ANG tanan nga maayong butang gikan sa Dios. Sa pag-iwag sa aton, ginhimu niya ang adlaw para sa adlaw, kag ang bulan kag bituon para sa gab-i. Kag ginhimu sang Dios ang duta agod puy-an ta.

Apang indi ini ang una nga ginhimu sang Dios. Nahibal-an mo bala ang una? Una ginhimu sang Dios ang mga anghel. Indi naton makita ang mga anghel, subong sang Dios. Ginhimu sang Dios ang mga anghel agod magpuyo kaupod niya sa langit.

Ang unang anghel nga ginhimu sang Dios pinasahi. Nagtrabaho sia upod sa Dios kag nagbulig sa paghimu sing tanan, lakip ang aton duta.

Ano ang hitsura sang duta sadto? Sang primero wala sing makapuyo sa duta. Ang tanan natabonan sing isa ka dagat sang tubig. Gani ginhanda sang Dios ang duta para sa aton. Ano ang iya ginhimu?

Una, ginhimu sang Dios ang kapawa gikan sa adlaw agod magsilak sa duta. Nian may gab-i kag adlaw. Pagkatapos ginpagua niya ang duta sa ibabaw sang tubig sang dagat.

Sang primero wala sing makita sa duta. Kaangay yadto sang laragway nga makita mo diri. Wala sing bulak, kahoy ukon sapat. Wala gani sing isda sa dagat. Madamu pa ang hilimuon sang Dios.