1, 2. Paano ginhalitan ni Balaam ang katawhan ni Jehova?

ANG manugpamunit nagkadto sa isa ka lugar para mabunit ang isda nga luyag niya. Nagpili sia sing paon, ginbutang niya ini sa taga, kag gintawtaw sa tubig. Naghulat sia, kag sang gintukob sang isda ang paon, ginbunit niya ang isda.

² Sing kaanggid, ang mga tawo posible man mabunit. Halimbawa, ang mga Israelinhon malapit na lang kuntani sa Ginsaad nga Duta sang nagkampo sila sa Kapatagan sang Moab. Ang hari sang Moab nagpromisa kay Balaam nga hatagan niya sia sang madamo nga kuarta kon pakamalauton niya ang Israel. Sang ulihi, nakakita sang paagi si Balaam para pakamalauton sang mga Israelinhon ang ila kaugalingon. Ginpili niya sing maayo ang paon. Ginpakadto niya ang bataon nga mga babayi sang Moab sa kampo sang mga Israelinhon para ganyaton ang mga lalaki.—Numeros 22:1-7; 31:15, 16; Bugna 2:14.

3. Paano nagtukob ang mga Israelinhon sa paon ni Balaam?

 ³ Epektibo bala ang paon ni Balaam? Huo. Linibo ka lalaki nga Israelinhon ang “nagpakighilawas . . . sa mga anak nga babayi sang Moab.” Nagsimba man sila sa butig nga mga dios, lakip na sa makangilil-ad nga dios sang sekso, ang Baal sang Peor. Gani 24,000 ka Israelinhon ang napatay sa dulunan sang Ginsaad nga Duta.—Numeros 25:1-9.

4. Ngaa linibo ka Israelinhon ang naghimo sang imoralidad?

⁴ Ngaa madamo nga Israelinhon ang nagtukob sa paon ni Balaam? Ginhunahuna lang nila ang ila kaugalingon nga handum, kag ginkalimtan nila ang tanan nga ginhimo ni Jehova para sa ila. Madamo sang rason ang mga Israelinhon nga mangin mainunungon sa Dios. Ginhilway niya sila sa pagkaulipon sa Egipto, ginpakaon sa kahanayakan, kag gin-amligan asta makalab-ot sa dulunan sang Ginsaad nga Duta. (Hebreo 3:12) Pero, naganyat sila gihapon sang seksuwal nga imoralidad. Si apostol Pablo nagsulat: “Indi man kita maghimo sang seksuwal nga imoralidad, subong sang ginhimo sang iban sa ila.”—1 Corinto 10:8.

5, 6. Ano ang aton matun-an sa natabo sa Kapatagan sang Moab?

⁵ Malapit na gid ang bag-o nga kalibutan. Gani kaangay kita sa mga Israelinhon nga yara sa dulunan sang Ginsaad nga Duta. (1 Corinto 10:11) Ang kalibutan subong mas buangbuang sa sekso sangsa mga taga-Moab sadto. Madali sini maapektuhan ang katawhan ni Jehova. Ang matuod, ang pinakaepektibo nga paon sang Yawa amo ang seksuwal nga imoralidad.—Numeros 25:6, 14; 2 Corinto 2:11; Judas 4.

⁶ Pamangkuta ang imo kaugalingon, ‘Mas gustuhon ko bala ang umalagi nga kalipay, sangsa wala sing  katapusan kag malipayon nga kabuhi sa bag-o nga kalibutan?’ Takus gid nga tumanon ang sugo ni Jehova nga “palagyo kamo sa seksuwal nga imoralidad!”—1 Corinto 6:18.

7, 8. Ano ang seksuwal nga imoralidad? Ngaa serioso ini?

