1-3. (a) Ano ang resulta sang ‘pagdabdab sang kaakig’ ni Jehova? (Tan-awa ang piktyur sa umpisa sini nga kapitulo.) (b) Ano ang hibaluon naton subong?

ANG mga lalaki, babayi, kag kabataan nagatindog kag nagakanta sing ambahanon sang Ginharian. Dayon ang isa ka gulang hanuot nga nangamuyo kay Jehova, nga nagapangabay sang Iya proteksion. Ang tanan sa kongregasyon nagasalig nga indi sila pagpabay-an ni Jehova, pero kinahanglan nila gihapon sing paumpaw kag pagpalig-on. Sa gua, mabatian ang pag-ilinaway sang mga tawo. Nagsugod na ang Armageddon!—Bug. 16:14, 16.

² Sa inaway sang Armageddon, ‘magadabdab ang kaakig’ ni Jehova kag laglagon ang katawhan, pero pilion niya ang iya laglagon. (Basaha ang Ezequiel 38:18.) Ipadapat niya ang kaakig indi lang sa isa ka hangaway ukon isa ka pungsod, kundi sa indi maisip nga mga tawo sa bilog nga kalibutan. Sa sina nga tion, ang pamatyon ni Jehova “lapnag sa bug-os nga duta,” ukon sa tanan nga bahin sang kalibutan.—Jer. 25:29, 33.

³ Si Jehova, Dios sang gugma, kag ginalaragway sia nga “maluluy-on kag mainawaon” kag “indi dali maakig.” Pero ngaa ‘magadabdab ang iya kaakig’? (Ex. 34:6; 1 Juan 4:16) Hibaluon naton ang sabat sa sina nga pamangkot kag kon ngaa makahatag ini sa aton sing  paumpaw kag kaisog, kag makapalig-on sa aton sa pagbantala subong.

4, 5. Ngaa ang kaakig sang Dios indi pareho sa kaakig sang indi perpekto nga mga tawo?

⁴ Tandaan naton nga ang kaakig ni Jehova indi pareho sa kaakig sang indi perpekto nga mga tawo. Kon indi na mapunggan sang isa ka tawo ang iya kaakig, sa masami nagaresulta ini sa indi maayo. Halimbawa, ang una nga bata ni Adan nga si Cain, “naakig gid” kay ginsikway ni Jehova ang iya halad pero ginbaton ang halad ni Abel. Ano ang resulta? Ginpatay ni Cain ang iya matarong nga utod. (Gen. 4:3-8; Heb. 11:4) Binagbinaga man ang natabo kay David, isa ka tawo nga kalahamut-an sa tagipusuon ni Jehova. (Binu. 13:22) Ining maayo nga tawo diutayan lang nakahimo sing krimen sang nabalitaan niya nga gin-insulto sia kag ang iya mga tinawo sang manggaranon nga tag-iya sang duta nga si Nabal. Grabe gid ang kaakig ni David, gani upod sa iya mga tinawo “gintaklus sang kada isa ang iya espada” para patyon indi lang ang wala sing kabalaslan nga si Nabal kundi ang tanan nga lalaki sang panimalay sini. Maayo lang kay paagi sa asawa ni Nabal nga si Abigail, nakumbinsi si David kag ang iya mga tinawo nga indi magbalos. (1 Sam. 25:9-14, 32, 33) Amo kon ngaa gingiyahan ni Jehova si Santiago sa pagsulat: “Ang kaakig sang tawo wala nagaresulta sa paghimo sing matarong sa panulok sang Dios.”—Sant. 1:20.

⁵ Indi pareho sa kaakig sang tawo nga sa masami indi maayo ang resulta, kontrolado gid ni Jehova ang iya kaakig kag ginapaathag niya kon ngaa naakig sia. Bisan pa grabe gid ang iya kaakig, matarong gihapon ang ginahimo ni Jehova. Kon nagapakig-away sia sa mga kaaway, wala niya ginadalahig “ang matarong upod sa malauton.” (Gen. 18:22-25) Isa pa, may matarong nga mga rason ang kaakig ni Jehova. Binagbinagon naton ang duha ka rason kag ang mga leksion nga matun-an naton sa sini.

