sa iya kabubut-on. (Heb. 13:18, 19; Sant. 5:16) Isa ini ka importante nga leksion nga dapat dumdumon sang mga Cristiano subong.

9. Paano naton masunod ang halimbawa sang mga Cristiano sang una nga nangamuyo para kay Pedro?

⁹ May kilala ka bala nga mga kauturan nga ginatilawan? Mahimo nga ginabatas nila ang paghingabot, pagdumili sang gobierno, ukon mga kalamidad. Ilakip sila sa imo pangamuyo. Mahimo nga may kilala ka man nga nagaatubang sing daw indi bal-anon nga mga kabudlayan, pareho sang problema sa pamilya, pagluya sing buot, ukon pila ka pagtilaw sa ila pagtuo. Kon nagapamalandong ka antes mangamuyo, mahimo mahunahuna mo ang pila ka tawo kag masambit ang ila ngalan sa imo mga pangamuyo kay Jehova, ang “Manugpamati sang pangamuyo.” (Sal. 65:2) Ang matuod, kinahanglan man naton ang pangamuyo sang aton mga kauturan kon ara kita sa mabudlay nga kahimtangan.

10, 11. Ilaragway kon paano ginpagua sa prisuhan sang anghel ni Jehova si Pedro.

¹⁰ Nabalaka bala si Pedro sa ginaatubang niya nga katalagman? Wala kita kabalo, pero sang katapusan nga gab-i niya sa prisuhan, mahamuok gid ang iya tulog sa tunga sang duha ka alisto nga bantay. Nahibaluan gid sining may pagtuo nga tawo nga bisan ano man ang matabo pagkaaga, amligan sia ni Jehova. (Roma 14: 7, 8) Pero wala gid maimadyin ni Pedro ang pag-abot sang makatilingala nga mga hitabo. Sa hinali, nagsanag ang iya selda. May nagatindog nga anghel didto, nga indi makita sang mga guardia, kag dalidali niya nga ginpukaw si Pedro. Kag ang mga kadena sa iya mga kamot nga daw indi gid mautod, nahulog!

¹¹ Ginsugo sang anghel si Pedro: “Dali, magbangon ka! . . . Maghimos ka kag isuksok ang imo sandalyas. . . . Isul-ob ang imo kunop.” Nagtuman dayon si Pedro. Ginsilingan sia sang anghel: “Magsunod ka sa akon,” kag nagsunod si Pedro. Naggua sila sa selda, naglabay sa mga guardia sa gua, kag wala sing gahod nga nakalab-ot sa daku nga gawang nga salsalon. Paano sila makaagi sa sini? Kon napensaran gid man ini ni Pedro, posible makadali lang. Samtang nagapalapit sila sa gawang, “nagbukas ini.” Antes makamarasmas si Pedro, nakaagi na sila sa gawang kag ara na sa dalan, kag nadula ang anghel. Nabilin sia didto, kag narealisar niya dayon nga matuod gid ini. Indi ini palanan-awon. Hilway na sia!—Binu. 12:7-11.

12. Ngaa makapaumpaw kon hunahunaon naton ang pagluwas ni Jehova kay Pedro?

¹² Makapaumpaw gid kon hunahunaon naton ang wala tupong nga gahom ni Jehova sa pagluwas sa iya mga alagad. Si Pedro ginpriso sang isa ka hari nga ginsuportahan sang pinakagamhanan nga gobierno sa kalibutan. Pero nakagua sia sa prisuhan! Ibutang ta nga ini nga milagro wala pirme ginahimo ni Jehova sa tanan niya nga alagad. Wala gani niya ini ginhimo kay Santiago; ukon kay Pedro sa ulihi, sang natuman ang ginsiling ni Jesus parte sa apostol. Subong, wala ginapaabot sang mga Cristiano nga luwason sila paagi sa milagro. Pero ginadumdom naton nga wala nagabag-o si Jehova. (Mal. 3:6) Sa indi madugay gamiton niya ang iya Anak para hilwayon ang minilyon ka tawo sa mabakod nga prisuhan, nga amo ang kamatayon. (Juan 5:28, 29) Ini nga mga promisa makabulig sa aton nga mangin maisog gid kon makaatubang kita sang mga pagtilaw.

