1-3. Ngaa nasubuan gid si Ezequiel, kag ano karon ang ginpasulat sa iya ni Jehova?

IKAN-OM na nga tuig sang pagkatapok ni Ezequiel. * Nasubuan gid ang propeta samtang ginapamensar niya ang malain nga pagginahom sa Juda, ang iya pinalangga nga duta nga natawhan nga mga ginatos ka kilometro ang kalayuon halin sa Babilonia. Nakita niya ang pagbuslanay sang mga hari sa paggahom.

² Si Ezequiel natawo sa tungatunga sang paggahom sang matutom nga si Hari Josias. Mahimo nga nalipay gid si Ezequiel sang nabal-an niya nga ginpangunahan ni Josias ang kampanya para gub-on ang tinigib nga mga imahen kag ipasag-uli ang putli nga pagsimba sa Juda. (2 Cron. 34:1-8) Pero temporaryo lang ang nahimo ni Josias kay kalabanan sang hari nga nagbulos sa iya padayon nga nagsimba sa mga diosdios. Amo kon ngaa nangin imoral ang pungsod kag naguba ang ila kaangtanan kay Jehova. May paglaum pa bala ang ila sitwasyon? May ara!

³ Gingiyahan ni Jehova ang iya matutom nga propeta sa pagsulat sang tagna. Amo ini ang una sa pila ka tagna parte sa Mesias, ang palaabuton nga Manuggahom kag Manugbantay nga permanente nga magapasag-uli sang putli nga pagsimba kag magaatipan sing  maayo sang karnero ni Jehova. Binagbinagon naton sing maayo ini nga mga tagna, kay ang katumanan sini may labot sa aton palaabuton. Usisaon naton ang apat ka tagna parte sa Mesias nga mabasa sa libro sang Ezequiel.

4. Ano nga tagna ang ginsugid ni Ezequiel, kag paano ginsugdan ni Jehova ina nga tagna?

⁴ Sang mga 612 B.C.E., may ‘ginsiling si Jehova’ kay Ezequiel. Parte ini sa isa ka tagna nga nagasugid kon daw ano ka kasangkad ang paggahom sang Mesias kag kon ngaa kinahanglan nga magsalig sa iya Ginharian. Ginsugdan ni Jehova ang tagna paagi sa pagsugo kay Ezequiel nga isugid sa kaupod niya nga mga tinapok ang paktakon nga nagapakita sang kakulang sing pagtuo sang mga gumalahom sang Juda kag kon ngaa kinahanglan ang matarong nga Mesianikong Manuggahom.—Ezeq. 17:1, 2.

5. Ano ang paktakon nga ginsugid ni Ezequiel?

⁵ Basaha ang Ezequiel 17:3-10. Ari ang paktakon: “May daku nga agila” nga nag-utod sing ugbos sa pinakaibabaw nga sanga sang sedro kag gindala ini sa “siudad sang mga negosyante.” Dayon ginkuha sang agila ang pila ka “binhi sang duta” kag gintanom ini sa matambok nga duta sa “higad sang katubigan.” Nagtubo ang binhi kag nangin madabong nga “puno sang ubas.” Masunod, nag-abot ang ikaduha nga “daku nga agila.” Ang mga gamot sang puno sang ubas naggapa “pakadto sa” ikaduha nga agila, kay gusto sini nga sayluhon sa isa pa ka lugar nga bugana sing tubig. Ginpakamalaut ni Jehova ang ginhimo sang puno sang ubas, gani nagsiling sia nga ang mga gamot sini gabuton kag “malaya” ini.

