Ang Ebolusyon Bala Makatarunganon?

SA KARON, ang teoriya sang ebolusyon isa kuno ka katunayan suno sa mga nagasakdag sini. Apang, daw ano bala ka makatarunganon ang mga pamatuod nga pirme nila ginasiling? Binagbinaga ang masunod.

Ang seda nga ginahimo sang mga damang amo ang isa sang pinakamabakod nga materyales nga nahibaluan. Suno sa New Scientist, “ang kada nahot makaunat sing 40 porsiento sang kalabaon sini kag makasarang sing isa ka gatos ka pilo nga enerhiya subong sang asero nga indi mautod.” Paano ginahimo ining pinasahi nga seda? Ang isa ka malapuyot nga likido, isa ka protina, nagaagi sa tuman ka diutay nga mga tubo sa lawas sang damang, kag ang likido ginahimo nga isa ka hilo paagi sa pagbalasa sa mga molekula sang protina sini, paathag sang Encyclopædia Britannica.

Ang New Scientist naghinakop: “Ang damang nagpauswag sing mga ikasarang nga labaw pa gani sa masarangan sang tuman ka sampaton nga kemiko.” Mahimo bala patihan nga ang damang naghimo sing tuman kasibod nga pamaagi sa pagpatubas nga indi pa mahangpan sang tawo?

Ang isa ka artikulo sa The Wall Street Journal, ni Phillip E. John­son, propesor sa abogasiya sa University of California, nagsiling nga ang pamatuod sang ebolusyon kulang apang ang mga sumalakdag sini padayon gihapon nga nagayubit sa mga nagaduhaduha sa sini. Ang artikulo nagkomento: “Ang teoriya sang ebolusyon may daku nga problema sa ebidensia—apang ang mga sumalakdag sini indi maluyag sang bunayag nga debate nga mahimo magpaluya sang ila pagtamod.”

Ang isa pa ka halimbawa nga nagapakita sing kakulang sang husto nga pangatarungan sa panghunahuna sang ebolusyon nagahilabot sa mga tanom. Ang mga sientipiko nga nagapanalawsaw sa Morocco nakakutkot sing 150 ka fossil sang archaeopteris, “ang pinakamalapit nga pamilya nga nadiskobrehan sa karon tuhoy sa una nga mga tanom nga may binhi, ang katigulangan sang kalabanan nga mga kahoy karon,” siling sang The Daily Telegraph sa London. Nagsiling ang editor sang pamantalaan tuhoy sa siensia nga ini nga tanom “nagbulig sa pagdihon sang moderno nga kalibutan paagi sa pag-imbento sing mga dahon kag mga sanga.” “Agod makaimbento” kinahanglan ang “pagpadihot paagi sa paghunahuna.” Makatarunganon bala nga padunggan ang tanom sing ikasarang sa paghunahuna kag sa pag-imbento?

Si Solomon, isa sang labing maalam sa mga tawo, naglaygay sa aton nga ‘bantayan ang aton ikasarang sa paghunahuna,’ nga maghunahuna para sa aton kaugalingon. Kinahanglan gid karon nga himuon ini.—Hulubaton 5:2.