1, 2. Ngaa ang Biblia manami nga regalo halin sa Dios?

ANO ang imo batyagon kon ginsorpresa ka sang imo abyan sang isa ka regalo? Gusto mo gid ini dayon buksan, kag malipay ka gid kay gindumdom ka niya. Pasalamatan mo gid sia.

² Ang Biblia regalo halin sa Dios. May mga impormasyon ini nga indi naton makita bisan diin. Halimbawa, nagasugid ini nga gintuga sang Dios ang langit, duta, kag ang una nga lalaki kag babayi. May mga prinsipio ini nga makabulig sa aton mga problema. Matun-an man naton sa Biblia kon paano tumanon sang Dios ang iya katuyuan nga himuon nga maayo nga ilistaran ang duta. Isa gid ka manami nga regalo ang Biblia!

3. Ano ang mahibaluan mo samtang ginatun-an mo ang Biblia?

³ Samtang ginatun-an mo ang Biblia, mahibaluan mo nga gusto gid sang Dios nga mangin abyan ka. Kag samtang nagadamo ang imo natun-an parte sa iya, magabakod pa gid ang inyo pag-abyanay.

4. Ngaa nagadayaw ka gid sa Biblia?

⁴ Ang Biblia gin-translate sa mga 2,600 ka lenguahe, kag binilyon na ka kopya ang naimprinta. Sobra sa 90 porsiento sang mga tawo sa kalibutan ang makabasa sang Biblia sa ila lenguahe. Kag kada semana, sobra isa ka milyon ang makabaton sang Biblia! Wala gid sing libro nga pareho sa Biblia.

5. Ngaa masiling naton nga ‘gintuytuyan sang Dios ang pagsulat’ sa Biblia?

 ⁵ ‘Gintuytuyan sang Dios ang pagsulat’ sa Biblia. (Basaha ang 2 Timoteo 3:16.) Ang iban mahimo magsiling, ‘Tawo lang ang nagsulat sang Biblia, ti paano nga halin ini sa Dios?’ Ang Biblia nagsabat: “Ang ginhambal sang mga tawo naghalin sa Dios samtang ginapahulag [ukon, gingiyahan] sila sang balaan nga espiritu.” (2 Pedro 1:21) Pareho ini sa negosyante nga nagsugo sa iya sekretaryo nga maghimo sang sulat. Gani kay sin-o ina sulat? Iya sang negosyante, indi sang sekretaryo. Amo man sina ang Biblia, ang Awtor sini amo ang Dios, indi ang mga tawo nga gingamit niya sa pagsulat sini. Gingiyahan sila sang Dios nga isulat ang iya mga panghunahuna. Gani sigurado gid nga  ang Biblia “pulong sang Dios.”—1 Tesalonica 2:13; tan-awa ang Endnote 2.

6, 7. Ngaa masiling naton nga nagasantuanay gid ang mga ginasiling sang Biblia?

⁶ Ang Biblia ginsulat sa sulod sang sobra 1,600 ka tuig. Ang mga manunulat sini nagkabuhi sa sarisari nga tion. Ang iban edukado kag ang iban indi. Halimbawa, ang isa doktor. Ang iban mga mangunguma, mangingisda, mga manugbantay sang karnero, mga propeta, mga hukom, kag mga hari. Bisan pa lainlain ang nagsulat sang Biblia, nagasantuanay gid ang ginasiling sini. *

⁷ Ang una nga mga kapitulo sang Biblia nagasugid kon paano nagsugod ang problema sa kalibutan, kag ang katapusan nga mga kapitulo nagasugid sa aton kon paano ini solbaron sang Dios paagi sa paghimo sang duta nga isa ka paraiso. Mabasa naton sa Biblia ang linibo ka tuig nga kasaysayan sang katawhan kag kon paano pirme nagakatuman ang katuyuan sang Dios.

