Ang Pagtamod sang Biblia

Kon Paano Landason ang Pagkawalay Paglaum

ANG pagkawalay paglaum kinaandan sa tanan nga tawo, sa di-magkubos sa pila ka kasangkaron. Apang, para sa pila ang kapung-aw nagagrabe gid amo kon ngaa ginapasulabi pa nila nga mapatay sangsa mabuhi.

Ginapakita sang Biblia nga bisan ang matutom nga mga alagad sang Dios indi hilway sa mga problema kag sa mga pag-ipit nga nagadul-ong sa pagkawalay paglaum. Binagbinaga, halimbawa, sanday Elias kag Job—nga lunsay may maayong kaangtanan sa Dios. Sa tapos manginluwas gikan sa malaut nga si Reyna Jesebel, si Elias “nagsugod sa pagpangabay [kay Jehova] nga ang iya kalag mapatay na.” (1 Hari 19:1-4) Ang matarong nga si Job nakaeksperiensia sing alagisod nga mga trahedya, lakip ang makangilil-ad nga balatian kag ang pagkapatay sang iya napulo ka anak. (Job 1:13-19; 2:7, 8) Bangod nadulaan na sia sing paglaum, nakasiling sia: “Pasulabihon ko pa nga mapatay sangsa antuson ini tanan.” (Job 7:15, The New English Bible) Maathag nga daku gid ang kalisang sining matutom nga mga tawo sang Dios.

Para sa pila karon, ang pagkawalay paglaum mahimo nga resulta sang masakit nga mga epekto sang pagtigulang, pagkapatay sang tiayon, ukon daku nga problema sa pinansial. Nasapwan sang iban nga ang walay untat nga kahuol, ang wala nagakadula nga mga epekto sang isa ka makahaladlok nga inagihan, ukon ang mga problema sa pamilya nagapabatyag sa ila nga daw nagakapakapa sa tunga sang kalalawran, nga sa kada paghampak sang balod labi pa nga ginabudlayan sila nga makalab-ot sa takas. Ang isa ka tawo nagsiling: “Nagabatyag ka nga walay pulos—nga subong bala wala sing mangita sa imo kon wala ka na. Ang kasubo nga ginabatyag sang isa daw indi mabatas kon kaisa.”

Sa pila ka kaso ang mga kahimtangan nagaayo, kag nagakadula ining daku nga pag-ipit. Apang ano kon indi magbag-o ang aton kahimtangan? Paano ang Biblia makabulig sa aton agod malandas ang pagkawalay paglaum?

 Makabulig ang Biblia

May ikasarang kag gahom si Jehova sa pagsakdag kay Elias kag kay Job sa tion sang ila kabudlayan. (1 Hari 19:10-12; Job 42:1-6) Makapalipay gid para sa aton karon nga mahibaluan ini! Ang Biblia nagasiling: “Ang Dios isa ka dalangpan kag kusog para sa aton, isa ka bulig nga madali matigayon sa tion sang kalisdanan.” (Salmo 46:1; 55:22) Bisan pa daw subong bala nga ginapalup-og kita sang pagkawalay paglaum, nagapanaad si Jehova nga alay-ayon niya kita paagi sa iya tuo nga kamot sang pagkamatarong. (Isaias 41:10) Paano naton matigayon ang iya bulig?

Ginapaathag sang Biblia nga paagi sa pangamuyo “ang paghidait sang Dios nga nagalabaw sa tanan nga panghunahuna magatipig sang [aton] mga tagipusuon kag sang [aton] mga painuino sa kalalangan ni Cristo Jesus.” (Filipos 4:​6, 7) Bangod sang aton kalisdanan, mahimo nga wala kita sing makita nga solusyon sa aton problema. Apang, kon ‘padayon kita mangamuyo,’ maamligan ni Jehova ang aton tagipusuon kag hunahuna, ginahatagan kita sing kusog nga kinahanglan naton agod makabatas.—Roma 12:12; Isaias 40:28-31; 2 Corinto 1:3, 4; Filipos 4:⁠13.

Makabenepisyo kita kon mangin espesipiko kita sa aton pangamuyo. Bisan pa mabudlay ipabutyag ang aton mga panghunahuna, indi kita dapat mangalag-ag sa pagpakighambal kay Jehova kon ano ang ginabatyag naton kag kon ano ang ginabanta naton nga amo ang gamot sang problema. Dapat kita mangayo sa iya sing kusog nga magapabaskog sa aton sa adlaw-adlaw. Ginapasalig kita: “Tumanon [ni Jehova] ang handum sang mga nagakahadlok sa iya, kag pamatian niya ang ila pagpangayo sing bulig, kag luwason niya sila.”—Salmo 145:⁠19.

Dugang sa pangamuyo, indi kita dapat mag-isahanon. (Hulubaton 18:1) Ang iban nakatigayon sing kusog paagi sa pagbulig sa iban. (Hulubaton 19:​17; Lucas 6:38) Binagbinaga ang isa ka babayi nga si Maria, * nga wala lamang makig-away batok sa kanser kundi namatyan pa sing walo ka katapo sang pamilya sa sulod lamang sang isa ka tuig. Dapat piliton ni Maria nga magbangon kag himuon ang adlaw-adlaw nga pagsinalayo. Nagaguwa sia halos adlaw-adlaw agod tudluan ang iban nahanungod sa Biblia, kag regular sia nga nagatambong sa Cristianong mga miting. Kada pauli niya, nagabalik liwat ang daku nga kalisod ni Maria. Apang, paagi sa pagbulig sa iban, nakabatas si Maria.

Apang ano kon nabudlayan kita mangamuyo ukon daw indi naton mahimo nga magsimpon sa iban? Sa sina nga kaso dapat kita mangayo sing bulig. Ginapalig-on kita sang Biblia nga magkadto sa “mga gulang sang kongregasyon.” (Santiago 5:​13-16) Ang isa ka lalaki nga nagapakigbato sa daku nga kapung-aw nagsiling: “Ang pagpakighambal kon kaisa sa isa ka tawo nga imo ginasaligan nagapasulhay sa hunahuna kag nagapakalma sa espiritu, amo kon ngaa nagapangibabaw ang makatarunganon nga panghunahuna.” (Hulubaton 17:17) Sa pagkamatuod, kon ang madugay kag grabe nga kapung-aw isa ka sintoma sang problema sa lawas, mahimo nga kinahanglanon man ang nagakaigo nga bulig sang mga propesyonal. *—Mateo 9:12.

Bisan pa wala sing mahapos nga mga solusyon, indi naton dapat pakadiutayon ang ikasarang sang Dios sa pagbulig sa aton agod malandas ang aton mga problema. (2 Corinto 4:8) Ang padayon nga pagpangamuyo, paglikaw nga mag-isahanon, kag ang pagtigayon sing nagakaigo nga bulig makabulig sa aton nga maglig-on liwat. Nagapanaad ang Biblia nga tapuson sang Dios sing bug-os ang gamot nga mga kabangdanan sang aton pagkawala gid sing paglaum. Determinado ang mga Cristiano nga magsandig sa iya samtang ginahulat nila ang adlaw nga ining “nagligad nga mga butang indi na pagdumdumon.”—Isaias 65:17; Bugna 21:4.

[Mga footnote]