1-3. (a) Ngaa naurungan si Ezequiel, kag ano ang iya nabal-an parte sa paglaglag sa Jerusalem? (b) Ano nga mga pamangkot ang binagbinagon naton?

NAURUNGAN si Ezequiel! Bag-o lang niya nakita ang palanan-awon sang makangilil-ad nga mga butang nga ginahimo sang apostata nga mga Judiyo sa templo sa Jerusalem. * Ginhigkuan sini nga mga rebelde ang sentro mismo sang putli nga pagsimba sa Israel. Pero indi lang ang templo ang nahigkuan. Napuno gid sang kasingki ang duta sang Juda kag wala na ini sing paglaum nga magbag-o. Nasakitan gid si Jehova sa ginahimo sang iya pinili nga katawhan, gani ginsilingan niya si Ezequiel: “Ipakita ko sa ila ang akon kaakig.”—Ezeq. 8:17, 18.

² Nasubuan gid si Ezequiel kay ang Jerusalem kag ang sagrado nga templo sini laglagon ni Jehova bangod sa iya kaakig! Sigurado nga nagapalibog si Ezequiel: ‘Ano ang matabo sa mga matutom nga ara sa siudad? Luwason bala sila? Kon huo, paano?’ Indi na maghulat sing dugay si Ezequiel para mabal-an ang sabat. Pagkatapos niya mabatian ang matigdas nga paghukom sa Jerusalem, nabatian niya dayon ang mabaskog nga tingog nga nagatawag sa mga magasilot sa siudad. (Ezeq. 9:1) Samtang nagapadayon ang palanan-awon, naumpawan ang propeta kay nabal-an niya nga indi  bisan sin-o lang ang laglagon, kundi pilion. Gani, maluwas ang mga takus!

³ Samtang nagahilapit na ang katapusan sining malaut nga sistema sang mga butang, mahimo nagapalibog man kita kon sin-o ang maluwas sa nagapakari nga dakung kalaglagan. Gani, binagbinagon naton: (1) Ano ang masunod nga nakita ni Ezequiel sa palanan-awon? (2) Paano natuman ang palanan-awon sa iya panahon? (3) Ano ang buot silingon sini nga palanan-awon sa aton tion?

4. Ilaragway ang masunod nga nakita kag nabatian ni Ezequiel sa palanan-awon.

⁴ Ano ang masunod nga nakita kag nabatian ni Ezequiel sa palanan-awon? (Basaha ang Ezequiel 9:1-11.) May pito ka lalaki nga nagapalapit “halin sa naibabaw nga gawang nga nagaatubang sa aminhan,” nga mahimo malapit sa nahamtangan anay sang isa ka diosdios nga nagapaakig gid sa Dios ukon ang lugar diin ang mga babayi naghinibi tungod sa dios nga si Tammuz. (Ezeq. 8:3, 14) Ining pito ka lalaki nagsulod sa nasulod nga luwang sang templo kag nagtindog sa tupad sang halaran nga saway. Pero indi sila maghalad diri. Wala na ginabaton ni Jehova ang ginahalad sa sini nga templo. Ang anom sa ila nagtindog nga ‘ang kada isa may dala nga inuglampos.’ Pero lain gid ang ikapito nga lalaki. Nagasuksok sia sing bayo nga linen, kag indi inuglampos ang dala niya kundi “suludlan sang tinta nga sungay nga ginagamit sang sekretaryo” ukon suno sa footnote, “suludlan sang tinta sang escriba.”

5, 6. Ano ang masiling naton sa mga ginmarkahan? (Tan-awa ang piktyur sa umpisa sini nga kapitulo.)

⁵ Ano ang himuon sang lalaki nga may suludlan sang tinta nga sungay? Nakabaton sia sing mabug-at nga asaynment halin kay Jehova: “Mag-agi ka sa bug-os nga siudad sang Jerusalem kag markahi ang agtang sang mga tawo nga nagapanghayhay kag nagapanghakroy tungod sa makangilil-ad nga mga butang nga ginahimo sa siudad.” Mahimo nga nadumduman dayon ni Ezequiel ang matutom nga Israelinhon nga mga ginikanan nga nagpalhit sing dugo sa ibabaw nayon sang puertahan kag sa mga bakalan bilang tanda para maluwas ang ila panganay nga bata sa kalaglagan. (Ex. 12:7, 22, 23) Sa palanan-awon ni Ezequiel, ang marka bala sa agtang nga ginabutang sang lalaki nga may suludlan sang tinta nga sungay tanda man nga maluwas ang isa sa kalaglagan sang Jerusalem?

