1, 2. (a) Ano ang natun-an naton sa nagligad nga kapitulo sa palanan-awon ni Ezequiel parte sa templo? (b) Ano ang duha ka pamangkot nga binagbinagon naton sa sini nga kapitulo?

NATUN-AN naton sa nagligad nga kapitulo nga ang nakita ni Ezequiel sa palanan-awon indi ang dakung espirituwal nga templo nga ginsaysay ni apostol Pablo pagligad sang ginatos ka tuig. Natun-an man naton nga ang katuyuan sang palanan-awon amo nga tudluan ang katawhan sang Dios nga importante gid ang iya mga talaksan parte sa putli nga pagsimba. Mapasag-uli lamang nila ang ila maayo nga kaangtanan kay Jehova kon sundon nila ina nga mga talaksan. Amo kon ngaa duha ka beses nga ginsulit ni Jehova sa isa lang ka bersikulo ining importante nga punto: “Amo ini ang kasuguan nahanungod sa templo.”—Basaha ang Ezequiel 43:12.

² Karon binagbinagon naton ang duha pa ka pamangkot. Una: Kon parte sa mga talaksan ni Jehova para sa putli nga pagsimba, ano ang mahimo natun-an sang mga Judiyo sang panahon ni Ezequiel sa sini nga palanan-awon parte sa templo? Ang sabat sa sini makabulig sa aton nga masabat ang ikaduha nga pamangkot: Ano ang kahulugan sini nga palanan-awon para sa aton sa sining mabudlay nga katapusan nga mga adlaw?

3. Ngaa nahuya gid ang katawhan sang nakita nila sa palanan-awon nga yara sa mataas nga bukid ang balay ni Jehova?

³ Para masabat naton ang una nga pamangkot, mapokus kita sa pila ka talalupangdon nga mga bahin sini nga palanan-awon parte sa templo. Ang mataas nga bukid. Mahimo nga ginaangot sang katawhan ang palanan-awon ni Ezequiel sa makalilipay nga tagna ni Isaias parte sa pagpasag-uli. (Isa. 2:2) Nakita nila ang balay ni Jehova nga yara sa mataas nga bukid. Ano ang ginatudlo sini sa ila? Ginatudlo sini nga dapat ang putli nga pagsimba pakataason kag himayaon labaw sa tanan. Siempre, mataas na nga daan ang putli nga pagsimba, kay kahimusan ini sang Isa nga ‘ginbayaw labaw sa tanan nga dios.’ (Sal. 97:9) Pero wala ginhimo sang katawhan ang ila dapat himuon. Sa sulod sang ginatos ka tuig, sulitsulit nila nga ginpasipalahan, gintalikdan, kag ginhigkuan ang putli nga pagsimba. Sigurado nga nahuya gid ang matarong sing tagipusuon nga katawhan sang nakita nila nga ginpakataas ang balay sang Dios sa mahimayaon kag dungganon nga posisyon nga nagakabagay gid sa sini.

4, 5. Ano nga leksion ang mahimo natun-an sang katawhan sang panahon ni Ezequiel parte sa mataas nga mga gawang sang templo?

⁴ Ang mataas nga mga gawang. Sa una nga bahin sang palanan-awon, nakita ni Ezequiel ang anghel nga nagagiya sa iya nga nagatakus sang mga gawang. Ini nga mga gawang mga 30 metros kataas! (Ezeq. 40:14) May hulot sang mga bantay sa mga alagyan pasulod sa templo. Ano ang mahimo nga ginatudlo sini sa mga tawo sang panahon ni Ezequiel sang gintun-an nila ang plano sang templo? Ginsilingan ni Jehova si Ezequiel: “Talupangda sing maayo ang mga alagyan pasulod sa templo.” Ngaa? Kay ang katawhan nagadala sing mga tawo nga “wala matuli ang tagipusuon kag unod” sa sulod sang sagrado nga balay sang Dios para sa pagsimba. Ano ang resulta? “Ginpasipalahan nila ang akon templo,” siling ni Jehova.—Ezeq. 44:5, 7.

