1, 2. Ano ang ginapamangkot sang mga tawo?

ISA ka tsunami ang nagguba sang bilog nga baryo. Isa ka tawo ang nagpaniro sa simbahan kag madamo ang napilasan kag napatay. Isa ka iloy, nga may lima ka bata, ang napatay bangod sa kanser.

² Kon matabo ina nga mga kalamidad ukon trahedya, madamo ang nagapamangkot, “Ngaa?” Madamo ang nagapamangkot kon ngaa grabe gid ang pagdinumtanay kag pag-antos sa kalibutan. Napamangkot mo man bala ina?

3, 4. (a) Ano ang pamangkot ni Habacuc? (b) Ano ang sabat ni Jehova?

³ Sa Biblia, natun-an naton nga namangkot man sing amo sini ang mga matutom nga alagad sang Dios. Halimbawa, si propeta Habacuc namangkot kay Jehova: “Ngaa ginahimo mo ako nga saksi sa kalautan? Kag ngaa ginapabay-an mo lang ang pagpamigos? Ngaa makita ko ang pagpanglaglag kag pagpamintas? Kag ngaa madamo ang nagailinaway kag nagaginamo?”—Habacuc 1:3.

⁴ Mabasa naton sa Habacuc 2:2, 3 ang sabat sang Dios kag ang Iya promisa nga tadlungon ang sitwasyon. Palangga gid ni Jehova ang mga tawo. Ang Biblia nagasiling: “Nagaulikid sia sa inyo.” (1 Pedro 5:7) Ang matuod, kon akig kita sa pag-antos, mas akig ang Dios. (Isaias 55:8, 9) Gani, sabton naton ang pamangkot nga, Ngaa grabe gid ang pag-antos sa kalibutan?

5. Ano ang ginasiling sang mga manunudlo sang relihion parte sa pag-antos? Ano ang ginatudlo sang Biblia?

⁵ Pirme ginasiling sang mga pastor, pari, kag mga manunudlo sang relihion nga pagbuot sang Dios nga mag-antos ang mga tawo. Ang iban nagasiling nga ang tanan nga nagakatabo sa tawo, lakip ang trahedya, natalana na sang Dios kag indi gid naton ini maintiendihan. Ang iban gani nagasiling nga nagakapatay ang tawo, lakip ang kabataan, para makaupod nila ang Dios sa langit. Pero sala ina. Wala si Jehova nagahimo sing malain. Ang Biblia nagasiling: “Imposible nga ang matuod nga Dios maghimo sing malaut, nga ang Labing Gamhanan maghimo sing sayop!”—Job 34:10.

6. Ngaa madamo ang nagabasol sa Dios sa tanan nga pag-antos sa kalibutan?

⁶ Madamo ang nagabasol sa Dios sa tanan nga pag-antos kay abi nila ang Dios ang nagagahom sa kalibutan. Pero natun-an naton sa Kapitulo 3 nga si Satanas nga Yawa amo ang nagagahom sa kalibutan.

7, 8. Ngaa grabe gid ang pag-antos sa kalibutan?

⁷ Ginasilingan kita sang Biblia nga “ang bug-os nga kalibutan yara sa gahom sang isa nga malauton.” (1 Juan 5:19) Ang manuggahom sini nga kalibutan, si Satanas, mapintas gid kag malain. ‘Ginapatalang niya ang bug-os napuy-an nga duta.’ (Bugna 12:9) Ginailog sia sang madamo nga tawo. Amo ina ang isa ka rason nga ang kalibutan puno sang kabutigan, dumot, kag kapintas.

⁸ May iban pa nga rason kon ngaa grabe gid ang pag-antos sa kalibutan. Sa tapos magrebelde si Adan kag si Eva, ginpapanubli nila ang sala sa ila kabataan. Kag bangod sa sala, ginapaantos sang tawo ang iya isigkatawo. Gusto nila nga mas importante sila sa iban. Nagainaway  sila kag ginadaugdaug nila ang iban. (Manugwali 4:1; 8:9) Kon kaisa nagaantos ang mga tawo bangod sa “tion kag . . . wala ginapaabot nga hitabo.” (Manugwali 9:11) Natabuan nga ara sila sa sina nga lugar kag oras sang natabo ang aksidente kag iban pa nga malain nga butang.