6. Ano ang buot silingon sang paktakon?

⁶ Ano ang buot silingon sang paktakon? (Basaha ang Ezequiel 17:11-15.) Sang 617 B.C.E., ginlikupan ni Hari Nabocodonosor sang Babilonia (ang una nga “daku nga agila”) ang Jerusalem. Ginpahalin niya ang hari sang Juda nga si Jehoiakin (“ang ugbos sa pinakaibabaw nga sanga”) sa trono kag gindala sia sa Babilonia (ang “siudad sang mga negosyante”). Ginpapungko ni Nabocodonosor si Sedequias (isa sa harianon nga “binhi sang duta”) sa trono sa Jerusalem. Ang bag-o nga hari sang Juda ginpasumpa paagi sa ngalan sang Dios, amo nga obligado sia nga mangin mainunungon nga hari nga kontrolado sang Babilonia. (2 Cron. 36:13) Pero wala gintuman ni Sedequias ang iya panumpa. Nagrebelde sia sa Babilonia kag nagsalig sa puersa-militar sang Paraon sang Egipto (ang ikaduha nga “daku nga agila”) kag napaslawan gid sia. Naakig gid si Jehova sa ginhimo ni Sedequias. (Ezeq. 17:16-21) Sang ulihi, ginpahalin si Sedequias sa trono, kag napatay sia sa prisuhan sa Babilonia.—Jer. 52:6-11.

7. Ano ang matun-an naton sa paktakon?

⁷ Ano ang matun-an naton sa paktakon? Una, bilang putli nga mga sumilimba dapat naton tumanon ang aton ginpanaad. “Dapat nga ang inyo ‘Huo’ mangin huo, ang inyo ‘Indi,’ indi,” siling ni Jesus. (Mat. 5:37) Kon kinahanglan nga manumpa kita sa atubangan  sang Dios nga isugid ang matuod, pareho kon nagatestigo kita sa korte, ginatamod naton ini nga serioso. Ikaduha, dapat kita maghalong kon sin-o ang aton ginasaligan. Ang Biblia nagpaandam sa aton: “Indi kamo magsalig sa mga prinsipe ukon sa anak sang tawo, nga indi makaluwas.”—Sal. 146:3.

8-10. Paano ginlaragway ni Jehova ang palaabuton nga Mesianikong Manuggahom, kag paano natuman ang tagna? (Tan-awa man ang kahon nga “Tagna Parte sa Mesias—Ang Daku nga Kahoy nga Sedro.”)

⁸ Pero may isa ka manuggahom nga nagakabagay sang aton pagsalig. Sa tapos mahatag ni Jehova ang paktakon parte sa ginsaylo nga ugbos, gingamit niya gihapon ini nga paktakon para ilaragway ang palaabuton nga Mesianikong Manuggahom.

⁹ Ano ang ginasiling sang tagna? (Basaha ang Ezequiel 17:22-24.) Sa sini nga tion, si Jehova na ang magapanghikot, indi ang daku nga mga agila. Magautod sia sing ugbos “sa pinakaibabaw nga sanga sang kahoy nga sedro kag itanom ini . . . sa mataas nga bukid.” Ini nga ugbos magatubo, kag mangin “daku nga kahoy nga sedro” kag ang “tanan nga sahi sang pispis” magapasilong diri. Dayon makilala sang “tanan nga kahoy sa latagon” nga si Jehova mismo ang nagpatubo sining daku nga kahoy.

¹⁰ Paano natuman ang tagna? Ginkuha ni Jehova ang iya Anak, si Jesucristo sa harianon nga pamilya ni David (ang “kahoy nga sedro”) kag gintanom sia sa Bukid Sion sa langit (ang “mataas nga bukid”). (Sal. 2:6; Jer. 23:5; Bug. 14:1) Gani bisan pa si Jesus ginatamod sang iya mga kaaway nga “pinakakubos sa katawhan,” ginpakataas sia ni Jehova paagi sa paghatag sa iya sang “trono ni David nga iya amay.” (Dan. 4:17; Luc. 1:32, 33) Pareho sang daku nga kahoy nga sedro, ang Mesianikong Hari nga si Jesucristo, mangin mataas sa bilog nga duta kag mangin pagpakamaayo sa tanan niya nga sakop. Gani nagakabagay gid sang aton pagsalig ini nga Manuggahom. Sa idalom sang paggahom ni Jesus sa Ginharian, ang matinumanon nga katawhan sa bilog nga duta “magakabuhi nga luwas sa katalagman kag wala sing ginakahadlukan nga kalalat-an.”—Hulu. 1:33.

