Pagbutig—Mapakamatarong Gid Bala Ini?
Ang Pagtamod sang Biblia
Pagbutig—Mapakamatarong Gid Bala Ini?
“ANG DIUTAY NGA SAYOP KON KAISA NAGAKINOT SING MADAMO NGA PAATHAG.”
GINAILUSTRAR sini nga komento ang ginabatyag sang madamo nga tawo tuhoy sa pagbutig. Ang ila rason amo nga ang pagbutig indi sayop kon wala ini nagahalit kay bisan sin-o. Ining pangatarungan may yara pa gani akademiko nga ngalan—situation ethics (paggawi depende sa kahimtangan), nga nagasiling nga ang lamang nga kasuguan nga dapat mo sundon amo ang ginatawag kuno nga kasuguan sang gugma. Sa iban nga pulong, paathag sang awtor nga si Diane Komp, “kon ang imo motibo husto kag ang imo katuyuan husto (nian ang) katunayan nga nagbutig ikaw . . . wala sing kabilinggan.”
Ina nga pagtamod kinaandan na sa kalibutan karon. Ang mga iskandalo may kaangtanan sa mga pagbinutig sang kilala nga mga politiko kag sang iban pa nga mga lider sang kalibutan nagpakibang sa katilingban. Naimpluwensiahan sining kahimtangan, madamo nga tawo ang indi na tanto ka desidido sa pagsugid sing kamatuoran. Sa pila ka lugar ang pagbinutig nangin ginakilala pa gani nga pagsulundan. “Ginabayaran ako agod magbutig. Nagadaug ako sa mga paindisanay sa benta kag kada tuig nagabaton ako sing sulat sang pagdayaw kon magbutig ako. . . . Daw amo ini ang sadsaran sang paghanas sa pagbaligya sing utay-utay bisan diin,” reklamo sang isa ka tindera. Madamo ang nagapati nga wala gid sing halit sa ginatawag nga diutay nga white lies (pagbutig nga wala sing tuyo nga maghalit). Matuod bala ini? May mga okasyon bala nga mahimo pakamatarungon sang mga Cristiano ang pagbutig?
Ang Mataas nga Talaksan sang Biblia
Ginapakamalaut gid sang Biblia ang tanan nga sahi sang pagbutig. “Laglagon [sang Dios] ang mga nagapamulong sing kabutigan,” siling sang salmista. (Salmo 5:6; tan-awa ang Bugna 22:15.) Sa Hulubaton 6:16-19, ginalista sang Biblia ang pito ka butang nga ginakangil-aran ni Jehova. Ang “butigon nga dila” kag ang “butigon nga saksi nga nagasugid sing kabutigan” talalupangdon nga ginalakip sa sining listahan. Ngaa? Bangod ginadumtan ni Jehova ang halit nga ginatuga sang kabutigan. Amo ina ang isa ka rason kon ngaa gintawag ni Jesus si Satanas nga isa ka butigon kag manugpatay sing tawo. Ang iya kabutigan naglugdang sa katawhan sa kapiutan kag kamatayon.—Genesis 3:4, 5; Juan 8:44; Roma 5:12.
Ginapadaku sang natabo kanday Ananias kag Safira kon daw ano ka serioso ang pagtamod ni Jehova sa pagbutig. Hungod nga nagbinutig ining duha sa mga apostoles sa maathag nga Binuhatan 5:1-10.
pagtinguha nga mangin mas maalwan tulukon sangsa kon ano gid sila. Ang ila ginhimo hungod kag ginplano na nga daan. Sa amo, si apostol Pedro nagsiling: “Nagbinutig kamo, indi sa mga tawo, kundi sa Dios.” Bangod sini, ginpatay sila sang Dios.—Tinuig sang ulihi ginlaygayan ni apostol Pablo ang mga Cristiano: “Indi kamo magbinutig sa isa kag isa.” (Colosas 3:9) Ining laygay ilabi na nga importante sa Cristianong kongregasyon. Nagsiling si Jesus nga ang may prinsipio nga gugma amo ang nagapakilala nga tanda sang iya matuod nga mga sumulunod. (Juan 13:34, 35) Ining di-salimpapaw nga gugma mahimo lamang magtubo kag maglambo sa isa ka kahimtangan nga may bug-os nga pagkabunayag kag pagsalig. Mabudlay higugmaon ang isa kon indi kita makasalig nga pirme sia magasugid sa aton sing kamatuoran.