⁵ Yadtong mga “wala matuli ang . . . unod” wala nagtuman sa maathag nga sugo sang Dios nga ginhatag halin pa sang panahon ni Abraham. (Gen. 17:9, 10; Lev. 12:1-3) Pero mas malain pa gid ang ginhimo sang mga “wala matuli ang tagipusuon.” Mga rebelyuso sila kag wala nagasunod sa direksion kag paggiya ni Jehova. Wala sila dapat ginpasugtan nga makasulod sa sagrado nga balay ni Jehova sang pagsimba! Ginadumtan ni Jehova ang pagkasalimpapaw, pero gintugutan sang iya katawhan nga magdamo ang salimpapaw sa iya balay. Ang mga gawang kag hulot sang mga bantay sa palanan-awon parte sa templo nagatudlo gid sini nga leksion: Indi na pagtugutan ang salimpapaw nga pagsimba sa templo! Dapat sundon ang mataas nga mga talaksan para makasulod sa balay sang Dios. Sa sini lang nga paagi nga pakamaayuhon ni Jehova ang pagsimba sang iya katawhan.

6, 7. (a) Ano nga mensahe ang ginatudlo ni Jehova sa iya katawhan sang ginpakita niya ang pader nga nagapalibot sa templo? (b) Ano anay ang pagtratar sang katawhan ni Jehova sa iya balay? (Tan-awa ang footnote.)

⁶ Ang pader nga nagapalibot sa templo. Ang isa pa ka talalupangdon nga bahin sini nga palanan-awon amo ang pader nga nagapalibot sa templo. Si Ezequiel nagsiling nga ang pader sa kada kilid 500 ka  tabun-ak, ukon 1,555 metros, sobra isa ka kilometro ang kalabaon! (Ezeq. 42:15-20) Pero ang bilding sang templo kag ang mga luwang sini nagasangkad lamang sing 500 ka kubiko, ukon 259 metros sa kada kilid. Gani malapad ang bakante nga lugar sa palibot sang templo kag ginapalibutan pa gid ini sang pader. * Ano ang katuyuan sini?

⁷ Si Jehova nagsiling: “Apang karon, dapat na nila untatan ang ila espirituwal nga pagpakighilawas kag isikway ang mga diosdios nga ginsimba nila subong ila mga hari, kag magapuyo ako sa tunga nila sa wala sing katubtuban.” (Ezeq. 43:9) Gani sang ginpakita ni Jehova inang malapad nga lugar sa palanan-awon ni Ezequiel parte sa templo daw pareho nga nagasiling sia: “Ipahilayo ninyo ina nga kahigkuan. Indi ninyo ina pagdal-a sa sulod.” Kon huptan nila nga putli ang ila pagsimba, pakamaayuhon sila ni Jehova paagi sa iya presensia.

8, 9. Ano ang mahimo natun-an sang katawhan sa mabaskog nga laygay ni Jehova sa nagadumala nga mga lalaki?

⁸ Mabaskog nga laygay sa nagadumala nga mga lalaki. Naghatag man si Jehova sing mabaskog pero mahigugmaon nga laygay sa mga lalaki nga may mabug-at nga responsibilidad sa katawhan. Ginsabdong niya ang mga Levinhon nga nagpalayo sa iya sang nagsimba liwat ang katawhan sa mga diosdios, pero ginkomendahan niya ang mga anak ni Zadok, nga “nag-atipan sang [iya] santuaryo sang ang mga Israelinhon nagtalikod sa [iya].” Ang pagpakig-angot ni Jehova sa kada grupo makatarunganon kag maluluy-on, suno sa ila mga buhat. (Ezeq. 44:10, 12-16) Ginsabdong man niya ang mga pangulo sang Israel.—Ezeq. 45:9.

⁹ Maathag nga ginpakita ni Jehova nga ining mga lalaki nga may katungdanan sa pagdumala manabat sa iya kon paano nila ginatungdan ang ila mga responsibilidad. Kinahanglan nila gihapon sang laygay, pagtadlong, kag pagdisiplina. Kag dapat sila ang manguna sa pagsunod sa mga talaksan ni Jehova.

