1, 2. Ngaa kon kaisa, nagagamit si Jehova sing mga larawan sa pagtudlo sing kamatuoran sa iya mga alagad diri sa duta?

IMADYINA ang isa ka pamilya nga may gagmay nga kabataan nga nagapungko sa atubang sang lamesa kag nagatuon sa Biblia. Para maintiendihan sang mga bata ang kamatuoran sa Biblia, naggamit ang amay sing simple nga mga piktyur. Nagayuhumyuhum ang mga bata kag paagi sa ila mga sabat nabatyagan sang amay nga naintiendihan nila ang iya ginatudlo. Sa bulig sang mga piktyur, natudluan niya ang iya kabataan parte kay Jehova sa paagi nga maintiendihan nila.

² Si Jehova naggamit man sing mga larawan para buligan ang iya mga anak diri sa duta nga mahangpan ang indi makita nga mga kamatuoran. Halimbawa, para ipaathag ang madalom nga kamatuoran parte sa iya, ginpakita ni Jehova kay Ezequiel ang palanan-awon nga may tumalagsahon nga mga larawan. Sang nagligad nga kapitulo sini nga publikasyon, ginbinagbinag naton ang isa sa mga larawan. Mapokus kita karon sa isa ka bahin sinang makahalawhaw nga palanan-awon kag hibaluon naton kon paano ang kahulugan sini makabulig sa aton nga mangin mas malapit kay Jehova.

3. (a) Suno sa Ezequiel 1:4, 5, ano ang nakita ni Ezequiel sa palanan-awon? (Tan-awa ang piktyur sa umpisa sini nga kapitulo.) (b) Ano ang natalupangdan mo sa paagi ni Ezequiel sa pagrekord sang iya mga nakita?

³ Basaha ang Ezequiel 1:4, 5. Ginlaragway ni Ezequiel nga “daw may apat ka buhi nga tinuga” nga may hitsura sang anghel, tawo, kag sapat. Talupangda ang paagi sa pagrekord ni Ezequiel sang iya nakita sang nagsiling sia nga “daw” may buhi nga mga tinuga. Samtang ginabasa mo ang palanan-awon sa Ezequiel kapitulo 1 matalupangdan mo nga sulitsulit nga gingamit sang propeta ang mga ekspresyon nga “daw may kaangay,” kag “daw kaangay.” (Ezeq. 1:13, 24, 26) Maathag nga kabalo si Ezequiel nga ang iya nakita mga larawan lang sang indi makita nga kamatuoran nga ara sa langit.

4. (a) Ano ang epekto sang palanan-awon kay Ezequiel? (b) Ano ang sigurado nga natun-an ni Ezequiel parte sa mga kerubin?

⁴ Sigurado nga nahalawhaw gid si Ezequiel sa iya nakita kag nabatian sa palanan-awon. Ang hitsura sang apat ka buhi nga mga tinuga daw “kaangay sang nagadabdab nga baga.” Madasig sila maghulag nga daw mga “kirab sang kilat.” Ang gahod sang ila pakpak “daw kaangay sang huganas sang tubig” kag kon maghulag sila, “daw kaangay sang gahod sang mga soldado.” (Ezeq. 1:13, 14, 24-28; tan-awa ang kahon nga “Ginatan-aw Ko ang Buhi nga mga Tinuga.”) Sa masunod nga palanan-awon, nabal-an ni Ezequiel nga ining apat ka buhi nga mga tinuga amo ang mga “kerubin,” ukon ang gamhanan nga mga anghel nga tinuga. (Ezeq. 10:2) Si Ezequiel halin sa pamilya sang mga saserdote, gani sigurado nga natun-an niya nga ang mga kerubin nagaalagad sa Dios kag naangot sa Iya presensia.—1 Cron. 28:18; Sal. 18:10.

5. (a) Paano ang mga kerubin kag ang ila apat ka nawong nagalaragway sa indi matupungan nga gahom kag himaya ni Jehova? (b) Ngaa ini nga bahin sang palanan-awon nagapahanumdom sa aton sang kahulugan sang ngalan sang Dios? (Tan-awa ang footnote.)