6. Ano ang ginbatyag ni Jehova sang ginpasipalahan ang iya ngalan?

⁶ Rason: Ginpasipalahan ang ngalan ni Jehova. Ang mga nagapangangkon nga nagasimba kay Jehova pero nagahimo sing malain, nagaguba sang reputasyon ni Jehova gani may rason sia nga maakig sa ila. (Ezeq. 36:23) Gintun-an sa nagligad nga mga kapitulo sini nga publikasyon nga ginpasipalahan sang pungsod sang Israel ang ngalan ni Jehova. Gani may rason gid nga maakig si Jehova sa panimuot kag ginhimo sang mga pungsod. Pero kontrolado gid niya ang iya kaakig, kag ginsilutan niya ang katawhan “sa nagakaigo nga paagi.” (Jer. 30:11) Kag kon matuman na ang katuyuan sang kaakig ni Jehova, wala na sia nagakaakig ukon nagahinakit.—Sal. 103:9.

7, 8. Ano nga mga leksion ang matun-an naton sa pagpakig-angot ni Jehova sa mga Israelinhon?

⁷ Mga leksion: Ang pagpakig-angot ni Jehova sa mga Israelinhon nagahatag sa aton sing serioso nga paandam. Pareho sa dumaan nga mga Israelinhon, may pribilehiyo man kita nga magdala sang ngalan ni Jehova. Mga Saksi ni Jehova kita. (Isa. 43:10) Ang aton ginahambal  kag ginahimo may epekto sa ginasimba naton nga Dios. Indi gid naton gusto nga mangin batasan ang paghimo sing malain kay nagapasipala ini sa ngalan ni Jehova. Ining salimpapaw nga buhat magapadabdab sa kaakig ni Jehova kag sa indi madugay, magapanghikot sia para pangapinan ang iya reputasyon.—Heb. 3:13, 15; 2 Ped. 2:1, 2.

⁸ Natun-an naton nga si Jehova may ikasarang nga ‘padabdabon ang iya kaakig,’ pero buot bala silingon sini nga indi na kita mangin suod sa iya? Indi. Nabal-an naton nga si Jehova mapinasensiahon kag mapinatawaron. (Isa. 55:7; Roma 2:4) Pero nabal-an man naton nga ginadisiplina niya kita kon kinahanglanon. Bangod sini, ginatahod gid naton ang awtoridad ni Jehova kay nabal-an naton nga ang iya kaakig ipadapat niya sa mga tawo nga padayon nga nagahimo sing malain kag indi niya pagtugutan nga mangin bahin sila sang iya katawhan. (1 Cor. 5:11-13) Ginapaathag sa aton ni Jehova kon ano ang nagapaakig sa iya. Ara na sa aton kon bala likawan naton ang mga panimuot kag mga buhat nga nagapaakig sa iya.—Juan 3:36; Roma 1:26-32; Sant. 4:8.

9, 10. Ano ang ginahimo ni Jehova kon ara sa katalagman ang iya matutom nga katawhan? Maghatag sing halimbawa.

⁹ Rason: Ara sa katalagman ang matutom nga katawhan ni Jehova. Nagadabdab ang kaakig ni Jehova kon ginasalakay sang mga kaaway ang mga mainunungon nga nagadangop sa iya. Halimbawa, sang nakahalin na ang mga Israelinhon sa Egipto, ginlagas sang Paraon kag sang iya mga soldado ang daw wala sing proteksion nga katawhan nga nagatipon sa higad sang Pula nga Dagat. Pero sang ginlagas na sang gamhanan nga mga soldado ang mga Israelinhon sa mamala nga dagat, ginpangpalos ni Jehova ang mga ruweda sang mga kangga sa inaway kag gin-anod niya ang mga Egiptohanon sa dagat. “Wala sing bisan isa nga nakaluwas.” (Ex. 14:25-28) Nagdabdab ang kaakig ni Jehova sa mga Egiptohanon bangod sang iya “mainunungon nga gugma” sa iya katawhan.—Basaha ang Exodo 15:9-13.

¹⁰ Ang gugma man ni Jehova sa iya katawhan ang nagpahulag sa iya nga manghikot sang panahon ni Hari Ezequias. Ang gamhanan kag mapintas nga mga kaaway sadto nga mga Asirianhon nag-abot sa siudad sang Jerusalem. Ara sa katalagman ang mainunungon nga mga alagad ni Jehova nga makibon kag amat-amat nga mapatay. (2 Hari 18:27) Nanghikot si Jehova kag nagpadala sang isa lang ka anghel, kag ginpatay sini ang 185,000 ka soldado sa isa lang gab-i! (2 Hari 19:34, 35) Imadyina ang kampo sang mga Asirianhon pagkaaga. Wala matandog ang mga bangkaw, taming, kag mga espada. Wala sing nagtunog nga budyong para pukawon ang mga soldado. Wala sing mando nga maghanda ang mga tropa. Malinong kaayo ang kampo, kag nagalinapta lang ang mga bangkay.

