Pamangkot sang mga Pamatan-on . . .

Ano ang Masiling sa Pagpatuhog sa mga Bahin sang Lawas?

‘Sang una ko nga makita ang mga tawo nga nagpatuhog sa ila bibig kag sa iban pa nga mga bahin sang ila lawas, nahunahuna ko “Abaw! Pinasahi ina.”’—Lisa.

WALA nagaisahanon si Lisa. Nagadamo ang mga pamatan-on nga may mga singsing kag mga tuhog sa nanuhaytuhay nga bahin sang lawas, bisan sa ila mga kilay, dila, bibig, kag pusod. Batasan ini nga ginatawag nga pagpatuhog sa mga bahin sang lawas (body piercing). *

Nakunyag sa pagsunod sa sina nga batasan ang 16-anyos nga si Heather. Kumbinsido sia nga ang singsing sa iya pusod “matahom gid” tulukon. Apang, ang 19-anyos nga si Joe may yara na sing korte-barbel nga bulawan sa iya dila. Kag ginpatuhugan sang isa pa ka dalagita ang iya kilay bangod luyag niya sang isa ka butang nga “matalupangdan gid” nga “makapakibang sa mga tawo.”

Ang ideya nga pagbutang sing mga alahas sa lawas indi na bag-o. Sang panahon pa sang Biblia, ang diosnon nga babayi nga si Rebeca may singsing sa ilong. (Genesis 24:​22, 47) Sang nagguwa sa Egipto, may mga aritos ang mga Israelita. (Exodo 32:2) Apang, wala mahibalui kon bala ini nga alahas ginatuhog sa dulunggan kag sa ilong. Apang, ang matutom nga mga ulipon nagpabuho sang ila dulunggan subong simbulo sang ila katutom sa ila agalon. (Exodo 21:6) Nangin prominente man ang pagpatuhog sa iban pa dumaan nga mga kultura. Ginatuhugan sang mga Aztec kag Maya ang ila mga dila tungod sa espirituwal nga mga rason. Ang pagbuho sa bibig lapnag gihapon sa Aprika kag sa mga Indian sa Bagatnan nga Amerika. Ang pagtuhog sing mga pamuni sa ilong kinaandan sa mga Melanesian kag sa mga pumuluyo sang India kag Pakistan.

Tubtob sining pila lamang ka tuig nga nagligad, ang pagpatuhog sa Nakatundan nga mga pungsod ginahimo lamang sa mga labit sang dulunggan sang mga babayi. Apang karon ang mga tin-edyer kag lamharon nga mga adulto nga babayi kag lalaki may alahas sa halos tanan nga bahin sang ila lawas.

Kon Ngaa Nagapatuhog Sila

Madamo ang nagapatuhog bangod nagapati sila nga amo gid ini ang uso. Ang iban nagahunahuna nga magapatahom ini sang ila hitsura. Sa pagkamatuod, ginpauso ini sang nagapanguna nga mga model, mga idolo sa isport, kag popular nga mga musikero nga naggamit sing alahas sa lawas. Kag para sa iban nga mga pamatan-on, ang pagpatuhog daw pagpabutyag man sang pagkaindependiente, isa ka pagtinguha sing  indibiduwalidad, isa ka paagi nga masiling nila nga tuhay sila sa tanan. Nagsiling ang kolumnista nga si John Leo: “Ang handum nga paakigon ang mga ginikanan kag pakugmaton ang mga may kasarangan daw amo ang panguna nga motibo sang mga nagapatuhog sing sulitsulit.” Ang pagkadikontento, indi pag-ugyon, pagpamatok, kag pagrebelde daw amo ang ginabangdan sining pagpabutyag sang kaugalingon.

May nagapatuhog pa gani agod paayawan ang daku nga mga kinahanglanon sa hunahuna kag emosyon. Halimbawa, ang iban nga mga pamatan-on nagabatyag nga pauswagon sini ang ila pagtahod sa kaugalingon. Ang pila ka biktima sang pag-abuso sang bata pa sila naghimo sini subong paagi nga maangkon nila ang pagkontrol sa ila lawas.

