Ginapakabahandi sang mga Ruso ang Kahilwayan sa Pagsimba

SUGOD SANG MABUNGKAG ANG UNYON SOBYET SANG 1991, ANG MGA TAGADIDTO NAKAAGOM SING DAKU PA NGA KAHILWAYAN SA PAGSIMBA SA DIOS. INI NGA KAHILWAYAN GINPABAKAHANDI MAN SANG MGA NAGSAYLO SA IBAN NGA MGA PUNGSOD.

PARA sa madamo nga nagapuyo sa anay Rusya, ang kahilwayan sa pagtipon sing dayag sa pagsimba sa Dios isa ka ginapakahamili nga kalipay—isa nga gindingot sa ila sa madamong dekada.

Pagkatapos sang Bolshevik nga Rebolusyon sang 1917, nangin delikado ang pagbasa sing Biblia sa Unyon Sobyet, kag pila lamang ka tawo ang nagbutang sa katalagman sang ila kahilwayan agod himuon ini. Lain ang mga Saksi ni Jehova. Sa katunayan, ang Newsweek nga magasin sang Abril 16, 1956​—⁠halos 44 ka tuig na ang nagligad​—⁠nagbalikwat sa isa ka pamatan-on sa Sidlangan nga Alemanya nga nagasiling: “Wala sing bisan sin-o luwas sa mga Saksi ni Jehova ang nagabasa sing Biblia.” Apang, bangod sang paghiwat sing mga miting sa pagtuon sa Biblia kag bangod sang pagbantala sing mensahe sang Biblia, ang mga Saksi ginbilanggo kag ginlupot sa mga kampo sang lakas nga pagpangabudlay. Apang, bisan diin man sila magkadto, gintuon nila ang igtalupangod sa ila pasad-sa-Biblia nga paglaum, subong sang ginapakita sang kaupod nga kahon.

Sang mabungkag ang Unyon Sobyet sang 1991, ang mga Saksi didto naghiwat sing pito ka kombension nga nagbinagbinag sing isa ka programa sang instruksion sa Biblia. Sa kabug-usan, 74,252 ang nagtambong. Sang 1993, pagligad lamang sang duha ka tuig, 112,326 ang nagtipon sa walo sang subong sini nga mga kombension sa 4 sang 15 ka republika anay sang Unyon Sobyet.⁠ * Madamo sining mga linibo ang naghinguyang sing malawig nga tinuig sa mga bilangguan kag mga kampo sang lakas nga pagpangabudlay sang Sobyet. Ining matutom nga mga Cristiano nagpasalamat gid sing daku tungod sa ila kahilwayan sa pagsimba sa Dios nga wala sing balagbag.

Kada tuig sugod sang 1993, ginpakabahandi sang mga tagarepublika anay sang Sobyet ang  pribilehiyo nga makatipon sing hilway sa Cristianong mga pagtilipon sa ila tumandok nga pungsod. Sang nagligad nga tuig, halimbawa, may kabug-usan nga 282,333 ka Saksi ni Jehova kag mga abyan nila ang nalipay sa pagsimba sing tingob sa 80 ka “Matagnaon nga Pulong Sang Dios” nga Distrito nga mga Kombension sa anay Sobyet nga mga republika. Kag may kabug-usan nga 13,452 ang ginbawtismuhan.

Bisan pa nga daw makatilingala, sang nagligad nga tuig may yara man Ruso-sing-hambal nga mga kombension sa iban nga mga pungsod sa kalibutan. May kabug-usan nga 6,336 ka tawo ang nagtambong sa apat sini nga pagtilipon sa mga pungsod sa guwa sang anay Unyon Sobyet! Diin ini ginhiwat? Kag ngaa madamo gid nga Ruso-sing-hambal nga katawhan ang may daku gid nga interes sa Biblia? Binagbinagon anay naton sa malip-ot ang naulihi nga pamangkot.

