1, 2. Ano ang dapat naton maintiendihan parte kay Satanas kag sa mga demonyo?

MATAHOM gid ang mangin kabuhi sa bag-ong kalibutan ni Jehova. Amo na ina ang tion nga magakabuhi kita suno sa katuyuan gid sang Dios. Pero subong nagakabuhi kita sa kalibutan nga ginakontrol ni Satanas kag sang iya mga demonyo. (2 Corinto 4:4) Bisan pa indi naton sila makita, nagaluntad sila kag gamhanan gid.

² Sa sini nga kapitulo, binagbinagon naton kon paano kita makapabilin nga suod kay Jehova kag maproteksionan ang aton kaugalingon kay Satanas. Nagpromisa si Jehova nga buligan niya kita. Pero dapat maintiendihan naton ang mga pamaagi ni Satanas kag sang mga demonyo sa pagdaya kag pag-atake sa aton.

3. Ano ang gusto himuon ni Satanas sa aton?

³ Nagsiling si Satanas nga ang mga tawo nagasimba kay Jehova kay may makuha sila kag mauntat na sila sa pag-alagad sa Iya kon mabudlay na ang sitwasyon. (Basaha ang Job 2:4, 5.) Kon ipakita sang isa nga gusto niya magtuon parte kay Jehova, makita ini ni Satanas kag sang mga demonyo kag tinguhaan nila nga pauntaton sia. Naakig sila kon ang tawo magdedikar kay Jehova kag magpabawtismo. Ginkumparar sang Biblia ang Yawa sa  “nagangurob nga leon, nga nagapangita sing tulukbon.” (1 Pedro 5:8) Gusto gub-on ni Satanas ang aton relasyon kay Jehova.—Salmo 7:1, 2; 2 Timoteo 3:12.

4, 5. (a) Ano ang indi mahimo ni Satanas? (b) Paano naton ‘pamatukan ang Yawa’?

⁴ Pero indi kita dapat mahadlok kay Satanas kag sa iya mga demonyo. Ginlimitehan ni Jehova ang ila mahimo sa aton. Nagpromisa si Jehova nga may “daku nga kadam-an” sang matuod nga mga Cristiano nga makaluwas sa “dakung kapipit-an.” (Bugna 7:9, 14) Wala sing mahimo  ang Yawa para punggan ina kay ginaproteksionan ni Jehova ang Iya katawhan.

⁵ Kon magpabilin kita nga suod kay Jehova, indi maguba ni Satanas ang aton relasyon sa Iya. Ginapasalig kita sang Pulong sang Dios: “Kaupod ninyo si Jehova kon padayon kamo nga mag-upod sa iya.” (2 Cronica 15:2; basaha ang 1 Corinto 10:13.) Madamo sang matutom nga mga tawo sang una pareho nanday Abel, Enoc, Noe, Sara, kag Moises, ang nakapamatok sa Yawa bangod nagpabilin sila nga suod kay Jehova. (Hebreo 11:4-40) Mahimo man naton ina. Nagpromisa ang Pulong sang Dios: “Pamatuki ang Yawa, kag magapalagyo sia sa inyo.”—Santiago 4:7.

6. Paano kita ginaatake ni Satanas?

⁶ Bisan pa nahibaluan ni Satanas nga ginlimitehan ni Jehova ang iya mahimo sa aton, ginahimo niya ang tanan para paluyahon ang aton relasyon sa Dios. Subong, ang Yawa nagaatake sa madamo nga paagi, kag ginagamit niya ini nga mga pamaagi sa linibo na ka tuig. Ano ang pila sini?

7. Ngaa ginaatake ni Satanas ang katawhan ni Jehova?

⁷ Si apostol Juan nagsulat: “Ang bug-os nga kalibutan yara sa gahom sang isa nga malauton.” (1 Juan 5:19) Ginakontrol ni Satanas ining malain nga kalibutan kag gusto man niya kontrolon ang katawhan ni Jehova. (Miqueas 4:1; Juan 15:19; Bugna 12:12, 17) Nakahibalo ang Yawa nga diutay na lang ang iya nabilin nga tion, gani ginasulay gid niya ang kada isa sa aton nga mangin indi matutom sa Dios. Kon kaisa ginagamit sang Yawa ang direkta nga pag-atake, pero nagagamit man sia sing indi hilmunon nga pag-atake.

8. Ano ang dapat dumdumon sang tanan nga Cristiano?

 ⁸ Mabasa naton sa Efeso 6:12: “Nagapakig-away [“nagapakigdumog,” footnote] kita, . . . batok sa puersa sang malaut nga mga espiritu sa langitnon nga mga lugar.” Ang kada isa sa aton personal nga nagapakig-away sa Yawa kag sa mga demonyo. Dapat dumdumon naton nga ang kada isa nga nakadedikar kay Jehova nadalahig sa sini nga pagpakig-away. Sa iya sulat sa mga taga-Efeso, tatlo ka beses nga ginlaygayan ni apostol Pablo ang mga Cristiano nga ‘magtindog sing malig-on.’—Efeso 6:11, 13, 14.

