1-3. (a) Ano nga mga pamangkot ang aton binagbinagon? (b) Ano ang apat ka panguna nga kinahanglanon para sa putli nga pagsimba ang aton binagbinagon? (Tan-awa ang piktyur sa umpisa sini nga kapitulo.)

GINATAN-AW sing maayo ni Abel ang iya panong. Sia ang nagsagod sini halin sang gamay pa. Karon mapili sia sang pila ka karnero, ihawon ini, kag ihalad bilang dulot sa Dios. Batunon bala ni Jehova ini nga klase sang pagsimba sang indi perpekto nga tawo?

² Si apostol Pablo gingiyahan sang Dios sa pagsulat parte kay Abel: “Ginkahamut-an sang Dios ang iya mga dulot.” Pero wala ginbaton ni Jehova ang halad ni Cain. (Basaha ang Hebreo 11:4.) Gani may mga pamangkot nga dapat naton binagbinagon. Ngaa ginbaton sang Dios ang pagsimba ni Abel pero ang kay Cain wala? Ano ang matun-an naton sa halimbawa ni Cain kag ni Abel kag sang iban pa nga tawo nga mabasa sa Hebreo kapitulo 11? Ang sabat sa sini makabulig sa aton nga maintiendihan sing maayo kon ano ang nadalahig sa putli nga pagsimba.

³ Samtang ginabinagbinag naton ining malip-ot nga sumaryo sang mga hitabo halin kay Abel asta kay Ezequiel, talupangda ang apat ka panguna nga kinahanglanon para batunon sang Dios ang aton pagsimba: Ang magabaton dapat si Jehova, ang kalidad  dapat pinakamaayo, ang paagi dapat nahamut-an sang Dios, kag ang motibo sang sumilimba dapat putli.

4, 5. Ano ang mga rason kon ngaa nagpensar si Cain nga si Jehova ang magabaton sang iya dulot?

⁴ Basaha ang Genesis 4:2-5. Nabal-an gid ni Cain nga ang magabaton sang iya dulot amo si Jehova. Madamo gid sing tion kag kahigayunan si Cain nga matun-an ang parte kay Jehova. Mahimo nga manug-100 ka tuig na ang ila edad ni Abel sang naghalad sila. * Samtang nagadaku sila, pamilyar sila sa hardin sang Eden, kag mahimo nakita nila sa uluunhan ining matahom nga lugar. Mahimo nakita man nila ang mga kerubin nga nagabantay sa alagyan. (Gen. 3:24) Sigurado nga gintudluan sila sang ila mga ginikanan nga si Jehova ang nagtuga sang tanan nga buhi nga butang kag ang iya orihinal nga katuyuan sa katawhan amo nga indi sila magtigulang kag mapatay. (Gen. 1:24-28) Posible amo ini ang mga rason kon ngaa nagpensar si Cain nga dapat sa Dios niya ihalad ang iya dulot.

⁵ Ano pa ang mahimo nga nagpahulag kay Cain nga maghalad? Nagtagna si Jehova nga may “kaliwat” nga magadugmok sa ulo sang “man-ug” nga nagsulay kay Eva nga maghimo sing sala. (Gen. 3:4-6, 14, 15) Si Cain ang kamagulangan, gani mahimo nagpensar sia nga sia ang ginpromisa nga “kaliwat.” (Gen. 4:1) Isa pa, padayon nga nakigkomunikar si Jehova sa makasasala nga mga tawo, kag bisan nakasala na si Adan, nakighambal gihapon ang Dios sa iya paagi sa isa ka anghel. (Gen. 3:8-10) Nakighambal man si Jehova kay Cain sa tapos sia makahalad. (Gen. 4:6) Gani nabal-an gid ni Cain nga si Jehova lang ang dapat simbahon.

6, 7. May sala bala sa kalidad ukon paagi sang paghalad ni Cain? Ipaathag.