10, 11. Ano nga mga ebidensia ang nagapakita nga ang pila sa nagbalik nga mga tinapok nag-aplikar sang mga leksion sa palanan-awon ni Ezequiel?

¹⁰ Gin-aplikar bala sang nagbalik nga mga tinapok ang mga leksion sa palanan-awon ni Ezequiel? Wala naton nahibaluan kon ano gid ang ginahunahuna sang matutom nga mga lalaki kag babayi sadto parte sa sining talalupangdon nga palanan-awon. Pero, madamo sing ginasugid ang Pulong sang Dios parte sa ginhimo sang nagbalik nga mga tinapok kag kon ano ang ila pagtamod sa putli nga pagsimba kay Jehova. Gin-aplikar bala nila ang mga prinsipio sa palanan-awon ni Ezequiel? Sa pila ka paagi ginsunod nila ini, ilabi na kon ikumparar sa ila rebelyuso nga mga katigulangan antes sang pagkatapok sa Babilonia.

¹¹ Ang matutom nga mga lalaki nga sanday propeta Hageo kag Zacarias, ang saserdote kag manugkopya nga si Esdras, kag ang gobernador nga si Nehemias nangabudlay gid sa pagtudlo sa katawhan sang mga prinsipio pareho sa matun-an sa palanan-awon ni Ezequiel parte sa templo. (Esd. 5:1, 2) Gintudluan nila ang katawhan nga dapat  pakataason ang putli nga pagsimba kag dapat unahon ini sangsa materyal nga butang ukon sa personal nga mga handum. (Hag. 1:3, 4) Ginpatuman gid nila nga dapat tahuron ang mga talaksan sa pagpakigbahin sa putli nga pagsimba. Halimbawa, mabaskog nga ginsabdong nanday Esdras kag Nehemias ang katawhan nga bulagan ang ila mga asawa nga taga-iban nga pungsod, kay sila ang nagapaluya sa espirituwalidad sang katawhan. (Basaha ang Esdras 10:10, 11; Neh. 13:23-27, 30) Ano naman ang natabo sa pagsimba sa mga diosdios? Mahimo nga pagkatapos nga mahilway sila sa pagkatapok, gindumtan na gid man sang pungsod ini nga sala, nga amo pirme ang nagasiod sa ila sa sulod sang malawig nga tion. Ano naman ang ginhimo sa mga saserdote kag pangulo, ukon mga prinsipe? Subong sang ginpakita sa palanan-awon ni Ezequiel, lakip sila sa ginlaygayan kag gintadlong ni Jehova. (Neh. 13:22, 28) Madamo sa ila ang mapainubuson nga nagtuman sa laygay.—Esd. 10:7-9, 12-14; Neh. 9:1-3, 38.

12. Sa ano nga mga paagi ginpakamaayo ni Jehova ang mga tinapok sang nakabalik sila?

¹² Nagtuman ang katawhan, gani ginpakamaayo gid sila ni Jehova. Nangin suod ang ila kaangtanan kay Jehova, maayo ang ila panglawas, kag may kahim-ong sila nga madugay na nga wala nila maeksperiensiahan. (Esd. 6:19-22; Neh. 8:9-12; 12:27-30, 43) Ngaa? Kay ginsunod na gid man sang katawhan ang matarong nga talaksan ni Jehova para sa putli nga pagsimba. Ang mga leksion sa palanan-awon parte sa templo nagpahulag gid sa madamo nga mapainubuson. Gani bilang sumaryo, makasiling kita nga ang mga  tinapok nakabenepisyo sa palanan-awon ni Ezequiel parte sa templo sa duha ka importante nga paagi. (1) Nagatudlo ini sa ila sang praktikal nga mga leksion parte sa mga talaksan para sa putli nga pagsimba kag kon paano nila dapat sundon ini nga mga talaksan. (2) Isa ini ka tagna nga nagapasalig nga ipasag-uli ang putli nga pagsimba, kag nagatagna man ini kon paano pakamaayuhon ni Jehova ang iya katawhan kon padayon nila nga himuon ang putli nga pagsimba. Pero, gusto naton mabal-an: Ini bala nga palanan-awon may katumanan sa aton tion?