9. Ano ang gusto himuon sa aton ni Satanas kag sang mga demonyo?

⁹ Ginadaya kita sang mga demonyo sa lainlain nga paagi. Indi buot silingon nga kon nagdaug kita kay Satanas sa isa ka paagi, indi na niya kita madaug sa iban nga paagi. Ginapangita sang Yawa kon ano ang aton mga kaluyahon para makapili sia sing siod nga iya gamiton. Pero puede kita makalikaw kay ginatudluan kita sang Biblia parte sa mga siod sang Yawa. (2 Corinto 2:11; Tan-awa ang Endnote 31.) Ang isa sini amo ang demonismo.

10. (a) Ano ang demonismo? (b) Ano ang pagtamod ni Jehova sa demonismo?

¹⁰ Ang demonismo amo ang pagpakig-angot sang isa ka tawo sa mga demonyo paagi sa pagpamakot, paghiwit, pag-orasyon, ukon pag-istorya sa patay. Ginasugiran kita sang Biblia nga ang demonismo “makangilil-ad” kag indi kita puede makigbahin sa demonismo kag sa amo man nga tion magsimba kay Jehova. (Deuteronomio 18:10-12; Bugna 21:8) Dapat likawan gid sang mga Cristiano ang tanan nga sahi sang demonismo.—Roma 12:9.

11. Ano ang mahimo matabo kon manamian kita sa makatilingala nga mga butang?

 ¹¹ Nakahibalo si Satanas nga kon manamian kita sa makatilingala nga mga butang, mahapos lang niya kita maengganyo sa demonismo. Ang tanan nga sahi sang demonismo makaguba sang aton relasyon kay Jehova.

12. Paano ginadaya ni Satanas ang aton panghunahuna?

¹² Ginadaya ni Satanas ang panghunahuna sang mga tawo. Amat-amat niya kita nga ginadaya nga magduhaduha asta nga maghunahuna kita nga “ang maayo malain kag ang malain maayo.” (Isaias 5:20) Ginapalapnag sang Yawa ang ideya nga ang laygay sang Biblia indi maayo kag mas malipayon kita kon indi naton pagsundon ang mga ginapatuman sang Biblia.

13. Paano si Satanas nagapalapta sang pagpangduhaduha?

¹³ Ang pagpalapta sang pagpangduhaduha isa sa epektibo gid nga pamaagi ni Satanas. Madugay na niya ini nga ginagamit. Sa hardin sang Eden, ginpaduhaduha niya si Eva sang ginpamangkot niya sia: “Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?” (Genesis 3:1) Sang ulihi, sang panahon ni Job, ginpamangkot ni Satanas si Jehova sa atubangan sang mga anghel: “Nahadlok bala si Job sa Dios sa wala sing rason?” (Job 1:9) Pagkatapos sang bawtismo ni Jesus, ginhangkat sia ni Satanas paagi sa pagsiling: “Kon ikaw anak sang Dios, sugua ining mga bato nga mangin mga tinapay.”—Mateo 4:3.

14. Ano ang ginahimo ni Satanas agod magduhaduha ang mga tawo kon bala malain gid ang demonismo?

¹⁴ Asta subong, ang Yawa nagapalapta gihapon sang pagpangduhaduha. Indi na sigurado ang mga tawo kon bala malain gid ang demonismo kay ginapagua niya ang  pila ka sahi sini nga OK lang. Bisan gani ang pila ka Cristiano nadaya sa sini. (2 Corinto 11:3) Gani, paano naton maproteksionan ang aton kaugalingon? Paano naton masigurado nga indi kita madayaan ni Satanas? Binagbinagon naton ang duha ka bahin nga puede kita madaya: ang kalingawan kag pagpabulong.

15. Paano kita makapakig-angot sa mga demonyo paagi sa aton kalingawan?

¹⁵ Subong, madamo nga pelikula, video, palaguaon sa TV, mga hampang sa kompyuter, kag mga site sa Internet ang may mga demonyo, madyik, kag makatilingala nga mga gahom. Abi sang madamo kalingawan lang ini pero wala sila nakahibalo nga ginapasulod gali nila ang mga demonyo sa ila kabuhi. Ang iban makapakig-angot sa mga demonyo paagi sa mga horoscope, paghimalad, tarot nga mga baraha, kag bola nga kristal. Ginapagua sang Yawa nga indi ini delikado kag ginahimo ini nga misteryoso, makatilingala, kag masadya. Ang isa mahimo pa gani maghunahuna nga wala sing malain kon magtan-aw sang parte sa mga demonyo, madyik, ukon may makatilingala nga gahom, basta wala lang sia aktual nga nagahimo sing demonismo. Ngaa delikado ina nga panghunahuna?—1 Corinto 10:12.

