NAKABATI ka na bala sing asno nga nagahambal? ‘Wala pa,’ mahimu isiling mo. ‘Ang mga sapat indi makahambal.’ Apang ang asno naghambal anay. Tan-awon ta kon paano ini natabu.

Si Balac, nga hari sang Moab, nahadlok sa mga Israelinhon. Gani ginpatawag niya ang maalam nga tao nga si Balaam agod pakamalauton ang mga Israelinhon. Ginpangakoan niya si Balaam sing madamu nga kuarta, gani si Balaam nagsakay sa iya asno kag naglakbay agod makigkita kay Balac.

Si Jehova nagpadala sing anghel nga may malaba nga espada sa pagtindog sa dalan agod punggan si Balaam. Indi makita ni Balaam ang anghel, apang makita sang iya asno. Ang asno nagalikaw sa anghel, kag sang ulihi nagluko sa dalan. Naakig si Balaam kag ginbunal niya ang asno.

Nian ginpahambal ni Jehova ang asno ni Balaam agod mabatian niya.

‘Ngaa ginabunal mo ako?’ pamangkot sang asno.

‘Daw ginapabuang mo ako,’ siling ni Balaam.

‘Nahimu ko na bala ini sa imo sang una?’ pamangkot sang asno.

‘Wala pa,’ sabat ni Balaam.

Nian ginpakita ni Jehova kay Balaam ang anghel. Ang anghel nagsiling: ‘Dili pagpakamalauta ang Israel. Kon ang imo asno wala maglikaw sa akon, kuntani napatay ko na ikaw.’

Si Balaam nagsiling: ‘Nakasala ako. Wala ako nakahibalo nga nagatindog ka sa dalan.’ Ginpalakat sang anghel si Balaam, kag si Balaam nakigkita kay Balac. Nagtinguha gihapon sia sa pagpakamalaut sa Israel, apang ginpahanabu ni Jehova sa baylo nga pakamaayuhon niya ang Israel sing makatlo.