1-3. Ngaa ginayaguta sang mga taga-Babilonia ang mga sumilimba ni Jehova, kag paano nila ini ginahimo?

IMADYINA nga isa ikaw ka matutom nga Judiyo nga nagaistar sa siudad sang Babilonia. Mga 50 ka tuig na kamo nga natapok diri. Pareho sa ginahimo mo kon Adlaw nga Inugpahuway, matipon ka upod sa imo mga masigkasumilimba para magsimba kay Jehova. Samtang nagapanagil-ot ka sa masako nga dalan, naagyan mo ang dalagku nga mga templo kag madamo nga halaran. Nagadugok diri ang mga tawo para maghalad kag para kantahan ang ila mga dios pareho kay Marduk.

² Paglampas mo sa madamo nga tawo, nagkitaay kamo sang imo mga masigkasumilimba. * Nangita kamo sing malinong nga lugar, mahimo sa pangpang sang suba, para mangamuyo, magkanta sing mga salmo, kag magpamalandong sa Pulong sang Dios. Samtang nagapangamuyo kamo, mabatian ninyo ang pagraginit sang mga sakayan sa pangpang. Nalipay ka gid kay kaupod mo ang imo mga masigkasumilimba. Nagapensar ka nga tani indi pagtublagon sang mga tawo ang inyo pagtilipon pareho sang ginahimo nila pirme. Ngaa ginahimo nila ina?

 ³ Pirme nagadaug sa inaway ang Babilonia, kag nagapati ang mga tawo nga ang ila butig nga mga dios amo ang nagapadaug sa ila. Para sa taga-Babilonia, ang kalaglagan sang Jerusalem ebidensia nga ang ila dios nga si Marduk mas gamhanan sangsa kay Jehova! Gani, ginayaguta nila ang inyo Dios kag ang iya katawhan. Kon kaisa nagasiling sila: “Kantahi ninyo kami sing ambahanon tuhoy sa Sion”! (Sal. 137:3) Madamo nga salmo ang nagasugid parte sa kadalag-an sang Sion sa mga kaaway ni Jehova. Mahimo nanamian ang taga-Babilonia nga insultuhon ini nga mga salmo. Pero may mga salmo man parte sa Babilonia. Ang isa ka halimbawa sini nagsiling: “Ginhimo nila ang Jerusalem nga tinumpok sang kagulub-an. . . . Ginayaguta kag ginatamay kami sang tanan sa palibot namon.”—Sal. 79:1, 3, 4.

4, 5. Ano nga paglaum ang ginahatag sang tagna ni Ezequiel, kag ano ang binagbinagon sa sini nga kapitulo? (Tan-awa ang piktyur sa umpisa sini nga kapitulo.)

⁴ May ara man sing apostata nga mga Judiyo nga nagayaguta sang imo pagtuo kay Jehova kag sa iya mga propeta. Pero ang putli nga pagsimba nagapaumpaw sa imo kag sa imo pamilya. Nalipay ka nga makapangamuyo kag makakanta upod sa ila. Nagamag-an ang imo pamatyag kon makabasa ka sing Pulong sang Dios. (Sal. 94:19; Roma 15:4) Imadyina nga sa sini nga adlaw, ang isa sa imo masigkasumilimba may pinasahi nga dala para sa pagtilipon—isa ka linukot nga nagaunod sang tagna ni Ezequiel. Nalipay ka nga mabatian ang promisa ni Jehova nga ibalik niya ang iya katawhan sa ila lugar. Eksayted ka samtang ginabasa sing matunog ina nga tagna, kag ginapamalandungan mo ang paglaum nga sa pila ka adlaw, ikaw kag ang imo pamilya magabalik sa inyo lugar kag magabulig sa pagpasag-uli!

⁵ Ang tagna ni Ezequiel puno sang promisa parte sa pagpasag-uli. Binagbinagon naton ini nga mga promisa. Paano ini natuman sa mga tinapok? Ano ang kahulugan sina nga mga tagna sa aton panahon? Binagbinagon man naton ang katumanan sini nga mga tagna sa palaabuton.

6. Paano sulitsulit nga ginpaandaman sang Dios ang iya rebelde nga katawhan?

⁶ Paagi kay Ezequiel, ginpaathag ni Jehova sa iya katawhan kon paano niya sila silutan bangod sang ila pagrebelde. “Dalhon sila sa pagkatapok kag pagkabihag,” siling ni Jehova. (Ezeq. 12:11) Sa natun-an naton sa Kapitulo 6 sini nga publikasyon, gin-akto pa gani ni Ezequiel ang paghukom ni Jehova. Pero indi ini ang una nga tion nga ginpaandaman ang katawhan. Halos isa ka libo ka tuig na ang nagligad, sang panahon ni Moises, ginpaandaman sila ni Jehova nga kon magpadayon sila sa pagrebelde, itapok sila. (Deut. 28:36, 37) Pareho man sini nga paandaman ang ginhatag nanday propeta Isaias kag Jeremias.—Isa. 39:5-7; Jer. 20:3-6.