Ginakilala Nila ang Espirituwal nga Kinahanglanon

Ang Rusya may bugana nga maragtas sa relihion. Ang napunihan sing luho nga mga katedral sini, nga ginpatindog sang nagligad nga mga siglo, nalakip sa pinakabantog sa Cristiandad. Apang, ang Iglesia Ortodokso Ruso, kaangay sang Iglesia Katolika Romana, naghimo sa mga tawo nga wala sing namang-an sa Biblia.

“Ang Biblia,” paathag sang karon lang nga libro nga The Russian Tragedy​—⁠The Burden of History, “wala gid mangin panguna nga bahin sang Ruso nga Ortodokso.” Ang resulta, suno sa Ruso nga iskolar sa relihion nga si Sergei Ivanenko amo nga “ang kakulang sing ihibalo sa Biblia sang mga tumuluo sang Ortodokso nagdul-ong sa katunayan nga madamong parokyano sang mga iglesia Ortodokso ang mas madali maimpluwensiahan sang mga disparatis, okultismo, kag madyik sangsa mga di-tumuluo.”

Amo man sini ang ginkomento sang bantog nga Ruso nga manunulat nga si Tolstoy. Nagsulat sia: “Ginkumbinsi ko ang akon kaugalingon nga ang doktrina sang iglesia [Ortodokso Ruso] sa teoriya isa ka malimbungon kag makahalalit nga daya, kag sa buhat isa ka koleksion sang pinakamalain nga mga disparatis kag mga pagkababaylan, nga bug-os nga nagatago sang bug-os nga kahulugan sang Cristianong panudlo.”

Ini nga kahimtangan nangin isa gid ka mauyahon nga kahimtangan sa pag-uswag sang Sobyet nga Komunismo upod ang ateistiko nga propaganda sini kag ang bantog nga hambalanon: “Ang relihion amo ang opyo sang katawhan.” Apang, ang Komunismo mismo nangin isa ka porma sang relihion sang ulihi, nga masunson ginatawag nga Pula nga Relihion. Apang ang Pula nga Relihion wala nagdugay. Sang ang Sobyet nga Estado napukan sang 1991, minilyon ka tawo ang nagumon kag naligban kon diin magdangop. Paagi sa pagpalig-on sang mga Saksi ni Jehova, linibo ka Ruso ang nagpangita sing mga sabat sa Biblia.

Bangod sang maayo nga sistema sa edukasyon, ang mga Ruso nalakip sa labing may tinun-an nga katawhan sa kalibutan. Sa amo, madamong Ruso ang wala lamang nangin mga bumalasa sang Biblia kundi mga mahigugmaon man sang mga panudlo sini. Sa amo man nga tion, ilabi na sang dekada sang 1990, ginatos ka libo ka tawo  gikan sa anay Unyon Sobyet ang nagsaylo sa iban nga mga pungsod, subong sang Alemanya, Gresya, kag Estados Unidos. Upod ang anong mga resulta?

Hilway sa Pagsimba sa Alemanya

Sang ika-18 kag ika-19 nga siglo, madamong Aleman ang nagsaylo sa Rusya. Ang labing bantog amo ang 15-anyos nga si Sophie, nga sang 1762 nagbulos sa iya bana subong manuggahom sang Rusya. Sa sulod sang iya malawig nga paggahom, gin-agda ni Sophie, nga nakilal-an sang ulihi nga si Catherine nga Daku, ang Aleman nga mga mangunguma nga magpuyo sa Rusya. Nian, sang ginsalakay sang Alemanya ang Unyon Sobyet sang Bug-os Kalibutan nga Inaway II, ang kadamuan sadtong Aleman sing kaliwat ginsaylo sa Siberia kag sa mga republika sang Sobyet subong sang Kazakhstan, Kyrgyzstan, kag Uzbekistan. Sining karon lang madamong Ruso-sing-hambal nga mga Aleman, subong man ang iban pa halin sa anay Unyon Sobyet, ang nagsaylo sa Alemanya agod maagom ang maayoayo nga kahimtangan sa pangabuhi.

