1-3. Ano ang mga pamangkot sang mga tawo parte sa kamatayon, kag ano ang sabat sang pila ka relihion?

ANG Biblia nagpromisa nga sa ulihi “wala na sing kamatayon.” (Bugna 21:4) Natun-an naton sa Kapitulo 5 nga paagi sa gawad nangin posible nga mabaton naton ang kabuhi nga wala sing katapusan. Pero nagakapatay gihapon ang mga tawo. (Manugwali 9:5) Gani ang isa sa importante nga pamangkot amo, Ano ang matabo sa aton kon mapatay kita?

² Importante gid ang sabat sa sina nga pamangkot ilabi na kon mapatay ang aton pinalangga. Mahimo mamangkot kita: ‘Diin na sia? Ginatan-aw bala niya kita? Mabuligan bala niya kita? Makita pa bala naton sia liwat?’

³ Sarisari ang sabat sang mga relihion sa sina nga mga pamangkot. Ginatudlo sang iban nga kon maayo ka, mapalangit ka kag kon malain ka, sunugon ka sa impierno. Ang iban naman nagasiling nga kon mapatay ka mangin espiritu ka kag padayon nga magkabuhi upod sa imo pamilya nga napatay na. May nagasiling man nga kon mapatay ka kag mahukman, mabun-ag ka liwat, ukon mabuhi sa lain naman nga lawas, mahimo sa lain nga tawo ukon sapat.

4. Ano ang ginatudlo sang mga relihion parte sa kamatayon?

⁴ Indi palareho ang ginatudlo sang mga relihion. Pero daw halos isa lang ang ila pagpati. Ginatudlo nila nga kon mapatay ang tawo, may bahin sa iya nga padayon nga nagakabuhi. Matuod bala ina?

5, 6. Ano ang nagakatabo sa aton kon mapatay kita?

⁵ Nahibaluan ni Jehova kon ano ang nagakatabo sa aton kon mapatay kita, kag ginsilingan niya kita nga kon mapatay ang tawo, natapos na ang iya kabuhi. Ang kamatayon kabaliskaran sang kabuhi. Kon mapatay ang isa, ang iya balatyagon kag hunahuna wala na nagapadayon sa bisan diin. * Kon mapatay kita, indi na kita makakita, makabati, kag makapamensar.

⁶ Si Hari Solomon nagsulat nga “ang mga patay wala gid sing nahibaluan.” Ang mga patay indi na makapalangga ukon makapangakig, kag “wala na sing hilikuton ukon plano ukon ihibalo sa Lulubngan.” (Basaha ang Manugwali 9:5, 6, 10.) Kag sa Salmo 146:4, ang Biblia nagsiling nga kon mapatay ang isa, mapatay man “ang iya panghunahuna.”

7. Ano ang ginsiling ni Jesus parte sa kamatayon?

⁷ Sang napatay ang iya abyan nga si Lazaro, ginsilingan ni Jesus ang iya mga disipulo: “Si Lazaro nga aton abyan nagakatulog.” Pero indi buot silingon ni Jesus nga nagapahuway lang si Lazaro. Nagsiling pa si Jesus: “Patay na si Lazaro.” (Juan 11:11-14) Gani nagsiling si Jesus nga ang kamatayon pareho sa pagtulog. Wala sia nagsiling nga si Lazaro ara sa langit ukon kaupod niya ang iya miembro sang pamilya nga napatay na. Kag wala man sia nagsiling nga nagaantos si Lazaro sa impierno ukon nabun-ag liwat sa lain nga tawo ukon sapat. Si Lazaro daw pareho lang nga nagatulog sing mahamuok. Ginpakita sang iban nga bersikulo nga ang kamatayon pareho sang mahamuok nga katulugon. Ang  Biblia nagasiling nga sang ginpatay si Esteban, “nagtulog sia sa kamatayon.” (Binuhatan 7:60) Si apostol Pablo nagsulat nga ang pila ka Cristiano “nagtulog na sa kamatayon.”—1 Corinto 15:6.

8. Ngaa masiling naton nga wala gintuga sang Dios ang tawo para mapatay?

⁸ Gintuga bala sang Dios si Adan kag si Eva para mapatay sa ulihi? Wala! Gintuga sila ni Jehova para mabuhi sing wala katapusan nga may perpekto nga panglawas. Sang gintuga ni Jehova ang tawo, ginbutang niya sa ila ang handum nga mabuhi sing wala katapusan. (Manugwali 3:11) Indi gusto sang mga ginikanan nga makita ang ila kabataan nga  magtigulang kag mapatay, kag amo man sini ang ginabatyag ni Jehova para sa aton. Pero kon gintuga kita sang Dios para mabuhi sing wala katapusan, ngaa nagakapatay kita?