⁶ Mabal-an naton ang sabat kon binagbinagon naton ang basihan sang pagmarka. Ibutang ini sa agtang sang mga “nagapanghayhay kag nagapanghakroy tungod sa makangilil-ad nga mga butang nga ginahimo sa siudad.” Gani ano ang masiling naton sa mga ginmarkahan? Nasubuan gid sila indi lang bangod sa pagsimba sa diosdios nga ginahimo sa templo kundi sa tanan nga kasingki, imoralidad, kag kalainan sa Jerusalem. (Ezeq. 22:9-12) Wala man nila ginatago ang ila ginabatyag. Ginapakita sining matarong sing tagipusuon  nga mga tawo sa ila ginahambal kag ginahimo ang ila debosyon sa putli nga pagsimba kag ang ila pagkangil-ad sa nagakatabo sa ila duta. Maluluy-on gid si Jehova, gani luwason niya ining mga takus.

7, 8. Ano ang ginhimo sang mga lalaki nga may dala nga inuglampos, kag ano ang katapusan sini nga palanan-awon?

⁷ Ano naman ang himuon sang anom ka lalaki nga may dala nga inuglampos? Nabatian ni Ezequiel ang instruksion ni Jehova sa ila: Sunda ninyo ang lalaki nga may suludlan sang tinta nga sungay kag pamatya ninyo ang tanan luwas lang sa bisan sin-o nga may marka sa ila agtang. “Mag-umpisa kamo sa akon santuaryo,” siling ni Jehova. (Ezeq. 9:6) Sugdan sang mga manugsilot ang ila asaynment sa sentro sang Jerusalem, sa templo, nga indi na sagrado para kay Jehova. Ang una nga pamatyon amo “ang mga gulang nga yara sa atubangan sang templo”—ang 70 ka gulang sang Israel nga ara sa templo kag nagahalad sing incienso sa butig nga mga dios.—Ezeq. 8:11, 12; 9:6.

 ⁸ Ano ang katapusan sini nga palanan-awon? Samtang nagatan-aw kag nagapamati si Ezequiel, ang lalaki nga may suludlan sang tinta nga sungay nagreport kay Jehova: “Nahimo ko na ang suno sa ginsugo mo.” (Ezeq. 9:11) Mahimo nagapalibog kita: ‘Ano ang natabo sa mga pumuluyo sang Jerusalem? May mga matutom bala nga naluwas sa kalaglagan?’

9, 10. Sin-o ang pila ka matutom nga naluwas sa kalaglagan sang Jerusalem, kag ano ang masiling naton parte sa ila?

⁹ Basaha ang 2 Cronica 36:17-20. Ang palanan-awon ni Ezequiel natuman sang 607 B.C.E. sang ginlaglag sang mga soldado sang Babilonia ang Jerusalem kag ang templo sini. Pareho sang “kopa sa kamot ni Jehova,” gingamit ni Jehova ang Babilonia para ibubo ang silot sa indi matutom nga Jerusalem. (Jer. 51:7) Ginlaglag bala ang tanan nga tawo? Wala. Gintagna sang palanan-awon ni Ezequiel nga may pila nga indi paglaglagon sang taga-Babilonia.—Gen. 18:22-33; 2 Ped. 2:9.

¹⁰ Madamo nga matutom ang naluwas, lakip ang mga Recabnon, si Ebed-melec nga Etiopianhon, si Jeremias nga propeta, kag ang iya sekretaryo nga si Baruc. (Jer. 35:1-19; 39:15-18; 45:1-5) Base sa palanan-awon ni Ezequiel, makasiling kita nga ini nga mga indibiduwal ‘nagpanghayhay kag nagpanghakroy tungod sa makangilil-ad nga mga butang’ nga ginhimo sa Jerusalem. (Ezeq. 9:4) Antes sang kalaglagan, sigurado nga ginsikway nila ang kalautan kag ginpakita ang ila debosyon sa putli nga pagsimba, amo kon ngaa naluwas sila.

