Mga Nanguna sa Pagbulong

SA EDAD nga 61, si José, nga taga-Belgium halin sa diutay nga banwa sang Oupeye, ginsilingan nga magakinahanglan sia sing liver transplant (pagliton sing atay halin sa iban nga tawo pakadto sa iya). “Amo yadto ang daku gid nga kakibang sa akon kabuhi,” siling niya. Sang nagligad lamang nga apat ka dekada, ang mga liver transplant makakilibang gid. Bisan sang katuigan 1970, ang kadamuon sang nabuhi mga 30 porsiento lamang. Apang, karon, ang mga liver transplant kinaandan na lamang, kag ginahimo ini nga may daku gid nga kadalag-an.

Apang yara gihapon ang isa ka daku nga disbentaha. Sanglit ang mga liver trans­plant masunson nga nagalakip sang sobra nga pagdugo, ang mga doktor masami nga nagatayon sing dugo sa tion sang operasyon. Bangod sang iya relihioso nga mga pagtuluuhan, indi luyag ni José nga magpatayon. Apang luyag niya magpa-liv­er trans­plant. Imposible bala? Ang iban mahimo maghunahuna sing amo sina. Apang nagpati ang pangulo nga manugbusbos nga daku ang tsansa nga makaopera sila sang iya mga kaupdanan sing madinalag-on nga wala sing dugo. Kag amo gid sina ang ginhimo nila! Beinte-singko ka adlaw lamang pagkatapos sang iya pagpaopera, nagpauli si José upod sang iya asawa kag anak nga babayi. *

Bangod sang pagkasampaton sang mga ginatawag sang magasin nga Time nga “mga baganihan sang medisina,” ang pagbulong kag pagbusbos nga walay dugo labi pa nga kinaandan na karon. Apang ngaa madamo gid ang nagapangabay sini? Agod masabat ina nga pamangkot, usisaon naton ang makalilibog nga maragtas sang mga pagtayon sing dugo.

[Footnote]

[Laragway sa pahina 3]

Sa bug-os nga kalibutan, may yara karon kapin sa 90,000 ka doktor nga nagpahibalo nga handa sila sa pagbulong sa mga Saksi ni Jehova nga wala sing dugo