1, 2. Suno sa Ezequiel 47:1-12, ano ang nakita kag natun-an ni Ezequiel? (Tan-awa ang piktyur sa umpisa sini nga kapitulo.)

MAY nakita pa gid si Ezequiel nga makatilingala sa iya palanan-awon parte sa templo. May nagailig nga tubig halin sa sagrado nga tinukod! Imadyina nga ginasundan niya ang pag-ilig sinang matin-aw nga tubig. (Basaha ang Ezequiel 47:1-12.) Nagailig ini halin sa atangan sang santuaryo; dayon nangalihid ini malapit sa nasidlangan nga gawang sang templo. Gingiyahan si Ezequiel sang anghel palayo sa templo, samtang ginatakus sang anghel ang kalayuon. Sulitsulit nga ginpaubog sang anghel si Ezequiel, kag natalupangdan sang propeta nga madasig ini nga nagadalom kag nagasulog, amo nga dapat ini languyon!

² Natun-an ni Ezequiel nga ang tubig nagailig pakadto sa Patay nga Dagat nga nagapaayo sa maasin kag wala-kabuhi nga tubig sa bisan diin nga malab-utan sang tubig, amo nga magadamo ang mga isda. Sa pangpang sang suba, nakita niya ang madamo nga sahi sang kahoy nga nagatubo. Kada bulan, nagapamunga ini sang masustansia nga mga prutas, kag ang mga dahon sini makapaayo. Sigurado nga sang nakita ini ni Ezequiel nakabatyag sia sang kalinong kag paglaum. Pero ano ang buot silingon sini nga bahin sang palanan-awon  para sa iya kag sa iya kaupod nga mga tinapok? Ano ang buot silingon sini sa aton tion?

3. Ngaa indi literal ang pag-intiende sang mga Judiyo sang una sa palanan-awon ni Ezequiel parte sa suba?

³ Sigurado nga naintiendihan sang mga Judiyo sang una nga indi literal ang suba sa palanan-awon. Kundi, ini nga bahin sang Kasulatan mahimo nagpahanumdom sa ila sang isa pa ka tagna parte sa pagpasag-uli, nga mahimo sobra duha ka gatos ka tuig na nga ginsulat ni propeta Joel antes sang ila tion. (Basaha ang Joel 3:18.) Sang ginbasa sang tinapok nga mga Judiyo ang ginsulat ni Joel, wala sila nagapaabot nga literal nga “magatulo ang matam-is nga alak” sa mga bukid, ukon “magailig ang gatas” sa mga bakulod. Wala man sila nagapaabot nga literal nga magailig ang suba “halin sa balay ni Jehova.” Gani indi man literal ang pag-intiende sang mga Judiyo sa mensahe ni Ezequiel parte sa suba. * Ti, ano nga mensahe ang gusto ipalab-ot ni Jehova? Ang Kasulatan nagabulig sa aton nga maintiendihan ang pila ka bahin sang palanan-awon. Pero sa sini nga kapitulo, binagbinagon naton ang tatlo ka maathag kag mahigugmaon nga pasalig nga mahimo matun-an naton sa sini nga tagna.

4. (a) Base sa palanan-awon ni Ezequiel parte sa suba, ano ang mahimo ginapaabot sang mga Judiyo nga mga pagpakamaayo halin kay Jehova? (b) Ngaa ang paggamit sang Biblia sang mga termino nga “suba” kag “tubig” nagapasalig sa aton nga pakamaayuhon ni Jehova ang iya katawhan? (Tan-awa ang kahon nga “Mga Suba sang Pagpakamaayo Halin kay Jehova.”)