11. Ano nga importante nga leksion ang matun-an naton sa tagna parte sa “ugbos” nga nangin “daku nga kahoy nga sedro”?

¹¹ Ano ang matun-an naton sa tagna? Ang dalayawon nga tagna parte sa “ugbos” nga nangin “daku nga kahoy nga sedro” makabulig sa aton nga masabat ang importante gid nga pamangkot: Kay sin-o kita dapat magsalig? Kabuangan gid kon magsalig kita sa mga gobierno sang tawo kag sa ila puersa-militar. Para maeksperiensiahan naton ang matuod nga seguridad, dapat kita magsalig sing bug-os sa Mesianikong Hari, si Jesucristo. Ang gobierno nga ginagamhan niya sa langit amo lamang ang paglaum sang katawhan.—Bug. 11:15.

12. Paano ginpaathag ni Jehova nga wala niya ginkalimtan ang iya katipan kay David?

¹² Sa paktakon parte sa duha ka agila nga ginpaathag sang Dios, naintiendihan ni Ezequiel nga si Sedequias, ang indi matutom nga hari sa harianon nga pamilya ni David, pahalinon sa trono kag  dal-on nga bihag sa Babilonia. Mahimo nagapalibog ang propeta, ‘Ano ang matabo sa katipan sang Dios kay David, nga nagsaad nga may hari halin sa pamilya ni David nga magagahom sa wala sing katapusan?’ (2 Sam. 7:12, 16) Kon ginpamensar ni Ezequiel ini nga pamangkot, indi na sia maghulat sing madugay para mabal-an ang sabat. Sang mga 611 B.C.E., sa ikapito nga tuig sang pagkatapok, sang nagagahom pa sa Juda si Sedequias, may ‘ginsiling si Jehova’ kay Ezequiel. (Ezeq. 20:2) Ginsugo sia ni Jehova nga ipahayag ang isa pa ka tagna parte sa Mesias, nga nagapaathag nga wala ginkalimtan sang Dios ang iya katipan kay David. Ginapakita sang tagna nga ang palaabuton nga Mesianikong Manuggahom may legal nga kinamatarong sa paggahom bilang kaliwat ni David.

13, 14. Ano ang tagna nga narekord sa Ezequiel 21:25-27, kag paano ini natuman?

¹³ Ano ang ginasiling sang tagna? (Basaha ang Ezequiel 21:25-27.) Paagi kay Ezequiel, ginpahayag ni Jehova ang mensahe para sa “malaut nga pangulo sang Israel” nga nag-abot na ang tion para silutan ini. Ginsilingan ni Jehova ining malaut nga manuggahom nga kuhaon sa iya ang iya “turbante” kag “korona,” ukon diadema (mga simbulo sang gahom sang hari). Dayon, ang “kubos” nga nagagahom nga kagamhanan pataason, kag ang “mataas” paubson. Ang ginpataas  nga kagamhanan padayon nga magagahom, pero asta lang nga “mag-abot ang isa nga may legal nga kinamatarong,” kag ihatag ni Jehova sa sinang isa ang Ginharian.

