1, 2. Ngaa ginahigugma mo si Jehova nga Dios?

GINAHIGUGMA mo bala ang Dios? Mahimo nga ginahigugma mo gid sia amo nga gindedikar mo ang imo kaugalingon sa iya. Mahimo nga nagabatyag ka nga sia ang imo pinakasuod nga Abyan. Pero antes mo pa ginhigugma si Jehova, ginhigugma ka na niya. Sa Biblia mabasa naton: “Nagahigugma kita, bangod sia ang una nga naghigugma sa aton.”—1 Juan 4:19.

² Hunahunaa ang mga paagi nga ginpakita ni Jehova ang iya gugma sa aton. Ginhatag niya sa aton ang duta subong matahom nga puluy-an kag ang tanan nga kinahanglan naton para mangin malipayon. (Mateo 5:43-48; Bugna 4:11) Luyag niya nga may maayo kita nga kaangtanan sa iya, kag ginpaposible niya nga makatuon kita parte sa iya. Kon nagabasa kita sang Biblia, ginapamatian naton si Jehova. Kag kon nagapangamuyo kita, ginapamatian niya kita. (Salmo 65:2) Ginagiyahan kag ginapabakod niya kita paagi sa iya balaan nga espiritu. (Lucas 11:13) Ginpadala pa gani niya ang iya pinalangga nga Anak sa duta para hilwayon kita sa sala kag kamatayon.—Basaha ang Juan 3:16; Roma 5:8.

3. Paano mahuptan ang maayo nga kaangtanan kay Jehova?

 ³ Hunahunaa sing makadali ang isa sa mga suod mo nga abyan nga nangin kaupod mo sa kalipay kag kasubo. Kinahanglan ang panikasog para magpabilin nga mabakod ang inyo suod nga pag-abyanay. Pareho man ini sa aton pagpakig-abyan kay Jehova, ang pinakasuod nga Abyan nga matigayon naton. Ang aton pagpakig-abyan sa iya puede mangin wala sing katapusan. Gani ang Biblia nagasiling sa aton: “Makapabilin kamo sa gugma sang Dios.” (Judas 21) Paano naton mahimo ini? Ang Biblia nagasabat: “Kay amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”—1 Juan 5:3.

4, 5. Paano nagsugod ang imo gugma kay Jehova?

⁴ Nagsulat si apostol Juan parte sa aton gugma sa Dios. Madumduman mo pa bala kon paano nagsugod ang imo gugma kay Jehova?

⁵ Dumduma kon ano ang imo ginbatyag sang natun-an mo nga luyag ni Jehova nga mabuhi ka sing dayon sa iya bag-o nga kalibutan. Natun-an mo ang tanan nga ginhimo niya para mangin posible ini, kag narealisar mo nga hamili gid ang regalo nga ginhatag niya sa aton sang ginpadala niya ang iya Anak sa duta. (Mateo 20:28; Juan 8:29; Roma 5:12, 18) Sang natun-an mo nga tuman kadaku ang gugma ni Jehova sa imo, natandog ang imo tagipusuon kag napahulag ka nga higugmaon man sia.—Basaha ang 1 Juan 4:9, 10.

6. Ano ang nalakip kon ginahigugma naton ang isa ka tawo? Tungod sa imo gugma sa Dios, napahulag ka nga himuon ang ano?

⁶ Pero ina nga gugma sa Dios panugod pa lang. Halimbawa, kon ginahigugma naton ang isa ka tawo,  wala lang kita nagasiling nga “ginahigugma ko ikaw.” Ginapahulag kita sang gugma nga himuon ang makapahalipay sa iya. Sing kaanggid, ang imo gugma kay Jehova magapahulag man sa imo nga magkabuhi sa paagi nga nagapahamuot sa iya. Samtang nagatubo ina nga gugma, mahimo nga napahulag ka nga magdedikar sa iya kag magpabawtismo. Sang ginhimo mo ina, nagpromisa ka nga alagaron si Jehova sa wala sing katubtuban. (Basaha ang Roma 14:7, 8.) Paano mo matuman ina nga promisa?

7. Kon ginahigugma naton si Jehova, ano ang aton himuon? Ano ang pila niya ka sugo?

⁷ Bangod ginahigugma naton si Jehova, ‘ginatuman naton ang iya mga sugo.’ Paano? Ginasunod naton sia. Sa Biblia natun-an naton ang paagi sang pagkabuhi nga luyag ni Jehova para sa aton. Halimbawa, ginasilingan niya kita nga malain ang pagpahubog, pagpangawat ukon pagbutig, paghulid nga wala makasal, ukon pagsimba kay bisan sin-o ukon sa bisan ano magluwas sa iya.—1 Corinto 5:11; 6:18; 10:14; Efeso 4:28; Colosas 3:9.

