Pamensari ini nga sitwasyon: Duha pa lang ka bulan nga nagadeyt sanday Heather kag Mike, pero pamatyag ni Heather kilalahay na gid sila. Pirme sila nagateksanay, inoras sila nagatawganay, kag daw pareho pirme ang dalagan sang ila pamensar! Pero may iban pa nga gusto himuon si Mike.

Sang nagligad nga duha ka bulan, sanday Mike kag Heather naga-holding hands lang kag naga-kiss. Asta lang dira ang gusto ni Heather, pero indi man niya gusto nga bulagan sia ni Mike. Ginapabatyag sa iya ni Mike nga guapa sia kag espesyal. ‘Isa pa,’ sa pensar niya, ‘nagapalanggaanay kami ni Mike.’

Kon sa husto ka na nga edad sa pagdeyt kag ikaw ang ara sa sitwasyon ni Heather, ano ang himuon mo?

Kon maglumpat ka sa bilding kag testingan mo nga maglupad, may malain gid nga matabo sa imo kay ginbalewala mo ang law of gravity. Amo man sini kon indi mo pagsundon ang kasuguan sa moral, pareho sang sugo nga: “Maglikaw sa seksuwal nga imoralidad.”—1 Tesalonica 4:3.

Ano ang matabo kon indi mo ini pagsundon? Ang Biblia nagasiling: “Ang padayon nga nagahimo sing seksuwal nga imoralidad nagapakasala batok sa iya kaugalingon nga lawas.” (1 Corinto 6:18) Matuod bala ini?

 Nakita sang mga researcher nga madamo nga pamatan-on nga nag-sex nga wala pa makasal ang masami nakaeksperiensia sang masunod nga resulta.

• GINAKONSIENSIA. Ang kalabanan nga pamatan-on nga nag-sex nga wala makasal naghambal nga naghinulsol gid sila.

• NADULAAN SING PAGSALIG. Pagkatapos sang ila ginhimo, nagapamensar ang kada isa sa ila, ‘Sin-o pa gid ayhan ang nakatilaw sa iya?’

• KAPASLAWAN. Madamo nga babayi ang gusto nga proteksionan sila, indi nga gamiton lang. Kag madamo nga lalaki ang naghambal nga nadulaan sila sing gana sa mga babayi nga natilawan na nila.

• Ang punto: Kon mag-sex ka nga wala makasal, ginapakanubo mo ang imo kaugalingon kay ginahatag mo ang tama ka importante nga butang. (Roma 1:24) Ang imo lawas tama gid ka malahalon, gani dapat mo ini halungan!

Ipakita nga determinado ka sa pagsunod sa sugo nga “maglikaw sa seksuwal nga imoralidad.” (1 Tesalonica 4:3) Kon makapangasawa ka na ukon makapamana sa ulihi, indi na malain ang pag-sex. Kag mangin bug-os ang imo kalipay kay indi mo mabatyagan ang kabalaka kag paghinulsol nga pirme ginabatyag sang mga nag-sex nga wala makasal.—Hulubaton 7:22, 23; 1 Corinto 7:3.

• Kon matuod gid ang iya gugma sa imo, halitan bala niya ang imo lawas kag balatyagon?

• Palangga ka gid bala niya kon ginatentar ka niya nga magpakasala sa Dios?—Hebreo 13:4.