⁴ Isa ka suba sang pagpakamaayo. Sa Biblia, ang mga suba kag tubig masami nga ginagamit sa paglaragway sa nagailig nga mga pagkamaayo ni Jehova nga nagahatag sing kabuhi. Nakita ni Ezequiel sa palanan-awon ang suba nga nagailig halin sa templo. Gani mahimo ginapaabot sang katawhan sang Dios nga magailig sa ila ang espirituwal nga mga pagpakamaayo ni Jehova nga nagahatag sing kabuhi kon padayon nila nga himuon ang putli nga pagsimba. Ano nga mga pagpakamaayo? Makabaton sila liwat sing espirituwal nga instruksion halin sa mga saserdote. Paagi man sa mga halad sa templo, makasalig sila liwat nga may himuon nga pagtumbas sa ila mga sala. (Ezeq. 44:15, 23; 45:17) Gani, mangin matinlo sila liwat, nga pareho nga ginhugasan sila sang putli nga tubig halin sa templo.

5. Kon may nagakabalaka gid man nga basi indi bastante ang pagpakamaayo para sa tanan, paano sia mapaumpawan sang palanan-awon parte sa suba?

⁵ Mangin bastante bala pirme ang pagpakamaayo para sa tanan? Kon may nagakabalaka gid man parte sa sini, mapaumpawan sia sang palanan-awon kay ginpakita sini ang milagruso nga pagdalom sang mga tubig. Sang primero nagailig lang ini asta nga nagsulog sa halos duha lang ka kilometro ang kalayuon! (Ezeq. 47:3-5) Ang populasyon sang mga Judiyo sa ila napasag-uli nga duta mahimo nga magdamo, pero ang mga pagpakamaayo ni Jehova magabugana para mahatag ang ila mga kinahanglanon. Ginalaragway sang suba ang bugana nga pagpakamaayo!

6. (a) Ano ang ginapasalig sang tagna? (b) Ano nga paandam ang ginhatag sang palanan-awon? (Tan-awa ang footnote.)

⁶ Tubig nga nagahatag sing kabuhi. Sa palanan-awon ni Ezequiel, ang suba nagailig pakadto sa Patay nga Dagat, nga nagpaayo sa daku nga bahin sini. Talupangda nga ang tubig nagresulta sa pagdamo sang nagkalainlain nga mga isda, kaangay sang kadamuon sang mga isda sa  Daku nga Dagat, ukon ang Dagat Mediteraneo. May ara pa gani negosyo nga pagpangisda sa baybayon sang Patay nga Dagat sa ulot sang duha ka banwa nga malayo ang distansia sa isa kag isa. Ang anghel nagsiling: “Mahimo nga mabuhi ang tanan sa bisan diin nga malab-utan sini.” Buot bala silingon nga ang tubig halin sa balay ni Jehova nakalab-ot sa tanan nga bahin sang Patay nga Dagat? Indi. Ang anghel nagpaathag nga ang pila ka tubigon nga duog wala malab-ot sang tubig nga nagahatag sing kabuhi. Ini nga mga duog nangin “maasin.” * (Ezeq. 47:8-11) Gani ini nga tagna nagapasalig nga ayuhon sang putli nga pagsimba ang katawhan para padayon sila nga mabuhi. Pero nagpaandam man ini: May ara gihapon nga indi gusto magbaton sang mga pagpakamaayo ni Jehova; ukon indi tanan magaayo.

7. Ano ang ginapasalig sa tinapok nga mga Judiyo sang mga kahoy sa pangpang nga nakita sa palanan-awon?

⁷ Nagapamunga nga mga kahoy nga mahimo kaunon kag makapaayo. Ano ang kapuslanan sini nga mga kahoy sa pangpang sang suba? Indi bala nagapatahom ini sa palanan-awon? Pero may kahulugan man ini. Si Ezequiel kag ang katawhan sigurado nga nalipay gid sa pagpamensar sang manamit nga mga bunga sini nga mga kahoy, nga nagapamunga kada bulan! Ginapasalig man sini nga amanan sila sa espirituwal ni Jehova. Ano pa ang ginatudlo sini? Talupangda nga ‘ang mga dahon sini nga mga kahoy makapaayo.’ (Ezeq. 47:12) Nahibaluan ni Jehova nga kinahanglan gid sang nagbalik nga mga tinapok ang espirituwal nga pag-ayo, kag amo gid sina ang iya ginpromisa. Sa iban nga tagna parte sa pagpasag-uli, natun-an naton kon paano ina ginhimo ni Jehova, nga ginbinagbinag naton sa Kapitulo 9 sini nga publikasyon.