7. Paano ginsilutan ni Jehova ang iya katawhan?

 ⁷ Pero makapasubo nga wala sila namati sa mga paandam. Nasakitan gid si Jehova kay ang iya katawhan nagrebelde, nagsimba sa mga diosdios, wala nagtuman, kag naghimo sing kalautan bangod sa impluwensia sang malain nga mga manugbantay. Gani ginpabay-an niya nga mag-antos sila sa gutom. Daku gid ini nga kahuy-anan, kay ang ila duta sadto “nagailig ang gatas kag dugos.” (Ezeq. 20:6, 7) Suno sa madugay na niya nga gintagna, gintugutan ni Jehova nga matapok ang iya batinggilan nga katawhan. Sang 607 B.C.E., ginlaglag sing bug-os ni Nabocodonosor sang Babilonia ang Jerusalem kag ang templo sini. Linibo sang Judiyo nga nakaluwas ang gintapok sa Babilonia. Nag-antos sila didto sang pagyaguta kag pagpamatok pareho sang ginsambit sa umpisa sini nga kapitulo.

8, 9. Paano ginpaandaman sang Dios ang Cristianong kongregasyon batok sa mga apostata?

⁸ Natabo man bala sa Cristianong kongregasyon ang natabo sa mga tinapok sa Babilonia? Huo! Pareho sa mga Judiyo sadto, abanse man nga ginpaandaman ang mga sumulunod sang Cristo. Sa una nga bahin sang iya ministeryo, nagsiling si Jesus: “Mag-andam kamo sa butig nga mga manalagna nga nagapalapit sa inyo kag nagapakunokuno nga mga karnero, apang ang matuod mabangis gali sila nga mga lobo.” (Mat. 7:15) Tinuig sang ulihi, gingiyahan si apostol Pablo sa paghatag sang pareho man nga paandam: “Nahibaluan ko nga kon makahalin na ako magasulod sa tunga ninyo ang mga tawo nga daw mapiguson nga mga lobo kag pintasan nila ang panong, kag halin sa inyo may mga tawo nga magahambal sing tiko nga mga panudlo agod ipahilayo ang mga disipulo kag pasundon sa ila.”—Binu. 20:29, 30.

⁹ Gintudluan ang mga Cristiano kon paano nila makilala kag malikawan ining makatalagam nga mga tawo. Ginsilingan ang Cristiano nga mga gulang nga sikwayon ang mga apostata sa kongregasyon. (1 Tim. 1:19; 2 Tim. 2:16-19; 2 Ped. 2:1-3; 2 Juan 10) Pero, pareho sa Israel kag Juda sadto, madamo nga Cristiano ang wala namati sa mahigugmaon nga mga paandam. Antes matapos ang unang siglo, madamo ang nangin apostata sa kongregasyon. Si Juan, nga katapusan nga apostoles nga buhi sang hingapusan sang unang siglo C.E., nagsiling nga lapnag na gid ang kahigkuan kag pagrebelde sa sulod sang kongregasyon. Sia na lang ang nabilin nga nagapugong sa kalautan. (2 Tes. 2:6-8; 1 Juan 2:18) Pero ano ang natabo sang napatay si Juan?

10, 11. Sugod sang ikaduha nga siglo C.E., paano natuman ang parabola ni Jesus parte sa trigo kag hilamon?

¹⁰ Sang napatay si Juan, nagsugod nga natuman ang parabola ni Jesus parte sa trigo kag hilamon. (Basaha ang Mateo 13:24-30.) Subong sang ginsiling ni Jesus, nagsab-ug si Satanas sang “hilamon,” ukon butig nga mga Cristiano, kag madasig nga naglapnag ang kahigkuan sa kongregasyon. Sigurado nga nasubuan gid si Jehova nga makita nga ang kongregasyon nga gintukod sang iya Anak  nahigkuan bangod sa pagsimba sa mga diosdios, pagano nga mga selebrasyon kag tradisyon, kag butig nga mga doktrina halin sa maalam nga mga tawo nga wala nagapati sa Dios kag mga relihion nga nagasimba kay Satanas! Ano ang ginhimo ni Jehova? Pareho sa ginhimo niya sa indi matutom nga Israel, gintugutan niya nga matapok ang iya katawhan. Sugod sang mga ikaduha nga siglo C.E., mabudlay makilala ang tulad-trigo sa butig nga mga Cristiano. Ang matuod nga Cristianong kongregasyon daw pareho nga natapok sa Babilonia nga Daku, ang bug-os kalibutan nga emperyo sang butig nga relihion. Ang butig nga mga Cristiano naman ginsakop sining mahigko nga emperyo. Nagdamo ang butig nga mga Cristiano, kag sang ulihi gintawag sila nga Cristiandad.