Sang Disiembre 1992 ang nahaunang Ruso-sing-hambal nga kongregasyon sa Alemanya gintukod sa Berlin. Sang nagligad nga tuig, 52 ka kongregasyon kag 43 ka magagmay nga grupo ang ginporma agod mangin tatlo ka Ruso-sing-hambal nga sirkito sa Alemanya. May pinakamataas nga tumalambong nga 4,920 sa Ruso-sing-hambal nga “Matagnaon nga Pulong Sang Dios” nga Distrito nga Kombension sa Cologne, nga ginhiwat halin sang Hulyo 30 tubtob Agosto 1, diin 164 ang ginbawtismuhan sa pagsimbulo sang ila dedikasyon kay Jehova. Antes sini, sang Abril 1, sa Ruso-sing-hambal nga mga kongregasyon sa Alemanya, 6,175 ang nagtambong sa pagsaulog sang Memoryal sang kamatayon ni Jesus.

Mga Ruso sa Estados Unidos

Naeksperiensiahan man sang Estados Unidos ang pagdugok sang Ruso-sing-hambal nga katawhan halin sa anay Unyon Sobyet. Ang The New York Times nagreport: “Sa ulot sang 1991 kag 1996, ang mga Ruso amo ang pinakamadasig magdamo nga grupo sang mga nagsaylo sa Brooklyn. Sini man nga panag-on, ang Immigration and Naturalization Service nagbaton sing kapin sa 339,000 ka imigrante sa Estados Unidos halin sa anay Unyon Sobyet.”

Sang ulihi, ang Times sang Enero 1999 nagsiling nga sang nagligad nga dekada, mga 400,000 ka Judiyo halin sa anay Unyon Sobyet ang nagsaylo sa New York City kag sa palibot nga lugar. Dugang pa, linibo ka Ruso ang nagpuyo sa iban nga mga bahin sang Estados Unidos sining ulihi nga tinuig. Halimbawa, ang naaminhan nga California nakaeksperiensia sang pagdugok sang mga 35,000 ka bag-ong Ruso nga mga imigrante, nagahimo sini subong ikatlo-sa-pinakadaku  nga sentro sang mga imigrante halin sa anay Unyon Sobyet sunod sa New York kag Los Angeles. Ining Ruso-sing-hambal nga katawhan naghulag man sa kahigayunan nga magtuon sa Biblia, kag ginatos sa ila ang nangin mga sumilimba sang matuod nga Dios, si Jehova.

Sang Abril 1, 1994, ang nahaunang Ruso-sing-hambal nga kongregasyon sang mga Saksi ni Jehova sa Estados Unidos gintukod sining karon lang sa Brooklyn, New York. Sang ulihi, ginsugdan ang Ruso nga mga kongregasyon sa Pennsylvania, California, kag Washington. Ang mga grupo sa pagtinuon ginsugdan sa madamo pa nga bahin sang pungsod.

Nahauna sa Estados Unidos

Sang nagligad nga Agosto 20 tubtob 22, isa ka pinakamataas nga tumalambong nga 670 sa bug-os nga Estados Unidos kag Canada ang nakunyag sa pagtambong sa nahaunang Ruso-sing-hambal nga distrito nga kombension nga ginhiwat sa New York City. Ang tanan nga pamulongpulong ginhatag sa Ruso, kag ang isa ka de-kostyum nga drama, nga nagapasundayag sang kasaysayan nanday Jacob kag Esau sa Biblia, ginpresentar sang mga katapo sang Ruso nga Kongregasyon sang Los Angeles, California. Isa gid yadto ka talalupangdon nga bahin sang kombension.