8. Ano ang nagapakita nga may daku pa nga katumanan ang palanan-awon ni Ezequiel?

⁸ Pero, natun-an man naton sa Kapitulo 9 nga ang naeksperiensiahan sang nagbalik nga mga tinapok indi bug-os nga katumanan sini nga mga tagna. Ang katawhan mismo ang rason kon ngaa wala ini natuman sing bug-os. Pirme sila nagabalik sa ila malain nga mga buhat, wala nagatuman, kag ginpabay-an nila ang putli nga pagsimba. Gani wala sila ginpakamaayo sing bug-os ni Jehova. Nasubuan gid kag naluyahan ang mga matutom sa ginhimo sang ila mga masigka-Judiyo. Pero nabal-an sang mainunungon nga mga sumilimba ni Jehova nga indi gid mapaslawan ang iya mga promisa, matuman gid ini. (Basaha ang Josue 23:14.) Gani, may daku pa nga katumanan ang palanan-awon ni Ezequiel. Pero san-o?

9. San-o ang daku pa nga katumanan sang palanan-awon ni Ezequiel parte sa templo?

⁹ Natun-an naton sa Kapitulo 14 sini nga publikasyon nga ang palanan-awon ni Ezequiel parte sa templo may daku pa nga katumanan “sa ulihi nga bahin sang mga adlaw,” sa tion nga pakataason ang putli nga pagsimba sa posisyon nga wala pa gid matabo sadto. (Isa. 2:2) Paano nagakatuman subong ini nga bahin sang palanan-awon?

10, 11. (a) Ano nga mga pagpakamaayo ang nagailig sa aton subong pareho sang suba? (b) Paano ang pag-ilig sang mga pagpakamaayo ni Jehova nagsangkad pa gid para maaman ang nagadugang nga kinahanglanon sa katapusan nga mga adlaw?

¹⁰ Isa ka suba sang pagpakamaayo. Ano ang ginapahanumdom sa aton sang pag-ilig sang tubig halin sa balay ni Jehova? Nagapahanumdom gid ini sa aton sang espirituwal nga mga butang nga ginaaman  ni Jehova sa aton. Ang panguna gid amo ang gahom sang halad-gawad sang Cristo nga nagatinlo sa aton mga sala, gani mapatawad kita. Ang putli nga kamatuoran sa Pulong sang Dios ginpaanggid sa tubig nga nagatinlo kag nagahatag sing kabuhi. (Efe. 5:25-27) Paano ini nga mga pagpakamaayo nagailig sa aton tion?

¹¹ Sang 1919, mga pila lang ka libo ang mga alagad ni Jehova kag nalipay gid sila nga makabaton sing espirituwal nga pagkaon nga ila kinahanglan. Pero pagligad sang mga dekada, padayon sila nga nagdamo. Subong, ang katawhan sang Dios sobra na walo ka milyon. Bastante bala ang pag-ilig sang putli nga tubig sang kamatuoran? Huo! Bugana gid kita sa espirituwal nga kamatuoran. Binilyon ka Biblia, libro, magasin, brosyur, kag mga tract ang nag-ilig sa katawhan sang Dios sang nagligad nga isa ka gatos ka tuig. Pareho sa suba nga nakita ni Ezequiel sa iya palanan-awon, ang pag-ilig sang putli nga kamatuoran nagsangkad pa gid para maaman ang nagadugang nga kinahanglanon sang mga tawo nga nauhaw sa espirituwal sa bilog nga kalibutan. Halin sang una, nagaimprinta na kita sing mga publikasyon base sa Biblia. Kag subong, paagi sa website nga jw.org, matigayon ini nga mga materyal sa elektroniko nga pormat sa sobra 900 ka lenguahe! Ano ang epekto sining tubig sang kamatuoran sa matarong sing tagipusuon nga mga tawo?