Mga Katalagman sa Kapagros

Apang hilway bala sa katalagman ining tanan nga pagpatuhog sa mga bahin sang lawas? Madamong doktor ang nagasiling nga ang pila sini indi hilway sa katalagman. Sa pagkamatuod, ang pagtuhog sa kaugalingon makatalagam. Kag ang pagkadto sa ginatawag nga propesyonal nga manugtuhog mahimo may mga katalagman. Madamo ang kulang sing nagakaigo nga paghanas, nga nakatuon lamang sa pagtuhog gikan sa mga abyan, mga magasin, ukon mga video. Subong resulta, mahimo nga indi sila maggamit sang matinlo nga mga pamaagi ukon makahangop pa gani sang mga katalagman sang pagtuhog. Madamo man nga manugtuhog ang kulang sing paghangop sa anatomiya. Serioso ini nga butang, kay ang pagbuho sa sayop nga lugar mahimo bangdan sang sobra nga pagdugo. Ang pag-igo sa ugat mahimo makahalit sing permanente.

Isa pa ka serioso nga katalagman ang impeksion. Ang indi esterilisado nga mga kagamitan makalaton sing makamamatay nga mga balatian subong sang hepatitis, AIDS, anos, kag tetanus. Bisan pa ginagamit ang esterilisado nga mga pamaagi, kinahanglan gihapon ang paghalong sa tapos sang pagpatuhog. Halimbawa, ang pagtuhog sa pusod mahimo magbanog bangod pirme ini ginasag-iran sang bayo. Gani mahimo ini magkinahanglan sing siam ka bulan agod mag-ayo.

Ang mga doktor nagasiling nga ang pagtuhog sa mahumok nga tul-an sa ilong ukon dulunggan sang isa mas makatalagam sangsa pagtuhog sa labit sang dalunggan. Ang isa ka pampleta gikan sa American Academy of Facial Plastic and Reconstructive Surgery nagpaathag: “Ang madamo nga tuhog sa naibabaw nga bahin sang dulunggan dapat gid kabalak-an​—⁠ang delikado nga mga impeksion mahimo bangdan sang pagkadula sang bug-os nga naibabaw nga korte sang dulunggan. Delikado man ang mga tuhog sa ilong​—⁠ang impeksion sa sini nga bahin mahimo magtandog sa mga ugat sang dugo kag maglapta sa utok.” Hinakop sang pamantalaan: “Para sa labing ikaayo, dapat himuon ang [pagtuhog] sa labit lamang sang dulunggan.”

 Ang iban pa nga mga katalagman amo ang malaw-ay nga pinalian kag ang pagka-allergic sa ginatuhog nga alahas. Kon ang mga singsing sa sensitibo katama nga mga bahin, subong sang suso, masalawid ukon masab-it sa bayo, ang mga tuhog madali makagisi sang unod. Ang tisyu nga pinalian sa suso sang isa ka dalagita makabalabag sang mga alagyan sang gatas, kag kon indi sia magpabulong, mahimo sia mabudlayan ukon indi na makapasuso sa lapsag sa ulihi.

Gintawag sining karon lang sang American Dental Association ang pagpatuhog sa baba nga isa ka katalagman sa pangpubliko nga kapagros. Ang dugang pa nga mga katalagman sang pagtuhog sa mga bahin sang baba nagalakip sang pagkadunlan bangod sang pagtulon sa alahas, pagpalaminhod kag pagkadula sang panabor sang dila, padayon nga pagdugo, pagkatisping ukon pagkabali sang mga unto, pirme nga paglaway, indi makontrol nga pagtulo sang laway, pagkasamad sang ngislo, pagkadiperensia sa paghambal, kag mga kabudlayan sa pagginhawa, pag-usang, kag pagtulon. Sang ang pamatan-on nga babayi nga si Kendra nagpatuhog sa iya dila, ‘nagbanog ini subong sang pahabok.’ Ang malain pa, gingamit sang nagtuhog ang tuhog para sa sag-ang, kag nagpilas ini sang dila ni Kendra kag naggisi sang tisyu sa sulod. Halos nadula niya ang ikasarang sa paghambal.