⁷ Madamo nga tawo subong ang may matampalason nga panimuot kag hayag nga wala nagatahod sa mga kasuguan sang Dios parte sa sekso. Sa Biblia, ang seksuwal nga imoralidad nagapatuhoy sa seksuwal nga mga buhat sang mga tawo nga wala makasal suno sa Kasulatan. Nalakip sa sini ang seksuwal nga mga buhat sang pareho nga lalaki ukon babayi, kag sang tawo kag sapat. Lakip sa seksuwal nga mga buhat ang pagpakigsekso, oral sex, anal sex, ukon ang paghapulas sa kinatawo sang iban.—Tan-awa ang Endnote 23.

⁸ Ang Biblia maathag nga nagasiling nga kon ang isa padayon nga nagahimo sang seksuwal nga imoralidad, indi sia makapabilin sa kongregasyon. (1 Corinto 6:9; Bugna 22:15) Dugang pa, madula sang imoral nga tawo ang pagtahod sa iya kaugalingon kag ang pagsalig sang iban. Ang imoralidad pirme nagaresulta sa problema. Sa masami, nagaresulta ini sa pagtublag sang konsiensia, wala ginplano nga pagbusong, problema sa pag-asawahay, balatian, ukon kamatayon pa gani. (Basaha ang Galacia 6:7, 8.) Kon hunahunaon anay sang isa ang resulta sang imoralidad, indi gid niya paghimuon ini. Pero sa kalabanan, kon ginahimo sang isa ang una nga tikang padulong sa imoralidad, ang una niya nga ginahunahuna amo ang pagpaayaw sa iya kailigbon. Inang una nga tikang, sa masami, amo ang pornograpiya.

9. Ngaa makatalagam ang pornograpiya?

⁹ Ang pornograpiya gindesinyo para pukawon ang aton seksuwal nga mga kailigbon. Subong, lapnag gid ang pornograpiya—sa mga magasin, libro, musika, palaguaon sa telebisyon, kag sa Internet. Para sa madamo indi ini malain, pero ang matuod, makatalagam gid ini. Bangod sini, ang isa posible maadik sa sekso kag mangin indi normal ang iya pagtamod sa sekso. Makadul-ong man ini sa masturbasyon, problema sa pag-asawahay, kag pagbulagay pa gani.—Roma 1:24-27; Efeso 4:19; tan-awa ang Endnote 24.

10. Paano kita mabuligan sang prinsipio sa Santiago 1:14, 15 nga malikawan ang imoralidad?

¹⁰ Importante nga mahangpan naton kon paano makahaylo sa aton ang seksuwal nga imoralidad. Talupangda ang paandam sa Santiago 1:14, 15: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon. Dayon ang kailigbon, kon nakapanamkon na, nagabun-ag sang sala; ang sala naman, kon nahimo na, nagaresulta sa kamatayon.” Gani kon makahunahuna ka sang malain, isikway ini gilayon. Kon makakita ka sing makapukaw sa seksuwal nga kailigbon, untati gilayon ang pagtan-aw. Patya ang imo kompyuter, ukon isli ang imo ginatan-aw. Indi pagtuguti ang malain nga mga kailigbon kay mangin tuman ini kabaskog kag mabudlay kontrolon.—Basaha ang Mateo 5:29, 30.

11. Paano kita mabuligan ni Jehova kon makahunahuna kita sang imoral?

¹¹ Mas kilala kita ni Jehova sangsa pagkilala naton sa aton kaugalingon. Nakahibalo gid sia nga indi kita  himpit. Pero nakahibalo man sia nga malandas naton ang malain nga mga kailigbon. Ginasilingan kita ni Jehova: “Gani, patya ninyo ang mga bahin sang inyo lawas nga may dutan-on nga huyog subong sang seksuwal nga imoralidad, kahigkuan, indi mapunggan nga kailigbon sa sekso, makahalalit nga handum, kag kakagod nga isa ka sahi sang pagsimba sa mga diosdios.” (Colosas 3:5) Indi ini mahapos himuon, pero si Jehova mapinasensiahon sa aton kag buligan niya kita. (Salmo 68:19) Ang isa ka pamatan-on nga utod nga lalaki naadik sa pagtan-aw sang pornograpiya kag sa masturbasyon. Para sa iya mga abyan sa eskwelahan, normal lang ini nga bahin sang pagsinoltero, pero nagsiling sia: “Nahalitan sini ang akon konsiensia, kag nangin imoral ang akon pagkabuhi.” Narealisar niya nga dapat niya kontrolon ang iya mga kailigbon, kag sa bulig ni Jehova, nauntatan niya ang pagtan-aw sang pornograpiya kag  ang masturbasyon. Kon makahunahuna ka sang imoral, pangabaya si Jehova sang “gahom nga labaw sa kinaandan” para mahuptan mo nga matinlo ang imo panghunahuna.—2 Corinto 4:7; 1 Corinto 9:27.