⁶ Pero, ngaa wala nalipay si Jehova sa halad ni Cain? Indi bala maayo ang kalidad sang iya dulot? Wala sing ginasiling ang Biblia. Nagsiling lang ini nga si Cain nagdala sing “mga patubas sang duta.” Sa Kasuguan nga ginhatag kay Moises, nagsiling si Jehova nga ginabaton ini nga sahi sang halad. (Num. 15:8, 9) Binagbinaga man ang sitwasyon sadto. Sang panahon nila, mga tanom lang ang ginakaon sang mga tawo. (Gen. 1:29) Ginpakamalaut sang Dios ang duta sa gua sang Eden, gani nangabudlay gid si Cain para makahalad. (Gen. 3:17-19) Naghalad sia sing pagkaon nga iya ginpangabudlayan. Pero wala nalipay si Jehova sa halad ni Cain.

⁷ Kon amo, sala bala ang paagi sang iya paghalad? May wala bala nahimo si Cain para batunon ang iya halad? Indi man. Ngaa makasiling kita sina? Wala ginbaton ni Jehova ang halad ni Cain, pero wala niya ginpakamalaut ang paagi ni Cain sa paghalad. Ang matuod, wala sing mabasa kon ano ang paagi sang paghalad ni Cain kag ni Abel. Ti, ano ang problema?

8, 9. (a) Ngaa wala nalipay si Jehova kay Cain ukon sa iya halad? (b) Ano ang natalupangdan mo sa mga impormasyon sa Biblia parte kay Cain kag kay Abel?

 ⁸ Gingiyahan sang Dios si Pablo sa pagsulat sa mga Hebreo. Kag suno sa iya sulat, indi putli ang motibo ni Cain sa paghalad. Wala sing pagtuo si Cain. (Heb. 11:4; 1 Juan 3:11, 12) Amo kon ngaa wala nalipay si Jehova indi lang sa halad ni Cain, kundi kay Cain mismo. (Gen. 4:5-8) Si Jehova mahigugmaon nga Amay, gani mainayuhon niya nga gintadlong ang iya anak. Pero wala ginbaton ni Cain ang pagtadlong ni Jehova. Nagtubo sa malaragwayon nga tagipusuon ni Cain ang mga buhat sang unod—“pag-ilinaway, kinagamo, kaimon.” (Gal. 5:19, 20) Bangod sang iya malain nga tagipusuon, mangin wala pulos ang bisan ano nga himuon niya sa pagsimba. Ang iya halimbawa nagatudlo sa aton nga ang putli nga pagsimba indi lang pakitakita nga debosyon kay Jehova.

⁹ Madamo kita sing matun-an sa Biblia parte kay Cain. Nabatian naton nga nakighambal si Jehova sa iya, kag nabasa naton ang sabat ni Cain. Nakilala man naton ang ngalan sang iya mga bata kag ang mga ginhimo nila. (Gen. 4:17-24) Kon parte naman kay Abel, wala kita sing mabasa nga may kabataan sia kag wala ginrekord sa Biblia ang iya ginhambal. Pero paagi sa mga ginhimo ni Abel, daw nagapakighambal sia sa aton subong. Paano?

10. Paano naghimo si Abel sing sulundan para sa putli nga pagsimba?

¹⁰ Naghalad si Abel kay Jehova bangod nabal-an niya nga Sia lamang ang dapat magbaton sini. Pinakamaayo ang kalidad sang iya dulot kay ginpili ni Abel ang pila ka “panganay sang iya kasapatan.” Bisan pa wala kita sing mabasa kon bala ginhalad niya ini sa halaran ukon wala, sigurado nga ginbaton ang paagi sang iya paghalad. Pero ang talalupangdon gid sa dulot ni Abel amo ang iya motibo sa paghatag. Makatuon gihapon kita sa iya halimbawa bisan pa mga anom ka libo ka tuig na ang nagligad. Ginpahulag si Abel sang iya pagtuo sa Dios kag sang iya gugma sa matarong nga talaksan ni Jehova. Paano?

