Ang Pornograpiya Yara Na sa Internet

SA BUG-OS NGA KALIBUTAN, MINILYON KA TAWO ANG nagagamit sing Internet kada adlaw. Madamo ang nagagamit sing Internet agod magnegosyo, agod matigayon ang pinakaulihi nga balita sa bug-os nga kalibutan, agod mahibaluan ang tiempo, agod matun-an ang tuhoy sa nagkalainlain nga mga pungsod, agod makuha ang impormasyon sa paglakbay, ukon agod makigkomunikar sa pamilya kag sa mga abyan sa nagkalainlain nga bahin sang kalibutan. Apang ang iban​—⁠mga minyo kag di-minyo nga mga hamtong, subong man ang makapakibot nga kadamuon sang mga kabataan—nagagamit sing Internet tungod sa lain gid nga rason: AGOD MAGTAN-AW SING PORNOGRAPIYA.

 ANG PORNOGRAPIYA SA KOMPYUTER, ginatawag man nga cyberporn, popular gid kaayo amo nga nangin isa ini ka multimilyones-dolyares nga negosyo. Ang The Wall Street Journal nagsiling: “Pangitaa ang Web site nga maganansiahon kag, ang tsansa amo nga, ang mga negosyo kag kaundan maathag gid nga bastos [pornograpiko].”

Ang,Journal padayon sa pagpaathag kon ngaa ang mga tawo nagadangop sa Internet para sa pornograpiya: “Ang mga kustomer mahimo makakita sing malaw-ay nga talan-awon nga indi na kinahanglan nga magkadto sing patago sa menos-klase nga balaligyaan sing libro ukon magsaliputpot pa gani sa likod sang video shop sa kasilingan. Matan-aw sang mga kustomer ang malaw-ay nga mga butang sa ila mismo puluy-an—ukon opisina.”

Pornograpiya kag mga Kabataan

Sing makapasubo, madamo sang mga tumalan-aw sang cyber­porn amo ang mga kabataan. Ang mga kabataan nga ginadumilian sang layi sa pagbakal sing pornograpiko nga mga literatura ukon sa pag-arkila sing pornograpiko nga mga vid­eo mahimo nga makatan-aw sini sa ila mismo puluy-an paagi sa pila lamang ka pagklik sang ila mouse (isa ka diutay kag de-mano nga gamit nga nagakontrol sang lakat sang cursor sa kompyuter). Tuman gid kadamo sang mapilian.

Madamong kabataan ang pirme nagabukas sang mga Internet site nga wala sing hinalung-ong ang ila mga ginikanan. Sa katunayan, ang The Detroit News nagsiling nga “kapin sa duha sa lima ka bata ang nagsuskriber sa isa ka web site ukon iban pa nga serbisyo sa kompyuter bisan pa nga halos 85 porsiento sang mga ginikanan ang may mga pagsulundan nga nagadumili sini.”

Samtang ang kalabanan nga mga kabataan​—⁠kag mga hamtong man—nagahalong nga ilikom ang kamatuoran nga nagatan-aw sila sing pornograpiya, indi tanan nagakabig nga dapat ini taguon. Ginakabig sang iban ang bisyo subong indi makahalalit nga porma sang kalingawan. Ginabaton naman sang iban nga ang pornograpiya indi maayo para sa mga kabataan apang nagapangatarungan nga kon ano man ang ginahimo sang mga hamtong sa pribado ini kinamatarong nila.

Sa pila ka pungsod ang kontrobersiya may kaangtanan sa pornograpiya nangin isa ka daku nga binais sa politika. Sa isa ka bahin sang argumento, ang mga nagasakdag sang kinamatarong sa hilway nga paghambal nagakampanya pabor sa pornograpiya, kag sa pihak naman, ang mga nagasakdag sang moral nga mga prinsipio sang mga pamilya nagatinguha sa pagbuyok sa mga awtoridad nga idumili ang pornograpiya.

Ang Magmata! wala sing ginadampigan sa politikal nga mga isyu. Ang katuyuan sini nga mga serye amo ang pagpahibalo sa amon mga bumalasa sang mga katalagman sang pagtan-aw sing pornograpiya, ang pagpanugda sing mga paagi nga maamligan nila ang ila kaugalingon kag ang ila mga hinigugma, kag ang paghatag sing pasad-sa-Biblia nga mga panugda para sa tanan nga nasiod sa pornograpiya kag luyag nga makapanginpalos.