Pinalangga nga mga Nagahigugma kay Jehova:

Sang 1971, ang mga nagtambong sa “Divine Name” Distrito nga Asembleya nalipay gid sa pagbaton sing pila ka bag-o nga publikasyon. Wala nila ginapaabot nga madamo nga publikasyon ang ipagua sa sini nga asembleya. Parte sa isa ka bag-o nga publikasyon, ang isa ka brother nagsiling: “Kanami gid sini kay ginapukaw sini ang imo kalangkag sa matabo sa palaabuton!” Ano ini nga publikasyon? Ini amo ang libro nga “The Nations Shall Know That I Am Jehovah”—How? Ngaa nalangkag gid sa sini ang tumalambong? Kay nagaunod ini sing pinakabag-o nga paathag sa mga tagna nga mabasa sa libro sang Ezequiel sa Biblia—mga tagna may labot sa palaabuton sang tanan nga katawhan.

Sa sulod sang mga tinuig sugod sang ginpagua ang libro nga ‘Know Jehovah’, madasig nga nagdamo ang katawhan sang Dios—halin sa mga 1.5 ka milyon asta sa sobra 8 ka milyon na subong. (Isa. 60:22) Kon tingbon, ining minilyon ka alagad ni Jehova nagahambal sing sobra 900 ka lenguahe. (Zac. 8:23) Madamo ang wala pa gid nakatuon sing libro nga detalyado nga nagapaathag sang mga tagna nga ginrekord ni propeta Ezequiel.

Dugang pa, sa sulod sang mga dekada sugod sang 1971, mas nag-athag pa gid ang aton paghangop sa madamo nga kamatuoran sa Biblia samtang ang kapawa amat-amat nga nagasanag. (Hulu. 4:18) Sang 1985, nangin maathag sa aton kon paano ang “iban nga mga karnero” gintawag nga matarong bilang mga abyan sang Dios. (Juan 10:16; Roma 5:18; Sant. 2:23) Dayon sang 1995, naintiendihan naton nga ang katapusan nga paghukom sa “mga karnero” kag “mga kanding” matabo sa nagapakari nga “dakung kapipit-an.” (Mat. 24:21; 25:31, 32) Ini nga mga pagbag-o sa paghangop nakabulig gid sa aton nga maintiendihan ang libro sang Ezequiel.

Sining nagligad lang nga mga tinuig, ang kapawa labi pa gid nga nagsanag. Binagbinaga ang mga leksion sa mga ilustrasyon ni Jesus. Madamo sa sini nga mga leksion ang mas nangin maathag pa gid sa aton hunahuna kag tagipusuon. Ang pila sa sini nga mga ilustrasyon nagapatuhoy sa mga hitabo nga matabo sa indi madugay sa nagahilapit nga dakung kapipit-an. Ang aton paghangop sa pila ka tagna sa libro sang Ezequiel ginbag-o man. Lakip sa sini nga mga tagna ang parte sa Gog sang Magog (kapitulo 38 kag 39), ang himuon sang lalaki nga may suludlan sang tinta nga sungay nga ginagamit sang sekretaryo (kapitulo 9), kag ang nalupyakan sang mamala nga mga tul-an kag ang malaragwayon nga pagtingob sang duha ka lipak (kapitulo 37). Ini nga mga paathag, pagbag-o man sa paghangop nga mabasa sa libro nga ‘Know Jehovah’ nga ginsulat madamo na nga tuig ang nagligad.

Indi katingalahan nga madamo sa katawhan ni Jehova ang nagapamangkot, “San-o pa kita makabaton sing libro nga nagapaathag sing bag-o nga paghangop sa mga tagna ni Ezequiel?” Amo gid sina ang unod sang libro nga Putli nga Pagsimba kay Jehova—Napasag-uli Na! Samtang ginabasa ninyo ang 22 ka kapitulo kag ginapamalandungan ang matahom nga mga piktyur nga makita diri, magadayaw gid kamo sa maid-id nga pag-research para mahanda ini nga libro. Ginpamensaran gid namon kag ginpangamuyuan sing maayo para maintiendihan namon kon ngaa gin-aman ni Jehova ining makawiwili nga libro sang Ezequiel sa Biblia. Ginbinagbinag gid namon sing maayo ang mga pamangkot pareho sang: Ano nga mga leksion ang matun-an sa libro sang Ezequiel para sa mga tawo nga nagkabuhi sang iya panahon kag sa aton tion? Ano nga mga tagna ang may katumanan pa sa palaabuton? Dapat bala naton pangitaan sang larawan  kag ginalarawan ang mga tagna ni Ezequiel? Ang mga sabat sa sini nga mga pamangkot amo ang pinakamaathag nga paghangop subong sa sining libro sang Biblia nga nanamian naton basahon.

Samtang ginabasa ninyo ang libro sang Ezequiel halin sa puno asta sa punta, magadayaw gid kamo sa langitnon nga bahin sang organisasyon ni Jehova. Magadayaw man kamo sa mataas nga talaksan ni Jehova nga dapat sundon sang mga tinuga sa langit kag sang mga tawo sa duta para batunon niya ang ila pagsimba. Ang Putli nga Pagsimba nga libro makabulig sa inyo nga maapresyar pa gid ang mga ginhimo ni Jehova para sa iya katawhan kag ang mga himuon pa niya para sa ila sa palaabuton. Matalupangdan ninyo nga ini nga libro sulitsulit nga nagapadaku sang duha ka tema. Una, para mapahamut-an si Jehova, dapat kilalahon naton sia kag padunggan bilang Soberano sang Uniberso. Ikaduha, dapat naton simbahon si Jehova sa paagi nga nahamut-an niya, kag sundon ang iya mataas nga talaksan.

Ginahandum gid namon nga ini nga publikasyon makapabakod pa gid sang inyo determinasyon nga simbahon si Jehova sa paagi nga nagahimaya sa iya dungganon kag balaan nga ngalan. Subong man, kabay nga makapalig-on ini sa inyo nga padayon nga maghulat sa pag-abot sang tion nga makilala sang tanan nga pungsod nga sia amo si Jehova.—Ezeq. 36:23; 38:23.

Kabay nga bugana nga pakamaayuhon sang aton mahigugmaon nga Amay, si Jehova, ang inyo mga pagtinguha nga maintiendihan ang libro nga ginpasulat niya kay propeta Ezequiel.