11. Ngaa nagsiling si Jesus nga matarong si Abel?

¹¹ Una, binagbinaga ang ginsiling ni Jesus parte kay Abel, ang tawo nga kilala gid niya. Nagakabuhi na si Jesus sa langit sang natawo si Abel sa duta. Interesado gid si Jesus sa sining anak ni Adan. (Hulu. 8:22, 30, 31; Juan 8:58; Col. 1:15, 16) Gani sang nagsiling si Jesus nga si Abel matarong nga tawo, base gid ini sa iya nakita. (Mat. 23:35) Ang matarong nga tawo nagakilala nga si Jehova lang ang dapat nga maghimo sing talaksan kon ano ang husto kag sala. Pero indi lang ina, makita man sa iya ginahambal kag ginahimo nga ginasunod niya ini nga mga talaksan. (Ipaanggid ang Lucas 1:5, 6.) Kinahanglan sing tion antes makilala kon bala ang isa matarong. Gani antes naghalad si Abel sang iya dulot sa Dios, kilala na sia nga nagasunod sa mga talaksan ni Jehova. Mahimo indi ini  mahapos para sa iya kay indi gid maayo ang halimbawa sang iya magulang nga si Cain nga nangin malaut ang tagipusuon. (1 Juan 3:12) Wala gintuman sang iloy ni Abel ang direkta nga sugo sang Dios, kag ang iya amay naman nagrebelde kay Jehova kay gusto sini nga sia ang magdesisyon kon ano ang husto kag sala. (Gen. 2:16, 17; 3:6) Nangin maisog gid si Abel kay wala niya ginsunod ang iya pamilya!

12. Ngaa indi pareho si Abel kay Cain?

¹² Masunod, talupangda kon paano gin-angot ni apostol Pablo ang pagtuo kag pagkamatarong. “Bangod sa pagtuo,” siling ni Pablo, “si Abel nagdulot sang halad sa Dios nga mas daku ang balor sangsa kay Cain, kag paagi sa sina nga pagtuo nakabaton sia sang pamatuod nga matarong sia.” (Heb. 11:4) Ginpakita sang ginsiling ni Pablo nga indi pareho kay Cain, si Abel napahulag sang iya tinagipusuon nga pagtuo kay Jehova kag sa Iya mga dalanon sa bug-os niya nga kabuhi.

13. Ano ang ginatudlo sa aton sang halimbawa ni Abel?

¹³ Ang halimbawa ni Abel nagatudlo sa aton nga ang isa makahimo lamang sing putli nga pagsimba kon putli ang motibo sang iya tagipusuon. Buot silingon, ang iya tagipusuon bug-os nga nagatuo kay Jehova kag nagasunod sa iya matarong nga mga talaksan. Dugang pa, natun-an man naton nga indi lang isa ka buhat sang debosyon ang nadalahig sa putli nga pagsimba. Nagadalahig ini sang aton bug-os nga kabuhi kag sang tanan naton nga ginahimo.

14. Ngaa ginbaton ni Jehova ang mga halad nanday Noe, Abraham, kag Jacob?

¹⁴ Si Abel ang una nga indi perpekto nga tawo nga naghatag kay Jehova sing putli nga pagsimba. Pero indi lang sia ang naghimo sini. Suno kay apostol Pablo, ginbaton man ni Jehova ang pagsimba sang iban—pareho nanday Noe, Abraham, kag Jacob. (Basaha ang Hebreo 11:7, 8, 17-21.) Sa pila ka bahin sang ila kabuhi, ini nga mga patriarka naghalad kay Jehova, kag ginbaton Niya ang ila dulot. Ngaa? Kay ang ila debosyon indi lang pakitakita kundi ginhimo nila ang tanan nga panguna nga kinahanglanon para sa putli nga pagsimba. Binagbinaga ang ila halimbawa.

15, 16. Paano ginhimo ni Noe ang apat ka panguna nga kinahanglanon para sa putli nga pagsimba?

