1-3. (a) Ngaa nakapaumpaw gid kay Ezequiel ang palanan-awon parte sa daku nga templo? (Tan-awa ang piktyur sa umpisa sini nga kapitulo.) (b) Ano ang binagbinagon naton sa sini nga kapitulo?

IMADYINA ang 50 anyos nga si Ezequiel. Mga 25 ka tuig na nga tinapok sia. Ang templo sa Jerusalem madugay na nga naguba. Kon naghandum gid man si Ezequiel nga mag-alagad bilang saserdote sa Jerusalem, imposible na nga matuman ina nga handum. Mga 56 ka tuig pa kag matapos ang pagtapok sa ila, gani kabalo si Ezequiel nga indi na niya maabtan ang pagbalik sang katawhan ni Jehova sa ila duta, kag makita ang pagpatindog liwat sang templo. (Jer. 25:11) Nagkasubo bala si Ezequiel bangod sini?

² Mainayuhon gid si Jehova kay ginpili niya ini nga tion para ipakita kay Ezequiel ang detalyado nga palanan-awon nga magahatag gid sa iya sing paumpaw kag paglaum! Paagi sa sina nga palanan-awon, ginbalik ang propeta sa iya duta kag gindala sa isa ka mataas gid nga bukid. Sa sining mataas nga lugar, ginsugata sia sang “isa ka tawo nga daw saway ang dagway.” Gingiyahan sia sini nga anghel sa paglibot sa daku nga templo. (Basaha ang Ezequiel 40:1-4.) Daw tuodtuod ini para kay Ezequiel! Sigurado nga napabakod gid ang iya pagtuo, nahalawhaw sia, kag  mahimo nagpalibog man sia. Bisan pa ang nakita niya nga templo madamo sing bahin nga pamilyar sa iya, lain gid ini sa templo sa Jerusalem.

³ Ini nga palanan-awon amo ang kaundan sang katapusan nga siam ka kapitulo sang libro sang Ezequiel. Binagbinagon naton karon kon ano nga panimuot ang dapat naton ipakita samtang ginausisa naton ini nga palanan-awon kag ang kahulugan sini. Binagbinagon man naton kon bala ang nakita ni Ezequiel amo man ang dakung espirituwal nga templo nga ginsaysay ni apostol Pablo ginatos ka tuig sang ulihi. Dayon, usisaon naton kon ano ang kahulugan sini kay Ezequiel kag sa iya kaupod nga mga tinapok.

4. Ano ang pag-intiende naton sang una sa palanan-awon parte sa templo, pero ano nga pagpaathag ang kinahanglan?

⁴ Sang una, suno sa aton mga publikasyon, ang nakita ni Ezequiel nga dakung espirituwal nga templo ni Jehova amo ang ginsambit ni apostol ni Pablo sa iya sulat sa mga Hebreo. * Base sa sini nga pagpati, makasiling kita nga ang madamo nga bahin sang templo sa palanan-awon ni Ezequiel may ginasimbulo, ukon ginalarawan, nga ginagamit nga basihan ang paathag ni Pablo sang tabernakulo. Pero paagi sa dugang nga pagtuon, pangamuyo, kag pagpamalandong, nakita nga kinahanglan ang mas simple nga pagpaathag sa palanan-awon ni Ezequiel parte sa templo.

5, 6. (a) Paano ginpakita ni apostol Pablo ang pagkamapainubuson sa iya pagsaysay parte sa tabernakulo? (b) Ano ang ginsiling ni Pablo parte sa pila ka bahin sang tabernakulo, kag paano naton maaplikar ang prinsipio sang iya ginsulat sa aton paghangop sa palanan-awon ni Ezequiel parte sa templo?

⁵ Maalamon nga indi naton paghatagan sing kahulugan ukon simbulo ang tanan nga bahin sang palanan-awon ni Ezequiel parte sa templo. Ngaa? Binagbinaga ang isa ka halimbawa. Sang ginsambit ni Pablo ang tabernakulo kag ang espirituwal nga templo, ginsaysay niya ang mga bahin sang tabernakulo, pareho sang incensario nga bulawan, takop sang kaban, kag tibod nga bulawan nga may unod nga manna. May ginhatag bala sia nga kahulugan sa sini nga mga bahin? Wala sia gingiyahan sang balaan nga espiritu sa paghimo sini. Sa baylo, nagsulat si Pablo: “Indi ini ang tion agod ihambal sing detalyado ini nga mga butang.” (Heb. 9:4, 5) Handa si Pablo nga magpagiya sa balaan nga espiritu kag maghulat sing mapainubuson kay Jehova.—Heb. 9:8.

