Palangga Namon nga Manugbantala sang Ginharian:

Imadyina nga isa ka sa mga apostoles nga nagatindog sa Bukid sang mga Olibo. Ara si Jesus sa atubangan mo. Sang manugkayab na sia, nagsiling sia: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Ano ayhan ang imo reaksion?

Mahimo magbatyag ka nga daw indi mo masarangan ini nga asaynment. Siguro mamangkot ka, ‘Paano kami makabantala “tubtob sa pinakamalayo nga bahin sang duta” kay diutay lang kami nga mga disipulo?’ Posible madumduman mo ang paandam ni Jesus sang gab-i antes sia mapatay: “Ang ulipon indi labaw sa iya agalon. Kon ginhingabot nila ako, hingabuton man nila kamo; kon gintuman nila ang akon pulong, tumanon man nila ang inyo pulong. Apang himuon nila ini tanan nga butang batok sa inyo tungod sa akon ngalan, bangod wala sila makakilala sa Isa nga nagpadala sa akon.” (Juan 15:20, 21) Samtang ginapamalandungan mo ini nga mga tinaga, mahimo pamangkuton mo ang imo kaugalingon, ‘Paano ako makapanaksi sing maid-id sa tion sang pagpamatok kag paghingabot?’

Pareho man sa sini ang aton sitwasyon subong. Ang sugo sa aton bilang mga Saksi ni Jehova amo ang pagpanaksi sing maid-id “tubtob sa pinakamalayo nga bahin sang duta,” sa “mga tawo sang tanan nga pungsod.” (Mat. 28:19, 20) Paano naton ini mahimo, ilabi na kay may gintagna nga pagpamatok?

Ang libro sang Mga Binuhatan sang mga Apostoles may makakulunyag nga rekord kon paano natuman sang mga apostoles kag sang pareho nila nga mga Cristiano sang unang siglo C.E. ang ila asaynment sa bulig ni Jehova. Ini nga libro nga imo ginabasa makabulig sa imo nga mabal-an ang madamo nga butang nga natabo sa sini nga mga Cristiano kag mabatyagan ang kalipay nga ila nabatyagan sang nakita nila nga naglapnag ang pagbantala sa madamo nga lugar. Madayaw ka gid kay madamo sa naeksperiensiahan sang mga kauturan sang unang siglo ang pareho gid sa mga nagakatabo sa aton subong. Makita mo nga pareho kita indi lang sa hilikuton kundi pati sa pag-organisar sa aton para mahimo ini. Samtang ginabinagbinag mo ang mga inagihan sang mga Cristiano sadto, magabakod pa gid ang imo pagtuo nga padayon nga ginagiyahan ni Jehova nga Dios ang iya organisasyon sa duta.

Nagalaum kami kag nagapangamuyo nga ang imo pagtuon sa libro sang Mga Binuhatan magapabakod sang imo pagsalig nga gamiton niya ang iya balaan nga espiritu para buligan ka. Kabay nga mapalig-on ka nga magpadayon sa “pagpanaksi sing maid-id tuhoy sa Ginharian sang Dios” kag sa pagbulig sa iban nga makilala si Jehova kag para may paglaum man sila nga mabuhi sing wala katapusan.—Binu. 28:23; 1 Tim. 4:16.