¹⁵ Si Noe natawo 126 ka tuig pa lang sa tapos nga napatay si Adan. Pero nagdaku sia nga ang halos tanan nagasimba sa butig nga dios. * (Gen. 6:11) Antes sang Baha, si Noe lang kag ang iya pamilya ang nagaalagad kay Jehova sa husto nga paagi. (2 Ped. 2:5) Pagkatapos nga naluwas sila sa Baha, napahulag si Noe nga maghimo sing halaran, ang una nga ginsambit sa Biblia, kag naghalad sia kay Jehova. Paagi sa paghalad ni Noe, naghatag sia sing maathag nga mensahe para sa iya pamilya kag sa tanan nga tawo nga mangin kaliwat niya nga si Jehova lamang ang nagakabagay  nga magbaton sang aton pagsimba. Sa tanan nga sapat nga puede niya ihalad, nagpili si Noe sing “pila ka matinlo nga sapat kag sing pila ka matinlo nga pispis.” (Gen. 8:20) Pinakamaayo gid ini nga kalidad sang halad kay si Jehova mismo ang nagsiling nga matinlo ini.—Gen. 7:2.

¹⁶ Ginhalad ni Noe ining dulot nga sinunog sa halaran nga iya ginhimo. Ginbaton bala ini nga paagi sang pagsimba? Huo. Ang Biblia nagasiling nga ang kahumot sini nakapahamuot kay Jehova, gani ginpakamaayo niya si Noe kag ang iya mga anak. (Gen. 8:21; 9:1) Pero ang rason gid kon ngaa ginbaton ni Jehova ang halad ni Noe amo ang iya motibo. Paagi sa iya paghalad, ginpakita ni Noe ang isa pa ka ebidensia sang iya mabakod nga pagtuo kay Jehova kag sa Iya mga dalanon. Pirme gid ginatuman ni Noe si Jehova kag ang Iya mga talaksan, gani ang Biblia nagsiling nga “naglakat [sia] upod ang matuod nga Dios.” Bangod sini, nakilala si Noe nga matarong nga tawo.—Gen. 6:9; Ezeq. 14:14; Heb. 11:7.

17, 18. Paano ginhimo ni Abraham ang apat ka panguna nga kinahanglanon para sa putli nga pagsimba?

¹⁷ Si Abraham napalibutan sang mga tawo nga nagasimba sa butig nga mga dios. Sa siudad sang Ur, nga ginaistaran ni Abraham, may bantog nga templo nga nagapadungog sa bulan nga dios nga si Nanna. * Bisan ang amay ni Abraham nakasimba man sa butig nga mga dios. (Jos. 24:2) Pero ginpili ni Abraham nga simbahon si Jehova. Mahimo nga natun-an niya ang parte sa matuod nga Dios sa iya katigulangan nga si Sem, isa sa mga anak ni Noe. Nag-abtanay pa sila ni Sem sa sulod sang 150 ka tuig.

¹⁸ Madamo nga beses nga naghalad si Abraham sa bug-os niya nga kabuhi. Kag ini tanan nga buhat sang pagsimba para sa nagakabagay gid nga magbaton sini, si Jehova. (Gen. 12:8; 13:18; 15:8-10) Handa bala si Abraham nga ihatag kay Jehova ang pinakamaayo nga kalidad sang halad? Huo, kay nagsugot sia nga ihalad ang iya pinalangga nga anak nga si Isaac. Sa sina nga tion, ginhambal ni Jehova sa iya ang tanan nga detalye kon sa ano nga paagi niya himuon ang paghalad. (Gen. 22:1, 2) Handa gid si Abraham nga sundon ang tanan nga instruksion ni Jehova. Pero ginpunggan sia ni Jehova sa paghalad sa iya anak. (Gen. 22:9-12) Ginbaton ni Jehova ang pagsimba ni Abraham kay putli ang iya motibo. “Nagtuo si Abraham kay Jehova,” siling ni Pablo, “kag bangod sini ginkabig sia nga matarong.”—Roma 4:3.

19, 20. Paano ginhimo ni Jacob ang apat ka panguna nga kinahanglanon para sa putli nga pagsimba?