Gintudluan sang Dios ang iya katawhan nga mga Israelinhon nga tahuron ang ila mga lawas kag likawan ang paghalit sa kaugalingon. (Levitico 19:​28; 21:​5; Deuteronomio 14:1) Kag bisan wala na sa idalom sang Mosaikong Kasuguan ang mga Cristiano karon, ginapalig-on sila gihapon nga tahuron ang ila mga lawas. (Roma 12:1) Gani, indi bala makatarunganon nga likawan ang di-kinahanglanon nga mga katalagman sa panglawas? Apang, may iban pa nga butang nga dapat mo binagbinagon magluwas sa kapagros.

Ano nga Mensahe ang Ginapaalinton Sini?

Wala sing espesipiko nga sugo ang Biblia tuhoy sa pagpatuhog sa mga bahin sang lawas. Apang ginapalig-on kita sini nga punihan naton ang aton kaugalingon nga may “kaugdang kag kaligdong sa hunahuna.” (1 Timoteo 2:9) Bisan pa ginakabig nga maugdang ang isa ka butang sa isa ka bahin sang kalibutan, importante gid nga butang ang kon paano ini ginatamod sa duog nga imo ginapuy-an. Halimbawa, ang may tuhog nga mga labit sang dulunggan sa mga babayi sa isa ka bahin sang kalibutan mahimo ginakabig nga nagakaigo. Apang sa lain naman nga pungsod ukon kultura, ang iban mahimo magtamod sini nga malain.

Bisan pa popular ini sa mga bantog nga mga tawo, ang pagpatuhog sa mga bahin sang lawas kag ang pag-aritos sang mga lalaki wala gihapon ginabaton sa kabilugan sa Nakatundan. Ang isa ka rason mahimo nga bangod madugay na ini nga nagapakilala sa mga priso, mga motorcycle gang, mga punk rocker, kag mga miembro sang sadista-masokista nga grupo sang mga homoseksuwal. Para sa madamo, ang pagpatuhog sa mga bahin sang lawas nagapahangop sang pagsipak kag pagrebelde. Madamo ang nagatamod sini nga makapakibot kag malaw-ay. Nagsiling ang isa ka Cristianong dalagita nga si Ash­ley: “Ining akon kaklase nga lalaki bag-o lang nagpatuhog sa iya ilong. Abi niya maayo gid ini. Para sa akon makaulugot gid ini!”

Gani, indi katingalahan nga ang isa ka kilala nga balaligyaan sa Amerika may pagsulundan nga ang mga empleyada nga direkta nga nagapakig-angot sa mga kustomer dapat nga may isa lang ka aritos sa tagsa ka dulunggan kag nga ang tanan iban pa makita nga mga tuhog ginadumilian. “Indi mo mahibaluan kon ano ang reaksion sang mga kustomer,” paathag sang humalambal nga babayi sang kompanya. Ang mga manuglaygay nahanungod sa pagpili sing karera nagalaygay man sa lalaki nga mga estudyante sa kolehiyo nga nagaaplay sing trabaho nga ‘indi mag-aritos ukon magpatuhog sing alahas sa mga bahin sang lawas; ang mga babayi indi dapat magbutang . . . sing mga singsing sa ilong.’

Dapat mabalaka ilabi na ang pamatan-on nga mga Cristiano nga nagahatag sila sing husto nga impresyon sa iban, lakip na kon nagapakigbahin sila sa pag-ebanghelyo nga hilikuton. Indi nila luyag nga ‘maghatag sing bisan ano nga kasandaran, agod nga ang ila ministeryo indi makitaan sing sayop.’ (2 Corinto 6:​3, 4) Bisan ano man ang imo personal nga opinyon tuhoy sa pagpatuhog, indi malikawan nga nagapamulong ang imo panagway tuhoy sa imo mga panimuot kag estilo sang pagkabuhi. Ano nga pinamulong ang gusto mo?

Sa ulihi, ikaw​—⁠kag, siempre, ang imo mga ginikanan​—⁠dapat mamat-od kon ano ang pagahimuon mo may kaangtanan sini. “Indi pagtuguti nga dihunon ka sang kalibutan sa iya kaugalingon nga dihunan,” amo ang maayo nga laygay sang Biblia. (Roma 12:2, Phillips) Kay man, ikaw ang magabatas sang mga resulta.

[Footnote]

[Mga laragway sa pahina 14]

Ang pagpatuhog sa mga bahin sang lawas popular gid sa mga pamatan-on