1-3. (a) Ngaa ginasiguro sang isa ka iloy nga matinlo ang iya bata? (b) Ngaa luyag ni Jehova nga mangin matinlo ang iya katawhan?

IMADYINA nga ginahanda sang mahigugmaon nga iloy ang iya bata para mag-eskwela. Ginasiguro niya nga nakapaligo ang iya bata kag ang iya bayo mahipid kag matinlo. Bangod sini mapagros ang bata kag makita sang iban nga ginaatipan sia sang iya mga ginikanan.

² Luyag ni Jehova, ang aton Amay, nga mangin matinlo kita kag putli. (Salmo 18:26) Nahibaluan niya nga makabenepisyo kita kon matinlo kita. Kag kon matinlo  kita, mapadunggan naton sia.—Ezequiel 36:22; basaha ang 1 Pedro 2:12.

³ Ano ang buot silingon sang mangin matinlo? Kag ngaa makabenepisyo kita kon matinlo kita? Samtang ginabinagbinag naton ini nga mga pamangkot, mahimo nga marealisar naton nga may dapat pa kita bag-uhon.

4, 5. (a) Ngaa dapat kita mangin matinlo? (b) Ano ang ginatudlo sa aton sang pagpanuga parte sa pagtamod ni Jehova sa katinlo?

⁴ Ang halimbawa ni Jehova makatudlo sa aton nga mangin matinlo kag putli. (Levitico 11:44, 45) Gani ang panguna nga rason kon ngaa dapat kita mangin matinlo kay luyag naton mangin ‘manug-ilog sa Dios.’—Efeso 5:1.

⁵ Madamo sing ginatudlo ang pagpanuga parte sa pagtamod ni Jehova sa katinlo. Naghimo si Jehova sang mga siklo para magpabilin nga matinlo ang hangin kag tubig. (Jeremias 10:12) Hunahunaa ang ikasarang sang duta nga magpabilin nga matinlo, bisan pa ginahigkuan ini sang mga tawo. Halimbawa, gindesinyo ni Jehova ang mga mikrobyo, nga makita lamang sa microscope. Ginahimo sini ang higko nga indi na makahalalit. Dalayawon gid ini nga proseso. Ginagamit pa gani sang mga scientist ang mga mikrobyo para batuan ang polusyon.—Roma 1:20.

6, 7. Paano ginapakita sa Kasuguan nga ginhatag sa mga Israelinhon paagi kay Moises nga ang mga nagasimba kay Jehova dapat mangin matinlo?

⁶ Makita man naton sa Kasuguan nga ginhatag ni Jehova sa mga Israelinhon paagi kay Moises nga importante ang katinlo. Halimbawa, dapat matinlo sa pisikal ang mga tawo para batunon ni Jehova ang ila pagsimba. Sa Adlaw sang Pagtumbas Para sa Sala, dapat ang mataas nga saserdote magpaligo sing duha ka beses. (Levitico 16:4, 23, 24)  Kag antes maghalad, ang iban nga saserdote dapat manghinaw sang ila mga kamot kag mga tiil. (Exodo 30:17-21; 2 Cronica 4:6) Sa pila ka kahimtangan, kamatayon ang silot sang indi pagtuman sa mga kasuguan parte sa katinlo.—Levitico 15:31; Numero 19:17-20.

⁷ Kamusta subong? Madamo kita sang matun-an sa Kasuguan parte sa mga talaksan ni Jehova. (Malaquias 3:6) Nagapakita ini nga ang mga sumilimba ni Jehova dapat mangin matinlo. Wala magbag-o ang mga talaksan ni Jehova. Subong, ginapaabot niya gihapon nga mangin matinlo kag putli ang iya mga sumilimba.—Santiago 1:27.

8. Sa ano nga mga paagi dapat kita mangin matinlo?

⁸ Sa pagtamod ni Jehova, ang katinlo indi lang basta matinlo ang aton lawas, bayo, kag puluy-an. Nagadalahig ini sang aton bug-os nga kabuhi. Nagalakip ini sang aton pagsimba, paggawi, kag panghunahuna. Huo, para mangin matinlo kita sa pagtamod ni Jehova, dapat kita mangin matinlo kag putli sa tanan nga aspekto sang aton kabuhi.