¹⁹ Si Jacob nag-istar sa halos bilog niya nga kabuhi sa Canaan, ang duta nga ginpromisa ni Jehova kay Abraham kag sa iya mga kaliwat. (Gen. 17:1, 8) Grabe gid kalain kag kahigko sang pagsimba sang mga tawo diri amo nga si Jehova nagsiling nga “iluad sila sang duta.” (Lev. 18:24, 25) Sang 77 anyos sia, naghalin si Jacob sa Canaan, nangasawa, kag nagbalik sia upod ang iya daku nga pamilya.  (Gen. 28:1, 2; 33:18) Pero ang pila sang iya pamilya naimpluwensiahan sang butig nga pagsimba. Bisan pa sini, sang ginsilingan sia ni Jehova nga magkadto sa Bethel para maghimo sing halaran, nagtuman dayon si Jacob. Antes sini, ginsilingan niya ang iya pamilya: “Kuhaa ninyo ang mga diosdios sa tunga ninyo, kag tinlui ang inyo kaugalingon.” Dayon matutom nga gintuman niya ang mga instruksion nga ginhatag sa iya.—Gen. 35:1-7.

²⁰ Naghimo si Jacob sing madamo nga halaran sa Ginsaad nga Duta, pero ang nagabaton sini tanan nga pagsimba amo si Jehova. (Gen. 35:14; 46:1) Insakto gid ang kalidad sang iya mga halad, ang paagi sang iya pagsimba sa Dios, kag ang iya motibo sa paghimo sini kay ang Biblia nagsiling nga “wala sia sing kasawayan,” isa ka ekspresyon nga nagapatuhoy sa mga tawo nga nahamut-an sang Dios. (Gen. 25:27) Sa bilog niya nga kabuhi, maayo gid nga halimbawa si Jacob sa pungsod sang Israel nga mangin kaliwat niya.—Gen. 35:9-12.

21. Ano ang matun-an naton parte sa putli nga pagsimba nga ginhimo sang mga patriarka?

²¹ Ano ang matun-an naton parte sa putli nga pagsimba nga ginhimo sang mga patriarka? Pareho sa ila, napalibutan man kita sang mga tawo, kag ang iban pamilya pa gani naton nga nagaupang sa aton nga si Jehova lang ang simbahon. Para mabatuan ini, dapat naton pabakuron ang aton pagtuo kay Jehova kag dapat kumbinsido kita nga ang iya matarong nga mga talaksan amo gid ang pinakamaayo. Ginapakita naton ina nga pagtuo paagi sa pagtuman kay Jehova kag paggamit sang aton tion, kusog, kag mga pagkabutang para alagaron sia. (Mat. 22:37-40; 1 Cor. 10:31) Makapalig-on gid kay ginakabig kita ni Jehova nga matarong kon simbahon naton sia sa aton bug-os nga masarangan, sa paagi nga gusto niya, kag may putli nga motibo.—Basaha ang Santiago 2:18-24.

22-24. Paano ginpadaku sang Kasuguan nga importante gid kon sin-o ang mabaton, ang kalidad, kag ang paagi sang paghalad sang mga Israelinhon?

²² Ginhatagan ni Jehova ang mga kaliwat ni Jacob sing Kasuguan para mahibaluan nila ang ginapatuman Niya sa ila. Kon tumanon nila si Jehova, sila mangin iya “hamili nga katawhan” kag “balaan nga pungsod.” (Ex. 19:5, 6) Talupangda kon paano ginpadaku sang Kasuguan ang apat ka panguna nga kinahanglanon para sa putli nga pagsimba.