¹⁴ Paano natuman ang tagna? Sang 607 B.C.E., ginpaubos ang “mataas” nga ginharian sang Juda nga ang sentro ara sa Jerusalem sang ginlaglag sang Babilonia ini nga siudad kag ginbihag ang ginpahalin nga hari nga si Sedequias. Kay wala na sing hari halin sa pamilya ni David nga nagagahom sa Jerusalem, ginpataas ang “kubos” nga Gentil nga kagamhanan, kag sila ang ginpagahom sa kalibutan—pero sa limitado lang nga tion. Ang Panag-on sang mga Gentil, ukon “ang gintalana nga mga tion sang mga pungsod,” natapos sang 1914 sang ginhatag ni Jehova ang paggahom kay Jesucristo. (Luc. 21:24) Subong kaliwat ni Hari David, si Jesus ang “may legal nga kinamatarong” sa Mesianikong Ginharian. * (Gen. 49:10) Gani paagi kay Jesus, gintuman ni Jehova ang iya promisa nga hatagan si David sing permanente nga manunubli sang Ginharian nga wala sing katapusan.—Luc. 1:32, 33.

15. Ngaa makasalig gid kita sa Hari nga si Jesucristo?

¹⁵ Ano ang matun-an naton sa tagna? Makasalig gid kita sing bug-os sa Hari nga si Jesucristo. Ngaa? Kay indi pareho sa mga  manuggahom sang kalibutan nga ginboto sang mga tawo ukon mahimo nangagaw sing posisyon, si Jesus ginpili ni Jehova kag “ginhatagan sia . . . sing ginharian” kay sia lamang ang may legal nga kinamatarong. (Dan. 7:13, 14) Gani, nagakabagay gid sang aton pagsalig ang Hari nga gintangdo mismo ni Jehova!

16. Ano ang ginabatyag ni Jehova sa iya mga karnero, kag paano ginatratar sang “mga manugbantay sang Israel” ang panong sang panahon ni Ezequiel?

¹⁶ Palangga gid sang Supremo nga Manugbantay nga si Jehova ang iya mga karnero—ang mga sumilimba niya diri sa duta. (Sal. 100:3) Sang gintugyan niya ang iya mga karnero sa kabulig nga mga manugbantay—ang mga may katungdanan—ginbantayan niya kon paano nila ginatratar ang iya mga karnero. Imadyina kon ano ang ginbatyag ni Jehova sa “mga manugbantay sang Israel” sang panahon ni Ezequiel. ‘Mapintas’ ang pagdumala sini nga mga lider. Gani nag-antos ang panong, kag madamo ang nagbiya sa putli nga pagsimba.—Ezeq. 34:1-6.

17. Paano ginluwas ni Jehova ang iya mga karnero?

¹⁷ Ano ang himuon ni Jehova? “Manabat sila sa natabo,” siling niya sa mapintas nga mga manuggahom sang Israel. Nagpromisa si Jehova: “Luwason ko ang akon mga karnero.” (Ezeq. 34:10) Ginatuman gid ni Jehova ang iya ginasiling. (Jos. 21:45) Sang 607 B.C.E., ginluwas niya ang iya mga karnero paagi sa paggamit sa mga soldado sang Babilonia para pahalinon ang makagod nga mga manugbantay. Pagligad sang 70 ka tuig, ginluwas niya ang iya tulad-karnero nga mga sumilimba sa Babilonia kag ginbalik sila sa ila duta para mapasag-uli nila didto ang matuod nga pagsimba. Pero mahapos gihapon salakayon ang mga karnero ni Jehova kay padayon sila nga pagagamhan sang mga manuggahom sang kalibutan. “Ang gintalana nga mga tion sang mga pungsod” magalawig pa sing ginatos ka tuig.—Luc. 21:24.

18, 19. Ano nga tagna ang ginpahayag ni Ezequiel sang 606 B.C.E.? (Tan-awa ang piktyur sa umpisa sini nga kapitulo.)

¹⁸ Sang 606 B.C.E., mga isa ka tuig sa tapos nga malaglag ang Jerusalem kag madugay pa antes ginluwas ang Israel sa pagkatapok sa Babilonia, gingiyahan ni Jehova si Ezequiel sa pagpahayag sang isa ka tagna nga nagapakita nga nagaulikid gid ang Supremo nga Manugbantay sa kaayuhan sang iya mga karnero. Ginalaragway sang tagna kon paano atipanon sang Mesianikong Manuggahom ang mga karnero ni Jehova.

