1, 2. (a) Ano nga instruksion ang ginhatag ni Jehova kay Ezequiel? (b) Ano nga mga pamangkot ang aton binagbinagon?

BAG-O lang nakita ni Ezequiel ang palanan-awon nga mahimo nagpahunahuna sa iya sang panahon nanday Moises kag Josue nga halos 900 ka tuig na ang nagligad. Sa sina nga tion, ginlaragway ni Jehova kay Moises ang mga dulunan sang Ginsaad nga Duta kag sang ulihi gin-instruksionan Niya si Josue kon paano partidahon ina nga duta sa mga tribo sang Israel. (Num. 34:1-15; Jos. 13:7; 22:4, 9) Pero subong, sa tuig 593 B.C.E., gin-instruksionan ni Jehova si Ezequiel kag ang iya kaupod nga mga tinapok nga ipanagtag liwat ang Ginsaad nga Duta sa mga tribo sang Israel.—Ezeq. 45:1; 47:14; 48:29.

² Ano ang kahulugan sini nga palanan-awon para kay Ezequiel kag sa iya kaupod nga mga tinapok? Ngaa makapalig-on ini nga palanan-awon sa katawhan sang Dios subong? May daku pa bala ini nga katumanan sa palaabuton?

3, 4. (a) Ano ang apat ka pasalig nga ginhatag sa mga tinapok sang katapusan nga palanan-awon ni Ezequiel? (b) Sa sini nga kapitulo, ano nga pasalig ang binagbinagon naton?

³ Ang katapusan nga palanan-awon nga nabaton ni Ezequiel mabasa sa siam ka kapitulo sang iya libro. (Ezeq. 40:1–48:35)  Nagahatag ini sing apat ka makapaumpaw nga pasalig sa mga tinapok parte sa napasag-uli nga pungsod sang Israel. Ano ini nga mga pasalig? Una, ang putli nga pagsimba ipasag-uli sa templo sang Dios. Ikaduha, ang matarong nga mga saserdote kag mga manugbantay magapanguna sa napasag-uli na nga pungsod. Ikatlo, ang palanublion nga duta ihatag sa tanan nga magabalik sa Israel. Kag ikap-at, si Jehova mangin kaupod nila kag magapuyo liwat sa tunga nila.

⁴ Ginbinagbinag sa kapitulo 13 kag 14 sini nga publikasyon kon paano matuman ang duha ka pasalig—ang pagpasag-uli sang matuod nga pagsimba kag ang pagpanguna sang matarong nga mga manugbantay. Sa sini nga kapitulo, mapokus kita sa ikatlo nga pasalig, ang promisa parte sa palanublion nga duta. Sa masunod nga kapitulo, binagbinagon naman naton ang promisa parte sa presensia ni Jehova.—Ezeq. 47:13-21; 48:1-7, 23-29.

5, 6. (a) Sa palanan-awon ni Ezequiel, ano nga duta ang bahinbahinon? (Tan-awa ang piktyur sa umpisa sini nga kapitulo.) (b) Ano ang katuyuan sini nga palanan-awon parte sa pagbahinbahin sang duta?

⁵ Basaha ang Ezequiel 47:14. Sa palanan-awon, ginpatan-aw ni Jehova kay Ezequiel ang bahin sang duta nga sa ulihi mangin pareho sa “hardin sang Eden.” (Ezeq. 36:35) Dayon nagsiling si Jehova: “Amo ini ang duta nga bahinbahinon ninyo subong palanublion sang 12 ka tribo sang Israel.” (Ezeq. 47:13) “Ang duta” nga bahinbahinon amo ang napasag-uli nga duta sang Israel nga balikan sang mga tinapok. Masunod, mabasa sa Ezequiel 47:15-21 nga ginlaragway ni Jehova sing detalyado ang insakto nga mga dulunan sang bilog nga duta.

⁶ Ano ang katuyuan sini nga palanan-awon parte sa pagbahinbahin sang duta? Ang paglaragway sa mga dulunan nga palareho ang takus nagpasalig kay Ezequiel kag sa iya kaupod nga mga tinapok nga mapasag-uli gid ang ila pinalangga nga duta. Sigurado nga nalipay gid ang mga tinapok sa sining detalyado kag makapaumpaw nga pasalig ni Jehova! Nabaton gid man bala sang katawhan sang Dios ang duta nga ihatag sa ila bilang palanublion? Huo.

7. (a) Ano ang natabo sang 537 B.C.E., kag ano ang ginapahanumdom sini sa aton? (b) Ano nga pamangkot ang sabton anay naton?

⁷ Sang 537 B.C.E., mga 56 ka tuig sa tapos nga mabaton ni Ezequiel ini nga palanan-awon, linibo ka tinapok ang nagbalik sa duta sang Israel kag ginpanag-iyahan ini. Ining dalayawon nga hitabo sang una nagapahanumdom sa aton sang nagakatabo man sa katawhan sang Dios sa moderno nga tion. Masiling nga ginhatagan man sila sing duta. Paano? Gintugutan ni Jehova ang iya mga alagad nga magsulod sa espirituwal nga duta kag panag-iyahan ini. May labot sini, hibaluon naton kon ano ang aton matun-an sa pagpasag-uli sang dumaan nga Ginsaad nga Duta parte sa pagpasag-uli sang espirituwal nga duta sang katawhan sang Dios subong. Pero antes naton binagbinagon ini nga mga leksion, sabton anay naton  ang pamangkot, “Ngaa makasiling kita nga may ara gid espirituwal nga duta subong?”