²³ Maathag nga ginpakilala ni Jehova kon sin-o ang dapat magbaton sang pagsimba sang mga Israelinhon. “Indi kamo magsimba sa iban nga mga dios luwas sa akon,” siling ni Jehova. (Ex. 20:3-5) Ang ila halad dapat pinakamaayo ang kalidad. Halimbawa, ang sapat nga ihalad dapat wala sing diperensia. (Lev. 1:3; Deut. 15:21; ipaanggid ang Malaquias 1:6-8.) Ang mga Levinhon nakabenepisyo sa mga dulot nga ginhatag kay Jehova, pero dapat man sila  maghatag sang ila personal nga halad. Ang ila ihalad dapat “halin sa pinakamaayo nga bahin sang tanan nga regalo,” nga ginhatag sa ila. (Num. 18:29) Kon parte sa paagi sa pagsimba, ginhatagan ang mga Israelinhon sing detalyado nga mga instruksion kon ano, diin, kag paano himuon ang halad para kay Jehova. Sa kabilugan, sobra 600 ka kasuguan ang ginhatag sa ila, kag ginsilingan sila: “Tumana gid ninyo ang ginsugo sa inyo ni Jehova nga inyo Dios. Indi kamo magliso sa tuo ukon sa wala.”—Deut. 5:32.

²⁴ Importante gid bala kon diin maghalad ang mga Israelinhon? Huo. Ginsilingan ni Jehova ang iya katawhan nga magpatindog sing tabernakulo, kag nangin sentro ini sang putli nga pagsimba. (Ex. 40:1-3, 29, 34) Gani kon gusto sang mga Israelinhon nga batunon sang Dios ang ila mga halad sadto, dapat nila ini dal-on sa tabernakulo. *—Deut. 12:17, 18.

25. Kon parte sa paghalad, ano ang mas importante? Ipaathag.

²⁵ Pero ang mas importante amo ang motibo sang Israelinhon sa paghalad. Dapat may tinagipusuon sia nga gugma kay Jehova kag sa Iya mga talaksan. (Basaha ang Deuteronomio 6:4-6.) Kon ang mga Israelinhon nagasimba lang bangod obligado sila, wala ginabaton ni Jehova ang ila mga halad. (Isa. 1:10-13) Paagi kay propeta  Isaias, ginpakita ni Jehova nga indi sia malimbungan sang pakitakita nga debosyon. Sia nagsiling: ‘Ini nga katawhan naghimaya sa akon paagi sa ila bibig, apang ang ila tagipusuon malayo sa akon.’—Isa. 29:13.

26. Sang primero, ano ang katuyuan sang templo nga ginpatindog ni Solomon para sa putli nga pagsimba?

²⁶ Ginatos ka tuig sa tapos nga makaistar ang mga Israelinhon sa Ginsaad nga Duta, nagpatindog si Hari Solomon sang isa ka tinukod para sa putli nga pagsimba nga mas daku sangsa tabernakulo. (1 Hari 7:51; 2 Cron. 3:1, 6, 7) Sang primero, si Jehova lamang ang nagabaton sang mga halad sa sini nga templo. Si Solomon kag ang iya mga sakop nagahatag sing madamo nga halad nga pinakamaayo ang kalidad suno sa paagi nga mabasa sa Kasuguan sang Dios. (1 Hari 8:63) Pero, ang rason kon ngaa ginabaton ni Jehova ang pagsimba sa templo indi ang bili sang templo ukon ang kadamuon sang mga halad diri, kundi ang motibo sang mga nagahalad. Ginpadaku ina ni Solomon sang gin-inagurahan ang templo. Nagsiling sia: “Himua ninyo nga mangin bug-os ang inyo tagipusuon kay Jehova nga aton Dios paagi sa pagtuman sa iya mga pagsulundan kag mga sugo, pareho sang ginahimo ninyo subong gid nga adlaw.”—1 Hari 8:57-61.

27. Ano ang ginhimo sang mga hari sang Israel kag sang ila mga sakop, kag ano ang ginhimo ni Jehova?

²⁷ Makapasubo nga wala nagpadayon sa pagtuman ang mga Israelinhon sa maalamon nga laygay sang hari. Wala nila ginsunod ang isa ukon ang iban pa nga panguna nga kinahanglanon para sa putli nga pagsimba. Nangin malaut ang tagipusuon sang mga hari sang Israel kag sang ila mga sakop, gani nadula ang ila pagtuo kay Jehova kag wala na nila ginsunod ang iya matarong nga talaksan. Padayon nga nagapadala si Jehova sing mga propeta para tadlungon kag paandaman sila sa mangin resulta sang ila ginahimo. (Jer. 7:13-15, 23-26) Ang isa sa sining mga propeta amo ang matutom nga si Ezequiel. Nagkabuhi sia sang tion nga ginhigkuan ang putli nga pagsimba.