8. Maghatag sing halimbawa nga ang Biblia sibu sa siensia.

⁸ Wala ginsulat ang Biblia para magtudlo sang siensia ukon gamiton nga libro sa eskwelahan, pero sibu ini pirme kon may ginasiling ini parte sa siensia. Indi na kita matingala kay libro ini halin sa Dios. Halimbawa, ang libro sang Levitico nagaunod sang mga sugo sang Dios sa mga Israelinhon para malikawan nga maglapta ang balatian. Madugay na ini nga ginsulat antes pa nahibaluan sang mga tawo ang paglapta sang balatian bangod sa mga  bakterya kag mga virus. Madugay naman nga ginatudlo sang Biblia nga ang duta ginabitay sa wala. (Job 26:7) Kag sang ang kalabanan nga tawo nagapati nga tapan ang duta, ang Biblia nagsiling nga matipulon ini.—Isaias 40:22.

9. Ano ang matun-an naton sa pagkatampad sang mga manunulat sang Biblia?

⁹ Ang Biblia sibu man sa kasaysayan. Pero madamo nga libro parte sa kasaysayan ang indi sibu kay indi tampad ang mga nagsulat sini. Halimbawa, wala nila ginasulat ang pagkapierde sang ila pungsod sa inaway. Pero ang mga manunulat sang Biblia tampad, kay bisan ang pagkapierde sang Israel ginsulat nila. Ginsulat man nila ang nahimo nila nga mga sala. Halimbawa, sa libro sang Numeros, ginsugid ni Moises nga nakahimo sia sing serioso nga sala kag dapat sia disiplinahon sang Dios. (Numeros 20:2-12) Gani masiling naton nga ang Biblia libro gid halin sa Dios. Masaligan gid naton ang Biblia.

10. Ngaa makabulig sa aton ang mga laygay sang Biblia?

¹⁰ “Ang pagsulat sa bug-os nga [Biblia] gintuytuyan sang Dios kag mapuslanon sa pagpanudlo, sa pagsabdong, sa pagtadlong.” (2 Timoteo 3:16) Huo, makabulig gid sa aton ang mga laygay sang Biblia. Bangod nahibaluan ni Jehova kon paano kita gintuga, naintiendihan niya ang aton ginapensar kag ginabatyag. Mas kilala niya kita sangsa pagkilala naton sa aton kaugalingon, kag gusto niya kita mangin malipayon. Nahibaluan niya kon ano ang makapaayo kag makapalain para sa aton.

11, 12. (a) Ano nga maayo nga laygay ang ginhatag ni Jesus sa Mateo kapitulo 5 asta 7? (b) Ano pa ang matun-an naton sa Biblia?

¹¹ Sa Mateo kapitulo 5 asta 7, mabasa naton ang maayo  nga laygay ni Jesus kon paano mangin malipayon, makighusay sang indi pag-intiendihanay, mangamuyo, kag kon ano ang insakto nga pagtamod sa kuarta. Bisan pa mga 2,000 na ka tuig ang nagligad sang ginsiling niya ini, makabulig ini gihapon subong.

¹² Paagi sa Biblia, ginatudluan man kita ni Jehova sang mga prinsipio nga makabulig nga mangin malipayon ang aton pamilya, mangin maayo kita nga trabahador, kag mangin maayo ang aton relasyon sa iban. Pirme gid makabulig ang mga prinsipio sa Biblia bisan sin-o man kita, diin man kita nagaistar, ukon ano man ang aton problema.—Basaha ang Isaias 48:17; tan-awa ang Endnote 3.

13. Ano ang ginsugid ni Isaias nga matabo sa siudad sang Babilonia?

¹³ Madamo na nga tagna sa Biblia ang natuman. Halimbawa, gintagna ni Isaias nga malaglag ang Babilonia. (Isaias 13:19) Ginsugid niya sing detalyado kon paano mapierde ang siudad. Ginaproteksionan ang siudad sang dalagku nga mga geyt kag suba. Pero gintagna ni Isaias nga ang suba pamalhon kag ang mga geyt mapabay-an nga bukas. Mapierde sang kontra ang siudad nga indi na kinahanglan makig-away. Kag gintagna man niya nga si Ciro amo ang magapierde sa Babilonia.—Basaha ang Isaias 44:27–45:2; tan-awa ang Endnote 4.