⁵ Basaha ang Ezequiel 1:6, 10. Nakita man ni Ezequiel nga ang kada kerubin may apat ka nawong—iya sang tawo, leon, toro nga baka, kag agila. Sigurado nga sang nakita ni Ezequiel ining apat ka nawong nagdayaw gid sia sa indi matupungan nga gahom kag himaya ni Jehova. Ngaa? Kay ang kada nawong iya sang tinuga nga nagarepresentar sang pagkahalangdon, kusog, kag gahom. Ang leon dalayawon nga ilahas nga sapat, ang toro nga baka daku nga sapat, ang agila makusog nga pispis, kag ang tawo amo ang pinakamaayo nga tinuga sang Dios diri sa duta, nga nagadumala sang tanan nga tinuga sa duta. (Sal. 8:4-6) Pero sa sini nga palanan-awon, nakita ni Ezequiel nga ang apat ka gamhanan nga tiglawas sang mga tinuga, nga ginarepresentar sang apat ka nawong sang kada kerubin, ara sa idalom sang trono ni Jehova, nga amo ang Supremo nga Soberano sa tanan. Ginalaragway gid sini nga puede gamiton ni Jehova ang iya mga tinuga para matuman ang iya katuyuan! * Gani ang manunulat sang salmo nagsiling parte kay Jehova, “Ang iya kadungganan mataas pa sa duta kag langit.”—Sal. 148:13.

6. Ano ang posible nga nakabulig kay Ezequiel nga mabal-an ang ginalaragway sang apat ka nawong?

⁶ Pagligad sang pila ka tion kag sang napamalandungan ni Ezequiel ang iya nakita, mahimo nadumduman niya ang mga alagad  sang Dios nga nagkabuhi antes sa iya nga naggamit man sang mga sapat sa pagpaanggid. Halimbawa, ang patriarka nga si Jacob nagpaanggid sa iya anak nga si Juda sa leon, kag sa iya anak nga si Benjamin sa lobo. (Gen. 49:9, 27) Ngaa? Kay ang leon kag ang lobo nagarepresentar sang mga kinaiya nga makita sa personalidad sini nga mga lalaki. Base sa sini nga mga halimbawa sa sinulatan ni Moises, posible nahunahuna ni Ezequiel nga ang mga nawong sang kerubin nagalaragway man sa tumalagsahon nga mga kinaiya. Pero ano nga mga kinaiya?

7, 8. Ano nga mga kinaiya ang masami nga naangot sa apat ka nawong sang mga kerubin?

⁷ Sa ano nga mga kinaiya gin-angot sang mga manunulat sang Biblia antes kay Ezequiel ang leon, agila, kag toro nga baka? Talupangda ang ginasiling sang Biblia: “Ang tawo nga pareho kaisog sang leon.” (2 Sam. 17:10; Hulu. 28:1) “Ang agila nagalupad paibabaw,” kag “nagatulok sia sa malayo.” (Job 39:27, 29) “Bugana ang ani bangod sa kusog sang toro nga baka.” (Hulu. 14:4) Base sa sini nga mga teksto, ang nawong sang leon nagarepresentar sang katarungan; ang nawong sang agila, kaalam; ang nawong sang toro nga baka, indi matupungan nga gahom, nga amo ang ginasiling pirme sang aton mga publikasyon.

⁸ Pero ano naman ang ginrepresentar sang “nawong sang tawo”? (Ezeq. 10:14) Nagapatuhoy ini sa kinaiya nga indi mapakita sang bisan ano nga sapat, kundi sang mga tawo lamang, nga gintuga sa larawan sang Dios. (Gen. 1:27) Sa duta, mga tawo lang ang makapakita sini nga kinaiya, kag maathag ini sa sugo sang Dios: “Higugmaa si Jehova nga inyo Dios sa bug-os ninyo nga tagipusuon” kag “higugmaon ninyo ang inyo isigkatawo subong sang inyo kaugalingon.” (Deut. 6:5; Lev. 19:18) Kon ginatuman naton ini nga sugo paagi sa pagpakita sing gugma, ginapakita naton ang gugma ni Jehova. Si apostol Juan nagsulat, “nagahigugma kita, bangod sia ang una nga naghigugma sa aton.” (1 Juan 4:8, 19) Gani, ang “nawong sang tawo” nagarepresentar sang gugma.