9, 10. Ano ang buot silingon nga mangin matinlo sa aton pagsimba?

⁹ Putli nga pagsimba. Dapat indi kita madalahig sa butig nga relihion sa bisan ano nga paagi. Sang ang mga Israelinhon bihag sa Babilonia, napalibutan sila sang mga tawo nga nadalahig sa imoral nga pagano nga relihion. Gintagna ni Isaias nga ang mga Israelinhon magabalik sa Israel kag tukuron nila liwat ang putli nga pagsimba. Ginsilingan sila ni Jehova: “Maggua kamo dira, indi kamo magtandog sang bisan ano nga mahigko! Maggua kamo sa tunga niya, tinlui ninyo ang inyo kaugalingon.” Ang ila pagsimba sa Dios indi dapat simbugan sang mga panudlo,  buhat, ukon kustombre sang butig nga relihion sang Babilonia.—Isaias 52:11.

¹⁰ Subong, ang matuod nga mga Cristiano wala man nadalahig sa butig nga relihion. (Basaha ang 1 Corinto 10:21.) Sa bilog nga kalibutan, madamo sang popular nga tradisyon, kustombre, kag pagpati ang nabase sa panudlo sang butig nga relihion. Halimbawa, madamo nga kultura ang nagapati nga may bahin sa sulod naton nga padayon nga nagakabuhi kon mapatay kita, kag madamo nga kustombre ang nabase sa sini nga pagpati. (Manugwali 9:5, 6, 10) Indi dapat pagsundon sang mga Cristiano ini nga mga kustombre. Mahimo kita piliton sang mga miembro sang aton pamilya nga makigbahin sa pila sa sini. Pero wala kita nagapadala sa ila bangod luyag naton nga tamdon kita ni Jehova nga matinlo.—Binuhatan 5:29.

11. Ano ang buot silingon nga mangin matinlo sa aton paggawi?

¹¹ Putli nga paggawi. Para tamdon kita ni Jehova nga putli, indi kita dapat maghimo sang bisan ano nga sahi sang seksuwal nga imoralidad. (Basaha ang Efeso 5:5.) Sa Biblia, ginasilingan kita ni Jehova nga ‘magpalagyo sa seksuwal nga imoralidad.’ Ginsiling niya nga ang mga imoral nga wala nagahinulsol “indi makapanubli sang Ginharian sang Dios.”—1 Corinto 6:9, 10, 18; tan-awa ang Endnote 22.

12, 13. Ngaa dapat kita mangin matinlo sa aton panghunahuna?

¹² Putli nga panghunahuna. Sa masami, ginahimo naton kon ano ang aton ginahunahuna. (Mateo 5:28; 15:18, 19) Kon putli ang aton ginahunahuna, putli man ang aton ginahimo. Siempre, indi kita himpit, gani kon kaisa makahunahuna kita sang malain. Kon amo sina, dapat isikway naton ini gilayon. Kay kon indi, maabot ang  tion nga mangin indi na putli ang aton tagipusuon. Kag magasugod ang aton handum nga himuon ini. Sa baylo, dapat naton pun-on ang aton panghunahuna sang putli nga mga butang. (Basaha ang Filipos 4:8.) Gani ginalikawan naton ang imoral ukon masingki nga kalingawan. Ginapili naton sing maayo ang aton ginabasa, ginatan-aw, kag ginaistoryahan.—Salmo 19:8, 9.

¹³ Para makapabilin sa gugma sang Dios, dapat kita mangin putli sa aton pagsimba, paggawi, kag panghunahuna. Pero importante man kay Jehova nga mangin matinlo kita sa pisikal.

14. Ngaa importante nga mangin matinlo sa pisikal?

¹⁴ Kon huptan naton nga matinlo ang aton kaugalingon kag ang aton palibot, makabenepisyo kita pati ang iban. Manami ang aton pamatyag, kag manamian ang iban sa aton. Pero may mas importante nga rason kon ngaa dapat mangin matinlo sa pisikal. Nagahatag ini sang kadungganan kay Jehova. Hunahunaa ini: Kon makakita ka sang bata nga pirme mahigko, mahimo maghunahuna ka sing malain sa iya mga ginikanan. Sing kaanggid, kon indi naton pag-atipanon kag huptan nga matinlo ang aton kaugalingon, ang mga tawo mahimo maghunahuna man sing malain kay Jehova. Nagsiling si Pablo: “Wala gid kami nagahatag sang bisan ano nga kasandaran, agod wala sing makita nga sayop sa amon ministeryo; kundi sa tagsa ka paagi ginarekomendar namon ang amon kaugalingon subong mga ministro sang Dios.”—2 Corinto 6:3, 4.