Ang isa pa ka talalupangdon nga bahin amo ang bawtismo sang 14 ka tawo, sila tanan makita sa kaupod nga retrato. Ang pila naglakbay sing mga 4,000 kilometros halin sa Portland, Oregon, kag halin sa Los Angeles kag San Francisco, California, agod bawtismuhan sa kombension sa New York City. Sang una, ining 14 nagapuyo sa anay Sobyet nga mga republika sang Armenia, Azerbaijan, Belarus, Moldova, Rusya, kag Ukraine. Ginapakita sang ila mga eksperiensia kon daw ano ka daku ang ila pagpakabahandi sa ihibalo tuhoy sa Dios kag sa kahilwayan nga simbahon sia.

Si Svetlana (atubangan nga raya, ikatlo halin sa wala) nagdaku sa Moscow. Sa edad nga 17 namana sia sa isa ka bantog nga manug-amba nga magulang sa iya sing madamo nga tinuig, kag sang 1989 nagkadto sila sa Estados Unidos upod sa ila lapsag nga anak nga lalaki. Pirme nagalakbay ang iya bana, kag lima ka tuig sang ulihi nagdiborsio sila.

Sang makilala ni Svetlana ang isa ka Saksi nga kaupod sa trabaho, ginpaandaman sia sang iya mga abyan nga indi gid madalahig sa ginasiling nila sa iya nga “isa ka sekta nga magakontrol sang [iya] kabuhi kag magakuha sang [iya] tanan nga kuwarta.” Apang, luyag niya tun-an ang ginatudlo sang Biblia. Sang ginpakitaan sang ngalan sang Dios sa Biblia, sia nagsiling: “Nagdayaw gid ako nga mga Saksi lamang ang nagapakilala sini.”

Subong isa ka pamatan-on, si Andrei (likod nga raya, ikatlo halin sa wala) nagbiya sang iya puluy-an sa Siberia para sa dugang pa nga paghanas subong isa ka atleta sa nakilal-an karon nga St. Petersburg. Wala madugay pagkatapos sadto, ang Unyon Sobyet nabungkag, kag sang   1993, si Andrei, sa edad nga 22, nagsaylo sa Estados Unidos. Nagpaathag sia: “Nagsugod ako sa paghunahuna tuhoy sa Dios kag nagsugod sa pagtambong sa Iglesia Ortodokso Ruso. Isa ka bes, sa tion sang selebrasyon sang Ruso nga Paskwa sang Pagkabanhaw, nagpabilin ako sa simbahan sa bug-os nga gab-i sa pagpanikasog nga magsuod sa Dios.”

Sini man nga tion nasugilanon ni Svetlana si Andrei, kag ginsugiran niya sia tuhoy sa kon ano ang natun-an niya gikan sa pagtuon sa Biblia. Nagpasugot sia sa pag-upod sa iya sa miting sang mga Saksi ni Jehova, kag pagkatapos sadto nagbaton sia sing isa ka pagtuon sa Biblia. Sang Enero 1999 nagpakasal sila. Pagkatapos sang ila bawtismo sa kombension, malipayon gid sila.

Si Pavel (likod nga raya, ikap-at halin sa wala) natawo malapit sa Qaraghandy, Kazakhstan, apang nagsaylo sang ulihi sa Nal’chik, Rusya. Ining daku nga siudad malapit sa Chechnya kag Dagestan, diin madamo nga inaway ang natabo anay. Didto una nakilala ni Pavel ang mga Saksi sang Agosto 1996, apang nagsaylo sia sa San Francisco pagkadason nga bulan. Nabuyo sia sa droga kag nangin amay sa isa ka anak nga babayi, nga nabilin sa Rusya upod sa iya iloy.

Sa gilayon pag-abot niya sa Estados Unidos, ginpakig-angutan ni Pavel ang mga Saksi ni Jehova kag nagbaton sing isa ka pagtuon sa Biblia. Gintadlong niya ang iya kabuhi kag ginsulatan ang iloy sang iya anak tuhoy sa iya bag-o nasalapuan nga mga pagtuluuhan. Nagatuon na sia (ang babayi) karon upod sa mga Saksi, kag may mga plano na para sa iya sa pagkadto sa Estados Unidos agod magpakasal sila ni Pavel kag mag-alagad kay Jehova sing magkaupod sa California upod sa ila anak.