28, 29. Sin-o si Ezequiel? (Tan-awa ang kahon nga “Mga Hitabo sa Kabuhi ni Ezequiel.”)

²⁸ Pamilyar gid si Ezequiel sa pagsimba sa templo nga ginpatindog ni Solomon. Saserdote sadto ang iya amay kag may turno sa pag-alagad sa templo. (Ezeq. 1:3) Posible malipayon gid ang kabuhi ni Ezequiel sang bata pa sia. Sigurado nga gintudluan sia sang iya amay parte kay Jehova kag sa Kasuguan. Ang matuod, mga isa ka tuig ang edad ni Ezequiel sang nakita “ang libro sang Kasuguan” sa templo. * Ang nagagahom sadto, ang maayo nga hari nga si Josias, natandog gid sa iya nabatian. Gani ginhimo niya ang tanan para ibalik ang putli nga pagsimba.—2 Hari 22:8-13.

 ²⁹ Pareho sa matutom nga mga lalaki nga nauna sa iya, ginsunod ni Ezequiel ang apat ka kinahanglanon para sa putli nga pagsimba. Matun-an naton sa libro sang Ezequiel nga si Jehova lang ang iya ginaalagad. Pirme niya ginahatag ang iya pinakamaayo, kag ginasunod ang ginapahimo ni Jehova suno sa ginapatuman Niya. Ginhimo ini tanan ni Ezequiel bangod sang iya mabakod nga pagtuo. Pero indi amo sini ang ginhimo sang kalabanan nga tawo sang panahon niya. Nagdaku si Ezequiel nga nagapamati sa mga tagna ni Jeremias, nga nagsugod sa pagpanagna sang 647 B.C.E., kag maisog nga nagpaandam sa nagahilapit nga paghukom ni Jehova.

30. (a) Ano ang ginapakita sang mga tagna ni Ezequiel? (b) Ano ang tagna, kag paano naton dapat hangpon ang tagna ni Ezequiel? (Tan-awa ang kahon nga “Paghangop sa mga Tagna ni Ezequiel.”)

³⁰ Mabasa sa libro sang Ezequiel kon paano ang katawhan sang Dios nagbiya sa pag-alagad sa Iya. (Basaha ang Ezequiel 8:6.) Sang gindisiplina ni Jehova ang Juda, isa si Ezequiel sa mga bihag nga gindala sa Babilonia. (2 Hari 24:11-17) Bisan pa bihag si Ezequiel, wala sia ginpaantos. May ipahimo sa iya si Jehova para sa Iya tinapok nga katawhan. Ginapakita sang makahalawhaw nga mga palanan-awon kag mga tagna ni Ezequiel kon paano ipasag-uli ang putli nga pagsimba sa Jerusalem. Ginapakita man sini kon paano ipasag-uli sing bug-os ang putli nga pagsimba para sa tanan nga nagahigugma kay Jehova.

31. Ano ang mabulig sini nga publikasyon sa aton?

³¹ Sa masunod nga mga seksion sini nga publikasyon makita naton sing makadali ang mga langit nga ginapuy-an ni Jehova, mahibaluan naton kon paano nabulit sa kahigkuan ang putli nga pagsimba, matun-an kon paano ginpasag-uli kag ginproteksionan ni Jehova ang iya katawhan, kag mahanduraw ang palaabuton kon ang tanan nga tawo nagasimba na kay Jehova. Sa masunod nga kapitulo, binagbinagon naton ang una nga palanan-awon ni Ezequiel. Magabulig ini sa aton nga maimadyin si Jehova kag ang langitnon nga bahin sang iya organisasyon kag makumbinsi gid kita kon ngaa sia lang ang dapat hatagan sing putli nga pagsimba.