⁶ Ang prinsipio sa ginsulat ni Pablo amo man ang iaplikar naton sa palanan-awon ni Ezequiel parte sa templo. Madamo man ini sing bahin. Kag kon kinahanglan sing dugang nga pagpaathag, maayo gid nga maghulat kay Jehova. (Basaha ang Miqueas 7:7.) Pero, makasiling bala kita nga wala sing dugang nga paathag ang espiritu ni Jehova sa sini nga palanan-awon? Indi.

7, 8. (a) Ano ang ginbag-o nga paghangop parte sa palanan-awon? (b) Ngaa ang palanan-awon ni Ezequiel parte sa templo lain sa espirituwal nga templo nga ginsaysay ni Pablo?

⁷ Sa sulod sang madamo nga tinuig, ginapaathag sang aton mga publikasyon nga ang nakita ni Ezequiel nga dakung espirituwal nga  templo ni Jehova amo man ang templo nga ginsambit ni Pablo sa iya sulat sa mga Hebreo. Pero paagi sa dugang nga pagtuon, makasiling kita nga ang nakita ni Ezequiel indi ang dakung espirituwal nga templo. Ngaa?

⁸ Una, ang templo nga nakita ni Ezequiel indi magsibu sa paathag ni Pablo. Binagbinaga ini: Ginpaathag ni Pablo nga ang tabernakulo sang panahon ni Moises may ginalandong kag sulundan sang isa nga mas daku pa. Ang tabernakulo, pareho sa mga templo ni Solomon kag ni Zorobabel, nga pareho ang desinyo, may “Labing Balaan” nga hulot. Gintawag ni Pablo ini nga hulot nga “balaan nga lugar nga ginhimo sang mga kamot sang tawo,” buot silingon “ang larawan sang katunayan,” indi ang katunayan mismo. Ano ang katunayan? Ginpaathag ni Pablo nga ini amo ang “langit mismo.” (Heb. 9:3, 24) Langit bala ang nakita ni Ezequiel? Indi. Wala ginapakita sang palanan-awon ni Ezequiel nga nakakita sia sing mga butang sa langit.—Ipaanggid ang Daniel 7:9, 10, 13, 14.

9, 10. Kon parte sa paghalad, ngaa ang palanan-awon ni Ezequiel parte sa templo lain sa dakung espirituwal nga templo nga ginsaysay ni Pablo?

⁹ Ang daku pa gid nga kinalain sang palanan-awon ni Ezequiel parte sa templo sa paglaragway ni Pablo amo ang parte sa paghalad. Nabatian ni Ezequiel ang detalyado nga mga instruksion nga ginhatag sa katawhan, sa mga pangulo, kag sa mga saserdote parte sa paghalad. Dapat sila maghalad para sa ila mga sala. Dapat man sila maghimo sing mga halad sa pag-ambitanay, nga mahimo kaunon nila sing magkaupod sa kalan-an sa templo. (Ezeq. 43:18, 19; 44:11, 15, 27; 45:15-20, 22-25) Ining sulitsulit bala nga halad ginhimo man sa dakung espirituwal nga templo?

¹⁰ Maathag kag simple ang sabat ni Pablo: “Sang nag-abot ang Cristo bilang mataas nga saserdote sang maayong mga butang nga natuman na, nagsulod sia sa mas daku kag mas himpit nga tolda nga wala ginhimo sang mga kamot sang tawo, kon sayuron, indi sa sini nga tinuga. Nagsulod sia sa balaan nga lugar sing makaisa gid lang, apang indi dugo sang mga kanding kag sang mga torite nga baka ang iya dala, kundi ang iya kaugalingon nga dugo, kag nagtigayon sia sang wala sing katapusan nga pagtubos para sa aton.” (Heb. 9:11, 12) Gani sa dakung espirituwal nga templo, makaisa gid lang ginhimo ang halad. Amo ini ang halad-gawad, kag ginhimo ini mismo sang Daku Pa nga Mataas nga Saserdote, si Jesucristo. Gani ginapakita sang palanan-awon ni Ezequiel parte sa templo lakip ang paghalad sang mga kanding kag mga toro nga baka nga indi ini ang dakung espirituwal nga templo.