12. (a) Ano ang pamatuod nga ang mensahe sang kamatuoran nagahatag sing espirituwal nga kabuhi kag kapagros sa katawhan? (b) Anong suno sa tion nga paandam ang ginahatag sa aton sang palanan-awon? (Tan-awa man ang footnote.)

¹² Tubig nga nagahatag sing kabuhi. Ginsilingan si Ezequiel: “Mahimo nga mabuhi ang tanan sa bisan diin nga malab-utan sini.” Hunahunaa kon paano nag-ilig ang mensahe sang kamatuoran sa tanan nga nagkadto sa aton napasag-uli nga espirituwal nga duta. Ang kamatuoran sa Biblia nagbuhi kag naghatag sing espirituwal nga kapagros sa minilyon nga nagbaton kag nagtuo kay Jehova. Pero ang palanan-awon may suno sa tion man nga paandam: Indi tanan magapabilin sa kamatuoran. Pareho sang tubigon nga mga duog kag katunggan sa Patay nga Dagat sa palanan-awon ni Ezequiel, may mga tawo nga sa ulihi indi na magbaton kag indi na mag-aplikar sang kamatuoran. * Kabay nga indi ina matabo sa aton.—Basaha ang Deuteronomio 10:16-18.

13. Ano nga mga leksion ang matun-an naton sa mga kahoy sa palanan-awon?

¹³ Nagapamunga nga mga kahoy nga mahimo kaunon kag makapaayo. May makapalig-on bala nga leksion nga matun-an naton sa mga kahoy sa pangpang sang suba sa palanan-awon? Huo! Dumduma nga ini nga mga kahoy nagapamunga sing manamit nga mga bunga kada bulan, kag ang mga dahon sini makapaayo. (Ezeq. 47:12) Gani nagapahanumdom ini nga ang Dios nga ginaalagad naton bugana nga nagapakaon kag nagaayo sa aton sa pinakaimportante nga paagi—sa espirituwal. Subong, ang kalibutan nagamasakit kag gutom sa espirituwal. Pero pensara ang ginaaman ni Jehova sa aton. Naeksperiensiahan mo bala nga pagkatapos mo mabasa ang artikulo sa isa sa aton mga magasin, ukon pagkatapos sang katapusan nga kanta sa asembleya ukon kombension, ukon pagkatapos mo matan-aw ang video  ukon mga programa sa broadcasting, nalipay ka gid kay nakabaton ka sining espirituwal nga pagkaon? Busog gid kita pirme. (Isa. 65:13, 14) Nagapapagros bala ang aton espirituwal nga pagkaon? Ang maayo nga laygay nga mabaton naton base sa Pulong sang Dios nagabulig sa aton nga malikawan ang mga sala pareho sang imoralidad, kakagod, kag kakulang sing pagtuo. May kahimusan man nga ginhimo si Jehova para buligan ang mga Cristiano sa paglandas sa espirituwal nga mga balatian nga resulta sang mabug-at nga sala. (Basaha ang Santiago 5:14.) Matuod gid nga ginapakamaayo kita, pareho sa ginapakita sang mga kahoy sa palanan-awon ni Ezequiel.

14, 15. (a) Ano ang matun-an naton sa tubigon nga mga duog nga wala mag-ayo sa palanan-awon ni Ezequiel? (b) Paano kita nagabenepisyo subong sa palanan-awon ni Ezequiel parte sa suba?