¹¹ Ginatos ka tuig nga ara sa kadulom ang katawhan bangod sa pagkontrol sang Cristiandad. Pero may pila gihapon ka matuod nga Cristiano, ang “trigo” sa parabola ni Jesus. Pareho sa Judiyo nga mga tinapok nga mabasa sa Ezequiel 6:9, gindumdom nila ang matuod nga Dios. Ang pila sa ila maisog nga nagpamatok sa butig nga mga panudlo sang Cristiandad. Gani ginyaguta sila kag ginhingabot. Pabay-an lang bala ni Jehova ang iya katawhan sa espirituwal nga kadulom? Indi! Pareho sa ginhimo niya sa Israel sadto,  ipakita ni Jehova ang iya kaakig sa nagakaigo nga paagi kag sa husto nga tion. (Jer. 46:28) Isa pa, wala ginpabay-an ni Jehova ang iya katawhan. Balikan naton ang tinapok nga mga Judiyo sa dumaan nga Babilonia kag tan-awon naton kon paano sila ginhatagan ni Jehova sing paglaum nga mahilway sa pagkabihag.

12, 13. Ngaa madula na ang kaakig ni Jehova sa iya tinapok nga katawhan sang panahon ni Ezequiel?

¹² Naakig gid si Jehova sa iya katawhan, pero ginpasalig man niya sila nga may katapusan ang iya matarong nga kaakig. Talupangda ang ginsiling niya: “Madula ang akon kaakig kag maumpawan ako sa akon kasingkal kag mangin kontento na ako. Kag makilala nila nga ako, si Jehova, ang nagahambal sini tungod sa pagpatuman ko nga ako lang ang dapat simbahon, kon mapautwas ko na ang akon kasingkal sa ila.” (Ezeq. 5:13) Ngaa madula na ang kaakig ni Jehova?

¹³ Nalakip sa mga bihag ang matutom nga mga Judiyo nga gintapok upod sa mga indi matutom. Isa pa, paagi kay Ezequiel, gintagna sang Dios nga ang pila sang Iya katawhan magahinulsol samtang natapok sila. Madumduman sining naghinulsol nga mga Judiyo ang makahuluya nga mga butang nga ila nahimo sang nagrebelde sila kay Jehova, kag makitluoy sila sa iya nga patawaron sila kag  kahamut-an. (Ezeq. 6:8-10; 12:16) Isa si Ezequiel sa mga matutom, pareho kay propeta Daniel kag sa iya tatlo ka kaupod. Malawig ang kabuhi ni Daniel, gani nasaksihan niya ang umpisa sang pagkatapok asta sa paghilway sa katawhan. Ang iya tudok nga pangamuyo sang paghinulsol sa mga sala sang Israel mabasa sa Daniel kapitulo 9. Ang iya ginpabutyag sa pangamuyo nahisuno gid sa balatyagon sang linibo ka tinapok nga nagapangabay sang pagpatawad kag pagpakamaayo ni Jehova. Makalilipay gid ang tagna ni Ezequiel parte sa promisa nga paghilway kag pagpasag-uli!

14. Ngaa ipasag-uli ni Jehova ang iya katawhan sa ila lugar?

¹⁴ Pero may mas panguna pa gid nga rason sa paghilway kag pagpasag-uli sa katawhan ni Jehova. Matapos ang ila pagkatapok, indi bangod nagakabagay sila hilwayon, kundi bangod tion na nga pakabalaanon liwat ni Jehova ang iya ngalan sa tanan nga pungsod. (Ezeq. 36:22) Mabal-an gid sang taga-Babilonia nga ang ila demonyohanon nga mga dios, pareho kay Marduk, wala gid sing mahimo sa Soberanong Ginuong Jehova! Binagbinagon naton ang lima ka promisa nga gusto ni Jehova nga ipahayag ni Ezequiel sa kaupod niya nga mga tinapok. Usisaon anay naton kon ano ang kahulugan sang kada promisa sa mga matutom sadto. Dayon, binagbinagon naton ang daku pa nga katumanan sini nga mga promisa.

