Ano Na ang Natabo sa Bata nga si Peter?

SANG KORESPONSAL SANG MAGMATA! SA ECUADOR

ANG Pebrero 8, 1971, nga Magmata! may artikulo nga natig-uluhan “Pagbusbos sa Tagipusuon nga Wala Sing Pagpatayon Sing Dugo.” Ginsaysay sini ang sugilanon tuhoy sa siete-anyos nga bata nga taga-Canada nga si Peter, nga nagkinahanglan sing nagaluwas-kabuhi nga operasyon sang 1963.

Nagsiling ang panguna nga doktor ni Pe­ter nga may isa ka paagi nga mahimo makapaayo sang iya depektuso nga valve sa tagipusuon. Apang sang gindala sang mga ginikanan ni Peter ang ila anak sa isa ka espesyalista kag namangkot kon bala mahimo himuon ang pag-opera nga wala-dugo, ang doktor nagsabat: “Indi. Imposible gid ini. Nahibal-an ko ang akon ginasiling.”

Wala madulaan sing paglaum, ginpadayon sang mga ginikanan ni Pe­ter ang ila pagpangita kag sang ulihi nakakita sila sing isa ka manugbusbos nga handa mag-opera nga wala nagagamit sing dugo. Ano ang resulta? Bisan pa nakalampuwas si Peter sa operasyon, ginsilingan ang iya mga ginikanan nga panahon lamang ang magasugid kon daw ano ka madinalag-on ang pamaagi. Gani, ano na ang natabo sa bata nga si Peter?

Sang 13 anyos si Peter, nagsaylo sila sang iya pamilya sa Ecuador, Bagatnan nga Amerika, agod mag-alagad diin mas daku ang kinahanglanon sang mga manugbantala sing maayong balita sang Ginharian sang Dios. (Mateo 24:14) Ginbawtismuhan si Pe­ter sa edad nga 15 anyos kag nangin regular payunir (bug-os tion nga ebanghelisador) sa edad nga 18 anyos. Sang 26 anyos nangin espesyal payunir sia, nga nagaalagad sa isa ka minuro nga nahamtang sing 3,000 metros ang kataason sa katupungan sang dagat sa Andes. Sang 1988, sa edad nga 31 anyos, si Peter upod sa iya asawa, si Isabel, nangin isa ka nagalakbay nga tiglawas sang Watch Tower Society. Nagapadayon sia sa sining katungdanan karon, nagaduaw sa nanuhaytuhay nga kongregasyon kada semana agod palig-unon sila.

Sa pagkamatuod, si Peter nagakabuhi sing aktibo gid, nga wala nagakinahanglan sing bisan anong dugang pa nga operasyon. Mapinasalamaton gid sia kag ang iban pa nga mga Saksi bangod sang kooperasyon sang malantipon nga mga manugbusbos nga nagatahod sa kinamatarong sang ila mga pasyente!

[Laragway sa pahina 27]

Si Peter sa edad nga siete anyos, wala madugay pagkatapos magpaopera

[Laragway sa pahina 27]

Sanday Peter kag Isabel Johnston karon