1. Ano ang ginakabalak-an ni Jesus sang gab-i antes sang iya kamatayon?

GAB-I sadto antes sang kamatayon ni Jesus. Nahibaluan niya nga pagabiyaan na niya ang iya mga disipulo, kag nabalaka sia sa ila palaabuton. Ginsilingan niya sila: “Indi kamo bahin sang kalibutan.” (Juan 15:19) Sang ulihi, nangamuyo sia sa iya Amay tuhoy sa ila: “Indi sila bahin sang kalibutan, subong nga ako indi bahin sang kalibutan.” (Juan 17:15, 16) Ano ang buot silingon ni Jesus?

2. Ano ang “kalibutan” nga ginpatuhuyan ni Jesus?

² Sa sini nga teksto, ang “kalibutan” nagapatuhoy sa mga tawo nga wala makakilala sa Dios kag yara sa idalom sang paggahom ni Satanas. (Juan 14:30; Efeso 2:2; Santiago 4:4; 1 Juan 5:19) Paano kita mangin ‘indi bahin sang kalibutan’? Sa sini nga kapitulo, binagbinagon naton ang pila ka paagi: Nagapabilin kita nga neutral kag mainunungon sa Ginharian sang Dios, amo nga wala kita sing ginadampigan sa pulitika. Nagapamatok kita sa espiritu sang kalibutan. Maugdang kita sa aton pamayo kag pamustura, kag balanse kita sa aton pagtamod sa kuarta. Nagasuklob man kita sang hinganib nga ginhatag sang Dios.—Tan-awa ang Endnote 16.

3. Ano ang pagtamod ni Jesus sa pulitika?

³ Sang yari si Jesus sa duta, nakita niya nga madamo sing problema ang mga tawo kag indi mahapos ang ila kabuhi. Nagaulikid gid sia sa ila kag luyag niya nga buligan sila. Nangin lider bala sia sa pulitika? Wala. Nahibaluan niya nga ang kinahanglan sang mga tawo amo ang Ginharian ukon gobierno sang Dios. Si Jesus ang mangin Hari sa sina nga Ginharian, kag ang Ginharian amo ang panguna nga tema nga iya ginabantala. (Daniel 7:13, 14; Lucas 4:43; 17:20, 21) Wala nagpasilabot si Jesus sa pulitika, kag nagpabilin gid sia nga neutral. Sang nag-atubang si Jesus sa Gobernador sang Roma nga si Poncio Pilato, nagsiling sia: “Ang akon Ginharian indi bahin sini nga kalibutan.” (Juan 18:36) Neutral man ang iya mga disipulo. Ang libro nga On the Road to Civilization nagsiling nga ang mga Cristiano sang una “wala nag-uyat sing katungdanan sa pulitika.” Subong, amo man sini ang pagtamod sang matuod nga mga Cristiano. Mainunungon kita nga nagasakdag sa Ginharian sang Dios kag neutral sa pulitika sini nga kalibutan.—Mateo 24:14.

4. Paano ginasakdag sang matuod nga mga Cristiano ang Ginharian sang Dios?

⁴ Ang mga embahador nagarepresentar sang ila gobierno sa iban nga pungsod, gani wala sila nagapasilabot sa pulitika sina nga pungsod. Amo man sini ang kahimtangan sang mga hinaplas nga may paglaum nga maggahom sa langit upod ang Cristo. Nagsulat si Pablo sa hinaplas nga mga Cristiano: ‘Mga embahador kita nga salili sang Cristo.’ (2 Corinto 5:20) Ang mga hinaplas nagarepresentar sa gobierno sang Dios. Wala sila nagapasilabot sa mga isyu sang pulitika kag gobierno sa sini nga  kalibutan. (Filipos 3:20) Sa baylo, nabuligan sang mga hinaplas ang minilyon ka tawo nga makatuon parte sa gobierno sang Dios. Ginasakdag sang “iban nga mga karnero,” nga may paglaum nga mabuhi sing wala katapusan sa bag-o nga kalibutan sang Dios, ang mga hinaplas. Nagapabilin man sila nga neutral. (Juan 10:16; Mateo 25:31-40) Maathag nga ang matuod nga Cristiano wala nagapasilabot sa pulitika.—Basaha ang Isaias 2:2-4.

5. Ngaa ang mga Cristiano wala nagaentra sa inaway?

⁵ Ginatamod sang matuod nga mga Cristiano ang ila masigkatumuluo nga pamilya kag nahiusa sila bisan ano man ang ila pungsod ukon gindak-an. (1 Corinto 1:10) Kon mag-entra kita sa inaway, makig-away kita sa aton pamilya kag ginasupak ang sugo ni Jesus nga higugmaon ang aton mga masigkatumuluo. (Juan 13:34, 35;  1 Juan 3:10-12) Dugang pa, ginsilingan ni Jesus ang iya mga disipulo nga higugmaon bisan ang ila mga kaaway.—Mateo 5:44; 26:52.