8. (a) Ano nga pungsod ang gin-ilis ni Jehova sa pungsod sang Israel? (b) Ano ang espirituwal nga duta, ukon paraiso? (c) San-o ini nagluntad, kag sin-o ang nag-istar diri?

⁸ Sa nauna nga palanan-awon nga ginhatag kay Ezequiel, ginpahayag ni Jehova nga ang mga tagna parte sa pagpasag-uli sang Israel may daku pa nga katumanan sa tapos nga ‘si David nga iya alagad,’ nga nagapatuhoy kay Jesucristo, nangin Hari. (Ezeq. 37:24) Natabo ina sang 1914 C.E. Sa sina nga tion, madugay na nga gin-islan ang pungsod sang Israel bilang katawhan sang Dios sang isa ka pungsod sang espirituwal nga Israel, ang hinaplas sang espiritu nga mga Cristiano. (Basaha ang Mateo 21:43; 1 Pedro 2:9.) Pero, indi lang pungsod sang Israel ang gin-islan ni Jehova sang espirituwal nga pungsod kundi ang pisikal nga duta sang Israel gin-islan man sang espirituwal nga duta, ukon paraiso. (Isa. 66:8) Natun-an naton sa Kapitulo 17 sini nga publikasyon nga ang espirituwal nga duta, isa ka malinong kag malaragwayon nga lugar diin ginasimba sang mga hinaplas nga nagkalabilin si Jehova sugod pa sang 1919.  (Tan-awa ang kahon 9B, “Ngaa 1919?”) Samtang nagaligad ang tion, ang mga may paglaum sa duta, ang “iban nga mga karnero,” nag-istar man sa sining espirituwal nga duta. (Juan 10:16) Pero, bisan pa padayon nga nagauswag kag nagasangkad ang espirituwal nga paraiso subong, maeksperiensiahan lang naton ang bug-os nga pagpakamaayo sini sa tapos sang Armageddon.

9. Ano nga detalyado nga instruksion ang ginhatag ni Jehova parte sa pagpanagtag sing duta?

⁹ Basaha ang Ezequiel 48:1, 28. Sa tapos nga maplastar ang mga dulunan sang duta, ginlaragway ni Jehova sing detalyado kon paano ipanagtag ang duta. Nagsugo sia nga ang palanublion para sa 12 ka tribo partidahon sing palareho kag insakto halin sa aminhan pakadto sa bagatnan, sugod sa tribo ni Dan sa aminhan sa pinakapunta nga bahin sang duta asta sa tribo ni Gad sa pinakapunta nga bahin sang dulunan sa bagatnan. Ang duta ginpartida sa 12 ka palanublion. Ang parte sang kada isa palaba nga duta halin sa dulunan sa sidlangan pakadto sa katundan, sa Daku nga Dagat ukon Dagat Mediteraneo.—Ezeq. 47:20.

10. Ano ang mahimo nga ginapasalig sini nga bahin sang palanan-awon sa mga tinapok?

¹⁰ Ano ang mahimo nga ginapasalig sini nga bahin sang palanan-awon sa mga tinapok? Ang detalyado nga paglaragway ni Ezequiel sang pagpanagtag sing duta mahimo nakabulig sa mga tinapok nga maintiendihan nga organisado gid ang pagpartida sini. Isa pa, ang palareho nga pagpartida sing duta sa tanan nga 12 ka tribo nagagarantiya nga ang kada isa sang nagbalik nga tinapok may palanublion gid sa napasag-uli nga duta. Ang kada isa may duta ukon puluy-an.

11. Ano nga mga leksion ang matun-an naton sa palanan-awon parte sa pagpanagtag sing duta? (Tan-awa ang kahon nga “Ang Pagpanagtag sing Duta.”)

¹¹ Ano nga makapalig-on nga mga leksion ang matun-an naton sa sini nga palanan-awon? Ang napasag-uli nga Ginsaad nga Duta may lugar indi lang para sa mga saserdote, Levinhon, kag mga pangulo kundi may para man sa tanan nga miembro sang 12 ka tribo. (Ezeq. 45:4, 5, 7, 8) Amo man subong, ang espirituwal nga paraiso may lugar indi lang para sa mga hinaplas nga nagkalabilin kag sa mga nagapanguna nga katapo sang “daku nga kadam-an” kundi may para man sa iban nga miembro sang daku nga kadam-an. * (Bug. 7:9) Bisan ano man ka gamay sang aton papel sa organisasyon, may sigurado nga lugar kita kag hamili nga asaynment sa espirituwal nga duta. Makapalig-on gid ini nga pasalig!