Si George (likod nga raya, ikaduha halin sa wala) natawo kag nagdaku sa Moscow. Nagkadto sia sa Estados Unidos sang 1996, kag sang masunod nga tuig nagpangasawa sia kay Flora, nga taga-Azerbaijan anay. Si George nagasimba sa Iglesia Ortodokso Ruso, apang sa tapos mabasa ang isa ka kopya sang Lalantawan nga magasin, may mga pamangkot sia tuhoy sa doktrina sang Trinidad. Bilang sabat sa iya sulat sa Watch Tower Society, nakabaton sia sing brosyur nga Dapat Ka Bala Magpati sa Trinidad? Sang 1998 nagtuon sila ni Flora sa Biblia. Karon nagaplano man sia (si Flora) sa pagpabawtismo.

Ang isa pa ka talalupangdon nga bahin sa kombension amo ang pagbaton sing mga panamyaw halin sa Moscow, diin 15,108 ang nagtipon sa ila kombension sadto man nga talipuspusan  sang semana. Daku gid ang kakunyag sang mga delegado sa New York City nga mabatian ang pahibalo nga 600 ang ginbawtismuhan didto! Makakulunyag gid ina ilabi na bangod sang malain nga mga balita sa pamantalaan kag telebisyon nga nagsugod sa paglutaw sa Estados Unidos kag sa iban pa nga mga lugar sang semana antes sang petsa sang kombension.

Kon Ano ang Natabo sa Moscow

Sang Hulyo 21, 1999, ang mga Saksi nagpirma sing isa ka kontrata agod magamit ang Olympic Stadium nga nahamtang malapit sa sentro sang Moscow kag tupad lamang sang isa ka daku nga simbahan sang Ortodokso Ruso. Apang isa ka semana antes magsugod ang kombension, maathag gid nga may magapamatok. Sang Mierkoles, Agosto 18, ang permiso sa paggamit sa istadyum wala gihapon mahatag, bisan pa nga nabayaran na ang arkila. Ginpadaku sa mga opisyales nga, subong sang ginapakita sa kahon sa pahina 28, ang mga Saksi ni Jehova isa ka ginakilala sang kasuguan nga relihioso nga organisasyon sa Rusya.

Bangod mga 15,000 ka delegado sa kombension ang nagahanda sa pagtambong sa Biernes sang aga, ang Saksi nga mga tiglawas nabalaka. Ang pila ka delegado nagalakbay pakadto sa Moscow halin sa mga siudad kag mga banwa nga madamong kilometro ang kalayuon. Sa katapusan, pagkatapos sang mga inoras nga paghambalanay, sang mga alas 8:​00 s.g., sang Huebes, Agosto 19, ang tagdumalahan sang istadyum nalipay sa pagpahibalo sa mga tiglawas sang mga Saksi nga mahimo na madayon ang kombension. Ang administrasyon sang siudad nagpahibalo nga wala sila sing pagpamatok sa kombension.

Pagkaaga linibo ang nagdugok pasulod sa istadyum. Ang mga Saksi nga mga boluntaryo nagtrabaho sa bug-os nga gab-i agod maghanda sa ila pag-abot. Nagtambong man sa nahauna nga aga ang mga miembro sang media, nga ginpahibalo antes nahanungod sa pagpamatok sa paghiwat sang kombension. “Panginbulahan!” siling sang isa sa ila. “Nalipay kami nga mabalitaan nga madayon ang inyo kombension.”

Halimbawa sang Mahim-ong nga Paggawi

Ang tagdumalahan sang istadyum naghunahuna nga maalamon nga magpangaman sa seguridad. Gani, ang mga bantay sa seguridad nga may metal nga kasangkapan sa pagmutik subong sang ginagamit sa pag-usisa sa mga pasahero sa erport ginpahamtang sa tanan nga ganhaan. Ginpahamtang man ang mga pulis sa tanan nga  bahin sa sulod sang istadyum. Ang kombension ginhiwat sing mahim-ong walay sapayan sang daku nga pamahog.