¹⁴ May matun-an man kita nga leksion sa tubigon nga mga duog nga wala maayo sang tubig. Indi gid naton pagpangindian ang pag-ilig sang mga pagkamaayo ni Jehova sa aton kabuhi. Makaluluoy gid kita kon indi kita mag-ayo, pareho sa madamo nga tawo sa sining nagamasakit nga kalibutan. (Mat. 13:15) Indi pareho sa ila, nalipay gid kita sa pagbenepisyo sa suba sang pagpakamaayo. Kon nalipay kita sa pag-inom sang putli nga tubig sang kamatuoran sa Pulong sang Dios, kon ginasugid naton ina nga kamatuoran sa iban paagi sa pagbantala, kag kon makabaton kita sing mahigugmaon nga laygay, paumpaw, kag bulig halin sa mga gulang nga ginhanas sang matutom nga ulipon, mahimo madumduman naton ang suba sa palanan-awon ni Ezequiel. Ina nga suba nagahatag sing kabuhi kag nagapaayo sa bisan diin nga malab-utan sini.

¹⁵ Pero ano naman ang katumanan sa palaabuton sining palanan-awon parte sa suba? Matun-an naton nga ang suba magasulog sing bug-os sa palaabuton nga Paraiso.

16, 17. (a) Ano ang buot silingon nga ang tubig sang kabuhi magasangkad pa gid sa Paraiso? (b) Paano kita makabenepisyo sa sinang suba sang pagpakamaayo sa Paraiso?

¹⁶ Ginaimadyin mo bala ang imo kaugalingon nga ara sa Paraiso, nga perpekto kag malipayon kaupod ang imo mga abyan kag pamilya? Ang pagtuon sa palanan-awon ni Ezequiel parte sa suba makabulig sa imo nga mangin maathag pa gid ina nga paglaum. Paano? Binagbinaga liwat ang tatlo ka maathag kag mahigugmaon nga pasalig sang palanan-awon.

¹⁷ Isa ka suba sang pagpakamaayo. Ang malaragwayon nga suba magasangkad pa gid sa Paraiso, kay ang benepisyo sini indi lang sa espirituwal kundi sa pisikal man. Sa Isa ka Libo ka Tuig nga Paggahom ni Jesus, ihatag sang Ginharian sang Dios sa mga matutom ang bug-os nga benepisyo sang gawad. Amat-amat sila nga mangin perpekto! Wala na sing balatian, doktor, nars, ospital, kag health insurance! Ang tubig sang kabuhi magailig sa minilyon nga maluwas sa Armageddon, nga amo ang “daku nga kadam-an” nga makalampuwas sa “dakung kapipit-an.” (Bug. 7:9, 14) Pero bisan pa masulog na ining pag-ilig sang suba sang pagpakamaayo, gamay pa ini kon ikumparar sa matabo sa ulihi. Subong sang ginapakita sa palanan-awon, ang suba magasangkad  pa gid para maaman ang nagadugang nga kinahanglanon sang katawhan.

18. Ano ang buot silingon nga ang “suba sang tubig sang kabuhi” magasulog sa sulod sang Isa ka Libo ka Tuig?

¹⁸ Tubig nga nagahatag sing kabuhi. Sa sulod sang Isa ka Libo ka Tuig, ang “suba sang tubig sang kabuhi” magasulog! (Bug. 22:1) Minilyon ukon binilyon pa gani ang banhawon kag may kahigayunan nga mabuhi sing wala katapusan sa Paraiso! Lakip sa mga pagpakamaayo ni Jehova paagi sa Ginharian amo ang pagbuhi liwat sa madamo nga mga napatay nga tawo, nga madugay na nga nagbalik sa yab-ok. (Isa. 26:19) Pero, ang tanan bala nga banhawon magakabuhi sing dayon?

19. (a) Ano ang nagapakita nga may bag-o nga tubig sang kamatuoran halin sa Dios nga matigayon sa Paraiso? (b) Ano ang buot silingon nga ang iban “mangin maasin” sa palaabuton?