9. Sin-o ang ginarepresentar sang mga kinaiya nga naangot sa mga nawong sang mga kerubin?

⁹ Kay sin-o ini nga mga kinaiya? Ang mga nawong iya sang mga kerubin, gani ang mga kinaiya iya sang tanan nga ginarepresentar sang mga kerubin sa palanan-awon, nga amo ang pamilya sang matutom nga espiritu nga mga tinuga ni Jehova sa langit. (Bug. 5:11) Dugang pa, bangod si Jehova ang Tuburan sang kabuhi sang mga kerubin, sia man ang Ginhalinan sang ila mga kinaiya. (Sal. 36:9) Gani, ang mga nawong sang mga kerubin nagarepresentar sang mga kinaiya mismo ni Jehova. (Job 37:23; Sal. 99:4; Hulu. 2:6; Miq. 7:18) Ano ang pila ka paagi nga ginapakita ni Jehova ining tumalagsahon nga mga kinaiya?

10, 11. Ano ang pila ka paagi nga nagabenepisyo kita sa apat ka panguna nga kinaiya ni Jehova?

¹⁰ Katarungan. Si Jehova, Dios nga “mahigugmaon sa katarungan,” amo nga “wala [sia] sing ginapasulabi.” (Sal. 37:28; Deut.  10:17) Gani ang tanan, bisan ano man ang posisyon sa komunidad ukon gindak-an, puede mangin alagad sang Dios kag makabaton sing wala katapusan nga mga pagpakamaayo. Kaalam. Si Jehova, Dios nga “maalam,” gani nag-aman sia sing libro nga puno sing “praktikal nga kaalam.” (Job 9:4; Hulu. 2:7) Ang pagsunod sa maalam nga laygay sang Biblia makabulig sa aton nga maatubang ang mga kabudlayan adlaw-adlaw kag mangin malipayon. Gahom. Si Jehova, Dios nga “gamhanan gid,” gani ginagamit niya ang iya balaan nga espiritu para hatagan kita sing “gahom nga labaw sa kinaandan.” Nagapabakod ini sa aton para maatubang bisan ang pinakamabudlay kag masakit nga mga pagtilaw.—Nah. 1:3; 2 Cor. 4:7; Sal. 46:1.

¹¹ Gugma. Si Jehova, Dios nga “bugana sa mainunungon nga gugma,” kag indi gid niya pagbiyaan ang iya matutom nga mga sumilimba. (Sal. 103:8; 2 Sam. 22:26) Gani bisan pa nasubuan kita kay limitado na lang ang aton mahimo sa pag-alagad kay Jehova bangod sa balatian ukon katigulangon, mapaumpawan kita kay ginadumdom ni Jehova ang aton pagpangabudlay sang una para sa iya. (Heb. 6:10) Nagabenepisyo gid kita sa pagpakita ni Jehova sing katarungan, kaalam, gahom, kag gugma, kag padayon kita nga makabenepisyo sa sining apat ka panguna nga kinaiya sa palaabuton.

12. Ano ang dapat naton pirme dumdumon parte sa aton ikasarang sa paghangop sa mga kinaiya ni Jehova?

¹² Siempre, dapat naton pirme dumdumon nga ang mahangpan naton bilang mga tawo parte sa mga kinaiya ni Jehova ‘diutay lamang nga bahin sang iya binuhatan.’ (Job 26:14) “Indi naton matungkad ang Labing Gamhanan,” kay “indi matungkad ang iya pagkagamhanan.” (Job 37:23; Sal. 145:3) Gani, ang mga kinaiya ni Jehova indi gid naton maisip ukon magrupo sa kategoriya. (Basaha ang Roma 11:33, 34.) Ginpakita sang palanan-awon ni Ezequiel nga ang mga kinaiya sang Dios tuman kadamo. (Sal. 139:17, 18) Ano nga bahin sang palanan-awon ang nagapadaku sinang importante nga kamatuoran?

13, 14. Ano ang ginarepresentar sang apat ka nawong sang mga kerubin, kag ngaa makasiling kita sina?

¹³ Nakita ni Ezequiel sa palanan-awon nga indi lang isa, kundi apat ang nawong sang kada kerubin. Ano ang buot silingon sini? Dumduma nga sa Pulong sang Dios, ang numero nga apat masami nga nagakahulugan nga sakop ang tanan ukon kompleto. (Isa. 11:12; Mat. 24:31; Bug. 7:1) Talalupangdon nga sa sini nga palanan-awon, ginsambit ni Ezequiel ang numero nga apat sing pito ka beses! (Ezeq. 1:5-18) Kon amo, ano ang aton mahinakop? Ang apat ka kerubin nagarepresentar sa tanan nga mainunungon nga espiritu nga mga tinuga. Gani, ang apat ka nawong sang mga kerubin kon tan-awon sa kabilugan, nagarepresentar ukon nagasakop sa tanan nga kinaiya ni Jehova. *