15. Ano nga pagbag-o ang himuon sa pagsimba sang mga nagbalik nga katawhan?

¹⁵ UNA NGA PROMISA. Dulaon ang pagsimba sa mga diosdios ukon ang iban pa nga makangilil-ad nga buhat nga may labot sa butig nga relihion. (Basaha ang Ezequiel 11:18; 12:24.) Natun-an naton sa Kapitulo 5 sini nga publikasyon nga ang Jerusalem kag ang templo sini nahigkuan sang sala nga mga buhat sang pagsimba, pareho sang pagsimba sa mga diosdios. Gani nangin malain ang katawhan kag nagtalikod kay Jehova. Paagi kay Ezequiel, nagtagna si Jehova nga maabot ang tion nga ang mga tinapok magahimo liwat sang matinlo kag putli nga pagsimba. Kon mapasag-uli na ang kahimusan sang Dios para sa putli nga pagsimba, matigayon man nila ang iban pa nga pagpakamaayo.

16. Ano ang ginpromisa ni Jehova nga matabo sa lugar sang iya katawhan?

 ¹⁶ IKADUHA NGA PROMISA. Magabalik sila sa ila duta. “Ihatag ko sa inyo ang duta sang Israel,” siling ni Jehova sa mga tinapok. (Ezeq. 11:17) Tumalagsahon gid ini nga promisa. Ngaa? Kay ginayaguta sang mga taga-Babilonia ang ginbihag nga katawhan sang Dios, gani daw wala na sila sing paglaum nga makabalik pa sa ila duta. (Isa. 14:4, 17) Isa pa, kon magpabilin nga matutom ang nagbalik nga katawhan, ang duta mangin mabungahon, nga magahatag sa ila sing pagkaon kag makalilipay nga trabaho. Indi na sila mahuy-an kag mag-antos bangod sa tiggulutom.—Basaha ang Ezequiel 36:30.

17. Ano ang matabo sa paghalad kay Jehova?

¹⁷ IKATLO NGA PROMISA. Magahalad liwat sa halaran ni Jehova. Natun-an naton sa Kapitulo 2 sini nga publikasyon nga suno sa Kasuguan, ang mga halad kag mga dulot importante nga bahin sang putli nga pagsimba. Kon padayon nga magtuman ang katawhan kag si Jehova lamang ang ila simbahon, batunon niya ang ila mga halad. Gani matumbasan sang katawhan ang ila mga sala kag makapabilin sila nga malapit sa ila Dios. Nagpromisa si Jehova: “Magaalagad sa akon ang bug-os nga panimalay sang Israel. Didto kahamut-an ko kamo, kag batunon ko ang inyo mga amot kag ang inyo pinakamaayo nga mga halad, kag ang tanan ninyo nga balaan nga mga butang.” (Ezeq. 20:40) Mapasag-uli gid ang putli nga pagsimba, kag magaresulta ini sing mga pagpakamaayo sa katawhan sang Dios.

18. Paano atipanon ni Jehova ang iya katawhan?

¹⁸ IKAP-AT NGA PROMISA. Pahalinon ang malain nga mga manugbantay. Ang panguna nga rason kon ngaa nakahimo sing mabug-at nga sala ang katawhan sang Dios amo ang impluwensia sang ila malain nga mga lider. Nagpromisa si Jehova nga pahalinon sila. Amo ini ang ginsiling niya parte sa malain nga mga manugbantay: “Indi na sila ang magapakaon sang akon mga karnero . . . Luwason ko ang akon mga karnero sa ila mga baba.” Pero ginpasalig ni Jehova ang iya matutom nga katawhan: “Atipanon ko ang akon  mga karnero.” (Ezeq. 34:10, 12) Paano? Himuon niya nga manugbantay ang matutom kag mainunungon nga mga lalaki.

19. Ano ang ginpromisa ni Jehova parte sa paghiusa?

¹⁹ IKALIMA NGA PROMISA. Magahiusa ang mga sumilimba ni Jehova. Antes gintapok ang katawhan sang Dios, wala na sila nagahiusa kag mabudlay gid ini para sa matutom nga mga sumilimba. Bangod naimpluwensiahan ang katawhan sang butig nga mga propeta kag malain nga mga manugbantay, nagrebelde sila sa matutom nga mga propeta nga nagrepresentar kay Jehova kag nagbahinbahin sila. Gani ang isa sa makalilipay nga bahin sang pagpasag-uli amo ang promisa paagi kay Ezequiel: “Hatagan ko sila sing nahiusa nga tagipusuon, kag sing isa ka bag-o nga espiritu.” (Ezeq. 11:19) Kon ang nagbalik nga mga Judiyo magpabilin nga nahiusa kay Jehova nga Dios kag sa isa kag isa, indi sila madaug sang mga nagapamatok sa ila. Bilang isa ka pungsod, mahimaya nila liwat si Jehova kag indi na sia mahuy-an.