13-15. (a) Ano ang reaksion sang mga kauturan sa kongregasyon nga nagtipon sa balay ni Maria sang mag-abot si Pedro? (b) Sa kay sin-o naman nagsentro sing igtalupangod ang Mga Binuhatan, pero ano ang padayon nga epekto ni Pedro sa mga kauturan?

¹³ Nagtindog si Pedro sa madulom nga dalan, nga nagapamensar kon diin sia makadto. Dayon nadumduman niya nga malapit lang ang balay sang Cristiano nga si Maria. May sarang sa pangabuhi ining balo kay may balay sia nga puede matipunan sang bilog nga kongregasyon. Iloy sia ni Juan nga ginatawag Marcos, nga sang ulihi nangin daw anak na ni Pedro kag amo ini ang una nga bes nga ginsambit si Marcos sa Mga Binuhatan. (1 Ped. 5:13) Sa sini nga tion, bisan gab-i na kaayo, madamo gihapon nga kauturan ang ara pa sa balay ni Maria, nga nagapangamuyo sing hanuot. Sigurado nga ginapangamuyo nila ang kahilwayan ni Pedro. Pero wala sila makahanda sa sabat ni Jehova!

¹⁴ Nanuktok sa puertahan si Pedro, nga ara sa atubangan sang balay. Nagkadto sa puertahan ang isa ka alagad nga babayi nga si Roda. Ang iya ngalan kinaandan  sa Griego nga nagakahulugan “Rosas.” Indi sia makapati sa iya nabatian. Tingog ni Pedro! Imbes nga buksan ang puertahan, ginbiyaan sang nalipay nga alagad si Pedro nga nagatindog sa dalan. Nagdalagan ang alagad pasulod sa balay para kumbinsihon ang kongregasyon nga si Pedro ara sa gua. Ginsilingan nila sia nga nagbuang na, pero wala magpasupil ang alagad nga babayi. Padayon sia nga nag-insister. Para paayunan sia, ang iban nanugda nga basi anghel ato nga nagarepresentar kay Pedro. (Binu. 12:12-15) Pero, padayon nga nanuktok si Pedro, kag sang ulihi ginbuksan nila ang puertahan.

¹⁵ Sa puertahan, “nakita nila sia kag nakibot sila”! (Binu. 12:16) Dapat pa sila pahipuson ni Pedro para masugid niya ang natabo, kag ginsilingan niya sila nga ipahibalo ini kay disipulo Santiago kag sa mga kauturan. Naghalin si Pedro antes sia makita sang mga soldado ni Herodes. Naglakat si Pedro para padayunon ang iya pag-alagad sa mas hilway nga lugar. Magluwas sa iya nahimo para solbaron ang isyu parte sa pagtuli, nga mabasa sa Binuhatan kapitulo 15, wala na sia liwat ginhinambitan. Ginsentro naman sang Mga Binuhatan ang igtalupangod sa hilikuton kag paglakbay ni apostol Pablo. Pero makasalig kita nga napalig-on ni Pedro ang pagtuo sang iya mga kauturan bisan diin man sia makadto. Sigurado gid nga malipayon ang mga kauturan nga ginbiyaan ni Pedro didto sa balay ni Maria.

16. Ngaa makasalig kita nga mangin malipayon ang aton palaabuton?

¹⁶ Kon kaisa ginahatagan ni Jehova ang iya mga alagad sing sobra pa sa ila mga ginapaabot, amo kon ngaa tuman gid ang ila kalipay. Amo sini ang nabatyagan sang mga Cristiano nga kauturan ni Pedro sadto nga gab-i. Mahimo amo man sini ang aton balatyagon kon kaisa kon maeksperiensiahan naton ang bugana nga pagpakamaayo ni Jehova. (Hulu. 10:22) Sa indi madugay, makita naton nga matuman sa bilog nga duta ang tanan nga ginpromisa ni Jehova. Ang katumanan sini magalabaw pa sa aton ginaimadyin subong. Gani kon padayon kita nga mangin matutom kay Jehova, makasalig kita nga mangin malipayon ang aton palaabuton.

17, 18. Ngaa gindayaw sang mga tawo si Herodes?

¹⁷ Daw indi makapati si Herodes nga nakagua si Pedro kag naakig gid sia. Insigida sia nga nagmando nga pangitaon sing maid-id si Pedro, kag gin-imbestigar niya ang mga guardia. Dayon, nagsugo sia nga “silutan sila,” mahimo sing kamatayon. (Binu. 12:19) Si Herodes Agripa wala sing kaluoy. Masilutan pa bala ining mapintas nga tawo?