6. Paano ginatamod sang mga Cristiano ang gobierno?

⁶ Bisan pa neutral kita, nagapanikasog kita nga mangin maayo nga pumuluyo. Halimbawa, ginapakita naton nga ginatahod naton ang gobierno paagi sa pagtuman sa mga kasuguan kag pagbayad sing buhis. Pero ginasiguro naton nga mahatag naton sa “Dios ang mga butang nga iya sang Dios.” (Marcos 12:17; Roma 13:1-7; 1 Corinto 6:19, 20) Ang “mga butang nga iya sang Dios” nagalakip sang aton gugma, pagkamatinumanon, kag pagsimba sa iya. Handa kita nga ihatag ang aton kabuhi sangsa supakon si Jehova.—Lucas 4:8; 10:27; basaha ang Binuhatan 5:29; Roma 14:8.

7, 8. Ano ang “espiritu sang kalibutan,” kag paano ini nagaapektar sa mga tawo?

⁷ Para indi mangin bahin sang kalibutan ni Satanas wala kita nagapakontrol sa “espiritu sang kalibutan.” Ina nga espiritu amo ang panghunahuna kag paggawi nga halin kay Satanas, kag ginakontrol sini ang mga wala nagaalagad kay Jehova. Pero ginapamatukan ini sang mga Cristiano. Pareho sa ginsiling ni Pablo, “ginbaton naton, indi ang espiritu sang kalibutan, kundi ang espiritu nga halin sa Dios.”—1 Corinto 2:12; Efeso 2:2, 3; tan-awa ang Endnote 17.

⁸ Ang espiritu sang kalibutan nagaimpluwensia sa mga tawo nga mangin maiyaiyahon, bugalon, kag rebelyuso. Bangod sini nagahunahuna sila nga indi kinahanglan nga tumanon ang Dios. Luyag ni Satanas nga magpagusto lang ang mga tawo bisan ano ang resulta sini.  Ginapapati niya sila nga “ang kailigbon sang unod kag ang kailigbon sang mga mata” amo ang pinakaimportante sa kabuhi. (1 Juan 2:16; 1 Timoteo 6:9, 10) Ilabi nga ginapanikasugan sang Yawa nga patalangon ang mga alagad ni Jehova kag dayaon kita nga sundon ang iya panghunahuna.—Juan 8:44; Binuhatan 13:10; 1 Juan 3:8.

9. Paano makaapekto sa aton ang espiritu sang kalibutan?

⁹ Pareho sa hangin nga ginahaklo naton, ang espiritu sang kalibutan yara man bisan diin. Kon indi kita manikasog nga pamatukan ini nga espiritu, makaapekto ini sa aton. (Basaha ang Hulubaton 4:23.) Mahimo ini magsugod sa indi hilmunon nga paagi, pareho sa pagtugot nga impluwensiahan kita sang panghunahuna kag paggawi sang mga tawo nga wala nagasimba kay Jehova. (Hulubaton 13:20; 1 Corinto 15:33) Ukon mahimo maapektuhan kita sang mga butang pareho sang pornograpiya, apostasya, ukon mga sport nga grabe ang kompetisyon.—Tan-awa ang Endnote 18.

10. Paano naton mapamatukan ang espiritu sang kalibutan?

¹⁰ Gani, ano ang aton himuon para indi kita makontrol sang espiritu sang kalibutan? Dapat kita magpabilin nga suod kay Jehova kag magpagiya sa iya kaalam. Dapat padayon kita nga mangayo sang iya balaan nga espiritu kag magpabilin nga masako sa pag-alagad sa iya. Si Jehova ang pinakagamhanan nga Persona sa uniberso. Makasalig kita nga mabuligan niya kita nga pamatukan ang espiritu sang kalibutan.—1 Juan 4:4.

11. Paano naimpluwensiahan sang espiritu sang kalibutan ang pamayo sang mga tawo?

¹¹ Mapakita man naton nga indi kita bahin sang kalibutan paagi sa aton pamayo kag pamustura. Nagapamayo  ang madamo nga tawo sa kalibutan para magkuha sang atension, magpukaw sang imoral nga panghunahuna, magpakita sang ila pagrebelde, ukon magpadayawdayaw sang ila ikasarang sa kabuhi. Ang iban naman wala sing labot sa ila pamayo. Ginahungod nila nga mangin indi mahipid ukon mahigko. Wala naton ginatugutan nga maimpluwensiahan sini nga mga panimuot ang aton pamayo kag pamustura.