9. Ngaa rasonable ang ginhatag nga sugo ni Jehova kay Adan kag kay Eva?

⁹ Sa hardin sang Eden, ginsilingan ni Jehova si Adan: “Makapaayaw ka sa pagkaon sang bunga sang tanan nga kahoy sa hardin. Apang indi gid ikaw magkaon sang bunga sang kahoy sang pagkilala sang maayo kag malain, kay sa adlaw nga magkaon ka sang bunga sini pat-od gid nga mapatay ka.” (Genesis 2:9, 16, 17) Inang maathag nga sugo indi mabudlay sundon, kag may kinamatarong si Jehova nga magsiling kay Adan kag kay Eva kon ano ang maayo kag malain. Ang pagtuman nila kay Jehova nagapakita nga ginarespeto nila ang iya awtoridad kag nagapasalamat sa tanan nga ginhatag niya sa ila.

10, 11. (a) Paano gindayaan ni Satanas si Adan kag si Eva? (b) Ngaa indi gid mapatawad ang ginhimo ni Adan kag ni Eva?

¹⁰ Ang masubo kay ginpili ni Adan kag ni Eva nga indi magtuman kay Jehova. Nagsiling si Satanas kay Eva: “Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?” Nagsabat si Eva: “Mahimo namon kaunon ang bunga sang mga kahoy sa hardin. Apang tuhoy sa bunga sang kahoy nga yara sa tunga sang hardin, nagsiling ang Dios: ‘Indi kamo magkaon halin sa sini, indi ninyo ini pagtandugon; kay kon himuon ninyo ini, mapatay kamo.’”—Genesis 3:1-3.

¹¹ Dayon nagsiling si Satanas: “Indi kamo mapatay. Kay nakahibalo ang Dios nga sa adlaw nga magkaon kamo sini, magamuklat ang inyo mga mata kag mangin kaangay kamo sa Dios, nga nakahibalo kon ano ang maayo kag malain.” (Genesis 3:4-6) Gusto papatihon ni Satanas si Eva nga puede sia  makadesisyon para sa iya kaugalingon kon ano ang maayo kag malain. Kag nagbutig man sia kay Eva kon ano ang matabo sa iya kon indi sia magtuman sa Dios. Nagsiling si Satanas nga indi mapatay si Eva, gani ginkaon ni Eva ang prutas kag ginhatagan niya ang iya bana. Nahibaluan ni Adan kag ni Eva nga nagsiling si Jehova nga indi nila pagkaunon ang prutas. Sang nagkaon sila, ginpili nila nga indi pagtumanon ang maathag kag rasonable nga sugo. Ginpakita nila nga wala nila ginarespeto ang ila mapinalanggaon nga Amay sa langit. Indi gid mapatawad ang ila ginhimo!

12. Ngaa makapasubo gid nga wala nagtuman si Adan kag si Eva kay Jehova?

¹² Makapasubo gid kay wala ginrespeto sang aton una nga mga ginikanan ang ila Manunuga! Ano ang batyagon mo kon nagpanikasog ka gid nga padakuon ang imo bata, pero nagrebelde sia sa imo kag wala ka niya gintuman? Sigurado nga masubuan ka gid!

13. Ano ang buot silingon ni Jehova sang nagsiling sia nga “sa yab-ok ka man magabalik”?

¹³ Sang wala nagtuman si Adan kag si Eva, nadula nila ang tsansa nga mabuhi sing wala katapusan. Ginsilingan ni Jehova si Adan: “Bangod yab-ok ka, sa yab-ok ka man magabalik.” (Basaha ang Genesis 3:19.) Gani mangin yab-ok liwat si Adan, nga daw wala lang sia gintuga. (Genesis 2:7) Sang nagpakasala si Adan, napatay sia kag wala na nagluntad.