15, 16. Ano ang aton himuon para mahuptan naton ang aton kaugalingon nga matinlo?

¹⁵ Sa aton lawas kag pamayo. Ang paghupot sang aton  kaugalingon nga matinlo dapat mangin rutina naton adlaw-adlaw. Halimbawa, regular kita nga nagapaligo, kon posible adlaw-adlaw. Ginahugasan naton sang habon kag tubig ang aton mga kamot, ilabi na antes magluto ukon magkaon kag pagkatapos maggamit sang kasilyas ukon makatandog sang mahigko. Daw indi importante ang paghugas sang kamot, pero kinahanglanon ini para indi maglapta ang bakterya kag balatian. Makaluwas pa gani ini sang kabuhi. Mahuptan gihapon ang katinlo bisan pa wala kita sing kasilyas. Ang mga Israelinhon sadto wala sing kasilyas, gani ginalubong nila ang ila higko malayo sa panimalay sang mga tawo kag sa ginakuhaan sang tubig.—Deuteronomio 23:12, 13.

¹⁶ Ang aton mga bayo indi kinahanglan nga magarbo, malahalon, ukon sunod sa uso. Ang importante mahipid  ini kag matinlo. (Basaha ang 1 Timoteo 2:9, 10.) Luyag naton pirme nga ang aton panagway makahatag sang kadungganan kay Jehova.—Tito 2:10.

17. Ngaa luyag naton huptan nga matinlo ang aton puluy-an kag palibot?

¹⁷ Sa aton puluy-an kag palibot. Diin man kita nagaistar, ginahuptan naton nga matinlo ang aton puluy-an. Ginasiguro man naton nga matinlo ang aton salakyan, motorsiklo, bisikleta, ukon iban pa, ilabi na kon ginagamit naton ini sa pagtambong sa mga miting ukon sa pagbantala. Kay sa aton pagbantala, ginasugid naton ang parte sa kabuhi sa matinlo nga paraiso nga duta. (Lucas 23:43; Bugna 11:18) Ang katinlo sang aton puluy-an kag palibot magapakita nga nagahanda na kita subong sa kabuhi sa sinang matinlo nga bag-ong kalibutan.

18. Ngaa luyag naton nga matinlo ang aton lugar sang pagsimba?

¹⁸ Sa aton lugar sang pagsimba. Mapakita naton nga importante sa aton ang katinlo kon ginahuptan naton nga matinlo ang aton tilipunan, Kingdom Hall man ini ukon lugar nga ginahiwatan sang aton mga asembleya. Sa masami matalupangdan ini sang mga tawo sa una pa lang nila nga pagkadto sa Kingdom Hall. Nagapadungog ini kay Jehova. Bilang mga miembro sang kongregasyon, tanan kita makabulig sa pagtinlo kag pagmentinar sang aton Kingdom Hall.—2 Cronica 34:10.

19. Ano ang indi naton paghimuon?

¹⁹ Wala ginsambit ang tanan nga bisyo sa Biblia, pero mabuligan kita sang mga prinsipio sa Biblia nga mahangpan ang ginabatyag ni Jehova parte sa sini. Indi niya luyag nga magpanigarilyo kita, magpahubog, ukon magdroga. Kon mga abyan kita sang Dios, indi naton  paghimuon ini nga mga butang. Ngaa? Bangod ginatahod gid naton ang regalo nga kabuhi. Ina nga mga bisyo nagapalip-ot sang aton kabuhi kag nagahalit sa aton panglawas kag sa iban. Madamo nga tawo ang nag-untat sa sining malain nga mga bisyo bangod sa ila panglawas. Pero, bilang mga abyan ni Jehova, may pinakamaayo kita nga rason sa pag-untat—ang aton gugma sa Dios. Ang isa ka pamatan-on nga babayi nagsiling: “Sa bulig ni Jehova, natinluan ko ang akon kabuhi kag nadula ko ang akon mga bisyo. . . . Kon sa akon lang, indi ko mahimo ini.” Binagbinagon naton ang lima ka prinsipio sa Biblia nga makabulig para mauntatan ang makahalalit nga mga bisyo.