8, 9. Paano naton mahibaluan kon ano ang luyag ni Jehova nga himuon naton sa mga sitwasyon nga wala sing espesipiko nga kasuguan sa Biblia? Maghatag sing halimbawa.

⁸ Pero para mapahamut-an si Jehova, indi bastante ang pagtuman lang sang iya mga sugo. Wala sia naghatag sa aton sing malaba nga listahan sang mga kasuguan sa tagsa ka sitwasyon sang kabuhi. Amo nga may mga tion nga wala sing espesipiko nga kasuguan sa Biblia nga nagasiling kon ano ang dapat naton himuon. Gani, paano kita makahimo sing maayo nga desisyon? (Efeso 5: 17) Sa Biblia may mga prinsipio, sadsaran ini nga mga kamatuoran nga nagatudlo sa aton sang pagtamod ni Jehova. Samtang ginabasa naton ang Biblia, makilala naton si Jehova subong isa ka Persona. Matun-an naton ang iya panghunahuna, lakip ang iya ginahigugma kag ginadumtan.—Basaha ang Salmo 97:10; Hulubaton 6:16-19; tan-awa ang Endnote 1.

⁹ Halimbawa, paano kita nagadesisyon kon ano ang aton lantawon sa TV ukon Internet? Wala kita ginasilingan ni Jehova kon ano gid ang dapat himuon. Pero ang mga prinsipio nga iya ginhatag makabulig sa aton sa pagdesisyon. Kalabanan sang kalingawan subong puno sing kasingki kag sekso. Sa Biblia, ginasilingan kita ni Jehova nga “ginadumtan niya ang nagahigugma sa kasingki” kag “hukman [niya] ang mga nagahimo sang seksuwal nga imoralidad.” (Salmo 11:5; Hebreo 13:4) Paano kita mabuligan sini nga mga prinsipio nga makahimo sing husto nga desisyon? Kon mahibaluan naton nga ginadumtan ni Jehova ukon ginatamod nga imoral ang isa ka butang, dapat indi naton ini paglantawon.

10, 11. Ngaa ginatuman naton si Jehova?

¹⁰ Ngaa ginatuman naton si Jehova? Indi lang para makalikaw sa silot ukon sa mga problema nga resulta sang indi maayo nga desisyon. (Galacia 6:7) Ginatuman naton si Jehova kay ginahigugma gid naton sia. Pareho sang kabataan nga luyag magpahalipay sa ila amay, luyag man naton pahalipayon ang aton Amay sa langit. Wala na sing mas maayo pa sangsa paghibalo nga nahamuot si Jehova sa aton!—Salmo 5:12; Hulubaton 12:2; tan-awa ang Endnote 2.

¹¹ Ginatuman naton si Jehova indi lang bangod mahapos ini ukon wala na kita sing iban nga mahimo. Wala  man kita nagapili kon diin lang sa iya mga kasuguan kag talaksan ang sundon. (Deuteronomio 12:32) Sa baylo, ginatuman naton sia sing bug-os, pareho sa salmista nga nagsiling: “Nalipay ako sa imo mga sugo, huo, ginahigugma ko sila.” (Salmo 119:47; Roma 6:17) Luyag naton mangin pareho kay Noe nga nagpakita sang iya gugma kay Jehova paagi sa paghimo sang tanan nga ginsugo ni Jehova sa iya. Ang Biblia nagsiling nga “amo gid ini ang ginhimo” ni Noe. (Genesis 6:22) Luyag mo man bala nga amo sina ang isiling ni Jehova sa imo?

12. Paano naton mapahalipay si Jehova?

¹² Ano ang ginabatyag ni Jehova kon ginatuman naton sia? Ginapasadya naton ang iya tagipusuon. (Hulubaton 11:20; 27:11) Hunahunaa ina! Ginapahalipay naton ang Manunuga sang uniberso kon ginatuman naton sia. Pero wala niya kita ginapilit. Sa baylo, ginhatagan niya kita sing kahilwayan sa pagpili. Buot silingon nga may kahilwayan kita sa paghimo sang maayo ukon malain. Luyag ni Jehova nga ang aton gugma sa iya amo ang magpahulag sa aton sa paghimo sing maayo nga mga desisyon para matigayon ang pinakamaayo nga kabuhi.—Deuteronomio 30:15, 16, 19, 20; tan-awa ang Endnote 3.

13, 14. Paano naton nahibaluan nga ang mga sugo sang Dios indi tama kabudlay tumanon? Iilustrar.