Bisan pa ang tanan nga pagbinutig salawayon, ang pila ka pagbutig mas serioso sangsa iban. Halimbawa, ang isa ka tawo mahimo magbinutig bangod sa kahuya ukon kahadlok. Ang isa mahimo malauton nga himuon nga batasan ang pagbinutig sa tuyo nga manghalit ukon mangsamad. Bangod sang iya malain nga motibo, ining kinabubut-on nga butigon makatalagam sa iban kag pagasikwayon sa kongregasyon kon indi sia maghinulsol. Sanglit indi tanan nga pagbutig ginapahulag sang malain nga tuyo, dapat maghalong nga indi magpakamalaut sing di-kinahanglanon kundi pat-uron nga nahibaluan sang isa ang tanan nga butang nga nadalahig kon ang isa nagbinutig. Ang mga motibo kag ang kabangdanan nga mga kahimtangan dapat binagbinagon.—Santiago 2:13.
‘Maalam Subong sang mga Man-ug’
Sa pagkamatuod, ang pagkamaminatud-on wala nagakahulugan nga obligado kita nga isugid ang tanan nga impormasyon kay bisan sin-o nga nagapangayo sini sa aton. “Indi ninyo pag-ihatag sa mga ido kon ano ang balaan, ukon ipilak ang inyo mga mutya sa atubangan sang mga baboy, agod indi gid [sila] . . . magliso kag magkusnit sa inyo,” paandam ni Jesus, sa Mateo 7:6. Halimbawa, ang mga indibiduwal nga may malaut nga katuyuan mahimo nga wala sing kinamatarong nga mahibaluan ang pila ka butang. Nahangpan sang mga Cristiano nga nagakabuhi sila sa di-mainabyanon nga kalibutan. Sa amo, ginlaygayan ni Jesus ang iya mga disipulo nga mangin ‘maalam subong sang mga man-ug’ samtang nagapabilin nga “inosente subong sang mga salampati.” (Mateo 10:16; Juan 15:19) Wala pirme ginsugid ni Jesus ang bug-os nga kamatuoran, ilabi na kon ang pagsugid sang tanan nga katunayan mahimo magresulta sa di-kinahanglanon nga halit sa iya ukon sa iya mga disipulo. Apang, bisan sa subong sini nga mga tion, wala sia nagbutig. Sa baylo, namat-od sia nga maghipos ukon ginalikaw niya ang paghambalanay sa tuhay nga topiko.—Mateo 15:1-6; 21:23-27; Juan 7:3-10.
Ang matutom nga mga lalaki kag mga babayi nga ginsambit sa Biblia, subong nanday Abraham, Isaac, Rahab, kag David, mga mainandamon man kag mahalungon kon nagapakig-angot sa mahimo nga mga kaaway. (Genesis 20:11-13; 26:9; Josue 2:1-6; 1 Samuel 21:10-14) Gintawag sang Biblia ining mga lalaki kag babayi subong matutom nga mga sumilimba nga ang mga kabuhi naglaragway sang pagkamatinumanon. Naghimo ini sa ila nga takus ilugon.—Roma 15:4; Hebreo 11:8-10, 20, 31, 32-39.
Mahimo nga may mga tion nga ang pagbutig amo ang daw mahapos nga solusyon. Apang maayo gid para sa mga Cristiano karon nga ilugon ang dalanon ni Jesus kag sundon ang ila nahanas-sang-Biblia nga konsiensia kon nagaatubang ilabi na sang mabudlay nga mga kahimtangan.—Hebreo 5:14.
Ginapalig-on kita sang Biblia nga mangin maminatud-on kag bunayag. Ang pagbutig malain, kag dapat naton sundon ang laygay sang Biblia: “Maghambal sing kamatuoran ang tagsatagsa sa inyo sa iya isigkatawo.” (Efeso 4:25) Sa paghimo sini, mahuptan naton ang matinlo nga konsiensia, mapauswag ang paghidait kag gugma sa kongregasyon, kag mapadayon ang pagpadungog sa “Dios sang kamatuoran.”—Salmo 31:5;
[Laragway sa pahina 20]
Sanday Ananias kag Safira napatay bangod sang pagbutig