13, 14. (a) Paano naton nahibaluan nga ang palanan-awon ni Ezequiel parte sa templo may katumanan sa aton tion? (b) Ano ang duha ka paagi nga makabenepisyo kita sa palanan-awon? (Tan-awa man ang kahon 13A, “Sarisari nga Templo, Sarisari nga Leksion.”)

¹³ Makasiguro bala kita nga ang palanan-awon ni Ezequiel parte sa templo may katumanan sa aton tion? Huo! Dumduma ang pagkaanggid sang palanan-awon ni Ezequiel parte sa sagrado nga balay sang Dios sa “mataas gid nga bukid” kag sa tagna ni Isaias nga “ang bukid sang balay ni Jehova tukuron sing malig-on nga mataas pa sa putukputukan sang kabukiran.” Ginsugid sa aton ni Isaias nga ang iya tagna matuman “sa ulihi nga bahin sang mga adlaw,” ukon “sa katapusan nga mga adlaw.” (Ezeq. 40:2; Isa. 2:2-4; footnote; tan-awa man ang Miqueas 4:1-4.) Ini nga mga tagna natuman sang katapusan nga mga adlaw sugod sang 1919 sang ginpakataas kag ginpasag-uli ang putli nga pagsimba, nga daw ginbutang sa mataas nga bukid. *

¹⁴ Gani sigurado nga ang palanan-awon ni Ezequiel may katumanan sa putli nga pagsimba subong. Nakabenepisyo gid ang tinapok nga mga Judiyo sa sini nga palanan-awon, gani makabenepisyo man kita sa sini sa duha ka paagi. (1) Nagatudlo ini sang praktikal nga mga leksion kon paano naton sundon ang mga talaksan ni Jehova para sa putli nga pagsimba. (2) Isa ini ka tagna nga nagapasalig sa aton nga ipasag-uli ang putli nga pagsimba kag pakamaayuhon kita ni Jehova.

15. Ano ang dapat naton tandaan samtang nagakuha kita sing mga leksion sa palanan-awon ni Ezequiel parte sa templo?

¹⁵ Binagbinagon naton subong ang pila ka bahin sang palanan-awon ni Ezequiel. Imadyina nga nagaupod kita kay Ezequiel samtang nagalibot sia sa sinang daku nga templo. Tandai nga indi ang dakung espirituwal nga templo ang aton ginatan-aw, kundi nagakuha lang kita sing mga leksion nga maaplikar sa aton pagsimba subong. Ano ang pila ka leksion nga matun-an naton?

16. Ano ang matun-an naton sa mga takus sa palanan-awon ni Ezequiel? (Tan-awa ang piktyur sa umpisa sini nga kapitulo.)

¹⁶ Ano ang matun-an naton sa mga takus? Samtang nagatan-aw si Ezequiel, ginakuha sang anghel nga daw saway ang dagway ang detalyado nga takus sang templo, lakip ang mga pader, gawang, hulot sang mga bantay, mga luwang, kag halaran sini. Ang mga takus sini mahimo makahalawhaw gid sa nagabasa. (Ezeq. 40:1–42:20; 43:13, 14) Pero, hunahunaon naton ang importante nga mga punto nga matun-an naton sa sini. Ginapadaku ni Jehova nga importante gid  ang iya mga talaksan. Sia ang naghimo sini, indi ang mga tawo. Sala gid ang mga nagasiling nga indi importante sa Dios kon paano sia simbahon. Isa pa, paagi sa detalyado nga pagtakus sa templo, nagapasalig si Jehova nga ipasag-uli gid ang putli nga pagsimba. Ginapakita sang insakto nga takus sang templo nga sigurado gid nga matuman ang promisa sang Dios. Gani ginapasalig sini si Ezequiel nga ang pagpasag-uli sang putli nga pagsimba sa katapusan nga mga adlaw sigurado gid nga matuman!