¹⁹ Ano ang ginasiling sang tagna? (Basaha ang Ezequiel 34:22-24.) Ang Dios ‘magahatag sing manugbantay’ nga gintawag niya “ang akon alagad nga si David.” Ang tinaga nga “manugbantay” kag ang tinaga nga “alagad” nagapakita nga indi pag-ibalik sang Manuggahom ang dinastiya sang mga hari halin sa pamilya ni David kundi sia ang mangin permanente nga manunubli ni David. Pakan-on sang Manugbantay nga Manuggahom ang mga karnero sang Dios kag sia mangin “pangulo nila.” Si Jehova ‘magahimo sing katipan sang paghidait’  sa iya mga karnero. “Magaulan ang mga pagpakamaayo” sa ila kag maeksperiensiahan nila ang matuod nga seguridad, kabuganaan, kag kalipay. Matabo gid ini kay may paghidait na indi lang sa mga tawo kundi pati na sa mga tawo kag sapat!—Ezeq. 34:25-28.

20, 21. (a) Paano natuman ang tagna parte sa “akon alagad nga si David”? (b) Ano ang katumanan sa palaabuton sang ginsiling ni Ezequiel parte sa “katipan sang paghidait”?

²⁰ Paano natuman ang tagna? Paagi sa pagtawag sa sini nga Manuggahom nga “akon alagad nga si David,” gintagna sang Dios nga si Jesus nga kaliwat ni David amo ang may legal nga kinamatarong sa paggahom. (Sal. 89:35, 36) Sang diri sia sa duta, ginpamatud-an ni Jesus nga sia “ang maayo nga manugbantay” paagi sa paghatag sang iya kabuhi “para sa mga karnero.” (Juan 10:14, 15) Pero subong, isa sia ka Manugbantay sa langit. (Heb. 13:20) Sang 1914, gintangduan sang Dios nga mangin Hari si Jesus kag gintugyan sa iya ang responsibilidad sa pagbantay kag pagpakaon sa mga karnero sang Dios sa duta. Wala madugay, sang 1919, ang bag-o ginpapungko nga Hari nagtangdo sing “matutom kag mainandamon nga ulipon” para pakan-on ang “panimalay”—ang mainunungon nga mga sumilimba sang Dios nga may paglaum sa langit ukon sa duta. (Mat. 24:45-47) Paagi sa paggiya sang Cristo, ginapakaon sing maayo sa espirituwal sang matutom nga ulipon ang mga karnero sang Dios. Ini nga pagkaon nakabulig sa ila nga huptan ang kalinong kag seguridad sa espirituwal nga paraiso.

²¹ Ano ang katumanan sa palaabuton sang ginsiling ni Ezequiel parte sa “katipan sang paghidait” kag pag-ulan sang pagpakamaayo? Sa nagahilapit nga bag-ong kalibutan, maeksperiensiahan sang putli nga mga sumilimba ni Jehova sa duta ang bug-os nga pagpakamaayo sang “katipan sang paghidait.” Kon mangin paraiso na ang bilog nga duta, indi na maeksperiensiahan sang matutom nga katawhan ang inaway, krimen, gutom, balatian, ukon ang halit sang mabangis nga mga sapat. (Isa. 11:6-9; 35:5, 6; 65:21-23) Makalilipay gid ang paglaum nga mabuhi sing wala katapusan sa paraiso sa duta diin ang mga karnero sang Dios ‘magakabuhi sing malinong, kag wala na sing magapahadlok sa ila.’—Ezeq. 34:28.