12. Ngaa dapat naton ‘bantayan ang aton tagipusuon’?

¹² Si Solomon nagsulat: “Labaw sa tanan nga dapat mo bantayan, bantayi ang imo tagipusuon, kay nagahalin sa sini ang mga tuburan sang kabuhi.” (Hulubaton 4:23) Ang aton “tagipusuon” amo ang aton nasulod nga pagkatawo, amo ini ang ginatan-aw ni Jehova. Daku ang epekto sa aton sang aton ginatan-aw. Ang matutom nga si Job nagsiling: “Nakigkatipan ako sa akon mga mata. Gani paano ako makapakita sing indi nagakaigo nga igtalupangod sa isa ka dalaga?” (Job 31:1) Pareho kay Job, dapat naton pilion ang aton ginatan-aw kag kontrolon ang aton ginahunahuna. Kag pareho sa salmista, nagapangamuyo kita: “Ilikaw ang akon mga mata sa pagtan-aw sa wala sing pulos nga mga butang.”—Salmo 119:37.

13. Ano nga mga abyan ang ginpili ni Dina?

¹³ Ang aton mga abyan may daku nga epekto sa aton, maayo man ukon malain. Kon pilion mo ang mga abyan nga nagasunod sa talaksan sang Dios, mabuligan ka nila nga sundon man ini. (Hulubaton 13:20; basaha ang 1 Corinto 15:33.) Makatuon kita nga importante ang pagpili sang aton mga abyan sa natabo kay Dina. Isa sia sa mga anak nga babayi ni Jacob, gani nagdaku sia sa pamilya nga nagasimba kay Jehova. Indi sia imoral, pero nakigsuod sia sa mga babayi nga Canaanhon nga wala nagasimba kay Jehova. Tuhay gid ang pagtamod  sang mga Canaanhon sa katawhan sang Dios parte sa sekso kag kilala sila nga imoral. (Levitico 18:6-25) Sang upod ni Dina ang iya mga abyan, nakilala niya ang Canaanhon nga si Siquem, kag nagustuhan niya si Dina. Si Siquem ang “pinakadungganon” nga pamatan-on sa ila panimalay. Pero wala niya ginahigugma si Jehova.—Genesis 34:18, 19.

14. Ano ang natabo kay Dina?

¹⁴ Ginhimo ni Siquem ang para sa iya natural lang kag nagakaigo. Bangod nagustuhan niya si Dina, “ginkuha niya si Dina kag ginlugos.” (Basaha ang Genesis 34:1-4.) Nagresulta ini sa sunodsunod nga trahedya nga natabo kay Dina kag sa iya pamilya.—Genesis 34:7, 25-31; Galacia 6:7, 8.

15, 16. Paano kita mangin maalamon?

¹⁵ Indi kinahanglan nga maagyan naton ang natabo kay Dina para mahibaluan nga para sa aton kaayuhan ang talaksan sa moral ni Jehova. “Ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang mapahamak.” (Hulubaton 13:20) Himua nga tulumuron nga mahangpan mo ang “bug-os nga dalanon sang kaayo,” kag malikawan mo ang kasakit kag pag-antos.—Hulubaton 2:6-9; Salmo 1:1-3.