17. Ano ang mahimo nga ginapahanumdom sa aton sang pader nga nagapalibot sa templo?

¹⁷ Ang pader nga nagapalibot. Nabinagbinag na naton nga nakita ni Ezequiel ang pader nga nagapalibot sa templo. Mabaskog ini nga pahanumdom sa katawhan sang Dios nga ipahilayo ang tanan nga kahigkuan sa putli nga pagsimba, kag indi gid pagdagtaan ang balay sang Dios. (Basaha ang Ezequiel 43:7-9.) Kinahanglan man naton ini nga laygay subong. Sa tapos nga mahilway ang katawhan sang Dios sa ginatos ka tuig nga pagkabihag sa espirituwal sa Babilonia nga Daku, gintangduan sang Cristo ang iya matutom kag mainandamon nga ulipon sang 1919. Sugod sadto, nagtinguha gid ang katawhan sang Dios nga talikdan ang butig nga mga doktrina kag buhat nga nasamuan sang idolatriya kag paganismo. Dapat gid naton ipahilayo ang espirituwal nga kahigkuan sa putli nga pagsimba. Isa pa, wala man kita naganegosyo sa aton Kingdom Hall, kay indi naton gusto nga samuan sang iban nga butang ang aton pagsimba.—Mar. 11:15, 16.

18, 19. (a) Ano ang matun-an naton sa mataas nga mga gawang sa palanan-awon parte sa templo? (b) Ano ang dapat naton himuon kon may mga tawo nga nagabalewala sa mataas nga talaksan ni Jehova? Maghatag sing halimbawa.

¹⁸ Ang mataas nga mga gawang. Ano ang aton matun-an kon pamalandungan naton ang mataas nga mga gawang nga nakita ni Ezequiel? Sigurado nga natudluan sini ang tinapok nga mga Judiyo nga may mataas gid nga talaksan si Jehova sa moral. Kon amo sina ang talaksan ni Jehova sadto, kamusta naman subong? Nagasimba kita sa dakung espirituwal nga templo ni Jehova. Gani mas importante pa gid subong ang matarong nga paggawi nga indi salimpapaw. (Roma 12:9; 1 Ped. 1:14, 15) Sa tion sang katapusan nga mga adlaw, padayon nga ginagiyahan ni Jehova ang iya katawhan para sundon sing maayo ang iya mga talaksan sa moral. * Halimbawa, ang mga indi mahinulsulon nga nakasala ginasikway sa kongregasyon. (1 Cor. 5:11-13) Isa pa, ang hulot sang mga bantay sa alagyan sang mga gawang mahimo nagapahanumdom sa aton nga kon parte sa pagsimba kay Jehova, wala niya ginabaton ang mga wala niya ginakahamut-an. Halimbawa, bisan pa magsulod sa Kingdom Hall ang isa ka tawo nga doble-kara ang pagkabuhi, indi gid sia pagkahamut-an ni Jehova kon indi niya pagsundon ang mga ginapatuman sang Dios. (Sant. 4:8) Proteksion gid ini sa putli nga pagsimba sa sining malain kag imoral nga kalibutan!

¹⁹ Ang Biblia nagtagna nga ining kalibutan mangin malain antes sang katapusan. Aton mabasa nga “ang malaut nga mga tawo kag mga impostor magalain pa gid, nga nagapatalang kag ginapatalang.”  (2 Tim. 3:13) Nagadamo na gid ang mga tawo subong nga napatalang sa pagpati nga ang mataas nga talaksan ni Jehova estrikto katama, kinaraan na, ukon sala. Masugot ka bala nga patalangon ka? Halimbawa, kon may magkumbinsi sa imo nga sala ang talaksan sang Dios parte sa homoseksuwalidad, mapati ka bala? Ukon patihon mo bala si Jehova nga Dios nga maathag nga nagsiling sa iya Pulong nga ang mga nagahimo sini ‘nagahimo sang malaw-ay nga buhat’? Ang Dios nagapaandam sa aton nga indi naton pag-ugyunan ining imoral nga buhat. (Roma 1:24-27, 32) Kon makaatubang kita sini nga sitwasyon, maayo gid nga pamensaron naton ang mataas nga mga gawang sang templo sa palanan-awon ni Ezequiel kag tandaan ini: Wala ginapanubo ni Jehova ang iya matarong nga talaksan, bisan pa ginabalewala ini sining malauton nga kalibutan. Tumanon bala naton ang aton Amay sa langit kag manindugan sa kon ano ang husto?