11. Sang panahon ni Ezequiel, ngaa indi pa tion nga ipahayag sang Dios ang kamatuoran parte sa dakung espirituwal nga templo?

¹¹ Ang ikaduha nga rason kon ngaa ang nakita ni Ezequiel indi ang dakung espirituwal nga templo amo nga: Indi pa tion nga ipahayag sang Dios ini nga kamatuoran. Dumduma, ang palanan-awon ni Ezequiel para sa tinapok nga mga Judiyo sa Babilonia. Ginapatuman sa ila ang Mosaikong Kasuguan. Kon mahilway na sila,  mabalik sila sa Jerusalem kag tumanon ina nga Kasuguan parte sa putli nga pagsimba paagi sa pagpatindog liwat sang templo kag halaran sini. Dayon padayunon nila ang paghalad diri, nga himuon pa nila sa halos anom ka gatos ka tuig. Imadyina kon ano ang mangin reaksion sang mga Judiyo kon ginpakita sa ila sa palanan-awon ni Ezequiel ang dakung espirituwal nga templo—ang templo diin ginhalad sang mataas nga saserdote ang iya mismo nga kabuhi, dayon gin-untat ang tanan nga paghalad! Maintiendihan ayhan nila ini nga palanan-awon? Mahimo gid nga magpaluya ini sang ila determinasyon nga tumanon ang Mosaikong Kasuguan. Subong sang ginahimo pirme ni Jehova, ginapahayag niya ang kamatuoran sa iya ginpat-od nga tion kag kon handa na ang iya katawhan.

12-14. Ano ang kaangtanan sang templo nga nakita ni Ezequiel kag sang paathag ni Pablo sang espirituwal nga templo? (Tan-awa ang kahon nga “Sarisari nga Templo, Sarisari nga Leksion.”)

¹² Ano kon amo ang kaangtanan sang palanan-awon ni Ezequiel parte sa templo kag sa paathag ni Pablo sang espirituwal nga templo? Tandai nga ang paathag ni Pablo wala niya ginbase sa palanan-awon ni Ezequiel parte sa templo. Kundi, ginbase niya ini sa tabernakulo sang panahon ni Moises. Matuod, may ginsambit si Pablo nga pila ka bahin sang templo nga ara man sa templo ni Solomon kag sa templo ni Zorobabel kag ara man sa palanan-awon  ni Ezequiel parte sa templo. Pero, lainlain ang pokus sang sinulatan ni Ezequiel kag ni Pablo. * Wala nila ginasaysay ang pareho lang nga butang, kundi ang ila sinulatan nagabuligay sa pagpaathag.

¹³ Halimbawa: Sa sinulatan ni Pablo, matun-an naton ang parte sa kahimusan ni Jehova para sa pagsimba, pero sa libro naman sang Ezequiel, matun-an naton ang parte sa talaksan ni Jehova para sa pagsimba. Agod tudluan kita parte sa kahimusan ni Jehova para sa putli nga pagsimba, ginpaathag ni Pablo ang kahulugan sang mga bahin sang espirituwal nga templo pareho sang mataas nga saserdote, mga halad, ang halaran, kag ang Labing Balaan. Pero para ipadaku ang mataas nga talaksan ni Jehova para sa putli nga pagsimba, ang palanan-awon ni Ezequiel parte sa templo naghatag sa aton sing detalyado nga laragway nga nagapatudok sa aton hunahuna kag tagipusuon sing mga leksion parte sa mga talaksan ni Jehova.

¹⁴ Ano ang kapuslanan sa aton sining bag-o nga paghangop? May kahulugan gid para sa aton ang palanan-awon ni Ezequiel. Para mabal-an naton kon paano kita makabenepisyo sa sini, usisaon anay naton kon paano nakabenepisyo sa sini ang matutom nga mga Judiyo sang una.

15. (a) Ano ang kabilugan nga mensahe sang palanan-awon ni Ezequiel? (b) Ano ang nakita naton nga kinatuhayan sang Ezequiel kapitulo 8 kag sang Ezequiel kapitulo 40 asta 48?