14, 15. Paano natuman ang tagna ni Isaias?

¹⁴ Pagligad sang 200 ka tuig, nag-abot ang mga soldado nga handa na nga magsalakay sa Babilonia. Sin-o ang ila lider? Pareho sa ginsiling sa tagna, si Ciro nga hari sang Persia. Nagakatuman na ang tagna.

¹⁵ Sina nga gab-i, may kapiestahan sa Babilonia. Kompiansa sila nga wala sing malain nga matabo sa ila kay  napalibutan sila sang dalagku nga mga pader kag suba. Sa gua sang siudad, nagkutkot si Ciro kag ang iya mga soldado sang palikawan sang tubig para magnabaw ang suba. Nagnabaw ang tubig nga hustuhan lang para makatabok ang mga soldado sang Persia. Pero paano nakasulod ang mga soldado sa siudad kay may dalagku ini nga mga pader? Pareho sa ginsiling sa tagna, napabay-an nga bukas  ang mga geyt sang siudad, gani napierde sang mga soldado ang siudad nga wala na nakig-away.

16. (a) Ano ang gintagna ni Isaias nga matabo sa Babilonia? (b) Paano natuman ang tagna ni Isaias?

¹⁶ Gintagna ni Isaias nga sa ulihi wala na gid sing magaistar sa Babilonia. Nagsulat sia: “Indi na sia pag-istaran, ukon pagpuy-an sa wala sing katubtuban.” (Isaias 13:20) Natuman bala ina? Ang lugar diin makita sadto ang Babilonia, nga mga 80 ka kilometro sa nabagatnan sang Baghdad, Iraq, isa na lang subong ka kagulub-an. Kag wala gid sing nagaistar didto. Ginsilhig ni Jehova ang Babilonia sang “silhig sang kalaglagan.”—Isaias 14:22, 23. *

17. Ngaa makasalig kita nga tumanon sang Dios ang iya mga promisa?

¹⁷ Ginapakita sang katumanan sang madamo nga tagna sa Biblia nga masaligan gid naton ang mga ginsiling sini parte sa palaabuton. Sigurado gid nga tumanon ni Jehova  ang iya promisa nga himuon nga paraiso ang duta. (Basaha ang Numeros 23:19.) Huo, may paglaum kita nga “kabuhi nga wala sing katapusan nga madugay na nga ginsaad sang Dios nga indi makabutig.”—Tito 1:2. *

18. Ano ang ginsiling ni Pablo parte sa “pulong sang Dios”?

¹⁸ Natun-an naton nga wala na sing libro nga pareho sa Biblia. Nagasantuanay ang mga ginasiling sini, kag sibu ini pirme kon parte sa siensia kag kasaysayan. Nagaunod man ini sang maayo nga mga laygay kag mga tagna nga natuman na. Pero indi lang amo sina ang Biblia. Si apostol Pablo nagsulat: “Ang pulong sang Dios buhi kag gamhanan.” Ano ang buot silingon sina?—Basaha ang Hebreo 4:12.

19, 20. (a) Paano makabulig sa imo ang Biblia nga makilala pa gid ang imo kaugalingon? (b) Paano mo mapakita nga nagapasalamat ka sa Biblia bilang isa ka regalo?

¹⁹ Mabag-o sang Biblia ang imo kabuhi. Makabulig ini sa imo nga makilala pa gid ang imo kaugalingon kag maintiendihan ang imo ginapamensar kag ginabatyag. Halimbawa, mahimo nagapensar kita nga palangga naton ang Dios. Pero para pamatud-an ina, dapat naton iaplikar ang ginasiling sang Biblia.

²⁰ Ang Biblia libro gid halin sa Dios. Gusto niya nga basahon mo ini, tun-an, kag pabaloran. Ipakita nga nagapasalamat ka sa sini nga regalo paagi sa pagtuon sini. Magabulig ini sa imo nga maintiendihan kon ano ang katuyuan sang Dios para sa mga tawo. Sa masunod nga kapitulo, matun-an pa gid naton ang parte sa sini nga katuyuan.