20. Ngaa mapalig-on ang “daku nga kadam-an” sa mga pahanumdom sa palanan-awon ni Ezequiel?

²⁰ Ang mga luwang. Sang nakita ni Ezequiel ang malapad nga nagua nga luwang sang templo, mahimo nalipay sia sa pagpamensar kay madamo gid nga malipayon nga sumilimba ni Jehova ang makatipon diri. Subong, ang mga Cristiano nagasimba sa mas sagrado nga lugar. Ang “daku nga kadam-an” sang sumilimba sa nagua nga luwang sang espirituwal nga templo ni Jehova mapalig-on gid sa mga pahanumdom sa palanan-awon ni Ezequiel. (Bug. 7:9, 10, 14, 15) Nakita ni Ezequiel nga ang mga luwang may mga kalan-an diin ang mga sumilimba ululupod sa pagkaon sang mga halad sa pag-ambitanay nga ila gindala. (Ezeq. 40:17) Daw pareho nga upod nila  si Jehova nga Dios sa pagkaon, nga nagapakita sang ila suod nga pag-abyanay. Subong, wala na kita nagahalad pareho sa ginhimo sang mga Judiyo bilang pagtuman sa Mosaikong Kasuguan. Kundi, nagahatag kita sing “halad sang pagdayaw” kon nagapakigbahin kita sa putli nga pagsimba, pareho kon nagakomento kita kag nagapabutyag sang aton pagtuo sa aton mga miting ukon nagaministeryo. (Heb. 13:15) Nagapagros man kita sa espirituwal nga pagkaon nga ginaaman ni Jehova. Gani makasiling man kita pareho sa gin-amba sang mga anak ni Kora para kay Jehova: “Ang isa ka adlaw sa imo luwang mas maayo pa sangsa isa ka libo sa bisan diin!”—Sal. 84:10.

21. Ano ang mahimo matun-an sang hinaplas nga mga Cristiano sa mga saserdote sa palanan-awon ni Ezequiel?

²¹ Ang mga saserdote. Nakita ni Ezequiel nga ang mga gawang nga ginaagyan sang mga saserdote kag sang mga Levinhon pakadto sa nasulod nga luwang pareho ang hitsura sa mga gawang nga ginaagyan sang mga tribo nga indi saserdote pakadto sa nagua nga luwang. Maayo gid ini nga pahanumdom sa mga lalaki halin sa pamilya sang mga saserdote nga dapat man nila sundon ang mga talaksan ni Jehova para sa putli nga pagsimba. Kamusta naman subong? Wala sing mga saserdote sa mga alagad sang Dios subong, pero ginsilingan ang hinaplas nga mga Cristiano: “Kamo ‘pinili nga rasa, harianon nga mga saserdote.’” (1 Ped. 2:9) Ang mga saserdote sa dumaan nga Israel nagasimba sa naseparar nga luwang. Subong, ang hinaplas nga mga Cristiano wala naseparar sa ila masigkasumilimba, pero may pinasahi sila nga kaangtanan kay Jehova bilang iya gin-adoptar nga mga anak. (Gal. 4:4-6) May matun-an man ang mga hinaplas sa mga pahanumdom sa palanan-awon ni Ezequiel. Halimbawa, kabalo sila nga ang mga saserdote ginlaygayan man kag ginsabdong. Dapat tandaan sang tanan nga Cristiano nga bahin kita sang “isa ka panong” nga nagaalagad sa idalom sang “isa ka manugbantay.”—Basaha ang Juan 10:16.

