INDI bala maambong ini nga bata? Si Samuel ang iya ngalan. Kag ang nagatakdung sang iya kamut sa ulo ni Samuel amo ang mataas nga saserdote sang Israel nga si Eli. Amo ina ang amay ni Samuel nga si Elkana kag ang iya iloy nga si Ana nga nagdul-ong kay Samuel kay Eli.

Si Samuel mga apat ukon lima ka tuig ang kagulangon. Apang magapuyo sia diri sa tabernakulo ni Jehova upod kay Eli kag sa iban pa nga saserdote. Ngaa ginhatag ni Elkana kag ni Ana ang subong ka bata ni Samuel sa pag-alagad kay Jehova sa tabernakulo? Tan-awon ta.

Pila lang ka tuig sa wala pa ini, tuman gid kasubo si Ana. Baw-as sia kag luyag gid magbata. Gani isa ka adlaw, nangamuyo sia sa tabernakulo: ‘O Jehova, kon hatagan mo ako sing anak, nagapanaad ako nga ihatag ko sia sa imo agod nga makaalagad sia sa imo sa bug-os niya nga kabuhi.’

Ginsabat ni Jehova ang pangamuyo ni Ana, kag wala magdugay nagbata sia kay Samuel. Ginhigugma gid ni Ana ang iya diutay, kag gintudloan niya sia tuhoy kay Jehova sang diutay pa sia ka tama. Nagsiling sia sa iya bana: ‘Kon malutas na si Samuel, dalhon ko sia sa tabernakulo agod mag-alagad kay Jehova didto.’

Amo ini ang makita naton nga ginahimu nila sa laragway. Kag malipayon si Samuel sa pag-alagad diri sa kayangkayang ni Jehova. Kada tuig, si Ana kag si Elkana nagasimba sa sining pinasahi nga kayangkayang, kag nagaduaw sa ila diutay nga bata. Kag kada tuig ginadalhan ni Ana si Samuel sing bag-o walay paku nga bayo.

Sa pila ka tuig, si Samuel nagpadayon sa pag-alagad kay Jehova, kag naluyagan sia ni Jehova kag sang kataohan. Apang ang mga anak sang mataas nga saserdote nga si Eli nga sanday Opni kag Pinehas indi maayo. Madamung kalautan ang ginahimu nila. Dapat pahalinon sila ni Eli sa pagkasaserdote, apang wala niya ginhimu.

Sa gihapon, nag-alagad si Samuel sa Dios. Apang bangod diutay lang ang nagahigugma kay Jehova, nagdugay pa kutob sang nakighambal si Jehova sa tao. Sang magdaku-daku na si Samuel amo sini ang natabu.

Nagakatulog si Samuel sa tabernakulo sang ginpukaw sia sang isa ka tingog. Nagsabat sia: ‘Yari ako.’ Kag nagdalagan sia kay Eli kag nagsiling: ‘Gintawag mo ako. Yari ako.’

Apang nagsabat si Eli: ‘Wala ko ikaw pagtawga; balik ka sa imo higdaan.’ Gani nagbalik si Samuel sa iya higdaan.

Natabu ini liwat, kag nian sa ikatlo pa nga tion. Sang ulihi, nahangpan ni Eli nga si Jehova ang nagapanawag. Gani ginsilingan niya si Samuel: ‘Maghigda ka liwat, kag kon magpanawag sia liwat, magsiling ka: “Maghambal ka, Jehova, kay ang imo alagad nagapamati” ’

Amo ini ang ginhimu ni Samuel. Nian ginsilingan ni Jehova si Samuel nga silotan niya si Eli kag ang iya mga anak. Sang ulihi si Opni kag si Pinehas napatay sa patag-awayan, kag sang mabatian ini ni Eli, natumba sia, nabali ang iya liog kag napatay man. Gani nagmatuod ang ginsiling ni Jehova

Nagdaku si Samuel kag nangin ang katapusan nga hukom sang Israel. Sang magtigulang na sia, ang kataohan nangabay sa iya: ‘Pilii kami sing hari nga magagahom sa amon.’ Wala magsugot si Samuel, kay si Jehova amo ang ila matuod nga hari. Apang ginsilingan sia ni Jehova nga pamatian ang kataohan.