11. Ngaa makahatag sa aton sing paumpaw kag kaisog ang mga halimbawa sa Biblia nga ginhimo ni Jehova sang ara sa katalagman ang iya katawhan?

¹¹ Mga leksion: Ini nga mga halimbawa sang ginhimo ni Jehova sang ara sa katalagman ang iya katawhan nagahatag sing mabaskog nga paandam sa aton mga kaaway: “Makahaladlok ang mahulog sa mga  kamot sang buhi nga Dios” kon magdabdab ang iya kaakig. (Heb. 10:31) Pero ini nga mga halimbawa nagahatag sa aton sing paumpaw kag kaisog. Makapaumpaw gid kay nabal-an naton nga ang aton panguna nga kaaway, si Satanas, indi gid magmadinalag-on. Sa indi madugay, ang iya ‘malip-ot na lamang nga tion’ sang paggahom matapos na! (Bug. 12:12) Samtang wala pa ina, makaalagad kita kay Jehova nga may kaisog, nagasalig nga wala sing indibiduwal, organisasyon, ukon gobierno ang makapauntat sa aton sa paghimo sang kabubut-on sang Dios. (Basaha ang Salmo 118:6-9.) Ginpabutyag ni apostol Pablo ang aton pagsalig paagi sa sining pinamulong: “Kon ang Dios dampig sa aton, sin-o ang makadaug sa aton?”—Roma 8:31.

12. Sa tion sang dakung kapipit-an, ano ang magapadabdab sang kaakig ni Jehova?

¹² Sa nagahilapit nga dakung kapipit-an, magapanghikot si Jehova para proteksionan kita pareho sa ginhimo niya sa mga Israelinhon sang wala na sila sing mapalagyuhan bangod sa paglagas sang mga Egiptohanon kag sa mga Judiyo sa Jerusalem nga ginkibon sang mga Asirianhon. Kon tinguhaan sang aton mga kaaway nga papason kita, magadabdab ang kaakig ni Jehova bangod sang iya daku nga gugma  sa aton. Kon salakayon kita sang aton mga kaaway, daw pareho nga ginatandog nila ang tawotawo sang mata ni Jehova. Magapanghikot sia gilayon. (Zac. 2:8, 9) Indi gid matupungan ang kadamuon sang mapatay. Pero wala sing rason nga makibot ang mga kaaway sang Dios kon ipadapat na ni Jehova ang iya kaakig sa ila. Ngaa?

13. Ano nga mga paandam ang ginhatag ni Jehova?

¹³ Si Jehova “indi dali maakig” kag naghatag sia sing abanse nga mga paandam nga laglagon niya ang mga nagapamatok sa iya kag nagahingabot sa iya katawhan. (Ex. 34:6, 7) Gingamit ni Jehova ang mga propeta pareho nanday Jeremias, Ezequiel, Daniel, Cristo Jesus, kag ang mga apostoles nga sanday Pedro, Pablo, kag Juan para magpaandam parte sa daku kag katapusan nga inaway.—Tan-awa ang kahon nga “Si Jehova Nagapaandam Parte sa Nagahilapit nga Dakung Inaway.”

14, 15. Ano nga hilikuton ang nahimo ni Jehova, kag ngaa?

¹⁴ Ginparekord ni Jehova ini nga mga paandam sa iya Pulong. Ginsigurado man niya nga ang Biblia ma-translate sa pinakadamo nga  lenguahe kag mapanagtag sa pinakamadamo nga tawo. Sa bilog nga kalibutan, nagpili sia sing mga boluntaryo para buligan ang iban nga makatigayon sing maayo nga kaangtanan sa Dios kag magpaandam sa nagahilapit nga “daku nga adlaw ni Jehova.” (Sof. 1:14; Sal. 2:10-12; 110:3) Ginpahulag niya ang iya katawhan nga i-translate sa ginatos ka lenguahe ang mga publikasyon nga ginagamit sa pagtuon sa Biblia kag maghinguyang sing ginatos ka minilyon ka oras kada tuig sa pagsugid parte sa mga promisa kag mga paandam nga mabasa sa iya Pulong.