9. Ngaa makasigurado kita nga may maayo nga rason si Jehova kon ngaa ginapasugtan niya nga magpadayon ang pag-antos?

⁹ Indi si Jehova ang rason sang pag-antos. Indi sia ang balasulon sa inaway, krimen, kag pagpanghalit. Indi man sia ang nagapahanabo sang mga linog, buhawi, kag baha. Pero mahimo magpalibog ka, ‘Kon si Jehova ang pinakagamhanan nga persona sa uniberso, ngaa ginapasugtan niya nga matabo ang malain nga mga butang?’ Nahibaluan naton nga nagaulikid gid ang Dios sa aton, pero may maayo gid sia nga rason kon ngaa ginapasugtan niya nga magpadayon ang pag-antos.—1 Juan 4:8.

10. Ano ang akusasyon ni Satanas kay Jehova?

¹⁰ Sa hardin sang Eden, gindayaan sang Yawa si Adan kag si Eva. Gin-akusahan ni Satanas ang Dios nga malain nga Manuggahom. Nagsiling sia nga indi gusto sang Dios ihatag ang maayo kay Adan kag kay Eva. Gusto sila papatihon ni Satanas nga mas maayo sia nga manuggahom sangsa kay Jehova kag indi na nila kinahanglan ang Dios.—Genesis 3:2-5; tan-awa ang Endnote 27.

11. Ano nga pamangkot ang dapat naton sabton?

¹¹ Wala gintuman ni Adan kag ni Eva si Jehova kag nagrebelde sila sa iya. Nagpamensar sila nga may kinamatarong sila nga magdesisyon kon ano ang maayo kag malain. Paano pamatud-an ni Jehova nga sala ang mga rebelde kag sia lamang ang nakahibalo kon ano ang maayo para sa aton?

12, 13. (a) Ngaa wala dayon ginpatay ni Jehova ang mga rebelde? (b) Ngaa ginpasugtan ni Jehova si Satanas nga maggahom sa kalibutan kag gamhan sang mga tawo ang ila kaugalingon?

 ¹² Wala dayon ginpatay ni Jehova si Adan kag si Eva. Ginpasugtan anay niya nga manganak sila. Dayon naghimo si Jehova sing paagi para makapili ang mga anak ni Adan kag ni Eva kon sin-o ang gusto nila nga manuggahom. Katuyuan ni Jehova nga mapuno sang perpekto nga mga tawo ang duta, kag matabo gid ina bisan ano pa ang himuon sang Yawa.—Genesis 1:28; Isaias 55:10, 11.

¹³ Ginkuestyon ni Satanas si Jehova sa atubangan sang minilyon ka anghel. (Job 38:7; Daniel 7:10) Gani ginhatagan ni Jehova si Satanas sang panahon para pamatud-an kon bala matuod ang iya ginsiling. Ginhatagan man niya sing panahon ang mga tawo nga magtukod sang ila gobierno sa impluwensia ni Satanas para ipakita kon bala mangin madinalag-on gid sila kon wala ang bulig sang Dios.

14. Ano ang napamatud-an sa pagligad sang panahon?

¹⁴ Sa sulod sang linibo ka tuig, gingamhan sang mga tawo ang ila kaugalingon, pero napaslawan sila. Napamatud-an nga butigon si Satanas. Kinahanglan gid sang mga tawo ang bulig sang Dios. Insakto gid ang ginsiling ni propeta Jeremias: “O Jehova, nahibaluan ko gid nga wala sing ikasarang ang tawo sa pagtuytoy sang iya dalanon. Wala sing ikasarang ang tawo sa pagtuytoy sang iya tikang.”—Jeremias 10:23.

15, 16. (a) Ngaa ginpasugtan ni Jehova nga magdugay ang pag-antos? (b) Ngaa wala ginsolbar ni Jehova ang mga problema nga ginhimo ni Satanas?

¹⁵ Ngaa ginpasugtan ni Jehova nga magdugay ang pag-antos? Ngaa wala niya ginpunggan nga matabo ang malain nga mga butang? Kinahanglan sang malawig nga  panahon para pamatud-an nga napaslawan ang paggahom ni Satanas. Napaslawan ang bisan ano nga klase sang gobierno nga gintukod sang mga tawo. Bisan pa nag-uswag ang siensia kag teknolohiya, mas madamo na gid ang inhustisya, gutom, krimen, kag inaway. Indi gid naton masarangan nga gamhan ang aton kaugalingon kon wala ang bulig sang Dios.