20, 21. Ano ang luyag ni Jehova para indi mahalitan ang aton hunahuna kag lawas?

²⁰ “Mga hinigugma, tungod sining ginsaad sa aton, tinluan naton ang aton kaugalingon sa tanan nga nagapahigko sang lawas kag tagipusuon, agod mangin mas balaan kita samtang nagakahadlok sa Dios.” (2 Corinto 7:1) Luyag ni Jehova nga wala kita sang mga bisyo kay makahalit ini sa aton hunahuna kag lawas.

²¹ Ginsiling sa 2 Corinto 6:17, 18 ang importante nga rason kon ngaa “tinluan naton ang aton kaugalingon sa tanan nga nagapahigko.” Si Jehova nagsiling sa aton: “Untati ninyo ang pagtandog sa indi matinlo nga butang.” Dayon nagsiling sia: “Batunon ko kamo. Kag ako mangin inyo amay, kag kamo mangin akon mga anak nga lalaki kag mga anak nga babayi.” Huo, higugmaon kita ni Jehova kaangay sang paghigugma sang isa ka amay sa iya mga anak kon indi naton paghimuon ang bisan ano nga makapahigko ukon makadagta sa aton sa iya panulok.

22-25. Ano nga mga prinsipio sa Biblia ang makabulig sa aton para mauntatan ang mga bisyo?

 ²² “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Amo ini ang pinakaimportante nga sugo. (Mateo 22:38) Takus gid si Jehova sang aton bug-os nga gugma. Paano naton sia mahigugma sing bug-os kon may ginahimo kita nga makapalip-ot sang aton kabuhi ukon makahalit sa aton utok? Gani, ginahimo naton ang tanan para ipakita nga ginatahod naton ang ginhatag niya nga kabuhi.

²³ “[Si Jehova] ang nagahatag sa tanan nga tawo sang kabuhi kag sang ginhawa kag sang tanan nga butang.” (Binuhatan 17:24, 25) Kon ginhatagan ka sang espesyal nga regalo sang imo abyan, ihaboy mo bala ini ukon gub-on? Ang kabuhi hamili nga regalo halin kay Jehova. Ginapabaloran gid naton ini. Gani luyag naton nga gamiton ini para mahimaya sia.—Salmo 36:9.

²⁴ “Higugmaa ang imo isigkatawo subong sang imo kaugalingon.” (Mateo 22:39) Indi lang kita ang mahalitan sang mga bisyo. Mahalitan man sini ang iban, sa masami ang aton mga pinalangga. Halimbawa, ang tawo nga nagaistar upod sa nagapanigarilyo puede magmasakit sing malubha bangod lang sa aso sang sigarilyo. Pero kon untatan naton ang mga bisyo, mapakita naton nga ginahigugma naton sila.—1 Juan 4:20, 21.

²⁵ “Padayon nga ipahanumdom sa ila nga magpasakop kag mangin matinumanon sa mga panguluhan kag mga awtoridad.” (Tito 3:1) Sa madamo nga lugar, batok sa kasuguan ang paghupot ukon paggamit sang pila ka sahi sang droga. Bangod ginsugo kita ni Jehova nga tahuron ang gobierno, ginatuman naton ini nga mga kasuguan.—Roma 13:1.

26. (a) Ano ang dapat naton himuon para batunon ni Jehova ang aton pagsimba? (b) Ngaa ang pagpabilin nga matinlo sa panulok sang Dios amo ang pinakamaayo nga paagi sang pagkabuhi?

 ²⁶ Kon luyag naton nga mangin abyan ni Jehova, mahimo may mga dapat kita bag-uhon. Kon amo sina, dapat naton ini himuon gilayon. Indi gid mahapos nga untatan ang isa ka bisyo, pero masarangan naton ini! Nagpromisa si Jehova nga buligan niya kita. Nagsiling sia: “Ako si Jehova nga imo Dios, ang nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan.” (Isaias 48:17) Kon ginahimo naton ang aton pinakamasarangan para magpabilin nga matinlo kag putli, makasiguro kita nga mapadunggan naton ang aton Dios.