22. Ano ang ginabatyag ni Jesus sa mga karnero, kag paano ini masunod sang kabulig nga mga manugbantay?

²² Ano ang matun-an naton sa tagna? Pareho sa iya Amay, nagaulikid gid si Jesus sa kaayuhan sang mga karnero. Ginasiguro gid sang Manugbantay nga Hari nga mapakaon sing maayo sa espirituwal ang mga karnero sang iya Amay kag may ara sila sing kalinong kag seguridad sa espirituwal nga paraiso. Makapaumpaw gid ang pagpalangga sini nga Manuggahom! Dapat man sundon sang kabulig nga mga manugbantay ang pagpalangga ni Jesus sa mga karnero. Bantayan sang mga gulang ang panong sing “kinabubut-on” kag “malangkagon” kag mangin halimbawa sa panong. (1 Ped. 5:2, 3) Indi gid dapat pagmaltratuhon sang isa ka gulang ang mga karnero ni Jehova! Tandai ang ginsiling ni Jehova sa mapintas nga mga manugbantay sang Israel sang panahon ni Ezequiel: “Manabat sila.”  (Ezeq. 34:10) Ginabantayan gid sang Supremo nga Manugbantay kag sang iya Anak kon paano ginatratar ang Iya mga karnero.

23. Ano ang ginpromisa ni Jehova parte sa paghiusa sa pungsod sang Israel, kag paano niya ini gintuman?

²³ Gusto ni Jehova nga mag-alagad sing nahiusa ang iya mga sumilimba. Sa tagna parte sa pagpasag-uli, nagpromisa ang Dios nga tipunon niya ang iya katawhan—ang mga representante halin sa duha ka tribo nga ginharian sang Juda kag sa napulo ka tribo nga ginharian sang Israel—kag mahiusa sila liwat subong “isa ka pungsod,” pareho sa duha ka “lipak” nga mangin “isa ka lipak” sa iya kamot. (Ezeq. 37:15-23) Natuman ini nga tagna sang ginpasag-uli sang Dios ang nahiusa nga pungsod sang Israel sa Ginsaad nga Duta sang 537 B.C.E. * Pero ina nga paghiusa halimbawa lang sang mas masangkad kag dayon nga paghiusa sa palaabuton. Sa tapos nagpromisa si Jehova nga mahiusa ang Israel, naghatag sia sing isa ka tagna kay Ezequiel kon paano tipunon sang palaabuton nga Manuggahom ang matuod nga sumilimba sa bilog nga duta para mahiusa sila sing wala katapusan.

24. Paano ginlaragway ni Jehova ang Mesianikong Manuggahom, kag ang paggahom sini nga Hari?

²⁴ Ano ang ginasiling sang tagna? (Basaha ang Ezequiel 37:24-28.) Ginpatuhuyan liwat ni Jehova ang Mesianikong Manuggahom nga “si David nga akon alagad,” “manugbantay,” kag “pangulo,” pero subong gintawag man ni Jehova ining Isa nga Ginsaad bilang “hari.”  (Ezeq. 37:22) Paano ilaragway ang paggahom sini nga Hari? Mangin permanente ang iya paggahom. Ang termino nga “wala sing katubtuban” kag “wala sing katapusan,” nagapakita nga wala sing untat ang mga pagpakamaayo sang paggahom sang Hari. * Sa iya paggahom, maeksperiensiahan ang paghiusa. Kay isa lang ang “hari,” tumanon sang mainunungon nga mga sakop ang isa lang ka “kasuguan,” kag “magaistar sila sa duta” sing ululupod. Sa iya paggahom, ang mga sakop sang Hari mangin mas malapit pa gid kay Jehova nga Dios. Si Jehova ‘magahimo sing katipan sang paghidait’ sa sini nga mga sakop. Si Jehova mangin ila Dios, kag sila mangin iya katawhan. Kag ang iya santuaryo mangin “yara sa tunga nila sa wala sing katubtuban.”

