SAMTANG nagalakbay si Jesus sa duta, nang-ayo sia. Madamu ang nakabati sini, kag nagdala sa iya sing mga piang, bulag kag bungol, kag iban pa nga may balatian. Kag gin-ayo sila tanan.

Tatlo ka tuig na ang nakaligad kutob sang ginbautismohan ni Juan si Jesus. Kag ginasugiran ni Jesus ang iya mga apostoles nga magataklad sia sa Jerusalem diin patyon sia kag bangawon.

Isa ka adlaw nagapanudlo si Jesus sa Inugpahuway. Ang Inugpahuway para sa mga Judiyo. Ang babae nga makita mo diri masakiton gid. Sa 18 ka tuig, indi sia makatindog sing tadlong. Gani gintandog sia ni Jesus kag nag-ayo!

Naakig ang relihioso nga mga lider. Para sa ila si Jesus dapat mang-ayo sa iban nga adlaw, indi sa Inugpahuway.

Apang si Jesus nagsiling sa ila: ‘Kamo nga mga malain. Ginapainum ninyo ang inyo asno sa Inugpahuway. Gani indi bala dapat ayuhon ining makaluluoy nga babae sa Inugpahuway?

Sang ulihi, si Jesus kag ang iya mga apostoles nagpa-Jerusalem. Sa gua sang banwa sang Jerico, nabatian sang duha ka bulag nga nagapakilimos nga manuglabay sia. Gani nagsinggit sila: ‘Jesus, buligi kami!’

Ginpamangkot ni Jesus kon ano ang luyag nila. Nagsiling sila: ‘Ginuo, muklata ang amon mga mata.’ Gintandog ni Jesus ang ila mga mata, kag nakakita sila. Nahibal-an mo bala kon ngaa ginahimu ni Jesus ining mga milagro? Bangod ginahigugma niya ang mga tao kag luyag niya nga magtuo sila sa iya. Kon maggahom sia subong Hari, wala sing isa sa duta ang magamasakit liwat.