12, 13. Ano nga mga prinsipio ang makabulig sa aton kon nagapili sang aton mga bayo?

¹² Bilang mga alagad ni Jehova, luyag naton nga pirme  mahipid, matinlo, maayo tan-awon, kag nagakabagay sa kahimtangan ang aton pamayo. Nagapamayo kita nga may “kaugdang kag maligdong nga hunahuna,” para ipakita nga kita “nagasimba sa Dios.”—1 Timoteo 2:9, 10; Judas 21.

¹³ Ang aton pamayo may epekto sa kon paano tamdon sang iban si Jehova kag ang iya katawhan. Luyag naton himuon ang “tanan para sa himaya sang Dios.” (1 Corinto 10:31) Ang kaugdang nagalakip sang pagtahod sa balatyagon kag opinyon sang iban. Gani kon nagapili kita sang aton mga bayo ukon nagadesisyon kon paano kita tan-awon, dumduma nga may epekto ini sa iban.—1 Corinto 4:9; 2 Corinto 6:3, 4; 7:1.

14. Ano ang dapat naton hunahunaon kon nagapili kita sang bayo para sa miting kag sa ministeryo?

¹⁴ Paano kita nagapamayo sa miting ukon sa ministeryo? Ginakuha bala sini ang indi nagakaigo nga atension sang iban? Nasaw-ahan bala sila? Nagabatyag bala kita nga wala sila sing labot? (Filipos 4:5; 1 Pedro 5:6) Siempre, luyag naton nga maayo kita tan-awon, pero ang makapatahom gid sa aton amo ang aton Cristiano nga mga kinaiya. Amo gid ini ang ginatan-aw ni Jehova sa aton. Ginapakita sini kon sin-o kita, ang aton “nasulod nga pagkatawo, . . . nga may daku nga balor sa mga mata sang Dios.”—1 Pedro 3:3, 4.

15. Ngaa wala maghatag si Jehova sang listahan kon ano ang dapat naton bayuon?

¹⁵ Si Jehova wala maghatag sang listahan kon ano ang dapat kag indi dapat bayuon. Sa baylo, naghatag sia sang mga prinsipio sa Biblia, nga makabulig sa aton sa paghimo sang maayo nga desisyon. (Hebreo 5:14) Daku man ukon gamay nga desisyon, luyag ni Jehova nga ibase naton  ini sa aton gugma sa iya kag sa iban. (Basaha ang Marcos 12:30, 31.) Sa bilog nga kalibutan, lainlain ang pamayo sang katawhan ni Jehova depende sa ila kultura kag sa ila nanamian. Matahom ini kag manami tulukon.

16. Paano ang pagtamod sang kalibutan sa kuarta lain sa ginatudlo ni Jesus? Ano ang dapat naton ipamangkot sa aton kaugalingon?

¹⁶ Luyag ni Satanas nga hunahunaon sang mga tawo nga ang kuarta kag materyal amo ang makahatag sang kalipay, pero nahibaluan sang mga alagad ni Jehova nga indi ini matuod. Nagasalig kita sa ginsiling ni Jesus:  “Bisan pa ang tawo madamo sing pagkabutang, indi ini makahatag sa iya sang kabuhi.” (Lucas 12:15) Ang kuarta indi makahatag sang matuod nga kalipay. Indi sini mabakal ang matuod nga mga abyan, kalinong, ukon kabuhi nga wala sing katapusan. Siempre, kinahanglan naton ang materyal, kag luyag naton malipay. Pero gintudluan kita ni Jesus nga mangin malipayon kita kon may maayo kita nga kaangtanan sa Dios kag kon prioridad naton ang pagsimba sa Dios. (Mateo 5:3; 6:22, footnote) Pamangkuta ang imo kaugalingon: ‘Naimpluwensiahan bala ako sang pagtamod sang kalibutan sa kuarta? Kuarta bala pirme ang akon ginahunahuna? Amo na lang bala ini ang ginaistorya ko sa iban?’—Lucas 6:45; 21:34-36; 2 Juan 6.

17. Ano ang resulta kon isikway mo ang pagtamod sang kalibutan sa kuarta?

¹⁷ Mangin malipayon kita kon magpokus kita sa pag-alagad kay Jehova kag sikwayon ang pagtamod sang kalibutan sa kuarta. (Mateo 11:29, 30) Mangin kontento kita kag mangin malinong ang aton hunahuna kag tagipusuon. (Mateo 6:31, 32; Roma 15:13) Mabuhinan ang aton kabalaka sa materyal. (Basaha ang 1 Timoteo 6:9, 10.) Mangin malipayon kita sa paghatag. (Binuhatan 20:35) May madamo kita nga tion sa aton mga pinalangga. Kag mas mahamuok ang aton tulog.—Manugwali 5:12.