22, 23. (a) Ano nga leksion ang mahimo matun-an sang Cristianong mga gulang sa pangulo sa palanan-awon ni Ezequiel? (b) Ano ang mahimo matabo sa palaabuton?

²² Ang pangulo. Sa palanan-awon ni Ezequiel, ang pangulo indi tanto ka prominente nga posisyon. Ang isa nga pangulo indi halin sa tribo sang mga saserdote, kag nagapasakop sia sa pagdumala sang mga saserdote sa templo. Pero nagaalagad sia bilang manugtatap sang katawhan kag nagabulig sia sa ila paghalad. (Ezeq. 44:2, 3; 45:16, 17; 46:2) Gani halimbawa sia para sa Cristianong mga lalaki subong nga may mabug-at nga responsibilidad sa kongregasyon. Ang Cristianong mga gulang, lakip ang mga nagalakbay nga manugtatap, dapat padayon nga magpasakop sa matutom nga hinaplas nga ulipon. (Heb. 13:17) Ang mga gulang nagabulig para mahatag sang katawhan sang Dios ang ila halad sang pagdayaw sa Cristianong mga miting kag sa ministeryo. (Efe. 4:11, 12) Pero dumdumon sang mga gulang nga ginsaway ni Jehova ang mga pangulo sang Israel kay gin-abusuhan nila ang ila posisyon. (Ezeq. 45:9) Gani indi sila dapat magpensar nga indi na nila kinahanglan ang laygay kag pagtadlong. Ginapabaloran gid nila ang kahigayunan nga ulayon ni Jehova  para mangin mas maayo sila nga mga manugbantay kag manugtatap.—Basaha ang 1 Pedro 5:1-3.

²³ Si Jehova padayon nga magaaman sing kalipikado kag mahigugmaon nga mga manugtatap sa Paraiso sa ulihi. Subong, madamo nga gulang ang ginahanas para mangin kalipikado nga manugbantay sa Paraiso. (Sal. 45:16) Indi bala makalilipay nga pamalandungan nga mangin pagpakamaayo gid ini nga mga lalaki sa bag-ong kalibutan? Pareho sa iban nga tagna parte sa pagpasag-uli, ang aton paghangop sa palanan-awon ni Ezequiel mangin maathag pa gid sa ginpat-od nga tion ni Jehova. Mahimo ang iban sini may makalilipay nga katumanan sa palaabuton, kag indi pa naton maintiendihan subong. Pero mabal-an naton ini sa ulihi.

24, 25. Paano ginlaragway sang palanan-awon ni Ezequiel ang mga pagpakamaayo ni Jehova sa iya katawhan samtang ginahimo nila ang putli nga pagsimba?

²⁴ Bilang konklusion, balikan naton ang isa sa importante nga hitabo sa palanan-awon ni Ezequiel. Si Jehova nagsulod sa templo, kag nagpromisa sia sa iya katawhan nga indi niya sila pagbiyaan kon matutom nga sundon nila ang iya mga talaksan para sa putli nga pagsimba. (Ezeq. 43:4-9) Ano ang epekto sang presensia ni Jehova sa iya katawhan kag sa ila duta?

²⁵ Ginasugid sa palanan-awon ang mga pagpakamaayo ni Jehova paagi sa duha ka laragway nga nagahatag sing paumpaw: (1) Ang suba nga nagailig halin sa santuaryo sang templo, nga nagahatag sing kabuhi kag kabuganaan sa duta; kag (2) ang duta nga ginpartida sing organisado kag palareho, kag ara sa tunga ang templo kag ang luwang sini. Ano ang buot silingon sini sa aton subong? Importante nga mabal-an naton ini kay nagakabuhi na kita sa tion nga si Jehova nagsulod sa gin-ulay kag nahamut-an nga sagrado gid nga paagi sang pagsimba, ang dakung espirituwal nga templo. (Mal. 3:1-4) Binagbinagon naton ining duha ka tagna sa Kapitulo 19 asta 21 sini nga publikasyon.