¹⁹ Ang kada isa dapat magpili. Sa sina nga tion, may buksan nga bag-o nga mga linukot. Gani lakip sa makapaumpaw nga tubig halin kay Jehova amo ang bag-o nga mga kamatuoran ukon instruksion. Indi bala makalilipay gid ina? Pero, may pila nga indi magbaton sina nga pagpakamaayo, kag indi magtuman kay Jehova. Sa tion sang Isa ka Libo ka Tuig, may mga tawo nga magarebelde, pero indi sila pagtugutan nga gamuhon ang Paraiso. (Isa. 65:20) Kabay nga tandaan naton ang palanan-awon ni Ezequiel kag ang tubigon nga mga duog nga wala nag-ayo, nga nangin “maasin.” Kabuangan gid para sa mga hungod nga indi mag-inom sining hamili nga tubig sang kabuhi! Sa tapos sang Isa ka Libo ka Tuig, ang grupo sang mga  rebelde magadampig kay Satanas. Ang tanan nga magasikway sa matarong nga paggahom ni Jehova pareho ang madangatan: dayon nga kamatayon.—Bug. 20:7-12.

20. Ano nga kahimusan nga makahatag sa aton sing pagpakamaayo sa tion sang Isa ka Libo ka Tuig ang nagapahanumdom sa aton sang mga kahoy nga nakita ni Ezequiel?

²⁰ Nagapamunga nga mga kahoy nga mahimo kaunon kag makapaayo. Indi gid gusto ni Jehova nga malaglag ang bisan sin-o sa aton. Para buligan kita nga indi madula sa aton ang kahigayunan nga ginatanyag niya, pat-uron niya nga may kahimusan liwat pareho sa mga kahoy nga nakita ni Ezequiel. Pero sa Paraiso, ang mga pagpakamaayo ni Jehova indi lang sa pisikal kundi sa espirituwal man. Sa langit, si Jesucristo kag ang iya 144,000 nga kaupod nga manuggahom mangin hari sa sulod sang Isa ka Libo ka Tuig. Bilang mga saserdote, ipadapat sang 144,000 ang mga benepisyo sang halad-gawad sang Cristo, ang pagbulig sa mga tawo nga mangin perpekto. (Bug. 20:6) Ini nga kahimusan para sa pisikal kag espirituwal nga pag-ayo nagapahanumdom sa aton sang mga kahoy nga nakita ni Ezequiel sa pangpang sang suba nga nagapamunga sing masustansia nga mga bunga kag may mga dahon nga nagapaayo. Ang palanan-awon ni Ezequiel naangot sa isa pa ka matahom nga tagna nga ginrekord ni apostol Juan. (Basaha ang Bugna 22:1, 2.) Ang mga dahon sang mga kahoy nga nakita ni Juan “makapaayo sa mga pungsod.” Minilyon ka matutom nga katawhan ang makabenepisyo sa pag-alagad sang 144,000 bilang mga saserdote.

21. Ano ang epekto sa imo kon pamalandungan mo ang palanan-awon ni Ezequiel parte sa suba, kag ano ang aton binagbinagon sa masunod? (Tan-awa ang kahon nga “Ang Ilig Nangin Masulog!”)

²¹ Samtang ginapamalandungan mo ang palanan-awon ni Ezequiel parte sa suba, indi bala nakabatyag ka sing kalinong kag paglaum? Makalilipay gid nga tion ang nagahulat sa aton! Kag hunahunaa ini: Linibo na ka tuig ang nagligad, ginsugid ni Jehova ang madamo nga tagna para maimadyin naton ang Paraiso. Mapailubon sia nga nagaagda sa aton nga dapat didto kita para makita naton ang daku pa nga katumanan sini nga mga tagna. Mangin didto ka bala? Mahimo ginapensar mo kon bala may lugar gid man para sa imo sa Paraiso. Binagbinagon naton sa masunod nga kapitulo kon paano ini ginapasalig sa aton sang katapusan nga bahin sang tagna ni Ezequiel.