11. Sin-o ang ginarepresentar sang anom ka lalaki nga may dala nga inuglampos kag sang tawo nga may suludlan sang tinta nga sungay nga ginagamit sang sekretaryo?

¹¹ Ining mga matutom literal bala nga ginmarkahan para sa kaluwasan? Wala sing rekord nga may nagsulod sa Jerusalem—si Ezequiel man ukon ang bisan sin-o nga propeta—para markahan ang agtang sang mga matutom. Gani ginapakita lang sang palanan-awon ni Ezequiel ang nagakatabo sa langit nga indi makita sang mga tawo. Sa palanan-awon, ang lalaki nga may suludlan sang tinta nga sungay nga ginagamit sang sekretaryo kag ang anom ka lalaki nga may dala nga inuglampos nagarepresentar sa matutom nga espiritu nga mga tinuga ni Jehova, nga handa pirme sa paghimo sang iya kabubut-on. (Sal. 103:20, 21) Sigurado nga gingamit ni Jehova ang iya mga anghel para himuon ang iya pagsilot sa indi matutom nga Jerusalem. Ginpili gid sang mga anghel ang ila laglagon kag indi bisan sin-o lang. Daw pareho nga ginmarkahan nila ang agtang sang mga maluwas.

12, 13. (a) Ngaa ginbubo ni Jehova ang iya kaakig sa Jerusalem, kag ngaa makapaabot kita nga amo man sini ang himuon niya sa aton tion? (b) Ang Cristiandad bala amo ang ginalarawan sang indi matutom nga Jerusalem? Ipaathag. (Tan-awa ang kahon nga “Ang Cristiandad Bala ang Ginalarawan sang Jerusalem?”)

¹² Sa indi madugay, makita man naton ang paghukom sang Dios nga wala pa gid makita sang bisan sin-o nga tawo. Amo ini “ang  dakung kapipit-an nga wala pa gid matabo halin sa ginsuguran sang kalibutan tubtob karon, kag indi na gid ini matabo liwat.” (Mat. 24:21) Samtang ginahulat naton ining makahalawathawat nga hitabo, may pila ka pamangkot nga nagautwas: Pilion gid bala ang laglagon kag indi bisan sin-o lang? Ang putli bala nga mga sumilimba ni Jehova markahan para sa kaluwasan? Buot silingon, may katumanan bala sa aton tion ang palanan-awon ni Ezequiel parte sa lalaki nga may suludlan sang tinta nga sungay? Ang sabat sa sining tatlo ka pamangkot, huo. Ngaa makasiling kita sina? Para mabal-an naton, balikan naton ang palanan-awon ni Ezequiel.

¹³ Nadumduman mo bala kon ngaa ginbubo ni Jehova ang iya kaakig sa dumaan nga Jerusalem? Tan-awa liwat ang Ezequiel 9:8, 9. (Basaha.) Nahadlok si Ezequiel kay basi mapapas ang “tanan nga nagkalabilin sang Israel” bangod sa nagapakari nga kalaglagan. Gani naghatag si Jehova sing apat ka rason sang iya paghukom. Una, “daku gid ang sala” sang pungsod. * Ikaduha, ang duta sang Juda “napuno sang pagpaagay sing dugo.” Ikatlo, ang Jerusalem, ang kapital sang ginharian sang Juda, “napuno sing kalainan.” Ikap-at, ginabalewala sang katawhan ang ila kalautan kay nagahunahuna sila nga ‘indi makita ni Jehova’ ang ila ginahimo. Indi bala may rason gid si Jehova nga maakig man sa sining imoral, masingki, malain, kag wala sing pagtuo nga kalibutan subong? Si Jehova “wala nagabag-o,” gani kon ano ang nagpaakig sa iya sang panahon ni Ezequiel, sigurado nga amo man ini ang magapaakig sa iya sa panahon naton. (Sant. 1:17; Mal. 3:6) Gani, makapaabot gid kita nga ang anom ka lalaki nga may dala nga inuglampos kag ang lalaki nga may suludlan sang tinta nga sungay may himuon gid sa aton tion!

