Kon ang Gugma Bulag

SANG KORESPONSAL SANG MAGMATA! SA ESPANYA

HANDURAWA nga harapon ikaw kag nagapangita sing palangasaw-on kag ang nagakabagay nga mga dalaga nagaguwa lamang kon sirom na. Amo sini ang kahimtangan sang lalaki nga mariposa. Apang ining elegante nga insekto may pila ka kinaiya nga makapahapos sining daku nga hangkat.

Sa mga binulan sang tig-ilinit, ang aton palaabuton nga manugpangaluyag nagahinguyang sang mga inadlaw sini subong isa ka matambok nga atataro nga nagakaon sang tanan nga pagkaon nga masapwan sini. Sa amo, sa masunod nga tigpamulak, kon magguwa sia gikan sa iya pagkatandotando, ining nagaidlak nga mariposa may nagakaigo nga pagkaon nga natipon nga bastante sa iya malip-ot nga pagkabuhi.

Bangod nalubad ang problema sa pagkaon, makahatag na karon sing bug-os nga igtalupangod ang mariposa sa pagpangita sing tiayon. Walay sapayan, kon indi bangod sang mapuslanon nga kagamitan nga dala niya, ang pagpangita sing babayi nga mariposa sa bulig sang kasanag sang bulan mangin mabudlay kaangay sang pagpangita sing dagom sa uhot.

Nagatindog kaangay sang matapok nga mga pakopako gikan sa diutay nga ulo sang mariposa amo ang duha ka antena. Ining diutay nga sungo mahimo nga amo ang pinakamaayo nga mga kagamitan sa duta sa paghibalo sing baho. Dugang pa, mapanimahuan sini ang diutay kaayo nga bilin sang isa ka pheromone, ukon “pahumot,” nga obligado nga ginapaguwa sang babayi.

Bisan pa nga ang mga babayi mahimo nga malaka lamang, ang ila maisog nga pher­o­mone nagapanghikot kaangay sang nagapangamyon nga sinyales. Tuman ka sensitibo ang mga antena sang lalaki nga mariposa nga sarang sini matultulan ang babayi nga mariposa nga halos 11 kilometros ang kalayuon. Sa amo ang tanan nga balagbag malandas sa ulihi, kag magakitaay ang lalaki kag babayi nga mariposa. Ang gugma bulag sa kalibutan sang mga insekto​—⁠sa di-magkubos sa sini nga kaso.

Ang mga tinuga sang Dios bugana sing makawiwili nga mga detalye kag tumalagsahon nga desinyo! Ang salmista nagsulat: “Daw ano kadamo sang imo mga binuhatan, O Jehova! Sa kaalam ginhimo mo sila tanan.”—Salmo 104:24.

[Ginkuhaan sang laragway sa pahina 28]

© A.R. Pittaway