¹⁸ Mahimo nga nahuy-an si Agripa bangod wala niya mapapatay si Pedro, pero wala lang magdugay nangin bugalon sia liwat. Isa ka bes, may mga kaaway si Agripa nga gusto makig-areglo sa iya, kag wala sing duhaduha nga gusto niya mamulongpulong sa atubangan sang madamo nga tawo. Ginreport ni Lucas nga bilang paghanda, “nagsuksok si Herodes sang harianon nga bayo.” Ang Judiyo nga historian nga si Josephus nagsulat nga ang bayo ni Herodes human sa  pilak, amo nga kon masilakan ini, daw nagabanaag sia sa himaya. Ining bugalon nga pulitiko namulongpulong dayon. Bangod gusto sang mga tawo nga dayawon si Herodes, nagsinggit sila: “Tingog ina sang isa ka dios, kag indi iya sang tawo!”—Binu. 12:20-22.

19, 20. (a) Ngaa ginsilutan ni Jehova si Herodes? (b) Ngaa makapaumpaw sa aton ang kasaysayan parte sa kamatayon ni Herodes Agripa?

¹⁹ Ina nga pagdayaw nagakadapat lamang sa Dios, kag nagatan-aw ang Dios! May kahigayunan kuntani si Herodes nga malikawan ang kalaglagan. Puede niya masabdong ang mga tawo ukon indi sila pag-ugyunan. Pero, pareho gid sia sa ginsambit sang isa ka hulubaton: “Ang bugal nagauna sa pagkapukan.” (Hulu. 16:18) “Ginsilutan sia gilayon sang anghel ni Jehova,” amo nga nag-antos ining tuman ka bugalon nga tawo asta mapatay. “Gin-ulod [si Herodes] kag napatay.” (Binu. 12:23) Ginsiling man ni Josephus nga nagbalatian sing hinali si Agripa kag nagsiling pa kuno ang hari nga nagatagumatayon sia bangod ginbaton niya ang pagdayaw sang mga tawo. Suno kay Josephus, mga lima pa ka adlaw antes mapatay si Agripa. b

²⁰ Kon kaisa daw indi masilutan ang malain nga mga tawo sa ila mga kalainan. Indi kita dapat matingala sa sini bangod “ang bug-os nga kalibutan yara sa gahom sang isa nga malauton.” (1 Juan 5:19) Pero kon kaisa ginabudlayan ang matutom nga mga alagad sang Dios kon ang malain nga mga tawo wala masilutan. Amo ini ang isa sa mga rason kon ngaa ini nga hitabo makapaumpaw gid. Kay man, ginapakita sini nga nagapanghikot si Jehova, kag ginapahanumdom niya sa tanan niya nga alagad nga ginahigugma niya ang katarungan. (Sal. 33:5) Sa indi madugay, magaluntad ang iya katarungan ukon hustisya.

21. Ano ang panguna nga leksion sa Binuhatan kapitulo 12, kag ngaa makapalig-on ini sa aton?

²¹ Ini nga kasaysayan natapos sa mas makapalig-on pa nga leksion: “Ang pulong ni Jehova padayon nga naglapnag kag nagdamo pa ang mga tumuluo.” (Binu. 12:24) Ining report sa pag-uswag sang pagbantala magapahanumdom sa aton nga ginapakamaayo man ni Jehova ini nga hilikuton subong. Maathag nga ang panguna nga leksion sa Binuhatan kapitulo 12 indi lang parte sa kamatayon sang isa ka apostol kag paggua sa prisuhan sang isa pa. Parte gid ini kay Jehova kag sa pagpugong niya sa mga panikasog ni Satanas nga dugmukon ang Cristianong kongregasyon kag pauntaton ang mapisan nga pagbantala sini. Wala magmadinalag-on ining mga paghingabot, kag ang bisan ano nga mga pahito subong para pauntaton ang pagbantala indi man magmadinalag-on. (Isa. 54:17) Ang hilikuton sang mga nagadampig kay Jehova kag kay Jesucristo indi gid mapaslawan. Makapalig-on gid ini. Pribilehiyo gid naton nga ibantala ang “pulong ni Jehova” subong!