¹⁵ Ginhimo ini tanan ni Jehova “bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (2 Ped. 3:9) Pribilehiyo gid naton nga masimba ang aton mahigugmaon, mapinasensiahon nga Dios kag mangin bahin sa pagpalapnag sang iya mensahe! Sa indi madugay, maubos na ang tion sang mga wala nagapamati sa mga paandam.

16, 17. May ginpat-od bala nga adlaw si Jehova para sa katapusan nga inaway? Ipaathag.

¹⁶ May ginpat-od nga adlaw si Jehova para sa katapusan nga inaway. Kabalo sia kon san-o salakayon ang iya katawhan. (Mat. 24:36)  Paano nahibaluan ni Jehova kon san-o magasalakay ang iya mga kaaway?

¹⁷ Natun-an naton sa nagligad nga kapitulo sini nga publikasyon nga ginsilingan ni Jehova ang Gog: ‘Kaw-itan ko ang imo sag-ang.’ Pangunahan niya ang mga pungsod sa katapusan nga inaway. (Ezeq. 38:4) Pero indi buot silingon sini nga si Jehova ang nag-umpisa sang inaway kag wala man niya ginkuha ang kahilwayan sa pagpili sang mga nagapamatok sa iya. Kundi ginapakita sini nga si Jehova makabasa sang tagipusuon kag nabal-an niya kon ano ang mangin reaksion sang iya mga kaaway sa isa ka sitwasyon.—Sal. 94:11; Isa. 46:9, 10; Jer. 17:10.

18. Ngaa magapakig-away ang mga tawo sa Labing Gamhanan?

¹⁸ Indi si Jehova ang magaumpisa sang inaway, kag indi man niya pagpiliton ang iya mga kaaway nga makig-away. Kon amo, ngaa magapakig-away ang ultimo nga mga tawo sa Labing Gamhanan? Ang isa ka rason amo nga sa sini nga tion, mahimo nga nagapati sila nga wala nagaluntad ang Dios ukon indi gid sia magpasilabot sa ginahimo sang mga tawo. Mahimo pensaron nila ini kay bag-o lang nila mapapas ang tanan nga organisasyon sang butig nga relihion sa duta. Gani mahimo masiling sila nga kon may Dios gid man, sigurado nga  proteksionan niya ang mga institusyon nga nagapangangkon nga nagasimba sa iya. Wala gid sila kabalo nga ang Dios amo ang nagbutang sa ila tagipusuon sa paghimo sang iya hunahuna para papason ang mga relihion nga nagapakahuya gid sa iya.—Bug. 17:16, 17.

19. Ano ang mahimo nga matabo sa tapos nga malaglag ang butig nga relihion?

¹⁹ Sa tapos nga malaglag ang butig nga relihion, mahimo suguon ni Jehova ang iya katawhan nga ipahayag ang masakit nga mensahe. Ginpaanggid ini sang libro sang Bugna sa ulan nga yelo, nga ang kada isa nagabug-at sang mga 20 ka kilo. (Bug. 16:21, footnote) Ini nga mensahe posible nagapahayag nga malapit na matapos ang pulitikal kag komersial nga sistema. Masakit gid ini sa mga nagapamati amo nga pasipalahan nila ang Dios. Mahimo nga amo ini nga mensahe ang magapaakig sa mga pungsod kag salakayon nila sing ubos-ubos ang katawhan sang Dios para pahipuson kita. Nagahunahuna sila nga mahapos lang kita papason kay wala sing magabulig sa aton. Pero nagsala gid sila!

20, 21. Sin-o ang Gog, kag ano ang matabo sa iya?

²⁰ Natun-an naton sa Kapitulo 17 sini nga publikasyon nga naggamit si Ezequiel sa iya tagna sang titulo nga “Gog sa duta sang Magog,” para ipakilala ang nagahimbon nga mga pungsod nga magasalakay sa aton. (Ezeq. 38:2) Pero masiling nga daw hilo lang ang nagahugpong sa mga pungsod nga bahin sini nga paghimbon. Kay bisan pa daw nagabuligay sila, ara gihapon sa ila ang pagpaindisanay, bugal, kag handum nga maggahom ang ila pungsod. Mahapos na lang para kay Jehova nga maniobrahon ang sitwasyon para gamiton nila ang ila espada sa ‘pagpakig-away sa isa kag isa.’ (Ezeq. 38:21) Pero ang kalaglagan sang mga pungsod indi hinimuan sang mga tawo.