20, 21. Paano natuman ang mga promisa sang Dios sa nagbalik nga mga Judiyo?

²⁰ Natuman bala ang lima ka promisa sa mga Judiyo nga nagbalik? Dumdumon naton ang ginsiling sadto sang matutom nga si Josue: “Wala sing bisan isa sa tanan nga ginsaad sa inyo ni Jehova  nga inyo Dios ang napaslawan. Natuman ini tanan sa inyo. Wala sing bisan isa sa sini ang napaslawan.” (Jos. 23:14) Pareho sa ginhimo ni Jehova sang panahon ni Josue, tumanon man niya ang iya promisa sa mga Judiyo nga nagbalik.

²¹ Ang mga Judiyo nag-untat na sa pagsimba sa mga diosdios kag sa paghimo sing makangilil-ad nga mga buhat sang butig nga relihion nga nagpahilayo sa ila kay Jehova. Bisan pa daw indi mapatihan, nakabalik sila sa ila lugar, ginkultibar ini kag nangin makalilipay ang ila pagkabuhi. Ang isa sa una nga butang nga ila ginhimo amo ang pagkay-o sang halaran para kay Jehova sa Jerusalem kag paghalad diri. (Esd. 3:2-6) Ginhatagan sila ni Jehova sing maayo nga espirituwal nga mga manugbantay, pareho sa matutom nga saserdote kag manugkopya nga si Esdras, ang mga gobernador nga sanday Nehemias kag Zorobabel, ang Mataas nga Saserdote nga si Josue, kag ang maisog nga mga propeta nga sanday Hageo, Zacarias, kag Malaquias. Kon padayon nga tumanon sang katawhan ang direksion kag paggiya ni Jehova, matigayon nila ang paghiusa nga madugay na nga wala nila maeksperiensiahan.—Isa. 61:1-4; basaha ang Jeremias 3:15.

22. Ngaa makasiling kita nga may daku pa nga katumanan ang tagna parte sa pagpasag-uli?

 ²² Makapalig-on gid sa nagbalik nga mga Judiyo ang una nga katumanan sang mga promisa ni Jehova parte sa pagpasag-uli! Pero, may daku pa ini nga katumanan sa ulihi. Ngaa makasiling kita sina? Ang mga promisa may kondisyon. Tumanon lamang ni Jehova ang iya mga promisa kon magpabilin nga matinumanon kag matutom ang katawhan. Sang ulihi, nagrebelde liwat kag wala nagtuman ang mga Judiyo. Pero suno sa ginsiling ni Josue, nagakatuman gid ang ginasiling ni Jehova. Gani ini nga mga promisa may daku kag dayon nga katumanan. Hibaluon naton kon paano.

23, 24. San-o kag paano nagsugod ang ‘tion sang pagpasag-uli sang tanan nga butang’?

²³ Natun-an naton sa Biblia nga nagsugod na ang katapusan nga mga adlaw sining malauton nga sistema sang mga butang sang 1914. Pero bilang mga alagad ni Jehova, indi kita dapat masubuan. Ginapakita sang Biblia nga sang 1914 nagsugod ang makalilipay nga hitabo—ang ‘tion sang pagpasag-uli sang tanan nga butang.’ (Binu. 3:21) Ngaa makasiling kita sina? Ti, ano bala ang natabo sa langit sang 1914? Si Jesucristo nangin Mesianikong Hari! Ngaa matawag ini nga pagpasag-uli? Tandai nga nagpromisa si Jehova kay Hari David nga ang paghari halin sa iya pamilya magapadayon asta san-o. (1 Cron. 17:11-14) Pero nauntat ang paggahom sang mga hari halin sa pamilya ni David sang 607 B.C.E., sang ginlaglag sang Babilonia ang Jerusalem.

²⁴ Subong “Anak sang tawo,” si Jesus kaliwat ni David, gani nangin legal sia nga manunubli sang paghari sa pamilya ni David. (Mat. 1:1; 16:13-16; Luc. 1:32, 33) Sang ginhatag ni Jehova kay Jesus ang trono sa langit sang 1914, nagsugod ang ‘tion sang pagpasag-uli sang tanan nga butang.’ Gani magamit na ni Jehova ining perpekto nga Hari para padayunon ang pagpasag-uli.