14, 15. Ano nga mga halimbawa ang nagapakita nga ginapaandaman ni Jehova ang katawhan antes sang kalaglagan?

¹⁴ Pero, paano natuman ang palanan-awon ni Ezequiel sa aton tion? Kon pamalandungan naton ang katumanan sang palanan-awon sang una, matun-an naton kon ano ang mapaabot naton subong kag sa palaabuton. Binagbinaga ang pila ka hitabo nga nakita na naton ukon makita pa naton bilang katumanan sang tagna ni Ezequiel.

¹⁵ Si Jehova nagapaandam sa katawhan antes sang kalaglagan. Natun-an naton sa Kapitulo 11 sini nga publikasyon nga gintangdo ni Jehova si Ezequiel bilang “bantay sa panimalay sang Israel.” (Ezeq. 3:17-19) Sugod sang 613 B.C.E., ginpaandaman ni Ezequiel ang Israel parte sa nagahilapit nga kalaglagan. Ang iban nga propeta, lakip sanday Isaias kag Jeremias, nagpaandam man parte sa kalaglagan nga matabo sa Jerusalem. (Isa. 39:6, 7; Jer. 25:8, 9, 11) Sa aton tion, ginagamit ni Jehova paagi sa Cristo, ang gamay nga grupo sang hinaplas nga mga alagad indi lang para pakan-on ang putli nga mga sumilimba, ang panimalay, kundi para paandaman man ang iban parte sa nagahilapit nga dakung kapipit-an.—Mat. 24:45.

16. Bilang katawhan ni Jehova, ginamarkahan bala naton ang mga luwason? Ipaathag.

 ¹⁶ Ang katawhan ni Jehova wala nagamarka sa mga luwason. Dumduma nga si Ezequiel wala ginsugo nga magkadto sa Jerusalem para sia mismo ang magamarka sa iban para sa kaluwasan. Ang katawhan ni Jehova subong wala man ginsugo nga markahan ang mga takus luwason. Kundi bilang panimalay, ginsugo kita nga magbantala. Importante gid sa aton ini nga sugo, gani makugi kita nga nagabantala sing maayong balita sang Ginharian sang Dios kag maukod naton nga ginapaandaman ang mga tawo nga malapit na ang katapusan sining malauton nga kalibutan. (Mat. 24:14; 28:18-20) Gani may bahin gid kita para buligan ang mga interesado nga batunon ang putli nga pagsimba.—1 Tim. 4:16.

17. Ano ang dapat himuon sang kada isa subong para mamarkahan sila sa palaabuton?

¹⁷ Para maluwas sa nagahilapit nga kalaglagan, dapat pamatud-an subong sang kada isa ang iya pagtuo. Natun-an na naton nga antes pa ginlaglag ang Jerusalem sang 607 B.C.E., ginsikway na sang mga naluwas ang kalautan kag ginpakita ang ila debosyon sa putli nga pagsimba. Amo man subong. Antes mag-abot ang kalaglagan, ang kada isa dapat “nagapanghayhay kag nagapanghakroy,” buot silingon, nasubuan gid sa kalautan sining kalibutan. Kag sa baylo nga taguon ang ila ginabatyag, dapat nila ipakita sa ila ginahambal kag ginahimo ang ila debosyon sa putli nga pagsimba. Paano? Dapat nila batunon ang mensahe nga ginabantala subong, padayon nga isuklob ang personalidad sang Cristo, magpabawtismo bilang simbulo sang ila dedikasyon kay Jehova, kag mainunungon nga suportahan  ang mga utod sang Cristo. (Ezeq. 9:4; Mat. 25:34-40; Efe. 4:22-24; 1 Ped. 3:21) Ang mga nagahimo lamang sini subong, kag makalab-ot sa dakung kapipit-an bilang putli nga mga sumilimba, amo ang markahan para sa kaluwasan.

18. (a) Paano kag san-o markahan ni Jesucristo ang mga takus? (b) Kinahanglan man bala markahan ang matutom nga mga hinaplas? Ipaathag.

