SI Jose 17 ka tuig lamang sang gindala sia sa Egipto. Didto ginbaligya sia kay Potipar. Si Potipar nagapangabudlay para sa hari sang Egipto, nga gintawag Paraon.

Si Jose nagpangabudlay sing maayo para sa iya agalon. Gani sang maghamtong si Jose, gintulin sa iya ni Potipar ang iya bug-os nga panimalay.

Si Jose nagdaku nga tuman kaambong nga lalaki, kag ang asawa ni Potipar luyag maghulid sa iya. Apang nakahibalo si Jose nga malain ini kag indi luyag maghimu sini. Naakig gid ang asawa ni Potipar. Gani nagbinutig sia sa iya bana kag nagsiling: ‘Inang malain nga Jose luyag maghulid sa akon!’ Ginpatihan ni Potipar ang iya asawa kag ginpabilanggu si Jose.

Bangid maayo nga tao si Jose, gintulin sa iya ang tanan nga bilanggu. Sang ulihi naakig si Paraon sa iya manugtagay kag sa iya manugtinapay, kag ginpabilanggu sila. Isa ka gab-i nagdamgo sila nga duha. Sang masunod nga adlaw si Jose nagsiling: ‘Isugid sa akon ang inyo damgo.’ Sang ginsugid nila, ginpaathag ni Jose ang kahulogan sang ila damgo sa bulig sang Dios.

Ginsugiran ni Jose ang manugtagay nga sa tatlo ka adlaw paguaon sia. Ginpangabay niya ang manugtagay nga dumdomon sia kon matabu ina. Apang sa manugtinapay sia nagsiling: ‘Sa tatlo ka adlaw ipapugot ni Paraon ang imo ulo.’

Sa tatlo ka adlaw natabu ang ginsiling ni Jose. Ginpapugot ni Paraon ang ulo sang manugtinapay. Apang ang manugtagay ginpagua kag nag-alagad liwat sa hari. Apang nalipatan niya si Jose! Gani nagpabilin si Jose sa bilangguan.