 ¹⁴ Para iilustrar nga posible indi lang apat ka kinaiya ang ginarepresentar sang apat ka nawong sang mga kerubin, balikan naton ang apat ka ruweda sa sini nga palanan-awon. Ang kada ruweda tama kadaku, pero kon tan-awon sa kabilugan, indi lang ini apat ka dalagku nga ruweda, kundi amo ini ang pundasyon nga ginatungtungan sang kangga. Pareho sini, kon tan-awon sa kabilugan ang apat ka nawong, indi lang sila apat ka matahom nga kinaiya, kundi amo ini ang pundasyon sang dalayawon nga personalidad ni Jehova.

15. Anong makapalig-on nga kamatuoran ang natun-an ni Ezequiel paagi sa una nga palanan-awon nga iya nakita?

¹⁵ Paagi sa sining una nga palanan-awon, natun-an ni Ezequiel ang importante kag makapalig-on nga kamatuoran parte sa iya kaangtanan kay Jehova. Ano ini? Ini nga kamatuoran mabasa sa una nga mga pinamulong sa libro ni Ezequiel. Sa tapos nga mahambal nga ara sia “sa duta sang mga Caldeanhon,” ginsugid ni Ezequiel ang iya mismo eksperiensia: “Samtang didto sia . . . nabatyagan niya ang gahom ni Jehova.” (Ezeq. 1:3) Talupangda nga nagsiling si Ezequiel nga nakita niya ang palanan-awon indi sa Jerusalem, kundi didto sa Babilonia. * Gani, ano ang ginatudlo sini kay Ezequiel?  Bisan pa tinapok sia kag malayo sa Jerusalem kag sa templo sini, wala sia napahilayo kay Jehova kag makasimba gihapon sa Iya. Ang pagpakita ni Jehova kay Ezequiel sa Babilonia nagatudlo nga ang paghatag sing putli nga pagsimba sa Dios wala nagadepende sa lokasyon ukon lugar. Nagadepende ini sa kahimtangan sang tagipusuon ni Ezequiel kag sa iya handum nga alagaron si Jehova.

16. (a) Ano ang ginapasalig sa aton sang palanan-awon ni Ezequiel? (b) Ano ang nagapahulag sa imo nga alagaron si Jehova sing bug-os tagipusuon?

¹⁶ Ngaa makapaumpaw man sa aton ang natun-an nga kamatuoran ni Ezequiel? Nagapasalig ini sa aton nga kon bug-os tagipusuon nga alagaron naton si Jehova, magapabilin sia nga malapit sa aton bisan diin man kita nagaistar, bisan daw ano kabug-at sang aton ginabatyag, ukon bisan ano ang aton sitwasyon. (Sal. 25:14; Binu. 17:27) Si Jehova bugana gid sa mainunungon nga gugma sa tagsa niya ka alagad, gani indi gid niya kita basta pagbiyaan. (Ex. 34:6) Bisan diin man kita, malab-ot gid kita sang mainunungon nga gugma ni Jehova. (Sal. 100:5; Roma 8:35-39) Dugang pa, ining dalayawon nga palanan-awon parte sa pagkabalaan kag indi matupungan nga gahom ni Jehova nagapahanumdom sa aton nga si Jehova lang ang dapat naton simbahon. (Bug. 4:9-11) Nagapasalamat gid kita nga gingamit ni Jehova ining mga palanan-awon para buligan kita nga mahangpan ang pila ka importante nga kamatuoran parte sa iya kag sa iya mga kinaiya! Ang madalom nga paghangop sa dalayawon nga mga kinaiya ni Jehova magabulig sa aton nga mangin mas malapit sa iya kag magapahulag sa aton nga dayawon sia kag alagaron sing bug-os tagipusuon kag bug-os kusog.—Luc. 10:27.

17. Ano nga mga pamangkot ang binagbinagon sa masunod nga mga kapitulo?

¹⁷ Pero makapasubo, nga sang panahon ni Ezequiel, ginhigkuan ang putli nga pagsimba. Ngaa natabo ina? Ano ang ginhimo ni Jehova? Ano ang matun-an naton sa sini nga mga hitabo sang una? Ini nga mga pamangkot binagbinagon sa masunod nga mga kapitulo.