¹⁵ Para mabal-an naton ang sabat sang Biblia sa sina nga pamangkot, binagbinagon naton ang mga pamangkot nga may labot sa sini nga palanan-awon nga makabulig sa aton nga maintiendihan ini sing maayo. Una, ano ang kabilugan nga mensahe sang palanan-awon? Ang pagpasag-uli sang putli nga pagsimba! Maathag gid ini kay Ezequiel. Nasulat na niya ang kapitulo 8 sang Ezequiel, diin ginlaragway ni Jehova ang makaluluoy nga sitwasyon sang templo sa Jerusalem. Kag sigurado nga nalipay gid si Ezequiel sa pagsulat sing detalyado parte sa daku nga kinatuhayan, nga makita naton sa kapitulo 40 asta 48. Mabasa naton diri, indi ang nahigkuan nga putli nga pagsimba, kundi ang nagakaigo gid nga putli nga pagsimba—isa ka perpekto nga halimbawa sang pagsimba kay Jehova suno sa Mosaikong Kasuguan.

16. Paano ginapamatud-an sang palanan-awon ni Ezequiel parte sa templo ang gintagna ni Isaias mga isa ka gatos ka tuig antes sini?

¹⁶ Para mapasag-uli ang pagsimba kay Jehova sa nagakaigo nga lugar sini, dapat ini pakataason. Sobra isa ka gatos ka tuig antes sini, si propeta Isaias gingiyahan sang Dios sa pagsulat: “Sa ulihi nga bahin sang mga adlaw, ang bukid sang balay ni Jehova tukuron sing malig-on nga mataas pa sa putukputukan sang kabukiran, kag pataason pa ini sa kabakuluran.” (Isa. 2:2) Nakita ni Isaias nga mapasag-uli ang putli nga pagsimba kay Jehova kag pakataason ini, nga daw ginbutang sa pinakamataas gid nga bukid. Karon, sa diin si Ezequiel sa sini nga palanan-awon? Ara sia “sa isa ka mataas gid nga bukid,” nga nagatan-aw sa balay ni Jehova. (Ezeq. 40:2) Gani ginapamatud-an sang palanan-awon ni Ezequiel nga ipasag-uli ang putli nga pagsimba.

17. Ano nga mga impormasyon ang ginaunod sang Ezequiel kapitulo 40 asta 48?

¹⁷ Binagbinaga ang mga nakita kag nabatian ni Ezequiel, nga narekord sa Ezequiel kapitulo 40 asta 48. Nagatan-aw sia samtang ginatakus sang anghel ang mga gawang, pader, mga luwang, kag santuaryo sang templo. (Ezeq. 40-42) Dayon may makalilipay nga natabo: Nag-abot si Jehova sa templo! Ginlaygayan ni Jehova ang iya batinggilan nga katawhan, ang mga saserdote, kag ang mga pangulo. (Ezeq. 43:1-12; 44:10-31; 45:9-12) Nakita ni Ezequiel ang suba nga nagailig halin sa santuaryo, nga nagahatag sing kabuhi kag mga pagpakamaayo asta nga nakalab-ot ini sa Patay nga Dagat. (Ezeq. 47:1-12) Nakita man niya nga ginpartida ang duta kag ang kada isa pareho ang bahin. Ang putli nga pagsimba ginahimo malapit sa sentro sang duta. (Ezeq. 45:1-8; 47:13–48:35) Ano ang kabilugan nga mensahe sini? Ginapasalig ni Jehova ang iya katawhan nga ipasag-uli ang putli nga pagsimba kag pakataason ini. Pakamaayuhon niya ang iya balay sang pagsimba paagi sa iya presensia, kag magailig ang mga pagpakamaayo halin sa sina nga templo, nga nagapaayo kag nagahatag sing kabuhi kag kalinong sa napasag-uli nga duta.