12, 13. Ano nga mga instruksion ang ginhatag ni Jehova parte sa pagpanagtag sing duta sa mga tribo?

¹² Ang pila ka instruksion ni Jehova parte sa pagpanagtag sing duta mahimo nagpalibog kay Ezequiel kay lain ini sa instruksion sang Dios kay Moises. Binagbinaga ang duha ka kinatuhayan. Ang isa parte sa duta; kag ang isa parte sa mga pumuluyo sini.

 ¹³ Una, ang duta. Gin-instruksionan si Moises nga hatagan sing mas malapad nga duta ang dalagku nga mga tribo sangsa gagmay nga mga tribo. (Num. 26:52-54) Pero sa palanan-awon ni Ezequiel, naghatag si Jehova sing instruksion nga dapat “pareho ang bahin [“ang kada isa pareho sang iya utod,” footnote]” sang tanan nga tribo. (Ezeq. 47:14) Gani ang distansia sang palanublion halin sa dulunan sa aminhan asta sa dulunan sa bagatnan dapat pareho sa kada isa sang 12 ka tribo. Ang tanan nga Israelinhon—ano man ang ila tribo—pareho nga makabenepisyo sa kabuganaan sang natubigan sing maayo nga Ginsaad nga Duta.

14. Ngaa lain ang instruksion ni Jehova parte sa dumuluong nga mga pumuluyo sangsa instruksion nga mabasa sa Kasuguan nga ginhatag kay Moises?

¹⁴ Ikaduha, ang mga pumuluyo. Ang Kasuguan nga ginhatag kay Moises nagaamlig sa mga dumuluong kag nagahatag sa ila sing kahigayunan nga masimba si Jehova, ugaling wala sila sing bahin sa duta. (Lev. 19:33, 34) Pero, ang ginsiling ni Jehova kay Ezequiel lain gid sa iya ginhambal sa Kasuguan. Gin-instruksionan sia ni Jehova: “Kon diin nga tribo nagaistar ang dumuluong nga pumuluyo didto man ninyo sia hatagan sing palanublion.” Paagi sini nga sugo, gindula ni Jehova ang daku nga kinatuhayan sang “tumandok nga mga Israelinhon” sa dumuluong nga mga pumuluyo sang duta. (Ezeq. 47:22, 23) Sa napasag-uli nga duta nga nakita ni Ezequiel  sa palanan-awon, naobserbahan niya ang pag-alalangay kag paghiusa sa pagsimba sang mga pumuluyo sini.—Lev. 25:23.

15. Ano ang indi na mabag-o nga kamatuoran parte kay Jehova ang ginpakita sang iya mga instruksion parte sa duta kag sa mga pumuluyo sini?

¹⁵ Ining duha ka talalupangdon nga instruksion nga nabaton ni Ezequiel parte sa duta kag sa mga pumuluyo sini mahimo nagpasalig pa gid sa mga tinapok nga pareho ang kadakuon sang lugar nga ihatag ni Jehova sa ila, tumandok man sila nga Israelinhon ukon mga dumuluong nga nagasimba kay Jehova. (Esd. 8:20; Neh. 3:26; 7:6, 25; Isa. 56:3, 8) Ginpakita man sini nga instruksion ang makapalig-on kag indi na mabag-o nga kamatuoran nga para kay Jehova hamili ang tanan niya nga alagad. (Basaha ang Hageo 2:7.) Subong, ginapabaloran man naton ina nga kamatuoran, sa langit man ukon sa duta ang aton paglaum.

16, 17. (a) Paano kita makabenepisyo sa pagbinagbinag sining mga detalye parte sa duta kag sa mga pumuluyo? (b) Ano ang binagbinagon naton sa masunod nga kapitulo?

¹⁶ Paano kita makabenepisyo sa pagbinagbinag sining mga detalye parte sa duta kag sa mga pumuluyo? Ginapahanumdom sini sa aton nga dapat mangin panguna nga bahin sang aton bug-os kalibutan nga paghiliutod ang pag-alalangay kag paghiusa. Si Jehova wala sing ginapasulabi. Pamangkuton naton ang aton kaugalingon: ‘Pareho man bala ako kay Jehova nga wala sing ginapasulabi? May tudok bala ako nga pagrespeto sa akon masigkasumilimba, ano man ang iya rasa ukon kahimtangan sa kabuhi?’ (Roma 12:10) Nalipay kita kay ginhatagan kita tanan ni Jehova sing palareho nga kahigayunan nga makaistar sa espirituwal nga paraiso, diin mahatag naton ang aton bug-os kalag nga sagrado nga pag-alagad sa aton Amay sa langit kag mabaton ang iya mga pagpakamaayo.—Gal. 3:26-29; Bug. 7:9.

¹⁷ Binagbinagon naton karon ang ikap-at nga pasalig sa ulihi nga bahin sang katapusan nga palanan-awon ni Ezequiel—ang promisa nga mangin kaupod sang mga tinapok si Jehova. Ano ang matun-an naton sa sini nga promisa? Hibaluon naton ang sabat sa masunod nga kapitulo.