SUGILANON 59
Kon Ngaa Dapat Malagyo si David
SANG mapatay ni David si Goliat, nahamuot gid si Saul sa iya. Ginhimu niya si David nga pangulo sang iya hangaway kag ginpapuyo sia sa balay sang Hari.
Sang ulihi, sang magbalik ang hangaway gikan sa pagpakig-away sa mga Pilistinhon, ginpadunggan sang mga babae si David sing labi kay Saul. Nahisa sa sini si Saul. Apang ang anak ni Saul nga si Jonatan wala mahisa. Ginahigugma gid niya si David, kag ginahigugma man ni David si Jonatan. Ang duha nanaad sa isa kag isa nga mag-abyanay sila tubtob san-o.
Si David maayo gid mag-arpa, kag si Saul naluyag mamati sa iya. Apang isa ka adlaw ang kahisa ni Saul nagpahimu sa iya sing malain gid nga butang. Samtang nagaarpa si David, ginbangkaw sia ni Saul. Apang nakalikday si David kag ang bangkaw wala makaigo. Sang ulihi wala liwat makaigo sing bangkaw si Saul kay David. Gani nakahibalo karon si David nga dapat gid sia maghalong.
Nadumdoman mo bala nga ang makapatay kay Goliat dapat mag-angkon sa anak ni Saul bilang asawa niya? Bueno, sang ulihi ginsilingan ni Saul si David nga maangkon niya ang iya anak nga si Micol, apang magpatay anay sia sing 100 sa kaaway nga mga Pilistinhon. Hunahonaa ina! Naglaum gid si Saul nga mapatay sang mga Pilistinhon si David. Apang wala nila mapatay, gani ginhatag ni Saul ang iya anak agod mangin asawa ni David.
Isa ka adlaw ginsugiran ni Saul si Jonatan kag ang tanan niya nga alagad nga luyag niya patyon si David. Apang si Jonatan nagsiling: ‘Dili paghimua ina. Si David wala gid sing ginhimu nga malain sa imo.’
Gani nanaad si Saul nga indi paghalitan si David. Ginpabalik si David, kag sa liwat nag-alagad kay Saul sa iya balay. Apang, isa ka adlaw, ginbangkaw liwat ni Saul si David. Nakalikday si David kag wala maigo. Ikatlo ini nga tion! Nakahibalo si David nga dapat malagyo sia!
Sadtong gab-i nagkadto si David sa iya balay. Apang nagpadala si Saul sing mga tinao sa pagpatay sa iya. Nahibaloan ni Micol ang plano sang iya amay, kag ginbuligan niya si David sa pagpalagyo. Sa mga pito ka tuig, nanagu si David sa lainlain nga duog, agod nga indi sia makita ni Saul.