25, 26. (a) San-o natapos ang madugay nga pagkabihag sa Babilonia nga Daku, kag ngaa makasiling kita sina? (Tan-awa man ang kahon nga “Ngaa 1919?”) (b) Ano ang natuman sugod sang 1919?

²⁵ Ang una sa mga ginhimo sang Cristo bilang Hari amo ang pagbulig sa iya Amay sa pag-usisa sa kahimusan sang putli nga pagsimba  sa duta. (Mal. 3:1-5) Sa gintagna ni Jesus sa ilustrasyon parte sa trigo kag hilamon, mabudlay makilala ang trigo sa hilamon, ang matuod nga mga hinaplas nga Cristiano sa mga impostor. * Pero kay tion na sa pag-ani sang 1914, madali na sila makilala. Sa sulod sang madamo nga tuig antes sang 1914, ginbuyagyag sang matutom nga mga Estudyante sang Biblia ang grabe nga mga sala sang Cristiandad kag nagseparar sila sa sining butig nga organisasyon. Tion na nga ipasag-uli sila sing bug-os ni Jehova. Gani sang una nga bahin sang 1919, mga pila ka tuig pa lang sugod sang “tig-alani,” ang katawhan sang Dios nahilway na sing bug-os sa pagkabihag sa Babilonia nga Daku. (Mat. 13:30) Natapos na ang ila pagkatapok!

²⁶ Natuman ang mga tagna ni Ezequiel parte sa pagpasag-uli kag mas daku pa ini sangsa naeksperiensiahan sang katawhan sang Dios sang una. Hibaluon naton kon paano ang lima ka promisa nga aton ginbinagbinag may daku pa nga katumanan.

27. Ano ang ginhimo sang Dios para matinluan ang iya katawhan sa pagsimba sa diosdios?

²⁷ UNA NGA PROMISA. Mauntat na ang pagsimba sa mga diosdios kag ang iban pa nga makangilil-ad nga buhat nga may labot sa butig nga relihion. Sang hingapusan sang ika-19 nga siglo asta sa umpisa sang ika-20 nga siglo, nagporma sang gamay nga mga grupo ang matutom nga mga Cristiano kag amat-amat nila nga gin-untatan ang mga buhat sang butig nga relihion. Gin-untatan nila ang pagpati sa mga doktrina pareho sang Trinidad, sa indi mapatay nga kalag, kag sa kalayuhon nga impierno kay ini nga mga panudlo wala nabase sa Biblia kag naghalin sa butig nga relihion. Nangin maathag sa ila nga ang paggamit sang mga imahen sa pagsimba isa ka porma sang pagsimba sa diosdios. Sang ulihi, natun-an sang katawhan sang Dios nga ang paggamit sang krus sa pagsimba isa man ka klase sang pagsimba sa diosdios.—Ezeq. 14:6.

28. Ano ang buot silingon nga ginpasag-uli ni Jehova ang iya katawhan sa ila duta?

²⁸ IKADUHA NGA PROMISA. Ang pagpasag-uli sa katawhan sang Dios sa ila espirituwal nga duta. Ginbiyaan na sang matutom nga  mga Cristiano ang butig nga mga pagpati nga naghalin sa Babilonia, kag nagsaylo sila sa ila nagakaigo nga espirituwal nga duta, isa ka kahimtangan ukon lugar nga indi na sila magutuman liwat sa espirituwal. (Basaha ang Ezequiel 34:13, 14.) Matun-an naton sa Kapitulo 19 sini nga publikasyon kon paano ginpakamaayo ni Jehova ina nga duta sang wala nagahubas nga espirituwal nga pagkaon.—Ezeq. 11:17.

29. Ano ang ginhimo sa pagbantala sang 1919?

²⁹ IKATLO NGA PROMISA. Magahalad liwat sa halaran ni Jehova. Sang unang siglo C.E., gintudluan ang mga Cristiano nga maghalad sila sa Dios, indi sang mga sapat, kundi sang mas hamili nga halad—ang ila pagdayaw kay Jehova kag pagbantala sa iban parte sa iya. (Heb. 13:15) Sa sulod sang ginatos ka tuig nga natapok sila, wala sing organisado nga kahimusan para sa paghalad. Pero sang manugtapos na ang pagkatapok, ang katawhan sang Dios nagahimo  na sing halad sang pagdayaw. Masako sila sa pagbantala kag malipayon nga nagadayaw sa Dios sa ila mga miting. Sugod sang 1919, ginhatagan pa gid sing daku nga importansia sang “matutom kag mainandamon nga ulipon” ang pagbantala nga hilikuton kag gin-organisar ini sing maayo. (Mat. 24:45-47) Gani ang halaran ni Jehova nagaawas sang mga halad bangod nagadamo pa gid ang katawhan nga nagadayaw sa iya balaan nga ngalan!