14. Ngaa nagakapatay kita?

 ¹⁴ Kon nagtuman si Adan kag si Eva sa Dios, buhi pa sila tani subong. Pero wala sila nagtuman sa iya, gani nakasala sila, kag sang ulihi napatay. Ang sala daw pareho sa makamamatay nga balatian nga napanubli naton sa aton una nga mga ginikanan. Tanan kita natawo nga makasasala, gani nagakapatay kita. (Roma 5:12) Pero indi amo sina ang katuyuan sang Dios para sa mga tawo. Indi niya gusto nga mapatay kita, kag gintawag sang Biblia nga “kaaway” ang kamatayon.—1 Corinto 15:26.

15. Paano ang kamatuoran parte sa kamatayon nagahilway sa aton?

¹⁵ Ang kamatuoran parte sa kamatayon magahilway sa aton sa madamo nga sala nga panudlo. Ginatudlo sa aton sang Biblia nga ang mga patay wala nagabatyag sang kasakit ukon kasubo. Indi na kita makaistorya sa ila, kag indi man sila makaistorya sa aton. Indi naton sila mabuligan, kag indi man sila makabulig sa aton. Indi sila makahalit sa aton, gani indi kita dapat mahadlok sa ila. Pero, ginatudlo sang madamo nga relihion nga ang patay nagakabuhi sa iban nga lugar kag mabuligan naton sila kon maghatag kita sing kuarta sa mga pari ukon sa ginakabig nila nga mga balaan. Pero indi na kita matuntuhan sina nga mga kabutigan kay nahibaluan na naton ang kamatuoran.

16. Ano nga butig nga mga panudlo parte sa mga patay ang ginatudlo sang madamo nga relihion?

¹⁶ Ginagamit ni Satanas ang butig nga relihion para papatihon kita nga buhi pa ang mga patay. Halimbawa, ginatudlo sang pila ka relihion nga kon mapatay kita, may bahin pa sa aton nga padayon nga nagakabuhi sa iban nga lugar. Ginatudlo bala ina sang imo relihion, ukon ginatudlo nila sa imo ang ginasiling sang Biblia parte sa mga patay? Nagabinutig si Satanas para ipalayo ang mga tawo kay Jehova.

17. Ngaa insulto gid kay Jehova ang panudlo nga sunugon sa impierno ang mga tawo?

 ¹⁷ Pero mas malala pa gid ang ginatudlo sang madamo nga relihion. Halimbawa, ginatudlo nila nga kon mapatay ang malain nga tawo sunugon sia sa impierno sa wala sing katapusan. Insulto gid ini kay Jehova. Indi gid niya pagpasugtan nga mag-antos ang mga tawo sa sina nga paagi! (Basaha ang 1 Juan 4:8.) Ano ang batyagon mo kon may isa nga nagasilot sa iya bata paagi sa pagbutang sang kamot sini sa kalayo? Sigurado nga masiling ka gid nga kapintas sa iya. Indi mo gid gusto kilalahon ina nga tawo. Amo gid sina ang gusto ni Satanas nga batyagon naton kay Jehova!

18. Ngaa indi kita dapat mahadlok sa mga patay?

¹⁸ Ginatudlo sang pila ka relihion nga kon mapatay ang tawo, mangin isa sia ka espiritu. Ginatudlo nila nga respetuhon kag kahadlukan naton ina nga mga espiritu kay puede naton sila mangin maayo nga abyan ukon malain nga kaaway. Madamo ang nagapati sa sina nga kabutigan. Nahadlok sila sa mga patay, gani amo ini ang ila ginasimba imbes nga si Jehova. Dumduma nga ang mga patay indi na makabatyag, gani indi kita dapat mahadlok sa ila. Si Jehova ang aton Manunuga. Sia ang matuod nga Dios, kag sia lamang ang dapat naton simbahon.—Bugna 4:11.

19. Paano makabulig sa aton ang kamatuoran parte sa kamatayon?

¹⁹ Sang nahibaluan naton ang kamatuoran parte sa kamatayon, nahilway na kita sa butig nga mga panudlo sang relihion. Paagi sini, maintiendihan naton ang matahom nga mga promisa ni Jehova sa aton kabuhi kag sa aton palaabuton.

20. Ano ang tun-an naton sa masunod nga kapitulo?

²⁰ Madugay na nga panahon ang nagligad, si Job nga alagad sang Dios namangkot: “Kon ang tawo mapatay, mabuhi pa bala sia liwat?” (Job 14:14) Posible bala nga mabuhi liwat ang mga patay? Makalilipay gid ang sabat sang Dios sa Biblia. Mahibaluan naton ini sa masunod nga kapitulo.