Sang Sabado sang hapon isa ka tawo ang nagtelepono kag nagsiling nga isa ka bomba ang ginbutang sa istadyum. Nabaton ang pamahog wala madugay antes matapos ang masunod-sa-katapusan nga pamulongpulong sadto nga adlaw. Gani, sa pangabay sang tagdumalahan sang istadyum, isa ka malip-ot nga pahibalo ang ginhatag nga biyaan gilayon ang istadyum. Sang ginhimo ini sang tanan sa mahim-ong nga paagi, natingala gid ang mga opisyales sang istadyum kag ang mga pulis. Wala pa gid sila makakita sing subong sini! Namangkot sila kon bala gin-ensayo ini.

Wala sing bomba nga nakita, kag sang masunod nga adlaw ang programa ginpalawig agod ilakip ang wala mahatag sang Sabado. Ang tagdumalahan sang istadyum nalipay gid sa kombension.

Sa Gresya kag sa Iban Pa nga mga Lugar

Sang katapusan nga talipuspusan nga semana sang Agosto kag nahauna nga semana sang Septiembre, ang Ruso-sing-hambal nga distrito nga mga kombension ginhiwat man sa Gresya​—⁠una sa Atenas kag dayon sa Tesalonica. May kabug-usan nga 746 ang nagtambong, kag 34 ang ginbawtismuhan. May yara 8 ka Ruso-sing-hambal nga kongregasyon sa Gresya kag 17 ka mas magagmay nga grupo nga ginatapuan sang mga imigrante halin sa nabagatnan nga mga republika anay sang Unyon Sobyet. Ginahiwat nila ang ila mga miting sa Ruso kag sa iban pa nga mga lenguahe nga ginahambal sang mga imigrante.

Ang isa sang mga nabawtismuhan sa Atenas amo si Victor. Ateista sia anay, apang sang Agosto 1998 nagtambong sia sa internasyonal nga kombension sang mga Saksi ni Jehova sa Atenas, diin ginbawtismuhan ang iya asawa. Nagsiling sia nga nagdayaw gid sia sa gugma nga ginpakita sang mga delegado amo nga napahulag sia nga magtuon sa Biblia.

Ang isa ka lalaki nga nagahingalan kay Ighor nakabaton sing isa ka kopya sang libro nga Mahimu Ka Mabuhi sing Dayon sa Paraiso sa Duta kag sa tapos ini mabasa ginhaboy niya ang iya mga imahen. Ginpakilala pa gani niya ang iya kaugalingon subong isa sang mga Saksi ni Jehova. Pagkatapos makasulat sa sanga talatapan sa Atenas kag maduaw sang mga Saksi sang Nobiembre 1998, nagtambong sia gilayon sa iya nahaunang miting sa kongregasyon kag wala na magpalya sugod sadto. Karon, pagkatapos sang iya bawtismo, ang tulumuron ni Ighor amo ang mangin isa ka bug-os tion nga ministro sang mga Saksi ni Jehova.

Ang Ruso-sing-hambal nga katawhan nagsaylo sa pila pa ka pungsod sa kalibutan nga wala namon masambit. Madamo sa ila ang nagkasadya man sa ila kahilwayan nga matun-an ang Biblia kag makatipon sing dayag sa pagsimba sa Dios. Para sa ila ini nga pribilehiyo isa ka ginapakabahandi nga kalipay!

[Footnote]

[Kahon sa pahina 16]

Mga Ruso nga Nagahigugma sang Biblia

Si Propesor Sergei Ivanenko, isa ka respetado nga Ruso nga iskolar sa relihion, naglaragway sa mga Saksi ni Jehova subong katawhan nga debotado gid sa pagtuon sa Biblia. Sa iya bag-o nga libro sa Ruso, O lyudyakh, nikogda nye rasstayushchikhsya s bibliey (Ang Katawhan nga Pirme Gid May Biblia Nila), ginsulat niya ang tuhoy sa ila anay maragtas sa Unyon Sobyet: “Bisan pa nabilanggo sila bangod sang ila katutom sa ila mga pagtuluuhan, ang mga Saksi ni Jehova nakakita sing mga paagi nga magamit ang Biblia.” Sa pag-ilustrar sini, ginsaysay niya ang masunod nga eksperiensia.