¹⁶ Pero, wala pa ginsolbar ni Jehova ang mga problema nga ginhimo ni Satanas. Kay kon himuon niya ini, daw pareho lang nga ginasuportahan niya ang paggahom ni Satanas, kag indi gid Niya ina paghimuon. Isa pa, basi pamensaron sang mga tawo nga masarangan nila nga gamhan ang ila kaugalingon sing madinalag-on. Indi gid ina matuod, kag indi gid ina pagsuportahan ni Jehova. Wala gid sia nagabutig.—Hebreo 6:18.

17, 18. Ano ang himuon ni Jehova sa tanan nga halit nga ginhimo ni Satanas?

¹⁷ Makay-o bala ni Jehova ang tanan nga halit nga resulta sang pagrebelde ni Satanas kag sang mga tawo? Huo. Wala sing imposible sa Dios. Nahibaluan ni Jehova kon san-o gid masabat sing bug-os ang pagkuestyon ni Satanas. Dayon himuon niya nga paraiso ang duta, suno sa iya katuyuan. Ang tanan nga ara “sa handumanan nga mga lulubngan” pagabanhawon. (Juan 5:28, 29) Indi na magmasakit ang mga tawo ukon mapatay. Kay-uhon ni Jesus ang tanan nga halit nga ginhimo ni Satanas. Gamiton ni Jehova si Jesus “agod gub-on ang mga binuhatan sang Yawa.” (1 Juan 3:8) Nagapasalamat gid kita kay nangin mapinasensiahon gid si Jehova sa aton para makilala naton sia kag pilion sia bilang aton Manuggahom. (Basaha ang 2 Pedro 3:9, 10.) Bisan pa mag-antos kita, buligan niya kita nga makabatas.—Juan 4:23; basaha ang 1 Corinto 10:13.

 ¹⁸ Wala kita ginapilit ni Jehova nga pilion sia bilang aton Manuggahom. Ginhatagan niya kita sing kahilwayan sa pagdesisyon. Hibaluon naton kon ano ang epekto sa aton sining espesyal nga regalo.

19. Ano nga matahom nga regalo ang ginhatag sa aton ni Jehova? Ngaa dapat naton ini pasalamatan?

¹⁹ Lain gid kita sa mga sapat kay ginhatagan kita ni Jehova sang matahom nga regalo, ang kahilwayan sa pagdesisyon. Ginahimo sang mga sapat ang isa ka butang bangod sang ila duna nga kinaugali, pero makapili kita kon paano naton gamiton ang aton kabuhi kag magdesisyon kon bala gusto naton mapahalipay si Jehova. (Hulubaton 30:24) Isa pa, indi kita pareho sa robot nga ginahimo lang sini kon ano ang naka-program. Makapili kita kon ano ang gusto naton nga mangin klase sang tawo, kon sin-o ang gusto naton nga mangin abyan, kag kon ano ang gusto naton himuon sa aton kabuhi. Gusto ni Jehova nga malipay kita.

20, 21. Ano ang pinakamaayo nga desisyon nga mahimo mo subong?

²⁰ Gusto ni Jehova nga palanggaon naton sia. (Mateo 22:37, 38) Pareho sia sa isa ka amay nga nalipay kon hambalan sia sang iya bata sing “palangga ta ka” sing tinagipusuon kag wala ginpilit. Ginhatagan kita ni Jehova sing kahilwayan sa pagpili kon bala alagaron naton sia ukon indi. Ginpili ni Satanas, ni Adan, kag ni Eva nga sikwayon si Jehova. Paano mo gamiton ang imo kahilwayan sa pagdesisyon?

²¹ Gamita ini sa pag-alagad kay Jehova. Minilyon ang nagdesisyon nga mag-alagad sa Dios kag ginsikway si Satanas. (Hulubaton 27:11) Ano ang himuon mo para makaistar sa bag-o nga kalibutan sang Dios nga wala na sing pag-antos? Sabton ini sa masunod nga kapitulo.