²¹ Antes malaglag ang aton mga kaaway, makita nila ang tanda sang Anak sang tawo, nga mahimo pagpakita sang indi kinaandan nga gahom ni Jehova kag ni Jesus. Makita sang mga kaaway ang mga butang nga magapahadlok gid sa ila. Si Jesus nagtagna: “Ang mga tawo magakapunaw sa kahadlok kag sa pagpaabot sa mga butang nga mahanabo sa duta.” (Luc. 21:25-27) Mahadlok gid ang mga kaaway kay marealisar nila nga nagsala gid sila sa pagsalakay sa katawhan ni Jehova. Mapilitan sila nga kilalahon nga ang Manunuga, amo ang kumander sang hangaway, si Jehova sang mga kasuldadusan. (Sal. 46:6-11; Ezeq. 38:23) Gamiton ni Jehova ang mga hangaway sa langit kag ang kinaandan nga mga puersa para proteksionan ang iya mainunungon nga mga alagad, kag para laglagon ang iya mga kaaway.—Basaha ang 2 Pedro 2:9.

22, 23. Sin-o ang magaamlig sa katawhan sang Dios, kag ano ang posible nila nga batyagon sa ila asaynment?

²² Hunahunaa ang kalangkag ni Jesus nga pangunahan ang paglaglag sa mga kaaway sang Dios, kag proteksionan ang mga nagahigugma kag nagaalagad sa iya Amay. Hunahunaa man ang batyagon sang mga hinaplas. Antes sang Armageddon, ang katapusan sa ila  nga ari pa sa duta banhawon para magkabuhi sa langit agod ang tanan nga 144,000 makaupod ni Jesus sa pagpakig-away. (Bug. 17:12-14) Madamo nga hinaplas ang nangin malapit sa mga miembro sang iban nga karnero samtang ululupod sila nga nagapangabudlay sa tion sang katapusan nga mga adlaw. Ang mga hinaplas karon may awtoridad na kag gahom sa pag-amlig sa mga mainunungon nga nagsuporta sa ila sa tion sang ila pagtilaw.—Mat. 25:31-40.

²³ Ang mga anghel mangin bahin man sang kasuldadusan ni Jesus sa langit. (2 Tes. 1:7; Bug. 19:14) Nagbulig sila kay Jesus sa pagtagbong kay Satanas kag sa iya mga demonyo halin sa langit. (Bug. 12:7-9) Nagbulig man sila sa pagtipon sa mga tawo nga gusto magsimba kay Jehova. (Bug. 14:6, 7) Gani nagakaigo lang nga gamiton ni Jehova ang mga anghel sa pag-amlig sa mga mainunungon. Labing importante, ang tanan nga hangaway ni Jehova makabatyag sing kadungganan kay mapakabalaan kag mabindikar nila ang iya ngalan, ukon reputasyon, paagi sa pagbulig sa paglaglag sa iya mga kaaway.—Mat. 6:9, 10.

24. Ano ang batyagon sang daku nga kadam-an sang iban nga karnero?

²⁴ Ang mangin bahin sang daku nga kadam-an sang iban nga karnero wala sing rason nga mahadlok kay ara ang gamhanan nga mga hangaway nga alisto gid sa pag-amlig sa ila. ‘Magatindog sila kag magahangad sang ila ulo, bangod malapit na ang pagtubos sa ila.’ (Luc. 21:28) Gani importante nga antes mag-abot ang adlaw ni Jehova, himuon naton ang tanan para buligan ang madamo nga tawo nga makilala kag mahigugma ang aton maluluy-on nga Amay nga nagaamlig sa aton!—Basaha ang Sofonias 2:2, 3.

25. Ano ang binagbinagon naton sa masunod?

²⁵ Ang inaway sang tawo nagaresulta sa kinagamo kag pag-antos. Pero indi amo sini ang resulta sang Armageddon. Magaresulta ini sa kalinong kag kalipay. Ano ang matabo kon magtahaw na ang kaakig ni Jehova, kon natagob na ang espada sang iya mga hangaway, kag kon nagtinong na ang singgit sang daku nga inaway? Sa masunod nga kapitulo, binagbinagon naton inang makalilipay nga palaabuton.