“Ginadumili sa mga bilanggo nga magtigayon sing Biblia. Ang mga Biblia ginakumpiskar sa tion sang mga pagrikisa. Sa isa sa naaminhan nga mga kampo ang isa sang mga Saksi ni Jehova isa anay ka elektrisyan kag gintago niya ang mga libro sa Biblia sa isa ka yunit sang transformer diin mataas kaayo ang boltahe sini. Ang tagsa ka bahin sang Biblia ginatabid sa isa ka partikular nga alambre paagi sa isa ka higot, kag sia lamang ang nakahibalo kon diin nga higot ang butungon​—⁠halimbawa, ang Ebanghelyo ni Mateo​—⁠nga indi makoryente. Siempre pa, bisan daw ano pa ka estrikto ang pagrikisa sang mga guardia, wala sila sing nakita, kag gani ining pinasahi nga Biblia wala matukiban.”

[Kahon sa pahina 22]

Ang mga Saksi ni Jehova Ginrehistro Liwat sa Rusya

Ang mga Saksi ni Jehova aktibo nga nagabantala sang Ginharian sang Dios sa Rusya sa kapin na sa isa ka siglo. Apang bangod sang mga pagdumili sang gobierno, nabaton lamang sang mga Saksi ang legal nga pagkilala sang Marso 27, 1991. Narehistro sila sadto sa ngalan nga Administrative Center of the Religious Organizations of Jehovah’s Witnesses in the U.⁠S.S.R.

Sang Septiembre 26, 1997, ang layi nga natig-uluhan “Sa Kahilwayan sa Konsiensia kag Relihioso nga Asosasyon” ginpatuman. Ining bag-o nga layi ginbalita sing lapnag sa bug-os nga kalibutan. Ngaa? Bangod ginkabig sang madamo ang pagpasar sini nga layi subong isa ka panikasog agod dumilian ang relihioso nga mga hilikuton sang minoridad nga mga relihion sa Rusya.

Busa, walay sapayan sang mabudlay-matigayon nga rehistrasyon sang mga Saksi ni Jehova sang 1991, ang bag-ong Kahilwayan sa Konsiensia nga layi sang Rusya nagsugo sa ila, subong man sa tanan iban pa relihioso nga mga organisasyon, nga magparehistro liwat. Nagpautwas ini sing pila ka pamangkot. Nagapakita bala ini nga ang Ruso nga mga awtoridad nagabalik sa isa ka pagsulundan sang pagpigos sa mga Saksi ni Jehova? Ukon sakdagon bala ang relihioso nga pagtugot kag kahilwayan sa pagsimba nga ginagarantiya sa idalom sang Konstitusyon sang Pederasyon sang Rusya?

Nag-abot gid man ang sabat. Daku gid ang kalipay sang mga Saksi sa pagbaton liwat sing legal nga pagkilala sang ang Ministri sang Katarungan sang Rusya nagpaguwa sing isa ka sertipiko sang rehistrasyon para sa “Administrative Center for Jehovah’s Witnesses in Russia,” sang Abril 29, 1999!

[Laragway sa pahina 17]

Ang nahaunang Ruso-sing-hambal nga distrito nga kombension sa Estados Unidos

[Laragway sa pahina 18]

Drama sa Biblia nga ginpresentar sa New York sang Ruso nga Kongregasyon sang Los Angeles

[Laragway sa pahina 19]

Ining 14 nga ginbawtismuhan sa New York naghalin sa anom ka republika anay sang Unyon Sobyet

[Laragway sa pahina 20, 21]

Kapin sa 15,000 ang nagtipon sa Olympic Stadium sang Moscow