¹⁸ Markahan ni Jesus ang mga takus. Sang panahon ni Ezequiel, ang mga anghel may papel sa pagmarka sa mga matutom para sa kaluwasan. Sa modernong adlaw nga katumanan, ang lalaki nga may suludlan sang tinta nga sungay nga ginagamit sang sekretaryo nagarepresentar kay Jesucristo, kon “mag-abot [sia] sa iya himaya” bilang Hukom sang tanan nga pungsod. (Mat. 25:31-33) Ang pag-abot ni Jesus matabo sa tion sang dakung kapipit-an, sa tapos malaglag ang butig nga relihion. * Sa sinang makahalawathawat nga tion, antes magsugod ang Armageddon, hukman ni Jesus ang mga tawo bilang mga karnero ukon mga kanding. Ang mangin bahin sang “daku nga kadam-an” hukman ukon markahan bilang mga karnero, nga nagapakita nga sila “magabaton sang kabuhi nga wala sing katapusan.” (Bug. 7:9-14; Mat. 25:34-40, 46) Ano naman ang himuon sa matutom nga mga hinaplas? Indi sila kinahanglan markahan para maluwas sa Armageddon. Mabaton nila ang ila katapusan nga pagmarka antes sila mapatay ukon antes magsugod ang dakung kapipit-an. Dayon, antes magsugod ang Armageddon, ang mga yari pa sa duta banhawon pakadto sa langit.—Bug. 7:1-3.

19. Sin-o ang kaupod ni Jesus sa pagpadapat sing paghukom sa sining sistema sang mga butang? (Tan-awa ang kahon nga “Pagpanghayhay kag Pagpanghakroy, Pagmarka, Pagpanglampos—San-o kag Paano?”)

 ¹⁹ Ang Hari sa langit nga si Jesucristo, kag ang iya mga hangaway sa langit magapadapat sing paghukom sa sining sistema sang mga butang. Sa palanan-awon ni Ezequiel, ang anom ka lalaki nga may dala nga inuglampos wala nagsugod sa paglaglag asta nga natapos sang lalaki nga nagabayo sing linen ang iya pagpangmarka. (Ezeq. 9:4-7) Pareho man sini, ang nagahilapit nga kalaglagan magasugod lamang sa tapos nga mahukman ni Jesus ang katawhan sang tanan nga pungsod kag mamarkahan ang mga karnero para sa kaluwasan. Dayon, sa inaway sang Armageddon, pangunahan ni Jesus ang iya hangaway sa langit, nga nagalakip sang balaan nga mga anghel kag sang tanan nga 144,000 nga kaupod niya nga manuggahom, batok sa sining malauton nga kalibutan kag laglagon ini sing bug-os. Pero luwason nila ang putli nga mga sumilimba pakadto sa matarong nga bag-ong kalibutan.—Bug. 16:14-16; 19:11-21.

20. Ano nga makapalig-on nga mga leksion ang natun-an naton sa palanan-awon ni Ezequiel parte sa lalaki nga may suludlan sang tinta nga sungay nga ginagamit sang sekretaryo?

²⁰ Nagapasalamat gid kita sa makapalig-on nga mga leksion nga natun-an naton sa palanan-awon ni Ezequiel parte sa lalaki nga may suludlan sang tinta nga sungay nga ginagamit sang sekretaryo! Makasalig gid kita nga indi paglaglagon ni Jehova ang matarong upod sa malauton. (Sal. 97:10) Nabal-an naton kon ano ang aton himuon subong para mamarkahan para sa kaluwasan sa palaabuton. Bilang mga sumilimba ni Jehova, determinado gid kita nga makigbahin sing bug-os sa pagsugid sing maayong balita kag sa pagpaandam sa mga nagapanghayhay kag nagapanghakroy sa kalautan sang kalibutan ni Satanas. Gani pribilehiyo gid naton nga buligan ang mga “may husto nga panimuot sa pagtigayon sing kabuhi nga wala sing katapusan” para magbuylog sa aton sa putli nga pagsimba, kag mamarkahan man para sa kaluwasan padulong sa matarong nga bag-ong kalibutan sang Dios.—Binu. 13:48.