¹³ Ano abi kon sa banta mo mabudlay gid tumanon ang mga sugo ni Jehova ukon madula sini ang aton kahilwayan? Ang Biblia maathag nga nagasiling: “Ang iya mga sugo indi mabug-at.” (1 Juan 5:3) Sa iban nga kasulatan, ang Griego nga tinaga para sa “mabug-at” nagalaragway sa indi makatarunganon nga mga pagsulundan ukon mga tawo nga gusto kontrolon kag halitan ang  iban. (Mateo 23:4; Binuhatan 20:29, 30) Amo ini ang pagbadbad sang Maayong Balita nga Biblia: “Ang iya mga sugo indi tama kabudlay para sa aton.” Ang mga sugo ni Jehova indi tama kabudlay tumanon. Makatarunganon sia pirme sa iya mga ginapatuman sa aton.

¹⁴ Sa pag-ilustrar, imadyina nga ginabuligan mo ang imo abyan nga magsaylo sa iya bag-o nga balay. Ginbutang niya sa mga kahon ang tanan niya nga gamit. Ang pila ka kahon mamag-an kag mahapos hakwaton, pero may pila nga mabug-at kag kinahanglan duha ka tawo ang mahakwat sini. Suguon ka bala sang imo abyan nga hakwaton ang mabug-at nga kahon nga ikaw lang? Siempre, indi gid! Ngaa? Bangod indi niya luyag nga mabalian ka. Pareho sa sina nga abyan, indi gid magpahimo sa imo si Jehova sang isa ka butang nga tama kabudlay. (Deuteronomio 30:11-14) Kilala gid kita ni Jehova. “Nahibaluan gid niya kon paano kita ginhimo, ginadumdom niya nga kita yab-ok lamang.”—Salmo 103:14.

15. Ngaa makasiguro kita nga ang tanan nga sugo ni Jehova para gid sa aton kaayuhan?

¹⁵ Ginsilingan ni Moises ang pungsod sang Israel nga ang mga sugo ni Jehova para gid sa ila “kaayuhan pirme” kag ang ila pagtuman makabulig sa ila nga ‘padayon nga mabuhi.’ (Deuteronomio 5:28-33; 6:24) Amo man subong, ang bisan ano nga ginapahimo ni Jehova sa aton para gid sa aton kaayuhan. (Basaha ang Isaias 48:17.) Ang aton Amay nga si Jehova pirme nakahibalo sang pinakamaayo sa aton. (Roma 11:33) Ang Biblia nagasiling sa aton: “Ang Dios gugma.” (1 Juan 4:8) Nagakahulugan ini nga ang tanan nga ginasiling kag ginahimo ni Jehova ginapahulag sang gugma.

16. Ngaa masiling naton nga puede kita mangin matinumanon bisan pa nagakabuhi kita sa malaut nga kalibutan kag indi kita himpit?

 ¹⁶ Indi pirme mahapos nga tumanon ang Dios. Nagakabuhi kita sa malaut nga kalibutan nga ginagamhan sang Yawa. Ginaimpluwensiahan niya ang mga tawo nga maghimo sang malain. (1 Juan 5:19) Dapat makigbato man kita sa aton indi himpit nga panghunahuna kag balatyagon, kay makaimpluwensia ini sa aton nga indi pagtumanon ang Dios. (Roma 7:21-25) Pero ang aton gugma kay Jehova nagapabakod sa aton nga himuon ang husto. Nakita niya ang aton panikasog nga tumanon sia, kag ginahatagan niya kita sang balaan nga espiritu. (1 Samuel 15:22, 23; Binuhatan 5:32) Ginabuligan kita sang balaan nga espiritu nga palambuon ang mga kinaiya para mangin mas mahapos sa aton nga tumanon sia.—Galacia 5:22, 23.

17, 18. (a) Ano ang matun-an naton sa sini nga libro? (b) Ano ang aton binagbinagon sa masunod nga kapitulo?

¹⁷ Sa sini nga libro, matun-an naton ang pagkabuhi nga nagapahamuot kay Jehova. Matun-an naton kon paano iaplikar ang iya mga prinsipio kag talaksan sa moral. Dumduma nga wala kita ginapilit ni Jehova nga tumanon sia. Kon pilion naton nga mangin matinumanon, mas mangin maayo ang aton kabuhi kag mangin matahom ang aton palaabuton. Labaw sa tanan, ang aton pagkamatinumanon magapakita nga ginahigugma gid naton ang Dios.—Tan-awa ang Endnote 4.

¹⁸ Para buligan kita nga mahibaluan ang husto kag sala, ang kada isa sa aton ginhatagan ni Jehova sing konsiensia. Kon hanason naton ang aton konsiensia, makabulig ini nga ‘matuman naton ang iya mga sugo.’ Gani, ano ang konsiensia, kag paano naton ini hanason? Binagbinagon naton ini sa masunod nga kapitulo.