18. Ano ang ginatinguhaan ni Satanas nga himuon sa aton?

¹⁸ Ginatinguhaan ni Satanas nga gub-on ang aton kaangtanan kay Jehova, gani dapat naton himuon ang tanan para amligan ini. Nagapakig-away kita “batok sa puersa sang malaut nga mga espiritu.” (Efeso 6:12) Indi luyag ni Satanas kag sang iya mga demonyo nga mangin malipayon kita ukon mabuhi sing wala katapusan.  (1 Pedro 5:8) Ginapamatukan kita sining gamhanan nga mga kaaway, pero sa bulig ni Jehova madaug naton sila!

19. Paano ginalaragway sang Efeso 6:14-18 ang “hinganib” sang Cristiano?

¹⁹ Sadto, ang mga soldado nagasuksok sang hinganib para maamligan sila sa inaway. Sing kaanggid, dapat kita magsuksok sang “hinganib” nga ginhatag ni Jehova. (Efeso 6:13) Maamligan kita sini. Mabasa naton ang parte sa sini nga hinganib sa Efeso 6:14-18: “Magtindog kamo sing malig-on nga may paha sing kamatuoran sa inyo hawak, may panaming sang pagkamatarong sa dughan, kag may kahanda sa pagbantala sing maayong balita sang paghidait nga nasuksok sa inyo mga tiil. Luwas sa sini, gamita ninyo ang daku nga taming sang pagtuo, nga paagi sini mapalong ninyo ang tanan nga nagadabadaba nga baslay sang isa nga malauton. Batuna man ninyo ang helmet sang kaluwasan, kag ang espada sang espiritu, nga amo ang pulong sang Dios, samtang padayon kamo nga nagapangamuyo sa tagsa ka higayon paagi sa espiritu, nga nagagamit sang tanan nga sahi sang pangamuyo kag pag-ampo.”

20. Ano ang dapat naton himuon para maamligan kita sang “hinganib”?

²⁰ Kon malipatan sang soldado ang isa ka bahin sang iya hinganib may parte sang iya lawas nga indi maamligan, dira sia puntariyahon sang iya kaaway. Kon luyag naton nga maamligan sang aton “hinganib,” indi naton pagkalipatan bisan ang isa ka bahin sini. Dapat isuklob naton ini sa tanan nga tion kag mentinahon ini. Padayon kita nga makig-away tubtob nga malaglag ang kalibutan ni Satanas kag wala na si Satanas kag ang iya mga demonyo sa duta. (Bugna 12:17; 20:1-3) Gani kon may  ginapakigbatuan kita nga sayop nga mga handum ukon kaluyahon, indi kita dapat mangampo!—1 Corinto 9:27.

21. Paano kita magdaug sa aton pagpakig-away?

²¹ Kon sa aton lang indi naton masarangan ang Yawa. Pero sa bulig ni Jehova masarangan naton sia! Para makapabilin nga matutom, dapat kita mangamuyo kay Jehova, magtuon sa iya Pulong, kag makig-upod sa kauturan. (Hebreo 10:24, 25) Makabulig ini sa aton nga magpabilin nga mainunungon sa Dios kag mangin handa sa pagpangapin sa aton pagtuo.

22, 23. (a) Paano kita mangin handa pirme sa pagpangapin sang aton pagtuo? (b) Ano ang binagbinagon naton sa masunod nga kapitulo?

²² Dapat handa kita pirme nga pangapinan ang aton pagtuo. (Juan 15:19) May mga isyu nga lain ang pagtamod sang mga Saksi ni Jehova sangsa kalabanan nga tawo. Pamangkuta ang imo kaugalingon: ‘Nahangpan ko gid bala kon ngaa amo sini ang amon pagtamod? Kumbinsido bala ako nga husto ang ginasiling sang Biblia kag sang matutom kag mainandamon nga ulipon? Ginapabugal ko bala nga isa ako ka Saksi ni Jehova? (Salmo 34:2; Mateo 10:32, 33) Mapaathag ko bala sa iban ang akon mga ginapatihan?’—Mateo 24:45; Juan 17:17; basaha ang 1 Pedro 3:15.

²³ Sa masami, maathag gid kon ano ang dapat naton himuon para makapabilin nga indi bahin sang kalibutan. Pero kon kaisa, indi amo sina kaathag. Ginasiod kita ni Satanas sa lainlain nga paagi. Ang isa ka paagi amo ang kalingawan. Paano kita mangin maalamon sa pagpili sang kalingawan? Binagbinagon naton ini sa masunod nga kapitulo.