25. Paano natuman ang tagna parte sa Mesianikong Hari?

²⁵ Paano natuman ini nga tagna? Sang 1919, ang matutom nga mga hinaplas nahiusa sa idalom sang isa ka “manugbantay,” ang Mesianikong Hari nga si Jesucristo. Sang ulihi, “ang daku nga kadam-an” halin sa “tanan nga pungsod kag tribo kag katawhan kag hambal” nahiusa upod sa ila masigkatumuluo nga mga hinaplas. (Bug. 7:9) Sila nangin “isa ka panong nga may isa ka manugbantay.” (Juan 10:16) Sa langit man ukon sa duta ang ila paglaum, tanan sila matinumanon nga nagasunod sa kasuguan ni Jehova. Gani ululupod sila nga nagaistar sa espirituwal nga paraiso bilang nahiusa nga paghiliutod sa bilog nga kalibutan. Ginpakamaayo sila ni Jehova sing kalinong, kag ara sa tunga nila ang iya santuaryo, nga nagarepresentar  sang putli nga pagsimba. Si Jehova ila Dios, kag nalipay gid sila nga mangin iya mga sumilimba—subong kag sa wala sing katapusan!

26. Paano ka makabulig nga mahuptan ang paghiusa sa espirituwal nga paraiso?

²⁶ Ano ang matun-an naton sa tagna? Pribilehiyo naton nga mangin bahin sang nahiusa nga paghiliutod sa bilog nga kalibutan nga nagahimo sang putli nga pagsimba kay Jehova. Pero ina nga pribilehiyo may upod nga responsibilidad. Dapat huptan naton ang paghiusa. Gani himuon naton tanan ang aton bahin para padayon kita nga mahiusa sa aton pagpati kag buhat. (1 Cor. 1:10) Natigayon naton ang paghiusa kay pareho ang espirituwal nga pagkaon nga ginahatag sa aton, pareho ang aton mga talaksan sa paggawi base sa Biblia, kag pareho ang aton ginahimo nga hilikuton—ang pagbantala sang Ginharian kag paghimo sing disipulo. Pero ang panguna gid nga rason sang aton paghiusa amo ang gugma. Samtang ginapalambo naton kag ginatinguhaan nga ipakita ang gugma sa lainlain nga paagi—lakip ang empatiya, kaluoy, kag pagpatawad—nagabulig kita nga mahuptan ang aton paghiusa. “Ang gugma,” siling sang Biblia, amo ang “himpit nga higot sang paghiusa.”—Col. 3:12-14; 1 Cor. 13:4-7.

27. (a) Ano ang masiling mo sa mga tagna parte sa Mesias sa libro sang Ezequiel? (b) Ano ang binagbinagon naton sa masunod nga mga kapitulo?

²⁷ Nagapasalamat gid kita sa mga tagna parte sa Mesias nga mabasa sa libro sang Ezequiel! Paagi sa pagbasa kag pagpamalandong sa sini nga mga tagna natun-an naton nga ang aton mahigugmaon nga Hari nga si Jesucristo nagakabagay gid sang aton pagsalig, may legal nga kinamatarong sa paggahom, mapinalanggaon nga nagabantay sa aton, kag magabulig sia nga magpadayon ang aton paghiusa sa wala sing katapusan. Pribilehiyo gid naton nga mangin sakop sang Mesianikong Hari! Tandaan naton nga ining mga tagna parte sa Mesias bahin sang kabug-usan nga tema parte sa pagpasag-uli nga mabasa sa libro sang Ezequiel sa Biblia. Si Jesus amo ang isa nga gamiton ni Jehova para matipon ang Iya katawhan kag mapasag-uli sila sa putli nga pagsimba. (Ezeq. 20:41) Sa masunod nga mga kapitulo sini nga publikasyon, binagbinagon naton ang makalilipay nga tema parte sa pagpasag-uli kag kon paano ini ginpakita sa libro sang Ezequiel.