18. Literal bala ang kahulugan sang palanan-awon parte sa templo? Ipaathag.

 ¹⁸ Ikaduha, dapat bala intiendihon sing literal ang palanan-awon? Indi. Mahimo nga naintiendihan gilayon ni Ezequiel kag sang iya kaupod nga mga tinapok nga ginsugiran niya sang palanan-awon nga indi ini literal. Ngaa? Dumduma nga nakita ni Ezequiel ini nga templo sa “isa ka mataas gid nga bukid.” Bisan pa pareho ini sa tagna ni Isaias, wala ini nagasibu sa aktual nga lokasyon sang templo. Ang templo ni Solomon nahamtang sa Bukid Moria sa Jerusalem, kag dira man patindugon liwat sa ulihi. Pero, ‘mataas gid bala ini nga bukid’? Indi. Ang matuod, ang Bukid Moria napalibutan sang mga bukid nga pareho kataas ukon mas mataas pa sa sini. Isa pa, daku katama ang nakita ni Ezequiel nga templo. Malapad ang lugar nga nahamtangan sini kag napalibutan ini sang pader, gani indi ini makaigo sa putokputokan sang Bukid Moria. Indi man ini makaigo sa siudad sang Jerusalem sang panahon ni Solomon! Isa pa, kabalo ang mga tinapok nga wala sing literal nga suba nga magailig halin sa santuaryo sang templo asta nga makalab-ot ini sa Patay nga Dagat kag magaayo sa mga tubig sini. Dugang pa, ang Ginsaad nga Duta madamo sing kabukiran, gani indi puede nga tadlong ang mga dulunan sang kada tribo, suno sa paglaragway sini sa palanan-awon. Gani indi literal ang kahulugan sini nga palanan-awon.

19-21. Ano ang gusto ni Jehova nga mangin epekto sa katawhan sang palanan-awon ni Ezequiel, kag ngaa dapat amo sina ang mangin epekto sa ila?

¹⁹ Ikatlo, ano dapat ang epekto sang palanan-awon sa katawhan ni Ezequiel? Kon pamalandungan sang katawhan ang mataas nga  talaksan ni Jehova para sa putli nga pagsimba, dapat makabatyag sila sing kahuya. Ginsugo ni Jehova si Ezequiel nga ‘isugid sa panimalay sang Israel ang nahanungod sa templo.’ Dapat detalyado gid ang paglaragway ni Ezequiel sa sini nga templo para ‘tun-an sang mga Israelinhon ang plano sini.’ Ngaa dapat pamalandungan sang katawhan ina nga templo? Sa natun-an naton, indi para patindugon ini. Kundi, subong sang ginsiling ni Jehova, “agod mahuya sila sa ila mga sala.”—Basaha ang Ezequiel 43:10-12.

²⁰ Ngaa ini nga palanan-awon mahimo nagtandog sa konsiensia sang matarong sing tagipusuon nga katawhan kag mahuya sila? Talupangda ang ginsiling kay Ezequiel: “Anak sang tawo, talupangda, tan-awa, kag pamatii sing maayo ang tanan nga ihambal ko sa imo tuhoy sa mga pagsulundan kag mga kasuguan sa templo ni Jehova.” (Ezeq. 44:5) Sulitsulit nga nabatian ni Ezequiel ang parte sa mga pagsulundan kag mga kasuguan. (Ezeq. 43:11, 12; 44:24; 46:14) Pirme man ginapahanumdom si Ezequiel parte sa mga talaksan ni Jehova—bisan ang talaksan sa kalabaon sang maniko kag ang talaksan para sa husto nga kabug-aton. (Ezeq. 40:5; 45:10-12; ipaanggid ang Hulubaton 16:11.) Sa sini lang nga palanan-awon, sobra 50 ka beses nga ginrekord ni Ezequiel ang orihinal nga mga tinaga para sa “takus” kag “talaksan”!

²¹ Paagi sa pagsambit sang mga talaksan, kabug-aton, kasuguan, kag pagsulundan, ano ang ginatudlo ni Jehova sa iya katawhan? Ginapahanumdom niya sila paagi sa mabug-at nga mga tinaga sining importante nga kamatuoran: Si Jehova lamang ang nagapahamtang sing mga talaksan para sa putli nga pagsimba. Dapat mahuya ang mga wala nagsunod sa sini nga mga talaksan! Pero, sa ano nga mga paagi nga natun-an sang mga Judiyo ini nga mga leksion sa bulig sini nga palanan-awon? Binagbinagon naton sa masunod nga kapitulo ang pila sa sini. Makabulig ini sa aton nga maintiendihan pa gid sing maayo kon ano ang kahulugan sini nga palanan-awon para sa aton subong.