30. Ano ang ginhimo ni Jesus para mahatagan ang iya katawhan sang maayo nga mga manugbantay?

³⁰ IKAP-AT NGA PROMISA. Pahalinon ang malain nga mga manugbantay. Ginhilway sang Cristo ang katawhan sang Dios sa malain, maiyaiyahon, kag butig nga mga manugbantay sang Cristiandad. Sa kongregasyon sang Cristo, ang mga manugbantay nga pareho sa sinang butig nga mga manugbantay ginapahalin sa ila katungdanan. (Ezeq. 20:38) Ginasiguro sang Maayo nga Manugbantay nga si Jesus nga maatipan sing maayo ang iya mga karnero. Sang 1919, gintangduan niya ang iya matutom kag mainandamon nga ulipon. Ining gamay nga grupo sang mainunungon nga mga hinaplas nga Cristiano amo ang nagpanguna sa pag-aman sing espirituwal nga pagkaon para maatipan sing maayo ang katawhan sang Dios. Sang ulihi, ginhanas ang mga gulang sa pagbulig sa pag-atipan sa “panong sang Dios.” (1 Ped. 5:1, 2) Ang Ezequiel 34:15, 16 ginagamit pirme para pahanumdumon ang manugbantay nga mga Cristiano sang mga talaksan nga ginpahamtang ni Jehova nga Dios kag ni Jesucristo.

31. Paano gintuman ni Jehova ang tagna sa Ezequiel 11:19?

³¹ IKALIMA NGA PROMISA. Magahiusa ang mga sumilimba ni Jehova. Sa sulod sang ginatos ka tuig, ang Cristiandad nabahinbahin sa linibo ka denominasyon, lakip ang madamo nga grupo kag sekta nga wala nagahiusa kag sarisari ang ginatudlo. Pero makatilingala gid ang ginhimo ni Jehova sa iya napasag-uli nga katawhan. Ang iya promisa paagi kay Ezequiel nga “hatagan ko sila sing nahiusa nga tagipusuon,” natuman gid. (Ezeq. 11:19) Sa bilog nga kalibutan, minilyon ang sumulunod sang Cristo halin sa sarisari nga rasa, relihion, kahimtangan sa kabuhi, kag gindak-an. Pero tanan sila gintudluan sang pareho nga kamatuoran kag nahiusa sa pareho nga hilikuton. Sa katapusan nga gab-i sang iya kabuhi sa duta, hanuot nga nangamuyo si Jesus nga mahiusa ang iya mga sumulunod. (Basaha ang Juan 17:11, 20-23.) Subong, ginasabat ni Jehova ina nga pangabay sa dalayawon nga paagi.

32. Ano ang ginabatyag mo sa katumanan sang mga tagna parte sa pagpasag-uli? (Tan-awa ang kahon nga “Mga Tagna Parte sa Pagkabihag kag Pagpasag-uli.”)

³² Ano ang ginabatyag mo kay nagakabuhi ka sa sining tion sang pagpasag-uli! Indi bala makalilipay gid? Nakita naton ang katumanan sang mga tagna ni Ezequiel sa tanan nga bahin sang aton pagsimba. Makasalig kita nga nalipay si Jehova sa iya katawhan subong, pareho sang iya gintagna paagi kay Ezequiel: “Kahamut-an ko kamo.” (Ezeq. 20:41) Isa gid ka pribilehiyo nga mangin bahin  ka sang nahiusa, naatipan sing maayo nga katawhan nga nagadayaw kay Jehova sa bilog nga kalibutan—ang katawhan nga nahilway sa ginatos ka tuig nga pagkatapok sa espirituwal. Pero ang pila sa mga tagna ni Ezequiel parte sa pagpasag-uli may daku pa gid nga katumanan sa ulihi.

33-35. (a) Ano ang buot silingon sang tagna sa Ezequiel 36:35 para sa tinapok nga mga Judiyo? (b) Ano ang buot silingon sini nga tagna para sa katawhan ni Jehova subong? (Tan-awa man ang kahon nga ‘Tion sang Pagpasag-uli sang Tanan nga Butang.’)

³³ Natun-an naton nga ang ‘tion sang pagpasag-uli sang tanan nga butang’ nagsugod sang ginpasag-uli ang paggahom sang hari halin sa pamilya ni David sang nangin Hari si Jesus sang 1914. (Ezeq. 37:24) Sunod, ginhatagan ni Jehova sing awtoridad ang Cristo para ipasag-uli ang putli nga pagsimba sang Iya katawhan sa tapos ang ginatos ka tuig nga pagkatapok sa espirituwal. Pero, natapos na bala ang pagpasag-uli sang Cristo? Wala pa! Magapadayon ini asta sa palaabuton sa dalayawon nga paagi—kag ginasugid sa aton sang mga tagna ni Ezequiel ang makalilipay nga mga detalye.