¹⁶ Mangin maalamon kita paagi sa pagtuon sa Pulong sang Dios, pagpangamuyo sa iya antes magdesisyon, kag pagsunod sa maayo nga laygay sang matutom kag mainandamon nga ulipon. (Mateo 24:45; Santiago 1:5) Siempre, nakahibalo ka nga tanan kita maluya kag indi himpit. (Jeremias 17:9) Pero ano ang imo reaksion kon paandaman ka nga ang imo ginahimo magaresulta  sa imoralidad? Maakig ka bala, ukon batunon mo sing mapainubuson ang paandam?—2 Hari 22:18, 19.

17. Maghatag sing halimbawa kon paano ang laygay sang masigka-Cristiano makabulig sa aton.

¹⁷ Halimbawa, sa ulubrahan sang isa ka utod nga babayi, may isa ka lalaki nga nagpakita sa iya sang pinasahi nga atension kag ginhagad sia nga magdeyt. Indi sia alagad ni Jehova, pero daw maayo man sia kag mabuot. Nakita sila sang isa ka utod nga babayi nga nagaupdanay kag sang ulihi ginpaandaman niya sia. Ano ang mangin reaksion sang utod nga babayi? Marason bala sia, ukon pamatian niya ang paandam? Palangga sang utod nga babayi si Jehova kag luyag niya himuon ang husto. Pero kon padayon sia nga makigdeyt, nagapalagyo bala sia sa seksuwal nga imoralidad ukon “nagasalig sa iya kaugalingon”?—Hulubaton 22:3; 28:26; Mateo 6:13; 26:41.

18, 19. Ipaathag kon paano nakapalagyo si Jose sa imoralidad.

¹⁸ Si Jose isa ka pamatan-on sang nangin ulipon sia sa Egipto. Adlaw-adlaw nga ginahambalan sia sang asawa sang iya agalon nga makigsekso sa iya, pero nakahibalo sia nga sala ini. Ginahigugma ni Jose si Jehova kag luyag niya sia pahamut-an. Gani sa kada tion nga ginaganyat sia sang babayi, nangindi sia. Bangod ulipon sia, indi puede nga basta na lang niya bayaan ang iya agalon. Isa ka adlaw, sang ginpilit sia sang asawa sang iya agalon nga makigsekso, “nagpalagyo sia.”—Basaha ang Genesis 39:7-12.

¹⁹ Indi amo sina ang natabo kon gintugutan ni Jose ang imoral nga panghunahuna ukon nagadalamguhanon sia parte sa asawa sang iya agalon. Ang pinakaimportante kay Jose amo ang iya kaangtanan kay Jehova. Ginsilingan niya ang babayi: ‘Ang akon agalon wala gid sing gindingot sa akon kundi ikaw lamang, bangod asawa ka niya. Gani paano ko mahimo ining daku nga kalainan kag magpakasala batok sa Dios?’—Genesis 39:8, 9.

20. Ngaa masiling naton nga nahamuot si Jehova kay Jose?

²⁰ Bisan malayo si Jose sa iya pamilya kag puluy-an, mainunungon gid sia sa Dios, kag ginpakamaayo sia ni Jehova. (Genesis 41:39-49) Nahamuot si Jehova sa pagkamainunungon ni Jose. (Hulubaton 27:11) Mabudlay pakigbatuan ang imoralidad. Pero dumduma ini nga pinamulong: “O kamo nga nagahigugma kay Jehova, dumti ang malaut. Ginaamligan niya ang kabuhi sang mga mainunungon sa iya; ginaluwas niya sila sa kamot sang malauton.”—Salmo 97:10.