16. Ngaa dapat naton likawan ang mga kalingawan parte sa makatilingala nga mga gahom?

¹⁶ Indi mabasa ni Satanas kag sang mga demonyo ang aton hunahuna. Pero matun-an nila kon ano ang aton ginahandum kag ginahunahuna paagi sa pagpanilag sa mga ginapili naton kag sang aton pamilya, lakip ang aton ginapili nga mga kalingawan. Kon ang ginapili naton  nga mga pelikula, musika, ukon libro, parte sa mga babaylan, madyik, mga tawo nga nasudlan sang demonyo, aswang, bampira, ukon iban pa nga pareho sini, mahibaluan ni Satanas kag sang mga demonyo nga interesado kita sa ila. Mahimo tinguhaan pa gid nila nga hayluhon kita sa mas malala nga sahi sang demonismo.—Basaha ang Galacia 6:7.

17. Paano hingalitan ni Satanas ang aton handum nga mag-ayo ang panglawas?

¹⁷ Puede man hingalitan ni Satanas ang aton handum nga mag-ayo ang panglawas. Madamo subong ang nagabalatian, kag posible madamo na nga paagi sang  pagbulong ang gintilawan sang isa pero wala gihapon sia mag-ayo. (Marcos 5:25, 26) Ayhan madulaan na sia sing paglaum kag handa sia himuon ang bisan ano. Pero bilang mga Cristiano, dapat maghalong kita nga indi magpili sing pagbulong nga may nadalahig nga “madyik.”—Isaias 1:13.

18. Ano nga pagbulong ang dapat naton likawan?

¹⁸ Sang dumaan nga Israel, may pila nga naggamit sing “madyik.” Ginsilingan sila ni Jehova: “Kon ibayaw ninyo ang inyo mga kamot sa pagpangamuyo, magapabulagbulag ako. Bisan ano kadamo ang inyo pangamuyo, indi ako magpamati.” (Isaias 1:15) Hunahunaa—indi na magpamati si Jehova sa ila pangamuyo! Indi naton gusto nga may magguba sang aton relasyon kay Jehova amo nga indi na sia makabulig sa aton, ilabi na gid kon nagamasakit kita. (Salmo 41:3) Gani dapat siguraduhon naton nga ang ginahunahuna naton nga pagbulong wala sing koneksion sa mga demonyo ukon sa madyik. (Mateo 6:13) Kon may posibilidad nga may koneksion ini, dapat naton ini likawan!—Tan-awa ang Endnote 32.

19. Paano ginapahadlok sang Yawa ang madamo nga tawo?

¹⁹ Kon may nagahunahuna nga ang Yawa kag mga demonyo imahinasyon lang, may nagapati man nga matuod gid sila bangod sa ila naeksperiensiahan. Madamo ang ginahadlukan pirme bangod sa malain nga mga espiritu kag ang iban naulipon sang mga disparatis. Ang iban nagapalapta sang kahadlok sa mga demonyo paagi sa pagsugid sing mga istorya sang ila paghalit sa mga tawo. Ang mga tawo nanamian mamati sa sini nga mga istorya kag ginaistorya man nila ini sa iban. Bangod sa sini nga mga istorya, madamo ang nahadlok sa Yawa.

20. Paano naton mapalapta ang kabutigan ni Satanas?

 ²⁰ Hunahunaa ini—gusto ni Satanas nga mahadlok sa iya ang mga tawo. (2 Tesalonica 2:9, 10) Butigon sia kag nakahibalo sia kon paano dayaon ang panghunahuna sang mga nanamian sa demonismo kag ginapapati sila sa mga butang nga indi matuod. Ini nga mga tawo magaistorya sang mga butang nga abi nila nakita nila kag nabatian. Bangod sulitsulit ini nga ginaistorya sang mga tawo, nadugangan ang mga detalye sini. Indi naton gusto palaptahon ang kahadlok kay Satanas paagi sa pagsulit sini nga mga istorya.—Juan 8:44; 2 Timoteo 2:16.

21. Sa baylo nga mag-istorya parte sa mga demonyo, ano ang maayo nga istoryahan naton?

²¹ Kon ang isa ka Saksi may naeksperiensiahan parte sa mga demonyo, indi niya ini dapat iistorya para lingawon ang iban. Ang katawhan ni Jehova indi dapat mahadlok sa mahimo sang Yawa ukon sang mga demonyo. Kundi, dapat magpokus kita kay Jesus kag sa gahom nga ginhatag ni Jehova sa iya. (Hebreo 12:2) Wala ni Jesus gin-istoryahan ang iya mga disipulo parte sa mga demonyo para lingawon sila. Nagpokus sia sa mensahe sang Ginharian kag sa “gamhanan nga mga binuhatan sang Dios.”—Binuhatan 2:11; Lucas 8:1; Roma 1:11, 12.

22. Ano ang determinado mo nga himuon?

²² Indi naton pagkalimtan nga ang tulumuron ni Satanas amo nga gub-on ang aton relasyon kay Jehova. Himuon niya ang tanan para matabo ina. Pero nahibaluan na naton ang mga pamaagi sang Yawa kag determinado kita nga likawan ang tanan nga sahi sang demonismo. ‘Indi naton paghatagan sing kahigayunan ang Yawa’ nga paluyahon ang aton determinasyon. (Basaha ang Efeso 4:27.) Huo, kon pamatukan naton ang Yawa, indi niya kita masiod kag proteksionan kita ni Jehova.—Efeso 6:11.