³⁴ Halimbawa, binagbinaga ini: “Magasiling ang mga tawo: ‘Ang duta nga mamingaw nangin kaangay sang hardin sang Eden.’” (Ezeq. 36:35) Ano ang buot silingon sini nga promisa kay Ezequiel kag sa iya kaupod nga mga tinapok? Sigurado nga wala sila nagapaabot nga ang ila napasag-uli nga duta mangin pareho sa orihinal nga hardin, ukon Paraiso nga ginhimo mismo ni Jehova. (Gen. 2:8) Kundi, naintiendihan nila nga ginapasalig sila ni Jehova nga ang ila napasag-uli nga duta mangin matahom kag mabungahon.

³⁵ Ano ang buot silingon sini nga promisa sa aton subong? Wala man kita nagapaabot nga literal ini nga matuman sa sining malaut nga kalibutan nga ginagamhan ni Satanas nga Yawa. Kundi, naintiendihan naton nga may espirituwal ini nga katumanan subong. Bilang mga alagad ni Jehova, nagaistar kita sa napasag-uli nga espirituwal nga duta, isa ka kahimtangan, ukon lugar, diin mauna naton sa aton kabuhi ang Dios kag maalagad sia sing maayo. Ining espirituwal nga duta padayon nga nagatahom pareho sang paraiso. Pero, ano naman ang matabo sa palaabuton?

36, 37. Ano nga mga promisa ang matuman sa palaabuton nga Paraiso?

³⁶ Sa tapos sang daku nga inaway sang Armageddon, ipasag-uli man ni Jesus pati ang pisikal nga duta. Sa tion sang iya Isa ka Libo ka Tuig nga Paggahom, giyahan niya ang katawhan nga himuon ang bilog nga duta nga hardin sang Eden, isa ka paraiso, suno gid sa orihinal nga katuyuan ni Jehova. (Luc. 23:43) Dayon ang tanan nga tawo mahiusa sa isa kag isa kag atipanon nila sing maayo ang duta. Wala na sing kahadlukan kag katalagman bisan diin. Imadyina ang tion nga matuman ini nga promisa: “Magahimo ako sing katipan sang paghidait sa ila, kag tabugon ko ang mabangis  nga mga sapat, agod magaistar sila sing malinong sa kamingawan kag magatulog sa kagulangan.”—Ezeq. 34:25.

³⁷ Imadyina ini: Makakadto ka sa bisan diin nga bahin sang duta nga wala sing kahadlok. Wala sing sapat nga magahalit sa imo. Wala na sing katalagman nga magatublag sang imo kalinong. Makalagaw ka na sa kagulangan nga isahanon, ma-enjoy ang katahom sini, makatulog diri sing mahamuok nga wala sing ginakahadlukan, kag makabugtaw nga maayo ang pamatyag!

38. Ano ang ginabatyag mo kay makita mo nga matuman sa ulihi ang promisa sa Ezequiel 28:26?

³⁸ Makita man naton nga matuman ini nga promisa: “Magaistar sila sa [duta] sing malinong kag magapatindog sing mga balay kag magatanom sing mga ubas. Magaistar sila sing malinong kon silutan ko ang ila kaingod nga mga pungsod nga nagayaguta sa ila; kag makilala nila nga ako amo si Jehova nga ila Dios.” (Ezeq. 28:26) Madula na ang tanan nga kaaway ni Jehova, gani maeksperiensiahan na naton ang kalinong kag seguridad sa bilog nga kalibutan. Atipanon naton indi lang ang duta, kundi ang aton man kaugalingon kag ang aton mga pinalangga, kag magapatindog kita sing matahom nga mga balay kag magatanom sing mga ubas.

39. Ngaa makasalig ka nga ang mga tagna ni Ezequiel parte sa Paraiso matuman?

³⁹ Pamatyag mo bala damgo lang ini nga mga promisa? Pensara kon ano na ang imo nakita sa sining ‘tion sang pagpasag-uli sang tanan nga butang.’ Bisan pa sang grabe nga pagpamatok ni Satanas, ginhatagan si Jesus sang awtoridad nga ipasag-uli ang putli nga pagsimba sa sining pinakamadulom nga tion sang kalibutan. Ebidensia gid ini nga ang tanan nga promisa sang Dios paagi kay Ezequiel matuman!