21. Paano gin-ilog sang isa ka pamatan-on nga utod nga lalaki si Jose?

²¹ Adlaw-adlaw, maisog nga ginapakita sang katawhan  ni Jehova nga ‘ginadumtan nila ang malain’ kag ‘ginahigugma ang maayo.’ (Amos 5:15) Puede ka mangin matutom kay Jehova bisan ano man ang imo edad. Sa eskwelahan, natilawan ang pagtuo sang isa ka pamatan-on nga utod nga lalaki. Ginsilingan sia sang isa ka babayi nga makigsekso sa iya kon buligan niya sia sa test sa math. Ano ang ginhimo sang utod? Pareho man sa ginhimo ni Jose. Nagsiling sia: “Ginpangindian ko sia gilayon. Kay ginhuptan ko ang akon integridad, wala ko madula ang akon dignidad kag pagtahod sa kaugalingon.” Ang bisan ano nga “umalagi nga pagpangalipay” sa imoralidad masami nga nagadul-ong sa kasakit. (Hebreo 11:25) Ang pagtuman kay Jehova pirme nagaresulta sa dayon nga kalipay.—Hulubaton 10:22.

22, 23. Paano kita mabuligan ni Jehova bisan pa nakahimo kita sing serioso nga sala?

²² Gamiton ni Satanas ang seksuwal nga imoralidad sa pagsiod sa aton, kag mabudlay gid ini pakigbatuan. Tanan kita makahunahuna sing malain kon kaisa. (Roma 7:21-25) Nahangpan ini ni Jehova kag ginadumdom niya nga “kita yab-ok lamang.” (Salmo 103:14) Ano abi kon ang isa ka Cristiano nakahimo sang imoralidad? Mapatawad pa bala sia? Huo. Kon mahinulsulon gid sia, buligan sia ni Jehova. Ang Dios “handa sa pagpatawad.”—Salmo 86:5; Santiago 5:16; basaha ang Hulubaton 28:13.

²³ Ginhatagan man kita ni Jehova sang “mga dulot nga mga lalaki”—mahigugmaon nga mga gulang nga nagatatap sa aton. (Efeso 4:8, 12; Santiago 5:14, 15) Gin-aman niya ang mga gulang para buligan kita nga mapasag-uli ang aton kaangtanan sa iya.—Hulubaton 15:32.

24, 25. Paano ang “maayo nga paghangop” makabulig nga malikawan naton ang imoralidad?

²⁴ Para makadesisyon sing maayo, dapat mahangpan naton ang benepisyo sang pagsunod sa kasuguan ni Jehova. Indi naton luyag mangin pareho sa pamatan-on nga lalaki nga ginlaragway sa Hulubaton 7:6-23. Kulang sia sa “maayo nga paghangop,” gani nagtukob sia sa paon sang seksuwal nga imoralidad. Ang maayo nga paghangop indi lang basta kaalam. Kon may maayo kita nga paghangop, ginatinguhaan naton nga hangpon ang panghunahuna sang Dios kag ginaaplikar ini. Dumduma ining maalamon nga pinamulong: “Ang nagatigayon sing maayo nga paghangop nagahigugma sang iya kaugalingon. Ang nagapakabahandi sang paghantop makasapo sing kadalag-an.”—Hulubaton 19:8.

²⁵ Kumbinsido ka gid bala nga husto ang mga talaksan sang Dios? Nagapati ka gid bala nga malipay ka kon sundon mo ini? (Salmo 19:7-10; Isaias 48:17, 18) Kon indi ka pa sigurado, dumduma ang tanan nga maayo nga ginhimo ni Jehova para sa imo. ‘Tilawi kag tan-awa nga si Jehova maayo.’ (Salmo 34:8) Kon himuon mo ina, mas higugmaon mo ang Dios. Higugmaa ang ginahigugma niya, kag dumti ang ginadumtan niya. Pun-a ang imo hunahuna sang maayo nga mga butang—mga butang nga matuod, matarong, matinlo, hiligugmaon, kag maayo. (Filipos 4:8, 9) Puede kita mangin pareho kay Jose nga nakabenepisyo sa kaalam ni Jehova.—Isaias 64:8.

26. Ano ang masunod naton nga pagabinagbinagon?

²⁶ Minyo ka man ukon indi, luyag ni Jehova nga mangin malipayon ka. Binagbinagon naton sa masunod nga duha ka kapitulo kon paano mangin madinalag-on ang pag-asawahay.